1 Yesus nair munuk roak afa avyai,

na nfalak verin Ni tamata ovi rorang Ia ne,

2 “Mia mkya'a roak ne,

amar irua ewal,

na ita,

tamata Yahudi,

mane totu snoba Paskah.

Na'ut inyai,

na tamata ra veka rtaha Ya'a,

Tamata Yanan Ya'a,

ma rala Ya'a ma ti rbaku Ya'a na'a aa walwalur.”^*

3 Na'ut inyai vali,

na Yahudi dawan ra ovu rira dawan mela falurut ra rasdovu ira na'a rira Mela Falurut Ila'a,

naran Kayafas,

ni rahan a.

4 Rasdovu ira ma rdava linga'an mane rtaha fanfonak Yesus ma rfedan Ia.

5 Na'uk ira rfalak ne,

“Deka totu na'ut i snoba nbana roak a,

beta ne tamata rivun veka vangoa-vanga.”

6 Yesus nti ahu i naran Betania,

ma nti tamata isa naran Simon ni rahan a ma nalola ia.

Tamata ini lan a,

ni suhut ngabaa.

7 Na'a rahan yai,

na vata isa nma ma ntaha botal ko'u isa i rotu tali vatu lolin isa naran pualam.

Botal yai nsa'a ngul i voan a lolin ovu fyawan urun a.

Na'ut inyai,

na Yesus nafna'an obin,

na vata yai ti ntuan Ia ma nli'i ngul yai na'a ulun a.

8 Yesus Ni tamata ovi rorang Ia rsi'ik afa i vata yai notu a,

na rangrova ma rfalak ne,

“Notu afakinimi nawahak watan ngul i voan lolin yai?

9 Ngul yai fyawan urun,

ba bisma tfedi ma kubang a,

tala verin tamata kasian ra.”

10 Na'uk Yesus nka'a lahir afa i ranovak na'a ralarira ra,

ba nfalak ne,

“Notu afakinimi fyasala vata ini?

Ia notu roak afa i lolin urun a verin Ya'a.

11 Tamata kasian ra rna'a lalawatan ovu mia,

na'uk Ya'a wol mane una'a lalawatan ovu mia.

12 Ia nli'i ngul voan lolin yai na'a tenang a,

ma neluk faneak ne,

nvilu lan roak Ya'a na'ut amar i veka umata a.

13 Afa i ufalak verin mia ini,

kena urun!

Na'a wan inba watan ma rfamalik Ubu Ni Ivar Lolin na'a lanit ivavan a,

na veka rfamalik vali afa i notu roak ini ma al rangnanang ia.”

14 Tamata isa tali Yesus Ni tamata vutu rahin irua ovi rorang ia,

naran Yudas Iskariot,

nti ma ntuan Yahudi rira dawan mela falurut ra.

15 Ia norat ira ne,

“Veka myala afaka verin ya'a,

boma ala Ia verin mia?”

Ira rbahir ia ovu kubang perak vututelu.^*

16 Tali amar yai vali,

na ia ndava amar kena mane nfedi Yesus.

17 Na'a amar i nban-ulu na'a tamata Yahudi rira snoba ma ra'an roti i wol rfadoku ragi na'a,

na Yesus Ni tamata ovi rorang Ia rma ma rtuan Ia ma rfalak ne,

“Bapa,

ralam nfalak wan inba ma amasusan verin Oa ma mufna'an Paskah?”^*

18 Yesus nsinir Ni tamata ra ma nfalak ne,

“Miti ma fyalak a verin tamata i mkya'a roak ia na'a kota ralan eri.

Fyalak verin ia ne:

Tuan Guru nfalak ne,

‘Ning amar sarseri roak ma umata,

ovu mane ufna'an Paskah ovu Ning tamata ovi rorang Ya'a na'a mu rahan.’ ”

19 Ba ira rotu wean i nfalak yai,

ma rasusan afamtahan ma al rotu rira snoba Paskah.

20 Ti ma ovan roak,

na Yesus nma ma ndoku ma nafna'an ovu Ni tamata vutu rahin irua yai.

21 Rdoku rafna'an obin,

na Yesus nfalak verin ira ne,

“Afa i ufalak verin mia ini,

kena urun.

Tali ovi tdoku tafna'an ini,

na tamata isa veka nfedi Ya'a.”

