¹ Abɩraham kakpadɩyɩ koŋgonoo. Ɖɔɖɔ lɛ, KƖPAƔLƲ kawazɩ ɛ-yɔɔ pɩtɩŋa pɩ-taa. ² Nakʋyʋ wiye lɛ, eheyi ɛ-tʋmlaɖaa taa weyi ɛkɩlɩ sɔsʋʋ nɛ ɛcɔŋnɩ ɛ-ñɩm tɩŋa yɔ́ɔ yɔ se, ɛ́lɛ ɛɖʋ e-nesi ɛnʋ yuye tɛɛ ^{a 3} nɛ eɖuuni KƖPAƔLƲ, ɛsɔdaa nɛ tataa pɛ-Ɛsɔ se, eeyeki nɛ ɛnʋ pɩyalʋ Izaakɩ kpaɣ halʋ Kanaanɩ ɛjaɖɛ ńɖɩ ɖɩ-taa ɛnʋ wɛɛ yɔ, ɖɩ-taa. ⁴ Se, eɖuuni-i se ewoki ɛjaɖɛ ńɖɩ ɖɩ-taa palʋlɩ ɛnʋ yɔ, ɖɩ-taa, ɛnʋ liɖe taa, nɛ ɛcaa ɛnʋ pɩyalʋ Izaakɩ halʋ. ⁵ Tʋmlaɖʋ ɛnʋ, ecosi-i se, pʋtɔma, halʋ ɛnʋ eetisiɣ nɛ ɛtɩŋ ɛnʋ wayɩ nɛ ewolo ɛjaɖɛ ńɖɩ ɖɩ-taa pɛwɛ ḿbʋ yɔ. Pʋbʋ, pɩwɛɛ se ɛnʋ ɛkpaɣ ɛ-pɩyalʋ nɛ ewoni-i ɛjaɖɛ ńɖɩ ɖɩ-taa ɛnʋʋ Abɩraham ɛlɩnaa yɔ yaa we? ⁶ Abɩraham cosi-i se, aayɩ, pɩtaacɩbɩ-ɩ se, ewokini ɛnʋ pɩyalʋ peeye. ⁷ KƖPAƔLƲ, ɛsɔdaa Ɛsɔ heyi ɛnʋ se, ɛnʋ ɛkʋyɩ ɛ-caa ɖɩɣa nɛ ɛjaɖɛ ńɖɩ ɖɩ-taa palʋlɩ ɛnʋ yɔ, pa-taa. Se, ɛyɔɔdɩnɩ ɛnʋ nɛ eɖuu se, ɛhaɣ ɛnʋ sayɩnaa ɛjaɖɛ ńɖɩ ɖɩ-taa pɛwɛ ḿbʋ yɔ. Se, ɛ́lɛ maɣmaɣ tiyiɣni e-tiyiyu nɛ ɛɖɛɛ-ɩ nɔɔ nɛ ɛpɩzɩ ɛcaa ɛnʋ pɩyalʋ halʋ. ⁸ Ye halʋ ekizina se ɛɛtɩŋɩɣ-ɩ lɛ, pʋbʋ, ɛlɩ ɖuuu mbʋ eɖuwaa yɔ, pɩ-taa. Ɛlɛ, paa ndʋ yaa ndʋ yɔ, ɛtaawoni ɛnʋ pɩyalʋ peeye. ⁹ Ɖɩnɛɛ tʋmlaɖʋ ɛnʋ, ɛɖʋ e-nesi ɛ-caa Abɩraham yuye tɛɛ, nɛ eɖuu se ɛlakɩ tɔm ńdʋ tɩ-yɔɔ. ¹⁰ Pʋwayɩ lɛ, ɛkpaɣ ɛ-caa kʋyʋndʋʋ kpaŋnaŋ hiu (10) nɛ ɛɖɛɛ Naahɔɔrɩ tɛtʋ taa, Mezoopotamii nɛ hayi kiŋ. Ɛɖɛɣaɣ lɛ, ɛkpɛndɩnɩ mbʋ mbʋ pɩkɩlɩ ɛ-caa ñɩm taa yɔ.

