Kimii :Paawulō Kōōriintō
18
1 Kii nēē woonyō :ng'aleechoochēē, kung'eetee :Paawulō Ateen akuwō Kōōriintō. 2 Kinyōōrchi wōloonēē Yāwuutyoontēē aka nyoo /kiikikuurēē Akiila. Kiipō :chiichi kōōrēē aka nyoo /kiikikuurēē Pōōntō. Kiitākuchōōnēē :chiichoonēē kōōroo Itali nkōō cheepyooseenyiin nyoo /kiikikuurēē Prisiila. Kiipkaana :pichoochēē Itali āmu kiimwooru *:Kiloowutiyō nyoo kiipāytooy kōōroo Rooma tōkōl kilē kupēēchi keey :Yāwuutik tōkōl choo kiimii Rooma. 3 Kuwō kutēpō :Paawulō akupāyiisyō nkōō mpō :Akiila āmu kii-irēy mpō :Akiila eemeen kilēē Paawulō. 4 Kiiwēētii :Paawulō kung'āloolēy ākōō piich mu *sinakōōki pērēētuu aka tōkōl nyēpō *Sapaato. Kiityāmēy :Paawulō kilē ntā isu keey Yāwuutik ākōō Kirik kucham Iriin.5 Kii nēē ituuna :Siila ākōō Tiimōti Makeetoonnya, kuukiilchi keey :Paawulō ku-amta ng'ālyoontoo Iriin kumwoochinii Yāwuutik kilē Yēēsu ku *Meesaaya nyoo /kiikukānyoonuuy. 6 Kii nēē tay :Yāwuutik Paawulō akumuul, kulalayta :Paawulō tēērit nkōō sirōōchiich akimwoochi akwaaneek kilē, “Kwaamaak :kērētiikwook. Mooting'aa lēēluut. Kung'eetee aniinee kitas taay, ku āwēētii wōloo mii :piich choo mālēē Yāwuut.” 7 King'eetee :Paawulō sinakōōkiinoonēē akuwō ākōy kaa chiich nyoo kiilēēkitēē yoonēē nyoo /kiikikuurēē Tiitō Yuustō nyoo kiikoonyitēy Iriin. 8 Kiimii :chiich nyoo kiiryoonchinii sinakōōkiinoonēē nyoo /kiikikuurēē Kiriispaas. Kicham :chiichoonēē nkōō piich chēpō katanyiin Yēēsu. Kii nēē teer :piich chaa chaang' chēpō Kōōriintō ng'ālyoontoonoonēē, kuuran Yēēsu /akeepaatiisan.
9 Nēē mii lang'atuu aka, kung'āloolchi :Iriin Paawulō nkōō ng'oong'uut kilē, “Paawulō, mēēwāriisyō, tasa taay i-amta lōkōōy. Meesiis, 10 āmu āmii ākōō inyēēn amoomii :chiich nyoo irtooyiin kir. Piich chaa chaang' nkōō yēēnyi pō Kōōriintō ku piichuuch.” 11 Kitēpō nyuun :Paawulō Kōōriintō kēny ākoong'o nkōō āroo lo kuunēētēy piich ng'ālyoontoo Iriin.
12 Kii nēē lēku :Kāliiyō pāytooyiintoo Akaaya, kuurum keey :Yāwuutik akunam Paawulō akuumut ākōy kaapkiirwōōk keepa /kēērwoochi. 13 Kii nēē itita :pichoochēē kōōkwēē, kumwa kilē, “Mii :chiichi kumwoochinii piich kilē kusa Iriin nkōō oor nyoo māyāmēy keey nkōō wōloo mwoortooy :ng'ātuut.” 14 Kii nēē mārēy kuutyaak keey :Paawulō nkōō ng'aleechoochēē kiimwoorēy Yāwuutik, kumwoochi :Kāliiyō Yāwuutik kilē, “Ntā kookwiintoochiniikwaan ng'ālyoon nyaa ra, ntā ku ng'ōōki choo ka-ir :chiichi, tākootēērwook ng'aleekwook. 15 Āmu :kwiintaanikwook kipō ng'al, kaarin ākōō ng'ātuutēkwook kupaat, ku ākwoonēēk keey choo āsātēy ng'aleechoochēē. Mā aneen nyoo ātilēy kiirwook nyoo lēē nyoonēē.” 16 Ku-oon :Kāliiyō pichoochēē kupa saang'. 17 Kunam :pichoochēē Sōōstēēnēēs, chiich nyoo kiiryoonchinii *sinakōōki akupir nkōō taayuu kaapkiirwōōk. Maang'woonchi :ng'aleechoochēē Kāliiyō mpō kiitēēn.
