Jakius
19
1 Waktu Yesus cacah ka kota Yeriko, Ia laju bajalat nglintas kota na. 2 Ka kota na ada urak nang badama Jakius. Ia kapala tukang nagih pajak nang kaya. 3 Ia kapengen nele bage mane model Yesus na, tape banyaꞌk urak ka sana, jaji ia angin bisa nele Yesus krana tubuh ia babah. 4 Lalu ia batalama ndulu urak nang banyaꞌk ntadi, ia naeꞌk ka batak kayu ontoꞌk nele Yesus nang daꞌk namu jalat na.5 Waktu Yesus cacah ka sana, Ia ngkadah ka atas lalu bakata, “Jakius, turut kau taꞌk sana, krana ari ntu Aku arus bamalam ka rumah kau.” 6 Lalu Jakius langsong turut, ia nrima Yesus duan ati nang mbada sanang. 7 Tape urak-urak nang nele kajadi na, kajah basungun-sungun, lalu umpu-ia madah, “Ngape Yesus takaꞌk bamalam ka rumah urak nang badosa ngan?”
8 Lalu Jakius badiri sambel bakata, “Tuhan, satangah taꞌk rata aku ntu, daꞌk ku bere ka urak-urak nang kodo, lalu sape nang udah kunipu, aku daꞌk mulak ka umpu-ia ampat kali lipat.”
9 Yesus madah ka ia, “Ari ntu kau wan biliꞌk kau udah dinylamat ulih Allah, krana kau uga katoron Abraham. 10 Krana Aku Anaꞌk Taleno datak ontoꞌk ngago urak-urak nang sasat lalu nylamat ia.”
Umpama tantang duit amas
11 Waktu umpu-ia ampir cacah ka Yerusalem, urak banyaꞌk masih nangar Yesus ngomong. Urak banyaꞌk na ngira, kaloꞌk Krajaan Allah daꞌk langsong tajadi ka dunia. Maka nsana Yesus madah umpama ka umpu-ia.
12 Ia madah, “Ada taꞌk katoron raja nang daꞌk ampus ka banua nang jauh lalu dingangkat njaji raja ontoꞌk mrintah ka banua ia surak. Udah na ia pulak ka banua ia agi. 13 Giangin ia ampus, ia nyaru sapuluh urak pambantu ia, lalu ia magi kajah sote duit amas na ka pambantu nang sapuluh ntadi. Udah na ia bakata ka umpu-ia, ‘Dipakai duit ntu dulu ontoꞌk ngkanaꞌk badagak sampai aku baleꞌk nana.’ 14 Tape urak-urak nang ada ka banua na angin suka ka katoron raja na. Waktu ia ampus, urak ka banua na ngutus urak lain ontoꞌk nyusut ia, supaya nyampai pasat ka banua nang daꞌk ngangkat ia njaji raja na, ‘Uraꞌkitu angin stuju kaloꞌk ia njaji raja uraꞌkitu.’
15 Tape katoron raja na tatap dingangkat ontoꞌk njaji raja. Waktu ia pulak ka banua ia agi, ia nyuruh nyaru pambantu-pambantu ia nang udah dimere duit na, ontoꞌk nele brape ontong nang udah umpu-ia namu.
16 Pambantu ia nang patama datak, lalu bakata, ‘Tuan, duit nang sote nang tuan mere ka aku, udah aku ngusaha njaji sapuluh ote.’
17 Lalu raja na bakata, ‘Kau pambantu nang banar-banar bagawe, kau bisa dipacaya ontoꞌk nggawe banda-banda nang amuꞌk, maka nsana, aku daꞌk mere kau kuasa ontoꞌk mempen sapuluh kota.’
18 Pambantu nang kadua na datak uga lalu bakata, ‘Tuan, duit nang sote nang tuan mere ka aku udah ngasel lima ote.’
19 Raja na uga bakata ka pambantu na, ‘Kau uga daꞌk mempen lima kota.’
20 Pambantu nang katege na datak uga lalu bakata, ‘Tuan, ntu duit tuan. Aku udah naroh ia dingotok duan kain. 21 Aku gali ka tuan, krana maꞌksana na urak nang karas. Tuan bisa nangkap biar gaꞌk bukat daꞌk tuan, bage sana uga, tuan bisa banyi biar gaꞌk tuan angin nanam padi.’
22 Raja na bakata ka ia, ‘He, kau pambantu nang jaat! Sasuai duan kata kau na, aku daꞌk ngukum kau. Kau nao kaloꞌk aku ntu urak karas, aku nangkap nang bukat hak aku wan nangkap asel ka tampat nang angin kunanam. 23 Kaloꞌk bage sana, ngape duit aku na angin kau bere ka urak nang tukang mbunga duit? Supaya kaloꞌk aku pulak aku bisa nangkap ontong ia.’ 24 Lalu raja na bakata ka pambantu-pambantu nang badiri ka adap ia na, ‘Tangkap duit nang sote na taꞌk ia, lalu bere ka pambantu nang ngasel sapuluh ote duit ntadi.’