¹¹ Ɛkɔma ɛtalɩ lɔkɔ ŋgʋ kɩwɛ tɛtʋ ndʋ tɩ-wayɩ yɔ lɛ, eyele nɛ kʋyɩndʋʋ kpaŋnaŋ luŋ tataa. Ɖanaɣ kaɖanaa, pɩɩkɛ alɩwaatʋ ndʋ halaa wokaɣ nɛ poluu lɩm yɔ. ¹² Pʋwayɩ lɛ, ɛsɛɛ KƖPAƔLƲ, ɛ-caa Abɩraham Ɛsɔ se, ɛha-ɩ waɖɛ nɛ sɔnɔ ɛnʋ katɩ mbʋ pɩwɛ ɖeu yɔ, nɛ pɩwɩlɩ taabalɩyɛ nɖɩ ɖɩwɛ ɛnʋʋ KƖPAƔLƲ nɛ ɛ-caa Abɩraham pɛ-hɛkʋ taa yɔ. ¹³ Ɛtɔm se, ɛnʋ sɩŋɩɣ lɔkɔ cɔlɔ peeye, nɛ tɛtʋ taa pɛlaa woki nɛ poluu lɩm nɛ ɛnʋ na.

¹⁴ Peleɣ pɩɣa ŋga ɛnʋ heyiɣ-kɛ se, kɛwɛlɩ ko-tokuu nɛ ɛñɔɔ lɩm nɛ kocosi-i se ɛñɔɔ, nɛ kɔtɔ se, kaɖʋʋ ɖɔɖɔ ɛ-kʋyʋndʋʋ kpaŋnaŋ nɛ ɛñɔɔ yɔ, ɛnaɣ se ŋgaa ɛ-tʋmlaɖʋ Izaakɩ kaɣ kpaɣʋ. Mbʋʋ ɛnʋ tɩlɩɣnɩ taabalɩyɛ ńɖɩ ɛwɩlɩ ɛnʋ caa yɔ. ¹⁵ Ɛtɛtɛmdɩ yɔɔdʋʋ lɛ, Betuwɛɛlɩ pɛlɛ Reebeeka talaa. Betuwɛɛlɩ kɛ Milikaa nɛ Abɩraham neu Naahɔɔrɩ pa-pɩyalʋ. Ɛhɔɔlɩ e-tokuu ɛ-hazaɣ yɔɔ. ¹⁶ Pɛlɛ ɛnʋ, eɖewa pɩtɩɩfɛyɩ, ɛtasɩmdɩ abalʋ. Etibi lɔkɔ taa nɛ elu lɩm tokuu taa ɖo lɛ, ɛpɩsɩ ɛkpa. ¹⁷ Peeye Abɩraham tʋmlaɖʋ sewa nɛ ɛkatɩ-ɩ nɛ etendi-i se, ɛ́ha ɛnʋʋ e-tokuu taa lɩm pazɩ nɛ ɛñɔɔ.^{a 18} Ɛ́lɛ yaa-i se, caa! Nɛ eheyi-i se, ɛ́ñɔɔ! Nɛ etisi tokuu e-nesi yɔɔ lɛɛlɛɛ nɛ ɛha-ɩ lɩm nɛ ɛñɔɔ. ¹⁹ Pɛlɛ ɛnʋ, ɛtɛm-ɩ haʋ lɩm nɛ ɛñɔɔ lɛ, eheyi-i se, ɛnʋ woki ɛtasɩ luu nɛ ewoni ɛ-kʋyʋndʋʋ kpaŋnaŋ, nɛ ɛ́lɛ ñɔɔ nɛ ɛ-lɔkɔtʋ sɩ. ²⁰ Kpaagbaa ḿbʋ lɛ, ɛpɩyɩ e-tokuu taa lɩm lɛɛlɛɛ wondu lɩm ɖɩñɔyɛ nɛ piyele ɛtasɩ seu nɛ etii lɔkɔ taa nɛ elu lɩm. Elu ḿbʋ nɛ kʋyʋndʋʋ kpaŋnaŋ tɩŋa ñɔɔ. ²¹ Ɛlakaɣ ḿbʋ lɛ, tʋmlaɖʋ ɛnʋ, esu ɖiɣɖiɣ nɛ ɛcɔŋɩnɩ-ɩ nɛ ɛpɔzʋʋ ɛ-tɩ se, ɛzɩ KƖPAƔLƲ caɣ se piɖeni ɛnʋʋ ɛnʋ nʋmɔʋ taa yaa ɛsɩna?

