Pamempen-pamempen Yahudi ngragu kuasa Yesus
20
1 Waktu ari na Yesus tangah ngajar, nyampai kabar baiꞌk nang taꞌk Allah ka urak-urak nang ada ka dalap Rumah Allah. Lalu kapala-kapala imam, guru-guru agama wan pamempen-pamempen urak Yahudi datak ka sana. 2 Umpu-ia batanya ka Yesus, “Coba padah ka uraꞌkitu ape dasar Maꞌksana muat pagawe nang bage sana? Sape nang mere kuasa na ka Maꞌksana?”3 Yesus nyaut, “Aku uga mao batanya ka ngkanaꞌk. Coba padah ka Aku, 4 sape nang mere kuasa ka Yohanes ontoꞌk mbaptis, taꞌk Allah atau taꞌk taleno?”
5 Lalu umpu-ia barunding, “Kaloꞌk diri madah baptis Yohanes na taꞌk Allah, nana Ia batanya agi, ngape ngkanaꞌk inga pacaya ka ia? 6 Tape sigaꞌk diri madah baptis Yohanes na datak taꞌk taleno, nana urak nang ada ka kitu nabaꞌk diri duan batu. Krana umpu-ia pacaya kaloꞌk Yohanes na nabi.” 7 Lalu umpu-ia nyaut kaloꞌk umpu-ia angin nao taꞌk sape baptis Yohanes na.
8 Maka nsana Yesus bakata ka umpu-ia, “Sigaꞌk bage sana, Aku uga inga madah ka ngkanaꞌk duan kuasa sape Aku muat pagawe ntu.”
Umpama urak-urak nang bagawe ka kabon anggor
9 Lalu Yesus madah ka urak banyaꞌk umpama bage pitu, “Ada urak muat kabon anggor. Udah na ia nyewa kabon na ka urak-urak nang mao nggawe kabon na, lalu ia ampus ka banua urak duan waktu nang agaꞌk lama. 10 Udah waktu ia daꞌk nangkap asel buah anggor na, umpu kabon na nyuruh pambantu ia ngaga urak-urak nang nyewa kabon anggor ia tadi ontoꞌk nrima bagi ia. Tape umpu-ia mopoꞌk pambantu na lalu nyuruh ia pulak duan angin maba ape-ape.
11 Udah na umpu kabon na nyuruh pambantu nang lain. Tape pambantu na uga dimopoꞌk wan dimleceh ulih umpu-ia. Lalu umpu-ia nyuruh ia pulak duan angin maba ape-ape.
12 Umpu kabon na nyuruh agi pambantu nang katege ontoꞌk ngaga urak-urak nang nyewa kabon ia ntadi. Tape pambantu nang katege na uga kana popoꞌk sampai badarah lalu ia dingkalok ka luas. 13 Maka nsana umpu kabon na bapikir, ‘Ape nang arus aku muat? Kaloꞌk bage pitu, ku suruh ja anaꞌk aku nang aku nyayang ngan ampus ngaga umpu-ia, pasti umpu-ia ngromat ia!’ 14 Tape waktu urak-urak nang nyewa kabon na nele nang datak na anaꞌk ia, umpu-ia kajah bakata, ‘Tele ia ngutus waris ia. Jon diri munuh ia, supaya diri bisa ngumpu kabon ntu.’ 15 Lalu umpu-ia nyeret anaꞌk umpu kabon ntadi ka luas, udah na umpu-ia munuh ia.”
Lalu Yesus batanya, “Kira-kira waktu umpu kabon na pulak, ape nang daꞌk ia muat ka urak-urak nang nyewa kabon ia ntadi? 16 Pasti ia daꞌk datak munuh umpu-ia, lalu ia nyarah kabon na ka urak-urak lain.”
Nangar Yesus madah bage sana, urak banyaꞌk na bakata, “Gajah doꞌk, usah sampai tajadi bage sana!”
17 Tape Yesus nele umpu-ia lalu bakata, “Kaloꞌk bage sana ape rati ayat Kitab Suci ntu:
‘Batu nang angin bagunaa nang dimuak ulih tukang ndiri rumah,
njaji batu nang mbada baguna ontoꞌk ndiri rumah.’
18 Sape nang labuh ka atas batu na, ia racaꞌk, tape sape nang kana tinih ulih batu na, ia ancur.”
19 Lalu waktu na uga guru-guru agama Yahudi wan kapala-kapala imam brusaha nangkap Yesus. Krana umpu-ia nao, kaloꞌk umpu-ia nalah nang dimaksut duan umpama Yesus na. Tape umpu-ia gali ka urak banyaꞌk.
Ka sape arus mayar pajak
20 Guru-guru agama Yahudi wan kapala-kapala imam kajah mrati Yesus ontoꞌk ngago kasalah Ia. Umpu-ia nyogok urak-urak nang bapura-pura jujur ontoꞌk ngintai Yesus sape nao Ia salah ngomong supaya umpu-ia bisa nangkap Ia, lalu nyarah Ia ka gubunur. 21 Urak-urak nang dinyogok ntadi batanya ka Yesus, “Guru, uraꞌkitu nao ape nang Maꞌksana madah, uga ape nang Maꞌksana ngajar na banar. Bage sana uga Maꞌksana ngajar bukat cuma ontoꞌk nyanang ati urak ja, tape Maꞌksana ngajar duan kata nang bujur banar supaya urak idup sasuai duan kamao Allah. 22 Jaji nnurut plator agama uraꞌkitu, bulihkah uraꞌkitu mayar pajak ka Kaisarb atau usah?”
