Yesus nva'at ewal tali matmatan
1 Terang a valing averi,
fiang ini ya'a mane ufangnanang ewal mia na'a Ubu Ni Ivar Lolin.
Ivar Lolin yai ufalyawang roak verin mia,
ma mryenar roak ovu myorang urun Kristus.
2 Ba wean i mia ralabira urun ma myorang Ivar Lolin yai,
na Ubu nsikat roak mia tali bira salasilan ra.
Na'uk wean i myorang afa ovi wol kena ra,
na bira inorang yai veka wol nala utun akataka verin mia.
3 Afa ovi ufamalik lan roak verin mia yai,
Ivar i Ubu nala roak verin ya'a.
Ivar yai lolin lia munuk,
wean lahir i rtulis roak na'a Surat Ralan ne,
Kristus nmata roak,
tevek dida salasilan ra.
4 Tamata ra rfadoku Ia na'a van isa ralan a,
na'uk amar itelu nelak,
na Ubu nfava'at ewal Ia tali matmatan.
Ivar ini rtulis vali roak na'a Surat Ralan.
5 Ya'a ufamalik vali roak verin mia ne,
Kristus nfavotuk roak tenan a verin Petrus,
ovu Ni tamata vutu rahin irua ovi rorang Ia.*
6 Ti ma nfavotuk munuk roak tenan a verin ira,
beti nfavotuk vali tenan a verin tamata ovi rorang Ia ratut ilima teran.
Tali tamata avyai,
boku rmata roak,
na'uk etal dawan rva'at obin,
ma naran i utulis surat ini.
7 Ia nfavotuk roak tenan a verin tamata avyai,
beti nfavotuk vali tenan a verin Yakobus,
nata verin Ni rasul ra munuk.
8 Ia nfavotuk marmuri lalean tenan a verin ya'a,
wean kasiko'u i wol naran ni amar obin,
na rarali roak ia.*
9 Wean inyai bi,
tali Ubu Ni rasul ra,
na ya'a wol fyawang akataka.
Ba wol inovan ma tamata rfalak ne,
rasul ya'a,
tevek lan a uwi-uwa Ni sidovung tamata ovi rorang Yesus.
10 Na'uk Ubu nala roak Ni rala lolin a verin ya'a,
bi fiang ini eluk rasul,
ovu Ni rala lolin yai wol nleka ma lolan watan.
Na'uk ukarya urun ia ma nlia tali rasul liak ra.
Velik aba,
ya'a wol ot-nala munuk afa avyai,
na'uk Duila'a nfatuang ya'a,
bi bisma ufabana nala karya yai.
11 Ba wean inyai,
na wol akataka,
velik ne ya'a te rasul liak ra amfamalik Ubu Ni Ivar Lolin a verin mia.
Ivar Lolin i amfamalik yai ikisa watan,
ovu myorang roak Ivar yai.
Ubu veka nfava'at ewal tamata matmatan ra
12 Wean i amfamalik ne,
Ubu nfava'at ewal Kristus tali matmatan,
na afakinimi tamata boku tali mia rfalak ne,
tamata matmatan ra veka wol rva'at ewal?
13 Ba wean i tamata matmatan ra wol rva'at ewal,
na Ubu wol nfava'at Kristus tali matmatan.
14 Na'uk wean i Ubu wol nfava'at ewal Kristus tali matmatan,
na afa ovi amfamalik ra ovu vali bira inorang na'a Kristus wol fyawan akataka.
15 Nlia tali inyai,
na lyawan roak ne,
amlabir roak tamata ra na'a afa ovi Ubu notu a,
tevek ami amfamalik roak ne,
Ubu nfava'at ewal roak Kristus tali matmatan.
Wean i kena ma Ubu wol nfava'at ewal Kristus tali matmatan,
na Ia wol nfava'at ewal tamata matmatan ra.
16 Ba wean i Ubu wol nfava'at ewal tamata matmatan ra,
na Ia wol nfava'at vali Kristus tali matmatan.
17 Ba wean i Ubu wol nfava'at ewal Kristus,
na bira inorang a wol fyawan lahir,
ovu bira vava'at ra nana'a watan salasilan ra.
18 Wean i Ubu wol nfava'at Kristus,
na Ia wol nsikat tamata inorang ovi rmata roak tali rira salasilan ra.
19 Na'uk wean i ita tamata inorang ra tfaklo'i a'uk dida vava'at verin Kristus na'a lanit ivavan ini watan,
na inyai sian urun i lahir verin ita.
Ba inovan ma tamata ra rfalak ne,
dida kasian dawan urun,
nlia tali tamata ra munuk.
20 Na'uk kena urun,
tevek Ubu nfava'at lan lalean Kristus tali matmatan!
Ba inyai neluk faneak ne,
Ia veka nfava'at ewal tamata matmatan ra.*
21 Tevek salasilan i tali tamata i Ubu notu ula lalean ia yai bi,
tamata ra munuk musti rmata.
Ba wean vali inyai,
ma Ubu veka nfava'at ewal matmatan ra tali tamata isa vali.
