Yesus nair Ni tamata ovi rorang Ia, ovu nfalak ma rsi'ik warira ma lolin na'a afa ovi tamata Farisi ra rair ra
1 Na'ut inyai,
na tamata rivun ila'a ti rasdovu ira,
ma boku rdir-sidekin watan ira ovu rsita earira ra al rsi'ik ovu rarenar afa ovi Yesus nair ra.
Ia nair lan Ni tamata ovi rorang Ia ma nfalak ne,
“Msyi'ik ma lolin sidovung tamata Farisi rira ragi a.
Deka myot-orang ira,
tevek rfalak afa isa,
na'uk rotu afa liak.*
2 Afa fanfonak ovi tamata rotu ra veka rvotuk,
ovu afa ovi rfonak na'a ralarira ra veka lyawan vali.
3 Ba afa ovi fyamalik na'a dedan ralan,
na veka rvotuk na'ut i amar a ma tamata ra rka'a.
Afa ovi fyifi watan verin tamata ra na'a kamar ralan,
na tamata liak ra veka rti ma rfamalik ma tamata rivun a rka'a.”
Ita musti tbobar a'uk Duila'a
4 “Ning kida averi,
deka byobar tamata ovi inar ma rfedan tenabira ra,
tevek wol rot-nala ma nlia tali inyai.
5 Ya'a mane ufalak verin mia ne,
byobar a'uk Ubu!
Ia wol mane Ni ngrebat watan ma nfedan tamata ra,
na'uk Ia Ni ngrebat vali ma nvatuk ira rti yafwan kakiwal.
Wean urun inyai,
bi ufalak verin mia ne,
‘Byobar a'uk Ubu!’
6 Eka minovak!
Subit ilima fyawarira ra ko'u lalean.
Velik ne fyawarira ko'u,
na'uk Ubu wol nablufang isa vali,
tevek Ia nsi'ik munuk subit ra.
7 Wean vali inyai verin vut ovi rna'a ulubira ra.
Ubu nrekan ovu nka'a munuk vali roak,
ba deka byobar,
tevek Ubu nsi'ik ma lolin mia.
Mia fyawabira lia subit ra!”
Deka fyalak sian Ubu Ni Roh a
8 “Mryenar ma lolin afa ovi ufalak ini!
Tamata iki watan ntorung ne,
norang Ya'a na'a tamata waharira ralan ra,
na Ya'a,
Tamata Yanan Ya'a ini,
veka utorung vali ia na'a Ubu Ni sansinir ovi rna'a lanit ratan waharira ralan ra.
9 Na'uk tamata iki watan wean i nalak ia ne,
wol nka'a Ya'a na'a tamata waharira ralan ra,
na Ya'a veka alak vali ia ne,
wol uka'a ia na'a Ubu Ni sansinir ovi rna'a lanit ratan waharira ralan ra.
10 Tamata iki watan nfalak afa boku ma nangal Ya'a,
Tamata Yanan Ya'a,
na Ubu veka na'i vatuk ni salasilan avyai.
Na'uk tamata iki watan wean i nfalak sian Ubu Ni Roh a,
na Ubu veka wol na'i vatuk roak ni salasilan ra.
11 Wean i tamata ra rtaha mia ti ma mdyiri Yahudi rira dawan waharira ralan ra na'a rira rahan falurut ra,
te fareta waharira ralan ra ma rurus mia,
na deka ralabira raruan na'a afa ovi veka fyalak ma al mlyotar tenabira ra.
12 Tevek na'ut inyai vali,
na Ubu Ni Roh a veka nfalyawang verin mia na'a afa ovi musti fyalak ra.”
Vaivatul kamkuma na'a tamata ka'i i nboda a
13 Tali tamata rivun avyai,
na brana isa nfalak verin Yesus ne,
“Tuan Guru,
fwalak verin a'ang a ma nsiduk yamamami ni metan ra ovu fautnanan ovi nfadoku roak verin amrua.”
