Misdovu bira kubang ra ma tala verin terad a valid ovi rorang Yesus
1 Terang a valing averi,
mane ufalak verin mia na'a kubang ovi inabira ma myala al mlyobang tamata ovi rorang Yesus na'a Yerusalem.
Era ma myot-orang afa ovi ufaturu roak verin sidovung tamata ovi rorang Yesus na'a Galatia.
2 Lokat amar kareda,
na mingnanang ma lokat mia fyadok-aling bira kubang boku tali bira karya enan ra.
Fyadoku kubang avyai na'a bira rahan ra,
ti naran i uma.
Deka mnyaban ma uma,
beti misdai ma misdovu bira kubang ra na'a isa.
3 Wean i uma aran roak,
na veka usinir tamata ovi fyili roak ira,
tevek mkya'a ne,
ira bisma rtaha kubang avyai rti Yerusalem.
Ya'a veka ala surat verin ira ma al nfaturu ne,
rfabana karya ini.
4 Ba wean i ufikir ne,
ni lolin a ya'a ovu vali,
na veka ovun ira ma amamunuk amati.
Paulus ni afa ovi veka notu ra
5 Terang a valing averi,
ya'a veka ahu propinsi Makedonia,
beti uti ma ulola mia.
6 Na'a Korintus,
na ya'a ulolak mia amar ifira veki,
te unaban ma amar ovi radridin a nbosal beti uti,
boma wean uti inba watan,
na bisma mlyobang ya'a na'a ning banbanan a.
7 Ba wol uti ma ulola mia obin,
betane wol una'a ma mnanat na'a inyai.
Na'uk wean i Duila'a ralan a nfalak,
na inak ma una'a inyai mnanat ovu mia.
8 Fiang ini una'a Efesus,
ba veka una'a ini ti naran amar i Yahudi ra rotu rira amar dawan Pentakosta.*
9 Una'a ini obin,
tevek ufabana karya i Duila'a nala verin ya'a ma tamata rivun rarenar Ni vaivatul ra,
velik ne tamata rivun rangal vali ya'a na'a karya ini.*
10 Wean i Timotius nti ma ntuan mia,
na msyi'ik ma lolin ia boma deka ralan a kako'u,
tevek ia wean watan ya'a ma amfabana Duila'a Ni karya a.
11 Ba deka msyi'ik watan ma tamata ra tali bira sidovung yai wol ralang ia.
Na'uk mlyobang ia,
boma bisma newal ia ovu lolin watan ma ntuan ya'a,
tevek unaban ia ovu terad a valid liak ovi veka rma vali ini.
12 Ya'a ufangnanang urun terad a valid i Apolos ma novun ni kida ovi rorang Yesus boku rti ma ralola mia.
Na'uk ia nafena ma nti fiang ini.
Na'uk amar liak,
na ia veka nti ma nalola mia.
Paulus nfakbosal ni surat a
13 Mia musti msyi'ik wabira ma lolin!
Bira dardirin a na'a bira inorang a musti nangrebat!
Deka byobar na'a bira inorang a,
na'uk myorang urun ovu ngrebat i nana'a ralabira ra.
14 Msyilobang mia na'a afa ovi myotu ra munuk.
15-16 Terang a valing averi!
Mia veka mkya'a roak ne,
na'a Propinsi Akhaya,
na Stefanus ovu ni rahan teta a ula lalean ira ma rorang Kristus.
Ira ralarira urun ma rkarya al rlobang tamata ovi rorang Yesus.
Wean inyai,
bi era urun verin mia,
ma myot-orang rira afa ovi rfalak ra,
ovu vali tamata ovi irmunuk a rkarya.
17 Ya'a ralang a lolin urun na'ut i Stefanus,
Fortunatus ovu Akhaikus rma.
Ira rna'a ini ma rkati bir tinemun,
tevek wol tna'a wan isa.
18 Ira rotu ma ralang a lolin urun,
wean lahir i rotu vali ma ralabira ra lolin a.
Ita musti talang tamata ovi wearira avyai.
19 Tamata ovi rorang Yesus rira sidovung ra na'a propinsi Asia rala salam verin mia.
Akwila ovu Priskila ovu vali sidovung tamata inorang i rasdovu ira na'a rira rahan a,
rala vali salam verin mia na'a Duila'a ovu ralarira urun,
tevek bira vava'at isa roak ovu Kristus.
20 Terabir-valibira ovi rorang Yesus na'a ini,
rala vali salam verin mia.
Ba lokat mia ka'i myala salam vali verin terabir-valibira ra ovu msyivoan mia ovu Ubu Ni Lolin a.
21 Ya'a Paulus ala salam verin mia.
Ya'a ka'i utulis vaivatul ovi rban-muri lalean na'a surat ini,
boma mkya'a ne,
aksa ya'a utulis surat ini.
22 Tamata ovi wol ralarira urun ma rlobang Duila'a,
na fara Ubu nukun ira ma rna'a yafwan kakiwal.
Era ma dida Duila'a nma ewal.
23 Fara Duila'a Yesus nala Ni rala lolin a verin mia.
24 Ulobang mia munuk tamata ovi bira vava'at isa roak ovu Kristus.
Kena urun.
Ning surat i utulis ini,
lawan watan ini.Ya'a Paulus,
ala salam verin mia