¹ Mbʋʋ Ɛsɔ labɩ ɛ-tʋmɩyɛ nɛ ɛtɛm-ɖɩ. Ɛlabɩ ɛsɔdaa nɛ tataa nɛ mbʋ pɩtɩŋa payɩ pɩwɛ pa-taa yɔ. ² Kɩyakʋ lʋbɛ (7) ñɩŋgʋ wiye lɛ, Ɛsɔ tɛm ɛ-tʋmɩyɛ tɩŋa, nɛ ɛhɛzɩ kɩyakʋ ŋgʋ^a. ³ Pʋwayɩ lɛ, ɛwazɩ kɩyakʋ lʋbɛ ñɩŋgʋ ŋ́gʋ kʋ-yɔɔ nɛ eyele kɩkɛ ɛ-ñɩŋgʋ. Mbʋ pʋyɔɔ yɔ, ɛlabɩ pɩtɩŋa payɩ lɛ, ki-wiye ɛhɛzaa. ⁴ Mbʋʋ Ɛsɔ labɩ ɛsɔdaa nɛ tataa alɩwaatʋ ndʋ ɛlakaɣ-wɛ yɔ.

Alɩwaatʋ ndʋ KƖPAƔLƲ Ɛsɔ labɩ ɛsɔdaa nɛ tataa yɔ, ⁵ cɔkɔyɛ naɖɩyɛ nɛ ñɩyʋʋ nakʋyʋ pataañɔ tɛtʋ yɔɔ. Mbʋ pʋyɔɔ yɔ, KƖPAƔLƲ Ɛsɔ taayebita se tɛʋ ɛnɩɩ tɛtʋ yɔɔ. Ɖɔɖɔ lɛ, nɔɔyʋ taawɛɛ se ɛhayɩ. ⁶ Ɛlɛ, hiɖe naɖɩyɛ taa lɩm lɩaɣnɩ tɛtɛɛ, nɛ pɩmɩzɩɣ tɛtʋ yɔɔ.

⁷ Peeye KƖPAƔLƲ Ɛsɔ cozi mʋzʋʋ tataa nɛ ɛlabɩnɩ ɛyʋ. Ɛlabɩ-ɩ lɛ, efezi ɛ-mɔɔŋ tɛɛ wezuu fezuu nɛ ɛyʋ pɩsɩ wezuu tʋ. ⁸ Pʋwayɩ lɛ, KƖPAƔLƲ Ɛsɔ siɣ kaɖaɣ nakɛyɛ egeetiye nɖɩ payaɣ se Edɛɛnɩ yɔ, ɖɩ-wɩsɩ ɖɩlɩyɛ hɔɔlʋʋ taa, nɛ ɛkpaɣ ɛyʋ weyi ɛlaba yɔ, nɛ ɛsɩɩ ka-taa. ⁹ Ɛlɛ, KƖPAƔLƲ Ɛsɔ yele nɛ tɩŋ ndɩ ndɩ weyi ŋna-ɩ ɛwɛ kɔcɔka yɔ ɛ-tɩŋa ɛñɔ. Ɛwɛ leleŋ. Eyeba ɖɔɖɔ nɛ tɩʋ ŋgʋ kɩhaɣ wezuu yɔ, nɛ ŋgʋ kiyeki se ɛyʋ ɛtɩlɩ mbʋ pɩwɛ ɖeu nɛ mbʋ pɩfɛyɩ ɖeu yɔ, pɔ́ñɔ kaɖaɣ ŋ́ga kɛ-hɛkʋ taa.

¹⁰ Pɔɔ sɔsɔɔ nakɛyɛ lɩaɣnɩ Edɛɛnɩ egeetiye taa nɛ kekpeŋ. Katɩŋaɣnɩ kaɖaɣ taa. Katalɩ kaɖaɣ taa peeye lɛ, katayɩ ka-tɩ pɔsɩ cikpesi naanza (4). ¹¹ Payaɣ kajalaɣ ñɩŋga se, Piisɔɔnɩ. Kɔcɔ ɛjaɖɛ nɖɩ payaɣ se, Hawiilaa yɔ, nɛ kata. Ɛjaɖɛ ńdɩ, ɖɩ-taa wɛ sika. ¹² Sika ŋ́ga, kɛfɛyɩ ɖaɣʋ. Ɛjaɖɛ ńɖɩ, ɖɩ-taa wɛ ɖɔɖɔ tɩŋ weyi e-ketu lɩɣ sɔzɩŋ yɔ, nɛ ñɩɣlɩm pɛ. ¹³ Payaɣ pɔɔ naalɛ ñɩŋga se Giihooni. Kaka ñɔcɔ ɛjaɖɛ nɖɩ payaɣ se Kuusi yɔ, nɛ kata. ¹⁴ Payaɣ naadozo (3) ñɩŋga se, Tiigiri. Kaka kpeŋ tɛtʋ ndʋ payaɣ se, Asuuri yɔ, ɖɩ-wɩsɩɖɩlɩyɛ hɔɔlʋʋ taa. Payaɣ pɔɔ naanza (4) ñɩŋga se, Efiraatɩ.