23 Tape Yesus ada nao ncana umpu-ia nang jaat na, lalu Ia madah ka umpu-ia, 24 “Coba baba kitu duit na! Kira-kira gambar wan tulis sape nang ada ka duit ntu?”
Umpu-ia nyaut, “Gambar wan tulis Kaisar.”
25 Lalu Yesus bakata ka umpu-ia, “Kaloꞌk bage sana bere ka Kaisar ape nang arus kau bere ka ia, bage sana uga bere ka Allah ape nang arus kau bere ka Allah!”
26 Jaji umpu-ia angin namu omong Yesus nang salah ka adap urak banyaꞌk. Umpu-ia eran nangar ape nang Yesus madah, lalu ngadam biabis.
Urak taꞌk klompok Saduki batanya tantang urak mati nang idup agi
27 Dua-tege urak taꞌk klompok Saduki, klompok nang angin pacaya tantang urak mati idup agi, datak ngaga Yesus lalu batanya ka Ia, 28 “Guru, Musa nulis plator ntu ontoꞌk diri: Kaloꞌk ada siko nang laki udah kawen lalu ia mati, tape ia angin bisi anaꞌk duan bini ia, adi ia nang laki arus kawen duan bini aka ia na, supaya aka ia nang mati ntadi bisi katoron. 29 Ada tujuh sanyadi. Nang tua kawen lalu ia mati angin bisi anaꞌk. 30 Lalu bini ia na tadi dingawen duan adi ia nang kadua. 31 Bage sana uga duan nang katege sampai ka adi ia nang katujuh, umpu-ia mati biabis angin bisi anaꞌk. 32 Sampai mbini na uga mati. 33 Jaji bage mane duan mbini na, sape ka ntara umpu-ia na nang njaji laki ia waktu ia idup agi nana? Krana umpu-ia nang batujuh na udah ngalap ia.”
34 Yesus nyaut, “Taleno ka dunia ngia memang kawen wan dingawen. 35 Tape tamila Allah daꞌk ngidup urak-urak nang dinganggap pantas. Waktu umpu-ia dah idup agi, umpu-ia angin kawen wan dingawen agi. 36 Umpu-ia angin bisa mati agi, sama bage malekat-malekat. Umpu-ia uga njaji anaꞌk-anaꞌk Allah, krana Allah dah ngidup umpu-ia agi. 37 Musa udah madah banar-banar tantang urak mati daꞌk idup agi. Krana Ia nulis ka dalap ayat tantang rompo unaꞌk nang brapi, kaloꞌk Tuhan nalah Allah nang malar dinyambah ulih Abraham, Isak wan Yakup sampai kinintu. 38 Tuhan na bukat Allah urak mati, tape Ia na Allah urak nang idup, krana ka adap Ia urak idup biabis.”
39 Nangar bage sana, dua-tege guru agama Yahudi bakata, “Guru, ape nang Maꞌksana madah na mbada banar!” 40 Maka nsana angin agi nang brani nanya ape-ape ka Yesus.
Obong Raja Tukang nylamat duan Daut
41 Lalu Yesus batanya ka urak-urak nang ada ka sana, “Bage mane urak bisa madah Raja Tukang nylamat nang dingutus Allah na anaꞌk Daut? 42 Maka Raja Daut inyan udah madah ka dalap kitab Masmur tantang Raja nang Tukang nylamat na, bage pitu:
‘Tuhan Allah udah bakata ka Tuhan aku:
Duduꞌklah ndeꞌk sbala kanan Aku,c
43 sampai Aku muat munsuh-munsuh Kau
nyalep lapa batis Kau.’
44 Krana Raja Daut nyabut Raja nang Tukang nylamat na ‘Tuhan,’ na rati ia Raja nang Tukang nylamat na bukat cuma anaꞌk Raja Daut, tape labih tingi kaduduꞌk ia taꞌk Raja Daut.”
Yesus bapasat supaya usah pura-pura alem bage guru-guru agama Yahudi
45 Waktu urak-urak nang ada ka sana masih nangar Yesus ngomong, Ia madah ka murit-murit Ia, 46 “Ati-ati ngkanaꞌk ka guru-guru agama Yahudi. Umpu-ia suka bajalat makai pakai nang nyicis, umpu-ia uga sanang kaloꞌk urak ngromat ia waktu bajalat ka pasar. Bage sana uga waktu ka dalap rumah sambayang wan tampat urak muat gawe, umpu-ia suka duduꞌk ka tampat nang panting. 47 Umpu-ia nipu mbini-mbini nang janda uga ngrampas rumah ia. Umpu-ia badoa panyaꞌk-panyaꞌk tape cuma pura-pura. Nana umpu-ia pasti nrima ukum nang labih barat taꞌk Allah!”