22 Rarenar munuk afa i Yesus nfalak yai,

na ralarira lalau urun i lahir.

Ba rsikati ira al rfalak verin Yesus ne,

“Duila'a,

ya'a wahal!”

23 Ia nfalak ne,

“Tamata i mane nfedi Ya'a yai,

fiang ini amrua amsovu mami roti na'a moko ini.

24 Ya'a,

Tamata Yanan Ya'a,

veka umata wean i rfalak roak na'a Ubu Ni Surat Ralan a.

Na'uk sian urun i lahir verin tamata i nfedi Ya'a.

Ni lolin a,

tamata yai deka rarali lahir ia.”

25 Yudas i mane nfedi Yesus yai nfalak ne,

“Tuan Guru,

ya'a wahal!”

Yesus nfalak verin ia ne,

“Oa ka'i fwalak roak yai.”

26 Yesus ovu Ni tamata ra rafna'an obin,

na Ia nala roti a ma nfalak fara weninyai verin Ubu,

beti nvisul roti yai ma nsiduk verin ira.

Ia nfalak ne,

“Myala ma mian kikyai.

Ini Ya'a tenang a.”

27 Nata Yesus nala vali kobi i nsa'a anggur ma nfalak fara weninyai verin Ubu,

beti nala ma renu.

Ia nfalak ne,

“Mia munuk myenu anggur i na'a kobi ini,

28 tevek ini Ya'a larang i nvoat al nakvanak tamata rivun rira salasilan ra,

ma neluk faneak ne,

Ubu nfakena roak Ni tnorung a.

29 Na'uk ufalak verin mia ne,

tali amar ini,

na Ya'a veka wol enu roak anggur ini,

ti naran amar i veka enu ewal anggur ngorva'an ovu mia na'a Yamang Ni Fareta a.”

30 Yesus ovu Ni tamata ra rdedang ma rfadawang roak Ubu,

beti ira rarata vuar Zaitun.

31 Nata Yesus nfalak verin ira ne,

“Ovan ini lahir,

bira inorang veka wol nangrebat ma mifla talik Ya'a,

tevek afa sian ovi tamata veka rotu verin Ya'a.

Surat Ralan nfalak roak ne,

‘Ubu veka nfedan domba duarira a,

ba domba ra veka rlilin watan.’^*

32 Na'uk Ubu veka nfava'at ewal Ya'a tali matmatan,

ba veka ula Ya'a uti Galilea.”

33 Petrus nfalak verin Yesus ne,

“Velik ne ira munuk rira inorang a wol nangrebat ma rafla talik Oa,

na'uk ya'a wahal lahir.”

34 Yesus nfalak verin ia ne,

“Afa i ufalak verin oa ini,

kena urun!

Ovan ini lahir manut wol nkukuwai obin,

na oa veka malak nala fatelu roak ne,

wol mka'a Ya'a.”

35 Na'uk Petrus nfalak verin Ia ne,

“Velik ne musti umata vali ovu Oa,

na'uk wol alak ya'a ne,

wol uka'a Oa.”

Yesus Ni tamata liak ra munuk rfalak vali wean i nfalak a.

36 Yesus ovu Ni tamata ovi rorang Ia rbana ma raran va'i isa naran Getsemani.

Ia nfalak verin ira ne,

“Mdyoku ini veki,

ma ti uflurut na'a ineri.”

37 Ia novun vali Petrus ovu Zebedeus yanan irua.

^* Yesus ralan nmulai lalau urun Ia ovu wol malinan.

38 Ba nfalak verin ira ne,

“Ralang a lalau urun i lahir,

wean i ufarnuang ne,

mane umata roak.

Fyatuang Ya'a na'a ini ovu msyi'ik wabira ma lolin.”

39 Nata Yesus nbana ma ya'i nfaroa tali ira,

beti nsangatur na'a lanun ma naflurut ne,

“Bapa,

ne wean urun inyai,

na fara maling vatuk varvara i aleman urun ini tali Ya'a,

na'uk deka wean i ralang a nfalak a,

ba wean watan i ralam a nfalak a.”

40 Yesus naflurut munuk ma newal ia,

na Ni tamata itelu i rfatuang Ia yai rtub-lufa roak.

Ba nfalak verin Petrus ne,

“Wol mtyahang nala jam isa vali ma fyatuang Ya'a ma tsi'ik wadida ma lolin?

