3
Ɛsɔ ɖɔɔnʋʋ halʋ nɛ ɛ-walʋ Edɛɛnɩ kaɖaɣ taa yɔ
1 Tɛyɛ kpɩna wena KƖPAƔLƲ Ɛsɔ laba yɔ, a-taa lɛ, ɖʋm kakɩlɩnɩ ajiitu. Nakʋyʋ wiye lɛ, ewolo ɛpɔzʋʋ halʋ se, Ɛsɔ heyi-wɛ toovenim se pataatɔɔ kaɖaɣ taa tɩŋ tɩŋa payɩ pe naa? 2 Halʋ cosi ɖʋm se, papɩzɩɣ pɔtɔɔ kaɖaɣ taa tɩŋ pe. 3 Piyele ŋgʋ kɩwɛ kaɖaɣ hɛkʋ taa yɔ kɩ-ñɩna lɛ, Ɛsɔ tɔm se, pataatɔɔ-yɛ, pataatukuna. Pɩtɛkɛ ḿbʋ, pasɩkɩ. 4 Peeye ɖʋm kitini halʋ se, pɩlɩ paasɩkɩ kaʋ. 5 Ɛlɛ, se, Ɛsɔ nawa se puwiye nɖɩ pɔtɔkɩ-yɛ yɔ, pɛ-ɛza kuluu nɛ pɛwɛɛ ɛzɩ ɛnʋ yɔ: Patɩlɩɣ mbʋ pɩwɛ ɖeu yɔ, nɛ mbʋ pɩfɛyɩ ɖeu yɔ.
6 Halʋ cɔnaa lɛ, ɛna se tɩʋ ŋ́gʋ ki-pe wɛ kɔcɔka, paa pɩɩla ɛzɩma yɔ, awɛɣ ɖeu, amʋnaa se pɔtɔɔ-yɛ nɛ pɛ-ɛza kuli. Peeye ekoyi tɩʋ ŋ́gʋ ki-piye nɛ ɛtɔɔ nɛ pɩkazɩ ɛha ɛ-walʋ nɛ ɛ́lɛ tɔɔ ɖɔɖɔ. Ɛ́lɛ, kɛwɛ ɛ-cɔlɔ peeye. 7 Pɔtɔɔ ḿbʋ lɛ, pa-naalɛ pɛ-za kuli nɛ pana se paawɛ ntaakpeɖe. Ɖɩnɛɛ pakpabɩ tɩʋ hatʋ nɛ pɔtɔɔlɩ.
8 Pɩkɔma ɛzɩ ɖanaɣ yɔ lɛ, heelifɛtaɣ nakɛyɛ pazɩ mabʋ nɛ halʋ nɛ ɛ-walʋ panɩɩ KƖPAƔLƲ Ɛsɔ taŋ, ɛɖɔŋaɣ kaɖaɣ taa. Panɩ ḿbʋ lɛ, pese pɛmɛlɩ kaɖaɣ taa tɩŋ hɛkʋ taa se, KƖPAƔLƲ Ɛsɔ ɛtaana-wɛ. 9 Ɛlɛ, KƖPAƔLƲ Ɛsɔ yaa abalʋ nɛ ɛpɔzɩ-ɩ se, leɣ ɛwɛɛ? 10 Ecosi-i se, ɛnʋ nɩ ɛ-taŋ kaɖaɣ taa nɛ sɔɔndʋ kpa ɛnʋ nɛ ɛnʋ se nɛ ɛmɛlɩ, mbʋ pʋyɔɔ yɔ, ɛnʋ wɛ ntaakpeɖe. 11 Ɛ́lɛ ñɔpɔzɩ-ɩ se, aheyi-i se ɛwɛ ntaakpeɖe? Ɛtɔɔ tɩʋ ŋgʋ eekizini-i yɔ yaa we? 12 Abalʋ cosi se, halʋ weyi ɛnʋʋ Ɛsɔ ɛsɩ-ɩ ɛ-cɔlɔ yɔ, ɛnʋ cɛlɩnɩ-ɩ tɩʋ ŋ́gʋ ki-piye nɛ ɛtɔɔ.
13 Peeye KƖPAƔLƲ Ɛsɔ pɔzɩ halʋ se, ɛbɛ lɛ ɛlabɩ mbʋ yɔ? Ɛ́lɛ ñocozi se, ɖʋm cɛtɩnɩ-ɩ nɛ ɛtɔɔ tɩʋ ŋ́gʋ ki-piye.
14 Ɖɩnɛɛ KƖPAƔLƲ Ɛsɔ heyi ɖʋm se,
Ɖenɖe ɛlabɩ ḿbʋ yɔ, ɛnʋ wɩlɩɣ-ɩ kpalʋʋ:
Kpɩna tɩŋa payɩ taa lɛ,
ɛkaɣ tuu e-lotu yɔɔ
ɛkaɣ tɔɔʋ mʋzʋʋ
e-wezuu caɣʋ tɩŋa payɩ. 15 Ɛtasɩ heyuu ɖʋm se,
Ɛɖʋʋ koyindiye halʋ nɛ ɛnʋʋ ɖʋm pɛ-hɛkʋ taa,
nɛ ɛnʋʋ ɖʋm e-liɖe taa ñɩma nɛ halʋ ñɩnɖɛ taa ñɩma pɛ-hɛkʋ taa.