22 Tamata ra munuk rira vava'at isa ovu Adam ma rmata vali wean ia.
Ba wean inyai,
bi tamata ovi rira vava'at isa roak ovu Kristus,
Ubu veka nfava'at munuk ewal ira wean i rmata roak.*
23 Na'uk Ubu nfava'at ewal tamata ra wean ini:
Ia nfava'at lan roak Kristus,
ma Ia wean karya enan i ula lalean tali va'i ihin a.
Ba ti ma naran amar i Kristus veka nma ewal lanit ivavan a,
na Ia veka nfava'at ewal vali tamata ovi rira vava'at isa roak ovu Kristus.
24 Notu munuk wean inyai,
beti lanit ivavan a namwear.
Na'ut inyai,
na Kristus veka nfaleka munuk lahir fareta ra,
ngrebat ra ovu tamata ovi rtaha fareta na'a lanit ivavan a,
lanit ovu lanit ratan ma nfareta wean lahir Raja.
Notu munuk roak wean inyai,
beti Ia nala fareta a verin Yaman a Ubila'a.
25 Tevek Kristus musti neluk raja ma ntaha fareta a,
ti naran i Ubu nfaleka munuk Kristus Ni musu ra ma rsoak nulu Ia.*
26 Kristus Ni musu i nban-muri lalean a,
nfaturu lahir matmatan yai ni ngrebat a.
Ba veka nfamwear matmatan yai ni ngrebat a.
27 Rtulis roak na'a Surat Ralan ne,
“Ubu nfaleka munuk roak afakataka ma rsoak nulu Ia.”
Na'uk wean i rfalak ne,
Ubu notu roak ma afakataka rsoak nulu Kristus,
na inyai wol nfaturu ne,
Ubu nsoak vali verin Kristus.*
28 Na'uk wean i Ubu notu ma Kristus nfareta roak afakataka munuk,
na Kristus veka ka'i nsoak verin Yaman a Ubila'a.
Notu wean inyai,
boma Ubu nfareta munuk afakataka na'a inba watan.
29 Na'uk wean i mia fyikir ne,
Ubu wol nfava'at ewal tamata matmatan ra,
na afakinimi tamata ra rtorung ma rbaptis ira verin tamata matmatan ra?
Wean i Ubu wol nfava'at ewal tamata matmatan ra,
na veka rala uturira aka verin tamata ovi rbaptis ira verin tamata matmatan ra?*
30 Wean vali inyai verin ami.
Wean i Ubu wol nfava'at ewal tamata matmatan ra,
na afakinimi amtorung watan ma rangrihi,
ma veka rotu sian lalawatan tenamami ra.
31 Terang a valing averi,
lokat amar,
na utuan sian lalawatan.
Afa avyai rotu ma kedan a watan,
na umata.
Na'uk ufalak urun verin mia ne,
ya'a ralang a dawan urun,
tevek na'a bira vava'at ra,
na myorang roak dida Duila'a Kristus Yesus.
32 Wean i Ubu veka wol nfava'at ewal tamata ovi rorang Yesus,
na ya'a wol utung akataka ma utuan tamata kuldawan ovi rna'a Efesus.
Tamata kuldawan avyai wearira afwatan ovi rna'a nangan ralan ma ba'i rfedan tamata ra!
Wean i Ubu wol nfava'at tamata matmatan ra,
na ni lolin ana,
totu watan wean ini,
“Mya ma tafna'an ovu tafnenu,
tevek ilyan,
na ita veka tmata.”*
33 Ba deka myorang tamata rira siklabir ra.
Tamata ovi rotu kida ovu tamata ovi ba'i rotu watan afa ovi sian ra,
na ira veka rorang vali tamata avyai ma rotu watan afa ovi sian ra.
34 Msyi'ik ma lolin tenabira ra ma deka myotu kikyai salasilan ra,
tevek tamata boku wol rka'a Ubu rna'a ebang mia.
Ufalak wean inyai,
boma ufama'it mia.
Tenadida ngorva'an na'ut i Ubu veka nfava'at ewal ita tali matmatan
35 Ka'a bi tamata boku tali mia rorat ne,
“Wean inba ma Ubu veka nfava'at ewal tamata matmatan ra?”
Ira rorat vali ne,
“Tenarira ra veka wean inba?”
36 Tamata ovi rorat wean inyai,
ira rboda urun!
Wean i tamata isa nava nabat ra,
na nabat avyai veka wol rarubu wean i wol rakvisal obin.
37 Nava nabat avyai na'a lanun ovu wol nava roan ra te kan ra.
Nabat ovi rarubu ra wean gandum te nabat liak ovi rira vatul ra.
38 Na'uk Ubu ka'i notu ma nabat avyai felarira ra wean lahir i ralan a nfalak a.
Ia notu vali ma nabat ra felarira rsialing ira.
39 Tamata ra ovu afwatan ra ihirira ra rsialing munuk ira.
Manut nangan ihirira ra rsialing vali ira tali ian ra.
40 Afa ovi rna'a lanit ratan ovu afa ovi rna'a lanit ivavan ini rsialing ira.
Afa ovi rna'a lanit ratan lokat ira vanarira ra rsialing ira ovu afa ovi rna'a lanit ivavan ini felarira ra lolin urun ovu rsialing vali ira.
