¹ Alɩwaatʋ ndʋ ɛyaa pazɩ húuu kedeŋa yɔɔ lɛ, pɛlaa ɖɔɔ pa-taa. ² Ɛlɛ, Ɛsɔ pɩyalaa ^c na se pɛlaa mba peɖewa, nɛ powolo pɔcɔnɩ pa-taa nɛ pakpaɣ halaa. ³ Peeye KƖPAƔLƲ hʋ ɛ-taa nɛ ɛtɔ se, e-wezuu ŋgʋ ɛha ɛyʋ nɛ ɛ́lɛ ñefeziɣ yɔ, kɩtaawɛɛ ɛ-taa tam. Ɛ́kɛ tomnaɣ ŋga kaɖazɩɣ yɔ. Pʋ-yɔɔ lɛ, ɛ-pɩnzɩ kɛɣ mɩnʋʋ nɛ nɩɩlɛ (120) ɖeke tɛtʋ yɔɔ. ⁴ Alɩwaatʋ ndʋ Ɛsɔ pɩyalaa kpaɣ ɛyaa pɛlaa nɛ palʋlɩ piya lɛ, ɛyaa kɩɖaɣlaa pazɩ wɛʋ tɛtʋ yɔɔ, nɛ pɩkɔɔ pɩsɩnɩ alɩwaatʋ natʋyʋ. Pɛkɛ ɖooo caanaʋ taa sɔdɩŋ, pa-hɩla sɛwa siŋŋ.

⁵ KƖPAƔLƲ wɛɛ ɛnaɣ se, ɛyaa kañatʋ wɛɛ pɩkpaɣ ɖoŋ kɩkpaʋ paa le tɛtʋ yɔɔ, nɛ ɛyʋ wɛɛ ɛmaɣzɩɣ kɩwɛɛkɩm labʋ yɔɔ ɖeke tam. ⁶ Peeye KƖPAƔLƲ laŋɩyɛ pɩsaa nɛ ekpiɖi se, ɛɛnawa ɛtaala ɛyʋ nɛ ɛ́lɛ ñɛwɛɛ tɛtʋ yɔɔ? ⁷ Ɖɩnɛɛ ɛɖʋ ɛ-taa se, ɛɖɩzɩɣ ɛyaa ḿba ɛlabɩ-wɛ yɔ. Ɛɖɩzɩɣ kpaɣ ɛyʋ nɛ piwolo pɩsɩnɩ kpɩna, nɛ tɛtɛ ñɩtʋ nɛ sumasi ɛsɔdaa. Toovenim, ɛnʋ kpiɖiɣ se, ɛɛnawa ɛtaalabɩ-wɛ. ⁸ Ɛlɛ, KƖPAƔLƲ la Nowee lootiye.

⁹ Ɩna Nowee tɔm.

Nowee kɛkɛ ɛyʋ kʋtʋʋzʋ Ɛsɔ ɛsɩndaa, ɛlakɩ mbʋ Ɛsɔ liu wɛɛ yɔ nɛ ɛ nɛ ɩ pɛwɛɛ ɖama taa. ¹⁰ Ɛwɛnɩ abalɩbiya naadozo (3): payaɣ lɛlʋ se Sɛm, lɛlʋ se Kam nɛ lɛlʋ se Yaafɛɛtɩ.

¹¹ Kedeŋa yɔɔ ɛyaa taatʋʋzɩ Ɛsɔ ɛsɩndaa, kañatʋ su kɔ-yɔɔ. ¹² Ɛsɔ cɔnɩ tɛtʋ yɔɔ lɛ, ɛna se, ɛyaa tɩŋa wɛɛkaa. Toovenim lɛ, ɛyaa tɩŋa lakaɣ mbʋ pɩtatʋʋzɩ yɔ. ¹³ Peeye Ɛsɔ heyi Nowee se, ɛnʋ tɛŋ ɛyaa tɩŋa tɔm. Pa-lakasɩ yɔɔ ɛzaɣtʋ su kedeŋa yɔɔ. Pʋ-yɔɔ lɛ, ɛɖɩzɩɣ-wɛ tɛtʋ yɔɔ. ¹⁴ Ɛnʋʋ Nowee lɛ, ɛ́saɣ ɛ nɛ ɛ-hɔʋ taa ñɩma mɛlɛ sɔsɔʋ nɛ tɩʋ ŋgʋ kɩ-ɖasɩ wɛ ɖoŋ yɔ. Kɩ-taa lɛ, ɛtayɩ hɔɔlɩŋ ndɩ ndɩ nɛ ɛtaa anwa, kɩ-taa nɛ kɩ-wayɩ. ¹⁵ Mɛlɛ ŋ́gʋ, kɩ-ɖaɣlɩkɩŋ ɛkɛ mɛtanaa mɩnʋʋ nɛ nɩɩnʋwa (150), nɛ kɩ-walanzɩ ñɛkɛ mɛtanaa nɩɩlɛ nɛ kagbaanzɩ (25) nɛ kɩ-kʋkʋyɩmɩŋ ñɛkɛ mɛtanaa hiu nɛ kagbaanzɩ (15). ¹⁶ Ɛ́tɛma lɛ, ɛ́lɔ kʋ-yɔɔ. Ɛ́lɔkɩ lɛ, ɛ́kazɩ mɛta hɔɔlʋʋ (0,5), lɔbɩtʋ nɛ koloŋa pɛ-hɛkʋ taa, nɛ ñalɩmɩyɛ sʋʋ. Ɛ́tʋlɩ kʋ-nɔnɔɔ hʋyʋʋ taa. Ɛ́tayɩ kɩ-taa ɛsɔdaa kuduyu tɩyɛ: hadɛ ñɩŋgʋ, nɛ hɛkʋ taa ñɩŋgʋ, nɛ hayo ñɩŋgʋ. ¹⁷ Pɩkazɩ ɛnʋʋ Ɛsɔ lɛ, éyeki nɛ kigiluu tɛʋ kɔɔ nɛ pɩɖɩzɩ mbʋ pɩwɛ wezuu tɛtʋ yɔɔ yɔ. Mbʋ pɩ-tɩŋa payɩ pɩwɛ tɛtʋ yɔɔ yɔ, pɩtɛŋɛlɩɣ. ¹⁸ Ɛlɛ, ɛnʋʋ Ɛsɔ, ɛhaɣ nɔɔ se, ɛnʋʋ Nowee nɛ ɛ-halʋ nɛ ɛ-pɩyalaa nɛ e-wolaa pasʋʋ mɛlɛ taa. ¹⁹ Pɩwɛɛ se, eyele nɛ paa kpɩnɛ nɖɩ ɖɩ́sʋʋ mɛlɛ taa halʋ nɛ abalʋ, halʋ nɛ abalʋ, nɛ ɛ nɛ wɛ palɩɩ pɩ-taa. ²⁰ Sumasi ndɩ ndɩ nɛ kpɩna ndɩ ndɩ nɛ tɛtɛ wondu ndɩ ndɩ, paa pa-taa weyi halʋ nɛ abalʋ, powokɩ ɛ-cɔlɔ nɛ pɛwɛɛ wezuu. ²¹ Pɩwɛɛ se, ɛnʋʋ Nowee lɛ, ɛ́kpaɣ tɔɔnasɩ nzɩ sɩ-tɩŋa nɛ ɛ́sɩnɩ hɔɔlʋʋ, nɛ patɩŋa payɩ pɔ́tɔɔ.

²² Nowee ña Ɛsɔ, nɛ ɛla mbʋ pɩtɩŋa payɩ eheyi-i yɔ.