¹ Pʋwayɩ lɛ, KƖPAƔLƲ heyi Nowee se, ɛ nɛ ɛ-hɔʋ taa ñɩma pásʋʋ mɛlɛ taa, mbʋ pʋyɔɔ yɔ, e-ɖekeɣ ɛnʋ naɣ se ɛkɛ ɛyʋ kʋtʋʋzʋ siŋŋ ɛyaa tɩŋa taa. ² Ɛsʋʋ lɛ, ɛ́kpɛndɩnɩ wazaɣ kpɩna, ^d halʋ nɛ abalʋ, halʋ nɛ abalʋ, tɔm lʋbɛ. Pɩkazɩ wena alɛ tɛkɛ wazaɣ ñɩna yɔ, halʋ nɛ abalʋ, halʋ nɛ abalʋ. ³ Ɖɔɖɔ lɛ, ɛ́kpaɣ sumasɩ, paa ŋga, halʋ nɛ abalʋ, halʋ nɛ abalʋ, tɔm lʋbɛ nɛ pataamʋʋ tɛtʋ yɔɔ. Lɩm kɔŋ pɩsɔɔ lɛ, palʋlɩ nɛ pihuúu. ⁴ Mbʋ pʋyɔɔ yɔ, kɩyakɩŋ lʋbɛ (7) taa, ɛnʋ yeki nɛ kigiluu tɛʋ nɩɩ tɛtʋ yɔɔ kɩyakɩŋ nɩɩnaza (40) wɩsɩ nɛ ɖoó, nɛ ɛɖɩzɩ mbʋ ɛnʋ laba yɔ pɩ-tɩnɛ payɩ: ɛyaa nɛ kpɩna.

⁵ Nowee ña KƖPAƔLƲ nɛ ɛla mbʋ pɩtɩŋa payɩ eheyi-i yɔ ɖeyiɖeyi.

⁶ Alɩwaatʋ ndʋ kigiluu tɛʋ nɩwa nɛ lɩm pazɩ walʋʋ tɛtʋ yɔɔ yɔ, Nowee kɛwɛnɩ pɩnzɩ taŋga nɛ mɩnʋʋ (600). ⁷ Peeye Nowee nɛ ɛ-halʋ nɛ e-piya nɛ e-wolaa pasʋ mɛlɛ taa se, patʋlɩ kigiluu tɛʋ nɛ lɩm. ⁸ Wazaɣ kpɩna nɛ wena afɛyɩ wazaɣ yɔ nɛ sumasɩ nɛ mbʋ payɩ pɩwɛ wezuu tɛtʋ yɔɔ yɔ, ⁹ pa-tɩŋa payɩ naalɛ naalɛ, halʋ nɛ abalʋ halʋ nɛ abalʋ, patalɩ Nowee cɔlɔ, mɛlɛ taa ɛzɩ Ɛsɔ keheyuu-i yɔ. ¹⁰ Pɩkɔma pɩla kpɩtaʋ lɛ, kigiluu tɛʋ lɩm suwa nɛ pɩwalɩ tɛtʋ tɩŋa yɔɔ.

¹¹ Pɩnaɣ ŋga Nowee wɛnɩ pɩnzɩ taŋga nɛ mɩnʋʋ (600) yɔ, ka-taa, fenaɣ naalɛ ñɩŋga taa, kɩyakʋ hiu nɛ lʋbɛ (17) ñɩŋgʋ wiye, tɛtɛɛ liŋgamɩŋ hila sɔsɔna nɛ ɛsɔtɔnʋʋ patʋlaa hooo, ¹² nɛ kigiluu tɛʋ pazɩ nɩʋ tɛtʋ yɔɔ, kɩyakɩŋ nɩɩnaza (40), wɩsɩ nɛ ɖoó. ¹³ Kɩyakʋ ŋgʋ ki-wiye, Nowee nɛ ɛ-halʋ nɛ ɛ-pɩyalaa, Sɛm nɛ Kam nɛ Yaafɛɛtɩ nɛ e-wolaa, pasʋ mɛlɛ taa. ¹⁴ Kpɩna ndɩ ndɩ sʋwa ɖɔɖɔ: tɛyɛ kpɩna ndɩ ndɩ nɛ ɖɩɣa ñɩna ndɩ ndɩ nɛ tɛtɛ ñɩtʋ ndɩ ndɩ nɛ sumasɩ ndɩ ndɩ nɛ furufuruwaa. ¹⁵ Mbʋ pɩtɩɩwɛ wezuu yɔ, pɩtɩŋa payɩ pɩsʋ Nowee cɔlɔ, halʋ nɛ abalʋ halʋ nɛ abalʋ. ¹⁶ Paa kpɩnɛ nɖɩ, ɖɩsʋ halʋ nɛ abalʋ ɛzɩ Ɛsɔ keheyuu Nowee yɔ. Peeye KƖPAƔLƲ ɖɩɣ pɔ-yɔɔ pɔɔyʋʋ.

¹⁷ Kigiluu tɛʋ nɩɩ kɩyakɩŋ nɩɩnaza (40) tɛtʋ yɔɔ. Kɩnɩɣaɣ ḿbʋ lɛ, lɩm wɛɛ pɩkpaɣ nɛ pɩkʋsʋʋ mɛlɛ. ¹⁸ Pɩwɛɛ pɩkpaɣ nɛ pihuuzi tɛtʋ yɔɔ, nɛ pɩcɔzʋʋ mɛlɛ. ¹⁹ Halɩ pɩkɔɔ pisu tɛtʋ yɔɔ nɛ pɩwalɩ pʋŋ sɔsɔŋ tɩŋa yɔɔ. ²⁰ Pɩkɔma pɩtɛmna se, lɩm kpawa, nɛ pɩɖɛɛ pʋŋ yɔɔ ɛzɩ mɛtanaa lʋbɛ (7) ḿbʋ yɔ. ²¹ Mbʋ pɩ-tɩŋa payɩ pɩɩwɛ wezuu tɛtʋ yɔɔ yɔ, pɩsɩba: sumasɩ nɛ ɖɩɣa kpɩna nɛ tɛyɛ ñɩna nɛ tɛtɛ ñɩtʋ nɛ ɛyaa pa-tɩŋa payɩ. ²² Tɛtʋ yɔɔ kpɩna wena awɛ wezuu nɛ afeziɣ yɔ, asɩba. ²³ Mbʋʋ KƖPAƔLƲ ɖɩzɩ mbʋ pʋwɛnɩ wezuu tɛtʋ yɔɔ yɔ, pɩtɩŋa payɩ: ɛyaa nɛ kpɩna sɔsɔna nɛ cikpena halɩ pɩkpɛndɩnɩ sumasɩ ɛsɔdaa. Ɛɖɩzɩ pa-tɩŋa payɩ nɛ pɩkazɩ Nowee nɛ mba ɛ nɛ wɛ pɛwɛ mɛlɛ taa yɔ.

²⁴ Lɩm walɩ tɛtʋ yɔɔ mbʋʋ kɩyakɩŋ mɩnʋʋ nɛ nɩɩnʋwa (150).