¹ Aɖam nɛ ɛ-halʋ Ɛɛvɩ pɔkɔma pacaɣ lɛ, ɛ́lɛ haɣ hoa nɛ ɛlʋlɩ pɩɣa nɛ ɛyaa-kɛ se, Kayɩnɩ, nɛ ɛtɔ se, KƖPAƔLƲ ɖoŋ taa ɛlʋlɩ-kɛ. ² Pʋ-wayɩ lɛ, ɛlʋlɩ Kayɩnɩ neu nɛ payaa ɛ́lɛ se, Aabɛɛlɩ.

Aabɛɛlɩ kɛkɛ ninɖiɣyu nɛ Kayɩnɩ ñɛkɛ haɖʋ. ³ Pɔkɔma pɛtɛ tɔɔnaɣ kʋm lɛ, Kayɩnɩ ha KƖPAƔLƲ mbʋ ɛhayaa yɔ pɩ-taa nabʋyʋ. ⁴ Aabɛɛlɩ ñowoni ɖɔɖɔ ɛ́lɛ kpɩna taa kajalaɣ heɣsi nasɩyɩ nɛ si-nim se ɛlaa KƖPAƔLƲ. KƖPAƔLƲ nɩnɩ Aabɛɛlɩ nɛ ɛmʋ ɛ-kɩlaʋ. ⁵ Ɛlɛ, ɛtamʋ Kayɩnɩ ñɩŋgʋ. Pʋ-yɔɔ ɛ́lɛ pana kpawa siŋŋ nɛ ɛwɛɛ ɛza ñɩŋɩyɛ taa. ⁶ Peeye KƖPAƔLƲ pɔzɩ-ɩ se, pɩlabɩ ɛzɩma nɛ ɛ-pana kpa ḿbʋ? Pɩlabɩ ɛzɩma nɛ ɛwɛɛ ɛza ñɩŋɩyɛ taa ḿbʋ? ⁷ Eheyi-i se ye ɛlakɩ mbʋ pɩwɛ ɖeu yɔ́ɔ yɔ, ɛwakɩ. Ɛlɛ, ye ɛɛlakɩ ɖeu yɔ, kɩwɛɛkɩm pabɩ ɛ-nɔnɔɔ taa ɛzɩ kpɩnɛ yɔ. Pɩmɛlaa nɛ pɩɖaŋ se, pɩkpa-ɩ. Ɛlɛ, ɛnʋʋ lɛ, pɩwɛɛ se, ɛkɩlɩ-pʋ ɖoŋ nɛ ɛwabɩ-pʋ.

⁸ Paa ḿbʋ yɔ, Kayɩnɩ ya e-neu se, palɩɩ. Palɩ awayɩ hayɩm taa lɛ, ɛtɩɖabʋ e-neu Aabɛɛlɩ nɛ ɛkʋ-ɩ nɛ ɛsɩ.

⁹ Peeye KƖPAƔLƲ pɔzɩ Kayɩnɩ se, leɣ e-neu Aabɛɛlɩ wɛɛ? Ɛ́lɛ cosi se, ɛɛsɩŋ. Ekitini se, ɛnʋ kɛnɩ ɛnʋ neu yɔɔ cɔnɩyʋ naa we? ¹⁰ KƖPAƔLƲ kitini-i se, ɛbɛɛ ɛlabɩ ḿbʋ yɔ? Ɛnʋʋ KƖPAƔLƲ ɛnɩɣ e-neu Aabɛɛlɩ calɩm taŋ nɛ tataa nɛ pɩkpaɣnɩ ɛnʋ cɔlɔ kiŋ. ¹¹ Pʋ-yɔɔ KƖPAƔLƲ heyi-i se, nɔɔnɔɔ yɔ, pawɩlɩɣ-ɩ kpalʋʋ tɛtʋ ndʋ tɩ-yɔɔ ɛkpɛdɩ e-neu calɩm yɔ, tɩ-yɔɔ. ¹² Alɩwaatʋ ndʋ ɛhayɩɣ yɔ, tɛtʋ ɛɛtasɩɣ wɛʋ mʋzʋŋ. Ɛwɛɣ nɛ etoluu nɛ ɛkpaɣ nɛ etiki tɛtʋ yɔɔ. ¹³ Peeye Kayɩnɩ heyi KƖPAƔLƲ se, ɛnʋ nɩŋgbaaŋ hɔm ɖɛlɩsɩ niye. ¹⁴ Ye sɔnɔ ɛɖɔɔnɩ-ɩ tɛtʋ tʋnɛ tɩ-yɔɔ yɔ, ɛnʋ seɣ nɛ eposini KƖPAƔLƲ. Ɛwɛɣ nɛ etoluu nɛ ɛkpaɣ nɛ etiki tɛtʋ yɔɔ, nɛ ye nɔɔyʋ ɛna ɛnʋ yɔ, ɛ́lɛ kʋ-ɩ. ¹⁵ Ɖɩnɛɛ KƖPAƔLƲ cosi-i se, pɩɩlakɩ mbʋ! Ye nɔɔyʋ ɛkʋ Kayɩnɩ yɔ, pɩwɛɛ se pakʋ ɛyaa lʋbɛ (7) nɛ pakpanɩ ɛ-kɩmɩyɛ.

Peeye KƖPAƔLƲ ɖʋ yʋsaɣ nakayɛ Kayɩnɩ yɔɔ se, ye nɔɔyʋ ɛkatɩ-ɩ lɛ, ɛ́lɛ ɛtaakʋ-ɩ. ¹⁶ Pʋ-wayɩ lɛ, Kayɩnɩ kʋyɩ ɛɖɛɛ, nɛ eposini KƖPAƔLƲ, nɛ ewolo ɛcaɣ Edɛɛnɩ wɩsɩɖɩlɩyɛ hɔɔlʋʋ taa, ɛjaɖɛ nɖɩ payaɣ se, Noodi yɔ ɖɩ-taa.

¹⁷ Kayɩnɩ kɔma ɛkpaɣ halʋ nɛ ɛ nɛ ɩ pacaɣ lɛ, ɛ́lɛ haɣ hoa nɛ ɛlʋlɩ pɩɣa nɛ ɛyaa-kɛ se, Eenɔɔkɩ. Peeye ɛpazɩ tɛtʋ natʋyʋ taa ɖɛsɩ maʋ nɛ ɛyaa-tʋ ɛ-pɩyalʋ hɩɖɛ se, Eenɔɔkɩ. ¹⁸ Eenɔɔkɩ ñalʋlɩ Iiraadɩ, Iiraadɩ ñalʋlɩ Mehuuyaayɛɛlɩ, ɛ́lɛ ñalʋlɩ Metuusaayɛɛlɩ, Metuusaayɛɛlɩ ñalʋlɩ Leemɛɛkɩ.

¹⁹ Leemɛɛkɩ ñakpaɣ halaa naalɛ, payaɣ kajalaɣ-tʋ se, Adaa nɛ lɛlʋ se Cilaa. ²⁰ Adaa lʋlɩ pɩɣa nɛ payaa-kɛ se, Yaabaalɩ. Ɛ́lɛ kɛnɩ ḿba pasʋʋ kɩɖanɖɩŋ tɛɛ nɛ pɔɖɔʋ wondu yɔ, pɔ-cɔzɔ. ²¹ Palʋlɩ e-neu nɛ payaa-ɩ se, Yuubaalɩ. Ɛ́lɛ ñɛkɩnɩ ḿba patɩŋa payɩ pamakɩ cɩmʋʋ nɛ pahʋlʋʋ hɩsɩ yɔ, pɔ-cɔzɔ. ²² Weyi payaɣ se, Cilaa yɔ, ɛ́lɛ lʋlɩ pɩɣa nɛ payaa-kɛ se, Tubaalɩ Kayɩnɩ. Ɛ́lɛ kɛnɩ kolu. Eluki wondu ndʋ tɩwɛ lɔŋ yɔ, nɛ ñɩɣyʋʋ ŋgʋ payaɣ se, fɛɛrɩ yɔ, nɛ ŋgʋ payaɣ se, bɩrɔnɩzɩ yɔ. Tubaalɩ Kayɩnɩ neu halʋ ñɩnʋ payaɣ se, Naama.

²³ Peeye Leemɛɛkɩ heyi ɛ-halaa

²⁵ Aɖam nɛ ɛ-halʋ patasɩ caɣʋ, nɛ Ɛɛvɩ lʋlɩ abalɩbɩɣa nɛ ɛyaa-kɛ se, Sɛɛtɩ, nɛ ɛtɔ se, Ɛsɔ ha ɛnʋʋ abalɩbɩɣa lɛɛka Aabɛɛlɩ weyi Kayɩnɩ kʋwa yɔ, e-lone taa. ²⁶ Sɛɛtɩ ñalʋlɩ abalɩbɩɣa, nɛ ɛyaa-kɛ se, Enɔɔsɩ. Alɩwaatʋ ndʋʋ ɛyaa pazɩ Ɛsɔ sɛʋ nɛ payaɣ-ɩ se, KƖPAƔLƲ.