41 Msyi'ik wabira ma lolin ovu miflurut,

boma nitdawan deka nlabir nala mia ma myotu salasilan.

Mia ralabira rfalak ma myotu afa lolin,

na'uk wol myot-nala,

tevek myafun da'in.”

42 Nata Yesus nti ewal vali ma naflurut.

Ia nfalak ne,

“Bapa,

wean i mtorung ma uvara wawa'uk ini,

na wean watan i ralam a nfalak a!”

43 Naflurut munuk ma newal Ia,

na Ni tamata itelu yai rtuba watan obin,

tevek matarira ra raswosu da'in roak.

44 Ba nsi'ik watan ma rtuba inyai,

na nti ewal ma naflurut nala fatelu roak.

Ia naflurut wean inlangin a.

45 Nata nma ma ntuan ewal Ni tamata itelu yai.

Ia nfalak verin ira ne,

“Mtyuba watan obin?

Eka msyi'ik Ning amar a naran roak ma rala Ya'a Tamata Yanan verin tamata salasilan ra.

46 Byatar ma tati kikyai.

Eka msyi'ik!

Tamata i mane nfedi Ya'a nma ma sarseri roak.”

47 Na'ut i Yesus nangrihi obin,

na Yudas i ntali Ni tamata vutu rahin irua yai nma.

Tamata rivun ovi rtaha nahin blawat ovu rira navnaval ra rban-orang vali ia.

Yahudi rira dawan mela falurut ra ovu dawan Yahudi ra rsinir ira ma rti inyai.

48 Yudas i nfedi Yesus nfalak lan roak verin tamata rivun avyai ne,

veka notu faneak.

Faneak yai wean ini:

“Tamata i uvoan Ia yai,

Ia hi inyai i.

Ba mtyaha lahir Ia ma myovun Ia ovu msyi'ik ma lolin Ia.”

49 Ba ti nfaseri lahir Yesus ma nfalak verin Ia ne,

“Oo Tuan Guru.”

Nata nvoan Ia.

50 Yesus nfalak verin ia ne,

“Kida,

motu kikyai afa ovi ralam nfalak a.”

Ba tamata avyai rti rtaha lahir Ia.^*

51 Tamata isa i norang vali Yesus ntavar ni nahin blawat a ma nafat vatuk lahir Yahudi rira Mela Falurut Ila'a ni tamata sansinir isa arun a.

52 Yesus nfalak verin Ni tamata yai ne,

“Ma'adoru ewal nahin blawat yai na'a ni tlanan a,

tevek wean i iki nsingarahi ovu nahin blawat,

na veka nmata vali ovu nahin blawat.^*

53 Mia wol mkya'a ne,

Ya'a bis watan ma era verin Yamang a ma nlobang Ya'a?

Bis watan ma era verin Ia ma nsinir lahir Ni sansinir ra tali lanit ratan,

na'a sidovung dawan nlia tali vutu rahin irua,

ma rma.^*

54 Na'uk wean i Ubu notu wean inyai ma nlobang Ya'a,

na wean inba ma nfakena lahir afa ovi rfadoku roak na'a Surat Ralan a,

na'a Ning matmatan a?”

55 Na'ut inyai,

na Yesus nfalak verin tamata rivun avyai ne,

“Mia beta mnyari ne Ya'a ini tamata ktufan Ya'a,

ma mya lahir ovu bira nahin blawat ra ovu navnaval ra ma mtyaha Ya'a?

Lokat amar,

na mryea Ya'a udoku ma usiair na'a Rahan Dawan Falurut,

na'uk wol mtyaha Ya'a.

56 Na'uk ma wean urun ini,

boma nfakena lahir afa ovi nabi ra rfadoku roak na'a Surat Ralan a.”

Nata Ni tamata ra munuk rafla talik Ia.

57 Tamata avyai rtaha roak Yesus,

beti rovun Ia rti Yahudi rira Mela Falurut Ila'a,

naran Kayafas,

ni rahan a ma ndiri wahan ralan a.

Yahudi rira dawan ovi rair Musa ni inukun ra ovu dawan Yahudi ra rasdovu roak ira na'a inyai.

58 Petrus nban-orang Yesus tali raroa watan,

nata ti naran Mela Falurut Ila'a yai ni lean a.