14 Yesus nfalak verin ia ne,
“Iki nsikat ya'a ma eluk tamata fareta ma usiduk bira metan ra?”*
15 Nata Yesus nfalak ewal verin tamata rivun avyai ne,
“Msyi'ik wabira ma lolin ma deka inabira ma mtyafal ila'a bira metan ra,
tevek tamata rira vava'at ra wol raklo'i watan na'a rira metan ra,
velik ne rira metan rivun ila'a.”
16 Yesus nfamalik vaivatul kamkuma isa ma nfalak ne,
“Tamata ka'i isa ni va'i a ihin urun.
17 Tamata yai nanovak na'a ralan a ne,
‘Wol wan roak ma ufadoku ning metan ra,
ba fiang ini veka otu afaka?’
18 Ba nanovak ewal vali ma nfalak ne,
‘A'ar munuk a'uk wan ovi ufadoku ning va'i ihin ra,
boma ufadiri ewal wan avyai ma veran rahi wan ovi ufadiri lan ra.
Otu wean inyai,
boma bisma ufadoku ning va'i ihin ra ovu metan ra na'a.
19 Otu munuk wean inyai,
beti ka'i unovak na'a ralang a ne,
ya'a inak urun,
tevek ning metan ovu va'i ihin ra rivun roak,
ovu bisma uva'at tali varat nti varat.
Ba fiang ini uyari watan ya'a ma ufna'an-ufnenu ovu otu inak lolin watan.’
20 Na'uk Ubu nfalak verin ia ne,
‘Hei,
oa bwoda urun!
Ovan ini lahir,
na oa veka mwata,
ba iki veka ni munuk mu metan rivun ovi musdovuk roak yai?’*
21 Tamata ovi ba'i rasdovuk rira metan ra ma al rfaka'i watan tenarira ra,
wor watan ira,
tevek wol rka'i na'a Ubu wahan ralan a.”
Deka ralabira kako'u na'a bira inorang a verin Ubu
22 Yesus nfalak verin Ni tamata ovi rorang Ia ne,
“Ba ufalak verin mia ne,
deka ralabira kako'u na'a bira vava'at ra ovu bira fana'an-fanenu ra.
Deka ralabira kako'u vali na'a afa ovi veka myung a myeluk ra.
23 Tevek bira vava'at a fyawan lia bira fana'an ra,
te bira kadaravit ra.
24 Eka msyi'ik manut nangan ra!
Ira wol ravuri-rava nabat ra,
ovu wol rala va'i ihin ra,
ovu vali wol wan ma rfadoku va'i ihin ra na'a,
na'uk Ubu nala afamtahan verin ira.
Mia fyawabira lia manut nangan avyai,
ovu Ubu nlobang mia nlia manut nangan ra!
25 Wean i tamata isa ralan kako'u na'a ni vava'at a,
na ia veka wol ntafal amar isa vali na'a ni vava'at.
26 Ba wean i wol myot-nala afa ko'u yai,
na afakinimi ralabira kako'u na'a afa liak ra?
27 Eka msyi'ik aa rira fafun ra.
Ira wol rkarya ovu wol rafedu ma rotu rira kadaravit.
Mryenar ma lolin afa ovi ufalak ini!
Raja Salomo nka'i urun,
na'uk ni kadaravit ovi neluk ra,
na wol isa vali lolin lia tali fafun avyai.
28 Ubu notu ria ovi rna'a va'i ra ma felarira lolin,
velik ne amar ini rva'at obin,
na'uk ilyan te ravrua,
na rasnuri roak ira.
Mia fyawabira nlia munuk ira!
Ia nsi'ik mia nlia tali ria avyai.
Na'uk wol myorang ne,
Ubu nlobang mia nlia tali ria avyai!
29 Ba deka fyikir da'in afa ovi veka mian te myenu ra,
ovu ralabira deka kako'u.