Halʋ liɖe taa ñɩma yɔkʋʋ ɛnʋʋ ɖʋm ɛ-ñʋʋ,
piyele ɛnʋʋ ɖʋm ɛñasɩ halʋ liɖe taa ñɩma naakikila.
16 Pʋwayɩ lɛ, KƖPAƔLƲ heyi halʋ se,
Ɛnʋ yeki nɛ ɛnɩɩ siziŋ alɩwaatʋ ndʋ ɛhakɩ hoa yɔ,
Ɛkɔŋ lʋlʋʋ e-piya lɛ, ɛtɔkɩ kʋñɔŋ.
E-liu wɛɣ ɛ-walʋ,
Ɛlɛ, ɛ́lɛ ɖʋʋnɩ-ɩ paɣtʋb.
17 Piyele eheyi abalʋ se, ɖenɖe ɛnɩ ɛ-halʋ nɔɔ taa tɔm nɛ ɛtɔɔ tɩʋ ŋgʋ eekizini-i kpem yɔ ki-pe yɔ,
ɛ-kɩwɛɛkɩm yɔɔ lɛ,
ɛnʋʋ Ɛsɔ ɛwɩlɩɣ tɛtʋ kpalʋʋ.
Ekonuu nɛ ɛyaɣ
nɛ pɩcɔ ehiɣ ɛtɔɔ
e-wezuu caɣʋ tɩŋa.
18 Ɛ-yɔɔ lɛ, ɛnʋ yeki nɛ
sɔɔ ndɩ ndɩ ñɔ tɛtʋ yɔɔ.
Mbʋ pɩñɔʋ hayɩm taa yɔ,
mbʋ kaɣnɩ kɛʋ ɛ-tɔɔnaɣ.
19 Etiŋ soŋaɣ nɛ pɩcɔ
ehiɣ mbʋ ɛkɔtɔɔ yɔ,
nɛ pɩkɔɔ pɩsɩnɩ alɩwaatʋ ndʋ ɛpɩsɩ tataa
ɖenɖe palɩzɩnɩ-ɩ yɔ.
Mʋzʋʋ palabɩnɩ-ɩ,
kɩ-taa ɛpɩsɩɣ ɖɔɖɔ.
20 Abalʋ yaa ɛ-halʋ se, Ɛɛvɩ, pʋ-tɔbʋʋ se: Wezuu, mbʋ pʋyɔɔ yɔ, ɛnʋʋ lɛ ḿba patɩŋa payɩ pɛwɛ wezuu yɔ po-ɖoo. Payaɣ abalʋ se Aɖam. 21 KƖPAƔLƲ Ɛsɔ tɛm yɔɔdɩnaʋ Aɖam lɛ, ɛñɛyɩ ɛ nɛ ɛ-halʋ tɔna wondu nɛ esuu-wɛ. 22 Pʋwayɩ lɛ, ɛyɔɔdɩ se, Lɛɛlɛɛyɔ, ɛyʋ pɩsɩ ɛzɩ pa-taa lɛlʋ yɔ, ɛsɩma mbʋ pɩwɛ ɖeu yɔ nɛ mbʋ pɩfɛyɩ ɖeu yɔ. Pʋ-yɔɔ lɛ, paɖaŋ-ɩ nɛ ɛtaatasɩ tukunaʋ wezuu tɩʋ pe. Pɩtɛkɛ mbʋʋ yɔ, ɛwɛɣ wezuu tam yɔɔ. 23 Peeye KƖPAƔLƲ Ɛsɔ ɖɔɔnɩ ɛyʋ kaɖaɣ taa se, ewolo ɛhayɩ tɛtʋ ndʋ pamanɩ-ɩ yɔ. 24 Ɛɖɔɔnɩ-ɩ ḿbʋ lɛ, ɛsɩɩ e-tiyiyaa ḿba paɖaŋɩɣ yɔ, Edɛɛnɩ kaɖaɣ wɩsɩɖɩlɩyɛ hɔɔlʋʋ taa se, paɖaŋ tɩʋ ŋgʋ kɩhaɣ wezuu yɔ kʋ-yɔɔ. Pɔɖɔkɩ miŋ sɛsɩ nɛ papɩsɩɣ-sɩ yem kpɛlɩ kpɛlɩ.