²² Kʋyʋndʋʋ kpaŋnaŋ tɩkɔma ɛtɛ lɩm ñɔʋ lɛ, tʋmlaɖʋ ɛnʋ, ɛha peleɣbɩɣa ŋ́ga sika kokooye naɖɩyɛ, nɛ sika kpasɩ nasɩyɩ naalɛ (2). Kokooye ńɖɩ, ɖɩɩwɛ yuŋ nɛ paa kpayaɣ ŋ́ga kɛwɛɛ yuŋ ɖɔɖɔ. ²³ Ɛcɛlɩ-ɩ ḿbʋ lɛ, ɛpɔzɩ-ɩ se, alʋlʋʋ-ɩ? Se, ye etisiɣ yɔ, eheyi-i nɛ ɛna se ɖɩcaɣyɛ wɛ ɛ-caa tɛ? Se, pɩtalɩɣ ɛ nɛ ɛ-wayɩ ñɩma nɛ papɩzɩ pacaɣ ɖoó ana yaa we? ²⁴ Kocosi se, kɛkɛ Betuwɛɛlɩ pɛlɛ, Milikaa nɛ Naahɔɔrɩ pa-sayɩ. ²⁵ Katasɩ yɔɔdʋʋ se, ñɩtʋ nɛ hatʋ pɛwɛ pɛ-tɛ sakɩyɛ, se, kʋyʋndʋʋ kpaŋnaŋ kɔtɔɔ nɛ halɩ ɖenɖe mba kahɩnɩ yɔ.

²⁶ Kɔyɔɔdɩ ḿbʋ lɛ, tiyiyu ɛnʋ, eluŋ ɛ-nɩmbɔla yɔɔ KƖPAƔLƲ tɛɛ nɛ ɛsɛɛ-ɩ. ²⁷ Ɛsɛ-ɩ se, KƖPAƔLƲ ɛ-caa Abɩraham Ɛsɔ, ɛnʋ weyi ɛlabɩ ɛ-caa ɖeu nɛ ɛwɩlɩ-ɩ ɛ-taabalɩyɛ yɔ, ɛlabaɣlɛ! Se, ɛ-nʋmɔʋ ɖɔm taa lɛ, KƖPAƔLƲ keti-i kpaagbaa nɛ ewoni-i ɛ-caa ñɩma tɛ. ²⁸ Peeye peɣleɣbɩɣa ŋ́ga, kesewa nɛ kowolo keheyi ka-ñɩma ^b mbʋ pɩlaba yɔ. ^29-30 Ŋgʋ, Reebeeka kɛwɛnɩ ɖalʋ, payaɣ-ɩ se Labaanɩ. Ɛ́lɛ na kokooye nɛ kpasɩ e-neu nesi taa nɛ ɛnɩɣ ɛ́lɛ kɛdɩɣ ndʋ abalʋ ɛnʋ eheyi-i yɔ lɛ, ɛkʋyɩ ese nɛ ewolo abalʋ ɛnʋ ɛ-cɔlɔ, lɔkɔ cɔlɔ awayɩ. Ewoba lɛ, ɛmaɣnɩ ɛ́lɛ nɛ ɛ-kʋyʋndʋʋ kpaŋnaŋ. ³¹ Ɛlɛ, ɛpɔzɩ-ɩ se, ɛnʋ weyi ɛkɛ weyi KƖPAƔLƲ wazɩ ɛ-yɔɔ yɔ, pɩlabɩ ɛzɩma nɛ ɛcaɣ awayɩ ḿbʋ? Ŋgʋ, ɛnʋ maɣmaɣ ɛñɔɔzɩ ɖɩɣa nɛ ɛnʋ lɩzɩ ɛ-kʋyʋndʋʋ kpaŋnaŋ ɖɩcaɣyɛ. ³² Peeye Abɩraham tiyiyu ɛnʋ ɛsʋ Labaanɩ tɛ. Ɛsʋwa lɛ, petisi kʋyʋndʋʋ kpaŋnaŋ yɔɔ wondu nɛ paɖʋ-ɩ ñɩtʋ nɛ hatʋ, nɛ piyele ɛnʋ nɛ ɛ-wayɩ ñɩma lɛ, paha paba lɩm nɛ pɔkɔ pa-nɩŋgbanzɩ. ³³ Powoni-i tɔɔnaɣ se ɛtɔɔ lɛ, ɛtɔ se, ye ɛtɔyɔɔdɩ tɔm ndʋ tɩwɛ ɛ-taa yɔ́ɔ yɔ, nabʋyʋ ɛɛkpaɣnɩ ɛnʋ nɔɔ. Labaanɩ cosi-i se, ye ḿbʋ, yɔɔdɩ. ³⁴ Peeye ɛtɔm se, ɛnʋ kɛ Abɩraham