30 Tamata ovi wol rorang Ubu rdava lalawatan afa avyai,
na'uk Yamabira nka'a munuk afa ovi mdyava na'a bira vava'at ra.
31 Ba mtyorung ma Ubu nfareta mia wean lahir Raja,
na Ia veka nfakena munuk afa ovi mdyava ra.
32 Tamata ovi myorang Ya'a,
velik ne bira sidovung a ko'u watan,
na'uk ralabira ra deka kako'u!
Tevek Yamabira inan ma nala Ni kalolin ra verin mia tali Ni Fareta a.
33 Ba miti ma fyedi bira metan ra,
ma myala kubang avyai verin tamata kasian ra.
Myotu wean inyai,
na misdovuk roak bira metan ra na'a lanit ratan.
Metan avyai wol rakvisal nala,
nata ti wol ni wahan,
ovu tamata barborin ra wol bis rala nala,
ovu ngafat ra wol bisma ra'an nala.
34 Tevek wean i fyadoku bira metan ra na'a wan isa,
na ralabira ra veka rna'a vali inyai.”
Tamata ovi rorang Yesus musti rsi'ik warira ma lolin ma rtuan Yesus na'ut i nma ewal
35-36 “Na'ut inba watan,
velik ne ovan te amar,
na musti misusan wabira ma lolin ma mkyarya urun verin Ubu.
Myotu wean tamata sansinir ovi rnaban duarira ra ma newal ia tali snobsifa.
Ira rasusan lalawatan warira ma rkarya ovu rwanar ma lolin rira damar ra ma deka rmata,
boma wean i duarira newal ia ma nevan falfolat a,
na yarak ti ma rvadil falfolat a.
37 Tamata sansinir ovi rasusan warira ma lolin ma al rnaban duarira ra veka uturira.
Afa i ufalak verin mia ini,
kena urun!
Duarira yai veka nfalak ma ni tamata sansinir avyai rdoku,
beti ia ka'i nasusan afamtahan verin ira.
38 Tamata sansinir avyai veka uturira wean i duarira newal ia,
na ntuan ira rasusan warira ma lolin ma al rnaban ia,
velik ne nafafruan tenan te nfada'ing amar.
39 Mingnanang afa ovi ufalak ini!
Wean i rahan duan nka'a ne,
jam ifira beti tamata barborin nma,
na ia veka nsi'ik ma lolin ni rahan a,
boma deka nti ni rahan ralan.
40 Wean inyai bi lokat amar,
na musti msyi'ik wabira ma lolin,
tevek wol mkya'a ne,
na'ut inba na Ya'a,
Tamata Yanan Ya'a,
veka uma.”
Vaivatul kamkuma na'a tamata sansinir i nbosa a, ovu tamata sansinir i iva'un a
41 Petrus nfalak ne,
“Duila'a!
Vaivatul kamkuma yai fwamalik watan verin ami,
te verin tamata liak ra vali?”
42 Duila'a nfalak verin ia ne,
“Tamata sansinir isa nasusan duan ni rahan,
ovu not-orang lalawatan afa ovi duan a nfalak ra,
ovu vali ni kaka'a dawan.
Ba duan a veka nfili ia ma nfareta tamata sansinir liak ra,
ovu nala afamtahan lokat amar ma ra'an.
43 Tamata sansinir yai veka utun urun na'ut i duan a newal ia,
na ntuan ia nfabana ni karya ra.
44 Afa i ufalak verin mia ini,
kena urun!
Tamata sansinir yai duan a veka nfili ia ma nasusan munuk ni metan ra.
45-46 Na'uk wean i tamata sansinir yai naktufan ma nanovak na'a ralan a ne,
‘Mnanat obin beti duang nma ewal.’
Ba ti ma nvaval tamata sansinir vata ovu brana ra,
ovu vali nafna'an-nafnenu ovu boranavut ia.
Tamata sansinir yai notu watan wean inyai,
ti naran i duan newal ia na'a amar i wol nka'a.