¹⁵ KƖPAƔLƲ Ɛsɔ sɩ ɛyʋ Edɛɛnɩ kaɖaɣ taa lɛ, eheyi-i se, ɛhayɩɣ nɛ ɛcɔŋnɩ kɔ-yɔɔ, ¹⁶ nɛ ɛɖʋ-ɩ paɣtʋ se, ɛpɩzɩɣ ɛtɔɔ kaɖaɣ taa tɩŋ tɩŋa pe. ¹⁷ Ɛlɛ, ɛtaatɔɔ tɩʋ ŋgʋ kiyeki se, ɛyʋ ɛtɩlɩ mbʋ pɩwɛ ɖeu yɔ, nɛ mbʋ pɩfɛyɩ ɖeu yɔ, kʋkʋ ñɩna. Mbʋ pʋyɔɔ yɔ, puwiye nɖɩ ɛtɔkɩ-yɛ yɔ, ɛsɩkɩ.

¹⁸ Pʋwayɩ lɛ, KƖPAƔLƲ Ɛsɔ ɖʋ ɛ-taa se, pɩfɛyɩ ɖeu se, ɛyʋ ɛwɛɛ e-ɖeke, se, ɛlakɩ-ɩ sɩnɩyʋ nɔɔyʋ nɛ ɛ́lɛ kɛ ɛ-ɛgbaadʋ. ¹⁹ Peeye KƖPAƔLƲ Ɛsɔ cozi tataa mʋzʋʋ nɛ ɛmanɩ tɛyɛ kpɩna tɩŋa nɛ ɛsɔdaa sumasɩ tɩŋa nɛ ewonɩ-wɛ ɛyʋ cɔlɔ se, ɛna se ɛ́lɛ yaɣ-wɛ se we? Paa kpɩnɛ nɖɩ lɛ, ɛyʋ yaɣ-ɖɩ yɩɖɛ nɖɩ yɔ, nɖɩɩ payaɣ-ɖɩ. ²⁰ Ewoni-wɛ lɛ, ɛyʋ yaa ɖɩɣa kpɩna nɛ ɛsɔdaa sumasi nɛ tɛyɛ kpɩna yɩla. Ɛlɛ, ɛ-maɣmaɣ ɛtana ɛgbaadʋ weyi ɛ́lɛ pɩzɩɣ ɛsɩnɩ-ɩ yɔ. ²¹ Ɖɩnɛɛ KƖPAƔLƲ Ɛsɔ yeba nɛ ɖom nabʋyʋ kpa ɛyʋ nɛ eɖoo ɛzɩ ɛsɩba yɔ, nɛ ɛlɩzɩ e-sinaɣ lɛɛka nɛ ɛpɩsɩnɩ nandʋ nɛ ɛtɔ ko-lone taa. ²² Pʋwayɩ lɛ, KƖPAƔLƲ Ɛsɔ kpaɣ sinaɣ ŋga ɛlɩzaa yɔ nɛ ɛlabɩnɩ halʋ nɛ ewoni ɛ́lɛ abalʋ cɔlɔ. ²³ Abalʋ na-ɩ lɛ, pɩkɛdɩnɩ-ɩ nɛ ɛtɔ se,

²⁴ Pʋ-yɔɔ abalʋ yeki ɛ-caa nɛ e-ɖoo nɛ ɛkpaɣ halʋ nɛ pa-naalɛ papɩsɩ ɛyʋ kʋɖʋm.

²⁵ Halʋ nɛ ɛ-walʋ pa-naalɛ paawɛ ntaakpeɖe, ɛlɛ, fɛyɛ taakpaɣ-wɛ nɛ ɖama.