Kiwārākēē :Paawulō Antyookya
18 Kiitēpō :Paawulō Kōōriintō pērēētuus chaa chaang'. Nēē mii lētuun, kumwoochi tuupchēēnik saaysērē paani kiimārēy kupēētii :tōkōl kōōroo Siirya ākōō Prisiila ākōō Akiila. Paani toomō kuwō nyuun, /kēētilchi mēt nkōō yoo /kiikikuurēē Keenkreeya, siku-irchi Iriin kōrōs nyēpō kōōnkēy. 19 Kii nēē it kōōr nyēpō Ēpēēsō, kutil :Prisiila ākōō Akiila kung'ētuunō yoonēē. Kumētō :Paawulō akwaaneek akuwō *sinakōōki akitoowu kung'alaal nkōō Yāwuutik. 20 Kisaarsaar :pichoochēē Paawulō kilē kutākutēpō nkōō akwaaneek, kutay Paawulō. 21 Kuwō kuloong'ēy mēēli, kumwoochi :Paawulō pichoochēē kilē, “Nēē cham :Iriin, ā-ōōkuuy keey.” Akuwēērō Ēpēēsō.
22 Kii nēē it :Paawulō Kayisareeya, kuwō kuutaakwees kaaniisee nkōō Chēērusālēēm. Nēē mii lētuun, kuwō Antyookya.
23 Kii nēē kaakupērēnō :Paawulō Antyookya pērēētuus choo ng'ērin, kung'eetee yoonēē akuwō kupuntoorō kōōroo Kalatiya ākōō nyēpō Puruukya kuchēērootēy tuupiik chēpō Yēēsu.
Kimii :Āpōōlō Ēpēēsō ākōō Kōōriintō
24 Kiimii :Yāwuutyoontēē aka nyoo /kiikikuurēē Āpōōlō nyoo kiichōōnēē Aleekisaantrya nkōō Miisiri. Kuwō :chiichoonēē Ēpēēsō. Kii chiich Āpōōlō nyoo kii ng'ālooliin akiinkēt siruut chēpō Iriin kukaraam. 25 /Kiikiikeeneet akipō araa Yēēsu, akiing'āloolēē :chiichoonēē Yēēsu nkōō nyakanat akuunēētēy ng'ālyoontoo Yēēsu nkōō oor nyaa karaam. Kiinkēt nyuun :Āpōōlō akipō *kaapaatiisana nyēpō Chowaana ākityōōn. 26 Kitoowu :chiichoonēē kung'alaal mu *sinakōōki nyoo maawāriisyō. Kii nēē teer :Prisiila ākōō Akiila ng'alēēpō Āpōōlō kuumut katang'waang' akupa kirārchi inyeentee ku karaam akipō araa Iriin.
27 Paani kiimārēy :Āpōōlō kuwō Akaaya, kucheer inyeentee :tuupchēēnik /ākēēsirchi tuupiik choo kiimii Akaaya kilē kutaak inyeentee. Kii nēē it Akaaya, kuumuuk kuutoorēt piich chēpō *Kiriistō choo kiikusiku nkōō chamataa Iriin, 28 āmu kiipēl :inyeentee ng'alēēpō Yāwuutik nkōō taayuu piich tōkōl, kipāyiisyēērēē siruut kung'uuti kilē :Yēēsu ku *Meesaaya.