41 Lera felan a lolin urun,
na'uk naling ia tali vulan a.
Vulan felan a lolin urun,
na'uk naling vali ia tali nara felarira ra,
ovu lokat nara felarira lolin urun,
na'uk rsialing vali ira.
42 Ubu veka notu vali wean inyai,
na'ut i nfava'at ewal tamata matmatan ra.
Tenarira ovi roving roak ira yai,
veka rakvisal,
na'uk tenarira ovi Ubu nfava'at ewal roak yai wol bisma rakvisal.
43 Na'ut i roving tamata matmatan tenarira ra,
na tenarira ra rmafun ovu felarira sian urun.
Na'uk ti naran amar i Ubu nfava'at ewal tamata matmatan ra,
na tenarira ra lolin buas ovu rangrebat urun.
44 Na'ut i roving tamata matmatan tenarira ra,
na inyai tenarira i ntali lanit ivavan a,
na'uk ti naran amar i Ubu veka nfava'at ewal tamata matmatan ra,
na tenarira avyai rtali Ubu Ni Roh a.
Wean lahir i tamata tenan a ntali lanit ivavan ini nana'a,
na tamata tenan i ntali Ubu Ni Roh nana'a vali.
45 Rfadoku roak na'a Surat Ralan ne,
“Ubu notu lan lalean Adam ma nva'at ula ia.”
Na'uk Adam i nbana marmuri lalean a,
inyai Kristus i nala vava'at verin afakataka munuk.*
46 Tenadida ovi Ubu nala lan roak verin ita yai,
ntali lanit ivavan ini.
Tenadida ovi Ubu nala marmuri yai,
veka ntali lanit ratan.
47 Ubu notu tamata i ula lalean a tali lanun,
ovu ia ntali lanit ivavan ini.
Na'uk tamata i norang i ula lalean a,
Ia ntali lanit ratan.
48 Tamata ovi rtali lanit ivavan ini wearira lahir tamata i Ubu notu lan lalean a tali lanun.
Na'uk tamata ovi rna'a lanit ratan ra,
ira wearira lahir Ia i ntali lanit ratan a.
49 Fiang ini ita weadida roak tamata i Ubu notu ia tali lanun a.
Ba ita veka weadida vali Ia i ntali lanit ratan a.
50 Terang a valing averi,
ufalak verin mia ne,
ita tenadida ra rtali lanit ivavan ini,
ma laradida ovu ihidida ra rna'a,
ba wol bisma ti tna'a Ubu Ni Fareta na'a lanit ratan.
Tenadida ovi veka rmata ovu rakvisal watan ini wol bisma ti rna'a wan i vava'at kakiwal a na'a lanit ratan.
51 Eka mryenar ma lolin ma ufamalik afa fanfonak ini verin mia:
Tali did tinemun,
na ita veka wol tmata munuk,
na'uk Ubu veka notu ma ita munuk feladida ra ngorva'an ewal.
52 Na'ut i tamata ra rarenar tvuri ngoan i nban-muri lalean a,
na brian munuk Ubu notu lahir afa avyai,
wean i tkubak a tvelar watan matadida ra.
Na'ut inyai,
na Ia veka nfava'at ewal tamata matmatan ra ovu tenarira ngorva'an i ntali lanit ratan a.
Ita vali Ubu veka notu ma feladida ra munuk lahir ngorva'an ewal.
53 Tenadida i ntali lanit ivavan ini veka nmata ma nakvisal munuk,
ba Ubu veka nkati ovu tenadida i ntali lanit ratan a ma wol bisma nakvisal roak,
ma veka dida vava'at kakiwal.
54 Ba wean i Ubu nkati roak tenadida ovi veka rmata ini ovu tenadida ovi wol rmata,
te nkati roak tenadida ovi rtali lanit ivavan ini ovu tenadida tali lanit ratan a,
na veka nfakena lahir afa ovi rtulis roak na'a Surat Ralan wean ini,
“Ita utudida roak,
tevek Ubu nfaleka roak matmatan a,
ba ita dida roak vava'at kakiwal a.
55 Hoi matmatan!
Wean inba ovu mu ngrebat a ma fwaleka ami?
Wean inba ovu mu bisa a ma motu ma amfarnuang wawa'uk?”*
56 Matmatan ni bisa a,
ihin a salasilan,
ovu salasilan ni ngrebat a nvua matmatan tali Musa ni inukun ra.
Musa ni inukun avyai nfalyawang verin ita wean inba ma tka'a ne,
afa ovi totu ra kena te sala.
57 Na'uk ita musti tfalak fara weninyai verin Ubu,
tevek notu ma utudida lalawatan tali dida Duila'a Yesus Kristus.
58 Wean inyai bi,
terang a valing ovi ulobang urun mia,
bira dardirin a musti nangrebat na'a bira inorang a,
boma tamata ra wol rweang nala mia.
Mia musti iva'ubira urun ma mkyarya na'a Duila'a Ni va'i ralan a!
Tevek mkya'a roak ne,
bira karya ra verin Duila'a veka wol rleka ma lolan watan.