Tamata avyai rovun roak Yesus rati lean ralan.

Petrus ndoku watan ovu tamata ovi rwanar wan yai,

ma al nanaban ne,

veka rotu Yesus wean inba.

59 Dawan Mela Falurut ra,

ovu dawan fareta Yahudi ovi rdoku na'a rira sidovung dawan yai rdava tamata boku ma rala vaivatul siklabir al rfasala Yesus,

boma rukun Ia ma nmata.

60 Na'uk wol rtuan Ni sala isa vali,

velik ne tamata rivun rma ma rfalak rira afa siklabir ra na'a Yesus.

Ti nata tamata siklabir irua rma ma rfalak ne,

61 “Tamata ini nfalak ne,

‘Ya'a bis a'ar vatuk Ubu Ni Rahan Dawan Falurut a,

ma na'a amar itelu,

na veka ufadiri ewal ia.’ ”

62 Ba Mela Falurut Ila'a ndiri ma norat Yesus ne,

“Notu afakinimi wol mlotar tenam a,

ma fwalak na'a afa ovi tamata avyai rfalak a?”

63 Na'uk Yesus wol vain.

Ba Mela Falurut Ila'a nfalak verin Ia ne,

“Ya'a ufalak verin Oa ne,

Ubu i nva'at a nrenar afa ovi fwalak ra,

ba fwalak urun verin ami!

Oa ini Raja i veka mtevut tamata ra rira salasilan ra?

Oa ini Ubu Yanan a?”

64 Yesus nfalak ne,

“Wean i fwalak roak yai.

Na'uk ufalak verin mia ne,

tali amar ini vali,

na veka msyi'ik Ya'a,

Tamata Yanan Ya'a ini,

udoku Ubu i nfareta munuk afakataka Ni lihir mela a,

ovu veka utali lanit ma una'a mutan ratan ra uma.”

65 Ba Mela Falurut Ila'a nangrova urun ma nkamadir ni ravit blawat a.

Ba nfalak ne,

“Ia nfalak sian Ubu,

tevek nfalak ne,

Ubu Yanan Ia.

Wol tperlu ma tdava tamata liak roak ma rfalak ni sala ra.

Mia ka'i mryenar afa sian i nfalak a.

66 Ba minovak ma wean inba?”

Ira rfalak ne,

“Musti rukun Ia ma nmata!”

67 Nata tamata boku rafnit na'a wahan ralan a ovu raskevu tia ma watan Ia.

Boku rvaval vali Ia ovu rfalak ne,

68 “Hoi,

Oa ini Raja i veka mtevut tamata ra rira sala silan ra?

Wean i nabi Oa,

na eka fwalak verin ami ne,

abovi rvaval Oa ini!”

69 Amar yai,

na Petrus ndoku watan lean obin.

Mela Falurut Ila'a ni vata sansinir isa nma ma nfalak verin Petrus ne,

“Oa ba'i morang vali Yesus,

tamata Galilea eri.”

70 Na'uk Petrus nalak ia na'a tamata rivun avyai waharira ralan ra ne,

“Ya'a wol uka'a afa i fwalak yai.”

71 Petrus ti ma ndiri tembok dawan ni falfolat ngoran a,

na Mela Falurut Ila'a ni vata sansinir liak isa vali nrea ia ma nfalak verin tamata ovi rna'a inyai ne,

“Tamata ini ba'i norang Yesus tamata Nazaret eri.”

72 Na'uk nalak ewal vali ia,

ma nafwaba lahir ne,

“Ya'a wol uka'a tamata yai!”

73 Ba wol mnanat,

na tamata ovi rna'a inyai rma ma rfalak verin Petrus ne,

“Oa ini vali morang Yesus,

tevek tka'a lahir na'a mu vai a.”

74 Petrus nalak matmatan watan ia ma ka'i nafwaba tenan a ma nfalak ne,

“Ya'a wol uka'a tamata yai.”

Na'ut inyai lahir,

na manut nkukuwai.

75 Ba Petrus nangnanang nal-ewal vaivatul ovi Yesus nfalak lan roak verin Ia ne,

“Manut wol nkukuwai obin,

na oa veka malak nala fatelu roak ne,

wol mka'a Ya'a.”

Nata Petrus nti talik wan yai ma nvakar ma na'a samsekur.