Deka msyifaleka inukun verin mia
1 Yesus nfalak ne,
“Deka fyasala tamata ra,
boma Ubu deka nfaleka inukun verin mia.
2 Tevek Ubu veka nfaleka inukun verin mia wean lahir i fyasala tamata ra.
Tevek afa i myala al myukur tamata ra,
na Ubu veka nala vali al nukur mia.
3 Notu afakinimi msyi'ik aa mumun i na'a terabira isa matan a,
na'uk wol msyi'ik nala aa etal dawan i na'a matabira ra?*
4 Wean inba ma fyalak verin terabira yai ne,
‘Mwa ma aling vatuk aa mumun i na'a matam a,’
na'uk aa etal dawan a nana'a matabira obin?
5 Hoi,
mia fyalak afa isa,
na'uk myotu afa liak!
Eka myaling vatuk aa etal dawan yai tali matabira ra veki,
boma msyirea ma lolin,
beti myaling vatuk aa mumun tali terabira yai matan a.”
Vaivatul fanfonak ovi reluk snurak verin ita, ma deka tfamalik Ubu Ni vaivatul ra verin tamata ovi rafena ma rarenar
6 “Deka myala afa marmerat ovi rtali Ubu verin tamata ovi wol inar ra.
Tevek myala verin ira,
na inyai wean i myala afa marmerat verin yaha ra,
te myala mutiara ra verin vavu ra.
Ira veka rta mutiara avyai,
beti rewal ira ti ma rkaras mia.”
Miflurut verin Ubu ma nlobang mia
7 “Myera verin Ubu na'a afa ovi ralabira ra rfalak ra,
na Ia veka nala verin mia.
Mdyava urun ia,
na veka mtyuan.
Myevan falfolat a,
na falfolat a veka natvadil verin mia.
8 Tamata ovi rera verin Ubu,
ira veka rala afa ovi rera yai tali Ia.
Tamata ovi rdava afa ovi ralarira ra rfalak ra,
ira veka rtuan vali.
Tamata ovi revan falfolat a,
falfolat a veka natvadil vali verin ira.
9 Did tinemun,
wean i yanabira nera afamtahan ma na'an,
na veka myala vatu verin ia?
10 Te wean i yanabira nera ian tali mia,
na veka myala nifa verin ia?
11 Velik ne bira salasilan rivun,
na'uk mkya'a ma myala afa ovi lolin ra verin yanabira ra.
Ba Yamabira i na'a lanit ratan veka notu ma nlia tali inyai!
Ia nka'a lahir ma nala afa ovi lolin ra verin tamata ovi rera tali Ia.
12 Ba wean i inabira ma tamata ra rotu lolin mia wean inyai,
na mia musti myotu lolin vali wean inyai verin tamata ra,
tevek ini nfakena lahir Musa ni inukun ra ovu afa ovi nabi rair ra.”
Vaivatul kamkuma i nfamalik linga'an i nrata lanit ratan
13 “Did tinemun,
na'a bira vava'at a,
na myahu a'uk falfolat i katkotat a.
Wean i myahu falfolat i ngluar a,
na nti yafwan kakiwal,
ma tamata rivun veka rahu linga'an yai.
14 Na'uk falfolat ovu linga'an i katkotat a nti vava'at kakiwal,
ma tamata ifira watan rahu inyai.”
Ita tka'a nabi ra tali rira vava'at ra
15 “Msyi'ik wabira ma lolin na'a nabi siklabir ra.
Ira rma ma rotu felarira ra wean domba,
wean tamata ovi rorang Yesus.
Na'uk ira wearira serigala ra ma rot-visal tamata rira inorang a.
16 Mia mkya'a lahir rira siweang ra,
wean i msyi'ik afa ovi rotu ra.
Mia wol fyufu anggur vuan ra na'a kadkadir ralan,
ovu vali wol fyufu aa ara vuan ra na'a karwamus ralan.
17 Aa ovi lolin ra,
vuarira veka lolin urun,
na'uk aa ovi sian ra,
vuarira ra veka sian vali.
18 Wol mane aa ovi lolin ra,
vuarira ra sian,
te aa ovi sian ra vuarira ra lolin.
19 Ba aa ovi vuarira ra wol lolin a,
na retal watan ma ti rvatuk ira,
beti rasnuri ira.
20 Aa avyai wearira nabi siklabir ra.
Ba tali afa ovi rotu ra,
na bisma mkya'a ne,
rsiklabir te wahal.”
Ubu veka nfaleka inukun verin tamata ra
21 “Tamata rivun veka rera Ya'a ne,
‘Duila'a,
Duila'a,’
na'uk wol mane ira munuk ti rna'a Ubu Ni Fareta a.
Tamata ovi rot-orang Yamang i na'a lanit ratan Ni afa ovi ralan nfalak ra,
na ira watan veka rna'a Ni Fareta a.
22 Na'ut amar i Ubu veka nukun tamata ra,
na tamata ra veka rfalak ne,
‘Duila'a,
wol mrenar ami ma amala naram ma amfamalik Mu vaivatul ra?
Amala vali naram a al amala'ing vatuk nait sian ra tali tamata ra,
ovu amotu mujizat rivun.’
23 Na'uk veka ungrihi velar ira ma ufalak ne,
‘Ya'a wol uka'a mia!
Miti vatuk mia tali wahang ralan a,
tevek myotu lalawatan salasilan ra*.’ ”
Vaivatul kamkuma i nfamalik tamata irua ovu rira inorang: isa norang Yesus Kristus, ba ni inorang nangrebat, na isa vali nafena ma not-orang Yesus Ni vaivatul ra, ba wol ni inorang
24 “Ba tamata ovi rarenar ovu rot-orang Ning vaivatul ra,
na ira wearira tamata ovi rira kaka'a dawan ma rfadiri rira rahan ra na'a fanderen ngrebat i rotu tali vatu ra.
25 Ti ma da'ut dawan ma wear ndata ma nbubul,
ovu nait dawan a nean rahan yai,
na'uk wol nama'ar,
tevek rfadiri ia na'a vatu ratan.
26 Tamata ovi rarenar afa ovi ufalak ra,
na'uk wol rot-orang,
na ira wean tamata boda-badi ovi rfadiri rira rahan ra na'a ngur ratan.
27 Ba ti ma da'ut dawan ma wear ndata ma nbubul,
ovu nait dawan nean rahan yai,
na rahan yai veka nama'ar munuk.”