1 Amar i Yahudi ra ryari ira yai nelak roak,

na Maria Magdalena ovu Maria liak isa vali rti ma rsi'ik van matmatan i rfanuba Yesus tenan a.

Na'ut inyai,

na lera sarseri mane ndata roak na'a amar kareda.

2 Ruru dawan urun na'a inyai,

tevek Duila'a Ni sansinir isa ntali lanit ratan nsuta ma nlawar vatu i nteri van ngoran yai,

ma ndoku vatu yai ratan a.

3 Felan a nyadat ma wean fitik,

ovu ni ravit blawat a nangiar ma wean avat minan.^*

4 Suldadu ovi rwanar van yai rbobar ma raruru lalean ira,

ba rleka rsuta fun ma wean tamata ovi rmata roak.

5 Na'uk sansinir yai nfalak verin vata avyai ne,

“Deka byobar,

tevek uka'a roak ne,

mya ma mdyava Yesus i rbaku roak Ia na'a aa walwalur a.

6 Ia wol nleal roak ini.

Ia nva'at ewal roak,

wean i nfalak lan roak verin mia.

Eka mya ma msyi'ik wan i rfanuba Ia na'a.

7 Ba myewal lahir mia ma ti fyamalik verin Ni tamata ovi rorang Ia ne,

Yesus nva'at ewal roak tali matmatan,

ma veka ula Ia nti propinsi Galilea.

Mia veka mtyuan Ia na'a ineri.

Afa ovi ufamalik roak verin mia ini,

kena urun!”

8 Vata irua yai rafla talik van matmatan yai.

Ira rbobar urun,

na'uk ralarira lolin urun i vali,

ba rfarlan mane ti rfamalik afa ini verin Yesus Ni tamata ovi rorang Ia.

9 Brian munuk,

na Yesus ntuan ira ma nfalak ne,

“Oo Titi averi!”

Ba vata irua yai rfaseri Ia,

ma rsangatur ovu rangabuk ean a ma rfadawang Ia.

10 Ba Yesus nfalak verin ira ne,

“Deka byobar!

Miti ma fyalak verin Ning tamata ra ma rti Galilea,

tevek na'a ineri,

na veka rsi'ik Ya'a.”

11 Vata irua yai rbana obin,

na suldadu ifira tali ovi rwanar van yai rti kota ralan ma rfamalik afa ovi rarea yai verin Yahudi rira dawan mela falurut ra.

12 Ti ma suldadu ovi rwanar van yai rfalak munuk afa avyai verin mela falurut ra ovu dawan Yahudi ra,

na ira ra'an vai isa ma rala kubang dawan verin suldadu avyai.

13 Yahudi rira mela falurut ra rfareta ira ne,

“Mia musti fyalak ne,

‘Ovan yai,

na amtub-lufa munuk roak,

beti Ni tamata ovi rorang Ia rma ma rbori tenan a.’

14 Wean i Gubernur Pilatus nrenar afa ini,

na ami ki amangrihi ma amlotar mia,

boma deka angangal akataka verin mia.”

15 Ba ira rala kubang avyai ma rewal roak ira,

ma ti rfamalik wean i rsurak roak verin ira yai.

Ivar ini ti nsoru roak Yahudi ra ma naran amar ini.

16 Yesus Ni tamata vutu rahin isa yai rti Galilea,

ma rna'a vuar i Yesus nfalak roak verin ira.

17 Ti ma rsi'ik Ia,

na rsangatur lahir ma rfadawang Ia,

na'uk boku ralarira ra raruan obin.

18 Yesus nfaseri ira ma nfalak ne,

“Ubu nala munuk roak ngrebat verin Ya'a na'a lanit ratan ovu lanit ivavan a.

19 Ba miti ma fyamalik Ubu Ni Ivar Lolin verin bangsa ra munuk na'a lanit ivavan a,

boma rorang Ya'a.

Byaptis ira na'a Yamang a naran a,

Yanan a,

ovu Ni Roh a.

20 Myair ira ma rot-orang afa ovi ufareta munuk roak verin mia yai.

Ya'a veka ufatuang mia,

nata ti naran i lanit ivavan namwear a.”