25 Tape umpu-ia bakata ka raja na, ‘Tuan, ia udah bisi duit sapuluh ote.’
26 Raja na nyaut, ‘Sape nang banar-banar mao nggawe ape nang dimere ulih Allah ka ia, ia daꞌk kana bere labih taꞌk sana, tape sape nang angin nggawe banar-banar ape nang dimere ka ia, maka nsana ape nang ada ka ia kana tangkap uga.’ 27 Waktu ntu baba kitu munsuh-munsuh aku nang angin suka kaloꞌk aku njaji raja umpu-ia, bunuh umpu-ia na ka adap aku.”
Yesus dinrima duan sanang ati ulih urak Yerusalem.
28 Udah madah umpama ka urak-urak nang ada ka sana, Yesus bajalat ndulu umpu-ia lalu nglanjot pajalat Ia ka Yerusalem. 29 Waktu umpu-ia dah samaꞌk kampong Betpage wan Betania, nang samaꞌk duan bukit Jaitun. Yesus nyuruh dua urak murit Ia, 30 lalu bapasat, “Ampus ngkanaꞌk ka kampong nang ada ka ujuk ngan, waktu ngkanaꞌk tama ka sana, nana ngkanaꞌk nele siko anaꞌk keledai kana kabat, nang ngkala urak nunggang. Lalu buka tali ia, udah na baba kitu. 31 Kaloꞌk ada urak batanya ka ngkanaꞌk, ‘Ngape ngkanaꞌk muka tali keledai na?’
Ngkanaꞌk padah ka umpu-ia bage pitu, ‘Tuhan mralu keledai ntu.’”
32 Lalu umpu-ia nang dinyuruh ntadi ampus. Umpu-ia namu sama bage nang dimadah ulih Yesus ntadi. 33 Waktu umpu-ia tangah muka tali keledai na, umpu keledai na batanya, “Ngape ngkanaꞌk muka tali keledai na?”
34 Umpu-ia nyaut, “Tuhan mralu keledai ntu.” 35 Lalu umpu-ia maba keledai na ngaga Yesus. Keledai na umpu-ia ngalas pakai baju umpu-ia, lalu umpu-ia uga mantu Yesus naeꞌk ka atas keledai na. 36 Sambel Yesus nunggang keledai na, urak-urak kajah ngampar baju ia ka tangah jalat.
37 Waktu dah samaꞌk Yerusalem, ka jalat nurut taꞌk bukit Jaitun, murit-murit nang nuna Ia kajah sanang biabis sambel muji Allah duan kata nang nyarek krana pagawe nang ajaib nang udah umpu-ia nele. 38 Umpu-ia bakata, “Batuah Ia nang datak njaji Raja dalap dama Tuhan! Sruga wan bumi udah badamai, uga Allah dimuji ka tampat nang Mbada tingi.”
39 Dua-tege urak Parisi nang ada ka ntara urak banyaꞌk na bakata ka Yesus, “Guru, suruh murit-murit Maꞌksana na ngadam.”
40 Yesus nyaut, “Aku madah ka ngkanaꞌk: Kaloꞌk umpu-ia ngia ngadam, batu-batu ntu nang daꞌk ngampaꞌk muji Allah.”
41 Waktu Yesus mukin samaꞌk, sambel nele kota na, Ia nangis. 42 Ia bakata, “O, urak Yerusalem! Mbada baiꞌk kaloꞌk ngkanaꞌk ngrati ape nang ngkanaꞌk mralu, supaya ngkanaꞌk bisa idup badamai duan Allah. Tape waktu ntu ngkanaꞌk angin ngrati. 43 Krana daꞌk datak ari ia nana, kaloꞌk munsuh ngkanaꞌk daꞌk nglilik ngkanaꞌk duan benteng-benteng lalu ngapong ngkanaꞌk uga nyasaꞌk ngkanaꞌk taꞌk mane-mane. 44 Lalu umpu-ia daꞌk ngancur ngkanaꞌk wan sloroh isi kota ngkanaꞌk, bage sana uga angin mang sote batu nang bisa mlakat ka dinik batu nang lain. Krana ngkanaꞌk angin nao waktu Allah datak nylamat ngkanaꞌk.”
Yesus ngoser urak-urak nang badagak ka Rumah Allah
45 Yesus tama ka dalap Rumah Allah lalu Ia ngoser urak-urak nang badagak ka sana. 46 Ia bakata ka umpu-ia, “Ada dinulis: ‘Rumah Aku ntu, tampat ontoꞌk badoa.’ Tape ngkanaꞌk muat ia sarak prampok.”
47 Tiap ari Yesus ngajar ka Rumah Allah. Tape kapala-kapala imam wan guru-guru agama uga pamempen-pamempen urak Yahudi brusaha daꞌk munuh Ia. 48 Tape umpu-ia angin nao bage mane cara ontoꞌk munuh Yesus, krana smua urak kapengen samaꞌk Ia uga kapengen nangar Ia ngajar.