Ba duan a veka nfar-visal ia ma rvatuk ia,
ma ia wean lahir tamata i wol norang Ubu.
47 Tamata sansinir i nka'a afa ovi duan ralan nfalak a,
na'uk wol nasusan tenan a ma not-orang afa ovi duan ralan a nfalak a,
na veka nfar-visal ia.
48 Na'uk tamata sansinir i wol nka'a afa ovi duan ralan nfalak a ma notu sala,
na inovan ma rukun ia.
Ira veka rvaval ia,
na'uk wol aleman.
Tamata iki watan wean i Ubu nala roak varvara verin ia ma nfareta tamata liak ra,
na'uk wol not-orang afa ovi Ubu nfalak ra,
na Ubu veka nukun tamata yai nlia tali tamata liak.”
Tamata ra wol ra'an vai isa, tevek boku rorang Yesus, na boku wahal
49 Yesus nfalak verin Ni tamata ovi rorang ia ne,
“Deka minovak ne,
Ya'a uma lanit ivavan ini ma otu ma malinan,
na'uk uma ma ukun tamata ra,
wean yafu i nlevur a,
ovu inak ma rsidovuk kikyai yafu yai!
50 Ya'a musti utuan susa i dawan a.
Ba ralang a wol malinan lahir,
ti naran i susa yai nlia.*
51 Mia minovak ne,
uma lanit ivavan a ma otu ma malinan?
Wahal!
Mryenar ma lolin afa ovi ufalak ini!
Uma lanit ivavan ini,
na wol otu ma malinan,
na'uk otu ma tamata ra rsingarahi.
52 Ba tali fiang ini,
na wean i tamata ilima rna'a rahan teta isa,
na veka rsitaku ulu ma tamata itelu rangal tamata irua,
te tamata irua rangal tamata itelu.
53 Ira veka ka'i rsitaku ulu.
Brana ra veka rangal yamarira ra,
ba yamarira ra veka rangal vali ira.
Vata ra veka rangal renarira ra,
ba renarira ra veka rangal vali ira.
Etan ra veka rangal avarira ra,
ba avarira ra veka rangal vali ira.”*
Tamata ra wol rfan-aran afa ovi Yesus nair ra ovu afa ovi notu ra
54 Yesus nfalak verin tamata rivun avyai ne,
“Wean i msyi'ik mutan ra rdiri na'a lihir varat,
na fyalak lahir ne,
veka da'ut,
na veka da'ut lahir wean i fyalak a.
55 Wean i nait tranan,
na mia fyalak ne,
veka lera,
na lera lahir ma wean i fyalak a.
56 Hoi,
mia tamata ovi fyalak afa isa,
na'uk myotu afa liak!
Mia msyi'ik lanit ovu lanit ivavan felan a,
na mkya'a ma fyalak ne,
veka da'ut te lera.
Na'uk afakinimi msyi'ik afa ovi otu ra,
ovu vali mryenar Ning Ivar Lolin a,
na'uk wol fyan-aran?”
Ubu wol nukun lanit ivavan obin, na fara tahil roak ma tatalik dida salasilan ra
57 “Mia musti fyikir ma lolin afa ovi kena ra ma myot-orang!
58 Wean i tamata isa nti ma nmangadu oa verin tamata i ba'i nfaleka inukun verin tamata ra,
na musti mkiwal ma na'a bira banbanan obin,
na motu ma lolin ovu ia.
Tevek wean i wol motu wean inyai,
na tamata yai veka nkiwal ma novun oa ti verin tamata i ba'i nfaleka inukun verin tamata ra,
beti tamata i ba'i nfaleka inukun yai novun oa ti verin polisi ra ma ra'abu'i oa.*
59 Mrenar ma lolin afa i ufalak ini!
Ira veka wol rfatalik oa tali bu'i ralan yai,
wean i wol bwahir munuk mu utan ra obin.”