Tamata iki watan wol nahil ma ntalik tali ni salasilan ra, na veka nmata
1 Na'ut i Yesus nair tamata rivun,
na boku rma ma rfamalik verin Yesus ne,
Pilatus nfedan roak tamata Galilea boku.
Ia nfedan ira na'ut i rfedan afwatan ra ma reluk rira korban verin Ubu.
2 Yesus nfalak verin ira ne,
“Mia fyikir ne,
tamata Galilea avyai rmata wean inyai tevek rira salasilan ra rivun lia tamata Galilea liak ra?
3 Mryenar ma lolin afa ovi ufalak ini!
Bira fikiran i wean inyai wol kena lahir!
Na'uk wean i wol myahil tali bira salasilan ra,
na mia veka myata vali wean inyai.
4 Mia mingnanang obin rahan dawan i nleka ma nta'i fedan tamata vutu rahin iwalu na'a Siloam?
Mia fyikir ne,
ira rira salasilan ra dawan lia munuk tamata ovi rna'a Yerusalem?*
5 Mryenar ma lolin afa ovi ufalak ini!
Bira fikiran i wean inyai wol kena lahir!
Na'uk wean i wol myahil ma mtyalik tali bira salasilan ra,
na mia veka myata vali wean inyai.”
Tamata ovi wol rahil ma rtalik tali rira salasilan ra ma rotu afa ovi lolin ra, ira wearira aa ara i wol vuan ra, ma retal vatuk ia
6 Yesus ntafal ma nfamalik ewal vaivatul kamkuma isa wean ini,
“Aa ara isa na'a tamata isa ni va'i anggur a.
Amar isa,
na tamata yai ndava aa yai vuan a,
na'uk wol ndav-nala isa vali.*
7 Ba nfalak verin tamata i nasusan ni va'i a ne,
‘Varat itelu roak uma ma udava aa ara ini vuan a,
na'uk wol udav-nala isa vali.
Metal a'uk aa ini!
Deka nva'at kikyai na'a lanun ini,
tevek wol nala utun akataka.’
8 Na'uk tamata i nasusan va'i yai nfalak ne,
‘Baba,
mnaban ma varat isa ewal.
Ya'a ki ukear lilit aa yai ma otu pupuk na'a.
9 Snain a varat ewal,
na veka vuan roak.
Na'uk wean i wol vuan,
na ki etal vatuk ia.’ ”
Yesus notu ma lolin vata i tetan natbukar a, na'a amar i Yahudi ra ryari ira
10 Amar isa na'a amar i Yahudi ra ryari ira,
na Yesus nsiair na'a Yahudi rira rahan falurut isa.
11 Na'a inyai,
na nait sian isa nlabir vata isa ma naran varat vutu rahin iwalu roak,
ba nawar ia ma tetan a natbukar,
ovu wol ndiri nala ma nmalola.
12 Ti ma Yesus nsi'ik vata yai,
na nera ia ma nfalak ne,
“Titi,
lolin roak oa tali mu suhut a.”
13 Nata Yesus nfadoku liman a na'a vata yai,
ba brian munuk,
na vata yai tetan wol natbukar roak ma ndiri lahir,
ma nfadawang Ubu.
14 Na'uk tamata i nban-ulu na'a rahan falurut yai nangrova,
tevek Yesus notu ma lolin tamata na'a amar i Yahudi ra ryari ira.
Ba nfalak verin tamata rivun avyai ne,
“Na'a karedralan isa,
na tkarya amar inean,
ba amar isa tali amar avyai,
na bisma mya ma rotu ma lolin mia.
Na'uk deka mya na'a amar i tyari ita!”
15 Ba Duila'a nfalak ne,
“Hoi,
mia msyiklabir sian ma fyalak afa isa,
na'uk myotu afa liak.
Na'a amar i myari mia,
na fyatalik bira karba ra ovu keledai ra tali warira ra ma myovun ira rti wan i ba'i rafnenu na'a.
16 Vata ini Abraham ubun-nusin vali ia.
Nitdawan nkeak ia varat vutu rahin iwalu roak,
ba Ya'a musti aling vatuk kakeak yai tali ia,
velik ne na'a amar i tyari ita!”
17 Yesus nfalak wean inyai,
ba tamata ovi rangal Ia rma'it urun.
Na'uk tamata rivun inarira lolin urun,
tevek Yesus notu afa lolin ovi tamata ra wol rot-nala.
Tamata ovi Ubu nfareta ira wean lahir Raja veka rtafal ma rivun ira, ovu wearira sesawi ni vatul a, ovu vali ragi
18 Ba Yesus nfalak ne,
“Ubu nfareta tamata ra wean lahir Raja,
na veka wean inba?
