¹ Pɩnzɩ nzɩ Saaraa caɣ wezuu yɔ, sɩkpɛndɩ mɩnʋʋ nɛ nɩɩlɛ nɛ lʋbɛ (127). ² Pʋwayɩ lɛ, ɛsɩ Kanaanɩ ɛjaɖɛ taa, Kiriyaatɩ Arɩbaa tɛtʋ taa, payaɣ-tʋ ɖɔɖɔ se Hɛbɩrɔɔnɩ, halɩ nɛ sɔnɔ. Ɛsɩba lɛ, Abɩraham ñɔɔzɩ-ɩ nɛ ewii-i. ³ Pʋwayɩ lɛ, eyebi-i nɛ ɛkʋyɩ ewolo Hɛɛtɩ sayɩnaa cɔlɔ, nɛ eheyi-wɛ se, ⁴ ɛnʋ kɛ ɛgɔm, ɛkɛ caɣyʋ pɛ-tɛ. Se, péhiɣ-i tɛtʋ natʋyʋ nɛ ɛmɛsɩ ɛ-halʋ. ⁵ Peeye Hɛɛtɩ sayɩnaa cosi-i se, ⁶ ɛ́ɖʋ-wɛ yɩɖɛ nɛ ewelisini-wɛ! Se, ɛkɛ ɛyʋ sɔsɔ pɛ-hɛkʋ taa. Se, éwoni ɛ-halʋ nɛ epi pa-pɩlaŋ taa ŋgʋ kɩkɩlɩ ɖeu yɔ kɩ-taa. Se, ḿba taa nɔɔyʋ ɛɛpɩzɩɣ ekízini-i se ɛtaapi ɛ-halʋ ɛ-pɩlaʋ taa.

⁷ Pɔyɔɔdɩ ḿbʋ lɛ, Abɩraham kʋyɩ nɛ eluŋ Hɛɛtɩ sayɩnaa tɛɛ, pe-egeetiye taa peeye, ⁸ nɛ eheyi-wɛ se, ye petisiɣ toovenim se epi ɛ-halʋ peeye yɔ, panɩnɩ-ɩ nɛ powolo petendi Cohaarɩ pɩyalʋ Efirɔɔnɩ, ⁹ se, éyebini-i ɛ-ɛwaɣ ŋga kɛwɛ ɛ-hayɩm tɩnaɣ yɔɔ, Maakpela hɔɔlʋʋ taa yɔ. Se, éyebini-i-kɛ liidiye ńɖɩ pɩmʋnaa se páyabɩ-kɛ yɔ, ɖɩ-ñʋʋ taa, pɛ-ɛsɩndaa, nɛ ɛwaɣ ŋ́ga, kɛkɛ ɛ-ñɩŋga nɛ e-ɖipinɖe. ¹⁰ Ŋgʋ, Efirɔɔnɩ kɛwɛ Hɛɛtɩ sayɩnaa lalaa mba paakpeɣli tɛtʋ sɔsɔtʋ nɔnɔɔ taa yɔ, pa-taa peeye. Peeyeɣ ecosi Abɩraham patɩŋa pɛ-ɛsɩndaa. ¹¹ Éheyi-i se, ɛ́ɖʋ-ɩ hɩɖɛ nɛ ewelisini-i, ɛtɔm se hayɩm nɛ ɛwaɣ ŋga kɛwɛ pɩ-taa yɔ lɛ, ɛnʋ ɛɛpɛdɩɣ! Se, ɛnʋ yɔɔdʋʋ ɛ-ñɩma ɛsɩndaa se ɛhaɣ-ɩ-tʋ. Se ɛpɩzɩɣ epi ɛ-halʋ peeye.

¹² Peeye Abɩraham luŋ tataa egeetiye taa samaɣ ɛsɩndaa, ¹³ nɛ ɛyɔɔdɩnɩ Efirɔɔnɩ nɛ patɩŋa panɩɩ. Eheyi-i se, ɛnʋ tendi-i se ɛ́nɩnɩ-ɩ ɖɔɖɔ! Ɛnʋ ɖʋwa se, ɛhɛyɩɣ-ɩ hayɩm yɔɔ liidiye nɖɩ yɔ, étisini-i nɛ pɩha-ɩ waɖɛ nɛ ewoni ɛ-halʋ nɛ epi. ¹⁴ Efirɔɔnɩ cosi Abɩraham se, ¹⁵ ɛ́lɛ ɛɖʋ-ɩ yɩɖɛ nɛ ewelisini-i. Ɛpɔzɩ ɛ́lɛ se, liidiye ñɩɣtʋ nasɩnaza (400) tɛtʋ wazɩɣ we ɛ nɛ ɩ pɛ-hɛkʋ taa? Pʋ-yɔɔ lɛ, éwoni ɛ-sɩɖʋ nɛ epi!

¹⁶ Peeye Abɩraham nɛ Efirɔɔnɩ panɩnɩ ɖama, nɛ ɛhɛyɩ ɛlɛɛ liidiye ńɖɩ ɛ́lɛ kɔyɔɔdaa nɛ ɛ́lɛ ñɩma nɩɩ yɔ, ɖɩ-ñʋʋ taa. Ɛhɛyaɣaɣ-ɩ lɛ, ɛmaɣzɩnɩ ɛzɩ pɛlɛɣzʋʋ liidiye kɩyakʋ taa yɔ. ¹⁷ Pɩkpaɣnɩ puwiye ńɖɩ lɛ, Efirɔɔnɩ hayɩm mbʋ pɩwɛ Maakpela hɔɔlʋʋ taa, Mamɩree cɔlɔ yɔ, nɛ ɛwaɣ ŋga kɛwɛ pɩ-taa yɔ, nɛ tɩŋ weyi ɛwɛ pɩ-taa yɔ, ɛ-tɩŋa payɩ ¹⁸ pɩpɩsɩ Abɩraham ñɩm. Hɛɛtɩ liɖe taa ñɩma mba paawɛ peeye yɔ, patɩŋa pɛkɛ pɩ-aseɣɖe tɩnaa.

¹⁹ Pʋwayɩ lɛ, Abɩraham woni ɛ-halʋ Saaraa nɛ epi ɛwaɣ ŋga kɛwɛ Maakpela hɔɔlʋʋ taa hayɩm taa, Mamɩree cɔlɔ yɔ, ka-taa. Pʋ-tɔbʋʋ se, Hɛbɩrɔɔnɩ tɛtʋ taa, Kanaanɩ ɛjaɖɛ taa. ²⁰ Mbʋʋ pɩlaba, nɛ Hɛɛtɩ liɖe taa ñɩma yebini Abɩraham hayɩm nɛ ɛwaɣ ŋga kɛwɛ pɩ-taa yɔ se, pɛkɛ ɛ-ñɩm kpaagbaa kpem nɛ épiŋ ɛ-ɛyaa peeye.