Ya'a veka ala vaivatul kamkuma ini ma ufalyawang Ni Fareta yai.
19 Ubu Ni Fareta wean sesawi ni vatul a.
Tamata isa nala sesawi ni vatul a,
ma ti nava na'a ni va'i a.
Sesawi yai veka narubu ma dawan,
ba manut nangan ra rti rotu rira renga na'a sanan ra.”*
20 Yesus nfalak ewal vali ne,
“Ya'a veka ala vaivatul kamkuma ra ma ufalyawang Ubu Ni Fareta.”
21 Ubu Ni Fareta wean ragi.
Vata isa nala ragi yai ma nsileti na'a terigu loyang dawan isa,
nata terigu yai nmela ma dawan.*
Falfolat katkotat ma tati vava'at kakiwal
22 Ba Yesus nban-ewal mane nti Yerusalem,
na nwelat kota ra ovu ahu ra ma nair tamata ra.
23 Tamata isa norat Yesus ne,
“Duila'a,
tamata ifira watan veka rira vava'at kakiwal?”
24 Ba Yesus nfalak verin tamata ovi rna'a inyai ne,
“Mkyiwal urun ma myahu falfolat i katkotat a!
Mingnanang,
tevek tamata rivun veka rkiwal ma rti ralan,
na'uk wol rti nala.
25 Wean i rahan duan a ndiri roak ma nfolat falfolat a,
na mia veka mydiri murin watan ma myevan falfolat a,
ma fyalak ne,
‘Baba,
bwadil falfolat a verin ami!’
Ia veka nfalak ne,
‘Ya'a wol uka'a mia!’
26 Mia veka fyalak ne,
‘Ami amafna'an ovu amafnenu roak ovu Oa,
ovu vali Oa msiair roak na'a linga'an ovi rna'a mami ahu ra.’
27 Na'uk Ia veka nfalak verin mia ne,
‘Ya'a wol uka'a mia ovu wol uka'a ne,
mtyali inba mya.
Hoi,
mia tamata ovi ba'i myotu a'uk afa ovi sian ra,
miti talik kikyai wan ini!’
28 Ba mia veka msyi'ik Abraham,
Ishak,
Yakub ovu nabi ra munuk rotu inarira lolin na'a Ubu Ni Fareta Ralan.
Na'uk mia veka byakar ovu nifabira ra veka rsitutu ira,
tevek fyarnuang wawa'uk i dawan a.
Ubu notu teri mia ma mnya'a murin watan.*
29 Tamata ra veka rtali timur,
varat,
marmar ovu tranan rma ma rdoku rafna'an na'a Ubu Ni Fareta.*
30 Ba Ubu veka notu ma tamata ovi wol fyawar akataka,
fyawar lia munuk tamata ra.
Tamata ovi rfakaratat tenarira ra,
Ia veka notu ma wol fyawar akataka.”
Yesus ralan lalau na'ut i nfikir tamata ovi rna'a Yerusalem
31 Na'ut inyai vali,
na tamata boku tali sidovung Farisi rma ma rfalak verin Yesus ne,
“Muti talik lahir wan ini,
tevek raja Herodes mane nfedan Oa.”
32 Yesus nfalak verin ira ne,
“Miti lahir Herodes i rfanara ia ne serigala,
ma fyalak verin ia ne,
Ya'a aling vatuk nait sian ra tali tamata ra ovu otu ma tamata ra lolin ira tali rira suhut ra,
amar ini ovu ilyan.
Ravrua beti Ning karya a roak.
33 Velik ne wean inyai,
na'uk Ya'a musti ubana uti Yerusalem amar ini,
ilyan ovu ravrua,
tevek wol inovan ma rfedan nabi na'a wan liak,
musti na'a Yerusalem.”*
34 Nata Yesus nfalak ne,
“Tamata ovi mnya'a Yerusalem!
Mia fyedan nabi ra ovu mtyev-fedan tamata ovi Ubu nsinir ira rma rtuan mia.
Ya'a umaseak dalang roak ma usdovu mia,
wean manut itai isa nkoka yanan ra na'a manin vavan a,
na'uk mifena ma otu wean inyai!
35 Ba wean inyai bi Ubu nban-talik bira Rahan Dawan Falurut a,
ba veka vu watan.
Ufalak verin mia ne,
tali amar ini,
na veka wol msyi'ik roak Ya'a,
ti naran amar i veka fyalak ne,
‘Ubu naflahar Ia i nma ovu Duila'a naran a!’ ”