tʋmlaɖʋ. ³⁵ KƖPAƔLƲ wazɩ ɛnʋ caa yɔɔ, nɛ ɛpɩsɩ ñɩmdʋ sɔsɔ. Mbʋ pʋyɔɔ yɔ, KƖPAƔLƲ ha-ɩ heŋ nɛ pʋŋ nɛ naŋ, nɛ liidiye nɛ sika, nɛ tʋmlaɖaa halɩñɩma nɛ abalɩñɩma, nɛ kʋyʋndʋʋ kpaŋnaŋ nɛ kpaŋazɩ. ³⁶ Se, ɛnʋ caa halʋ, Saaraa lʋlɩ ɛlɛɛ abalɩbɩɣa ɛ-akpadɩyɩtʋ taa, nɛ ɛ́lɛ ɖʋsɩ ke-nesi taa ɛ-ñɩm tɩŋa payɩ. ³⁷ Se, ɛnʋ caa heyi-i se, ɛnʋ eɖuu se, ɛnʋ eeyeki nɛ ɛ-pɩyalʋ kpaɣ halʋ Kanaanɩ ɛjaɖɛ nɖɩ ɖɩ-taa ɛwɛɛ yɔ, ɖɩ-taa. ³⁸ Se, eɖuu se ewoki ɛ́lɛ caa hɔʋ taa, e-liɖe taa nɛ ɛcaa ɛ́lɛ pɩyalʋ, halʋ. ³⁹ Peeye ɛnʋ pɔzɩ-ɩ se, ye halʋ ɛnʋ, ekizaa se ɛɛtɩŋɩɣ ɛnʋ wayɩ? ⁴⁰ Ecosi-i se, KƖPAƔLƲ weyi ɛnʋʋ Abɩraham ɛcaɣ wezuu ɛ-ɛsɩndaa tam yɔ, etiyiɣni e-tiyiyu nɛ ɛnʋ nɛ ɩ powolo nɛ ɛ́lɛ yele nɛ piɖeni ɛnʋʋ ɛnʋ nʋmɔʋ taa nɛ ɛnʋ ñɩnɩ halʋ e-liɖe taa, ɛnʋ caa hɔʋ taa nɛ ɛnʋ woni ɛ́lɛ pɩyalʋ. ⁴¹ Se, ye ɛnʋ ewobi ɛ-caa liɖe taa, nɛ paa ɛnʋ etehiɣ pʋyʋ yɔ, pʋbʋ, pɩlɩsɩ ɛnʋʋ ɖuuu mbʋ ɛnʋ ɖuwaa yɔ, pɩ-taa, ɛɛwɩlɩɣ-ɩ kpalʋʋ. ⁴² Se, sɔnɔ ɛnʋ kɔma ɛtalɩ lɔkɔ cɔlɔ lɛ, ɛnʋ sɛɛ ɛ-caa Abɩraham Ɛsɔ, KƖPAƔLƲ se, eyele nɛ piɖeni ɛnʋʋ nʋmɔʋ ŋgʋ ɛnʋ ɖɔma yɔ kɩ-taa. ⁴³ Lɛɛlɛɛyɔ, ɛnʋ talɩ lɔkɔ cɔlɔ yɔ, ɛnʋ pɔzʋʋ peɣleɣbɩɣa ŋga ketiki se kolu lɩm yɔ se, kaha ɛnʋʋ ko-tokuu taa lɩm pazɩ nɛ ɛnʋ ñɔɔ. ⁴⁴ Ye kocosi-i se, ɛnʋ ɛñɔɔ, nɛ kɔtɔ se, koluu ɖɔɖɔ nɛ kaɖʋ ɛ-kʋyʋndʋʋ kpaŋnaŋ nɛ ɛñɔɔ yɔ, pʋbʋ ɛnʋ naɣ se ŋga ɛɖʋwa se, ɛ-caa pɩyalʋ kaɣ kpaɣʋ. ⁴⁵ Ɛnʋ maɣzaɣ ɛ-taa ḿbʋ lɛ, Reebeeka tala, ɛ nɛ e-tokuu ɛ-hazaɣ yɔɔ. Etii lɔkɔ taa nɛ elu lɩm. Ɛnʋ heyi-i se, etendi-i se ɛha-ɩ lɩm nɛ ɛñɔɔ. ⁴⁶ Kpaagbaa ḿbʋ lɛ, etisi e-tokuu nɛ ɛ-hazaɣ yɔɔ nɛ eheyi-i se, ɛñɔɔ, se, ɛɖʋʋ ɛ-kʋyʋndʋʋ kpaŋnaŋ nɛ ɩlɛ ñɔɔ ɖɔɖɔ. Peeye ɛnʋ ñɔwa nɛ ɛɖʋ ɛ-kʋyʋndʋʋ kpaŋnaŋ nɛ ɩlɛ ñɔɔ ɖɔɖɔ. ⁴⁷ Se, pɩlabɩ ḿbʋ lɛ, ɛnʋ pɔzɩ-ɩ se, alʋlʋʋ-ɩ? Ɛ́lɛ cosi se, ɛkɛ Betuwɛɛlɩ pɛlɛ, Milikaa nɛ Naahɔɔrɩ pa-sayɩ. Ɖɩnɛɛ ɛnʋ lɛ ɛ-mɔɔʋ kokooye nɛ kpasɩ e-nesi taa. ⁴⁸ Ɛlɛ, ɛnʋ luŋ ɛ-nɩmbɔla yɔɔ ɛ-caa Abɩraham Ɛsɔ, KƖPAƔLƲ tɛɛ nɛ ɛsɛɛ-ɩ. Mbʋ pʋyɔɔ yɔ, eketi ɛnʋʋ ɛ-nʋmɔʋ taa nɛ ɛtanɩ-ɩ ɖeu ɛnʋ caa koou halɩñɩnʋ tɛ se, ɛkpaɣ-ɩ nɛ ewoni ɛ-caa ɛnʋ ɛ-pɩyalʋ. ⁴⁹ Ɛtɛm-wɛ kɛdʋʋ ḿbʋ lɛ, ɛpɔzɩ-wɛ se, lɛɛlɛɛyɔ, pocosi-i nɛ ɛna se, petisiɣ nɛ pala ɛnʋ caa ɖeu nɛ pawɩlɩ-ɩ pa-taabalɩyɛ naa we? Pɩtɛkɛ mbʋʋ yɔ, ɛnʋ ɖɛnɩ ɖoli.

⁵⁰ Peeye Labaanɩ nɛ Betuwɛɛlɩ pocosaa se, Tɔm ńdʋ, KƖPAƔLƲ cɔlɔ tɩlɩnaa, ḿba fɛyɩnɩ natʋyʋ se pɔyɔɔdʋʋ. ⁵¹ Peheyi-i se, Reebeeka lɛ ɛ-cɔlɔ. Se, ɛkpaɣ-ɩ ɛwona nɛ ɛwalɩ ɛ-caa pɩyalʋ ɛzɩ KƖPAƔLƲ yɔɔdʋʋ yɔ. ⁵² Pɔyɔɔdɩ ḿbʋ nɛ Abɩraham tʋmlaɖʋ nɩɩ lɛ, eluŋ tataa nɛ ɛsɛɛ KƖPAƔLƲ se, ɛlabaɣ lɛ. ⁵³ Pʋwayɩ lɛ, ɛlɩsɩ e-wondu taa liidiye nɩŋgbacaɣlanaa, nɛ sika ñɩma, nɛ wondu ndʋ posuu yɔ, nɛ ɛha Reebeeka, nɛ ɛla ɖɔɖɔ ɛ́lɛ ɖalʋ, nɛ e-ɖoo, kʋjɔŋ sɔsɔŋ. ⁵⁴ Pʋbʋ wayɩ lɛ, Abɩraham tʋmlaɖʋ nɛ ɛ-wayɩ ñɩma pɔtɔɔ nɛ pɔñɔɔ nɛ pasʋʋ pahɩnɩ.

Tɛʋ fema tanaŋ tɛɛ nɛ pakʋyɩ lɛ, Abɩraham tʋmlaɖʋ heyi Reebeeka ɖalʋ nɛ e-ɖoo se, paha ɛnʋʋ waɖɛ nɛ ɛpɩsɩ ɛ-caa cɔlɔ. ⁵⁵ Peeye pocosi-i se, peleɣbɩɣa ŋ́ga, kátasɩ caɣʋ pɔ-cɔlɔ alɩwaatʋ natʋyʋ ɛzɩ kɩyakɩŋ hiu (10) mbʋ yɔ, nɛ pɩcɔ kɛɖɛɛ. ⁵⁶ Ɛlɛ, ɛnʋ ñocosi-wɛ se, pataalaɣzɩ-ɩ! Lɛɛlɛɛyɔ, ɖenɖe KƖPAƔLƲ yeba nɛ piɖeni-i ɛnʋʋ ɛ-nʋmɔʋ taa yɔ, peyele nɛ ɛpɩsɩ ɛ-caa cɔlɔ. ⁵⁷ Paba se, ye ḿbʋ, payaa peleɣbɩɣa nɛ pɔpɔzɩ-kɛ ndʋ kaka ñamaɣzɩɣ yɔ.

⁵⁸ Peeye paya Reebeeka nɛ pɔpɔzɩ-ɩ se, e-liu wɛɛ se, ɛ nɛ abalʋ ɛnʋ pɛɖɛɛ yaa we? Etisi se, ɛɛɛ! ⁵⁹ Mbʋʋ pɩlaba, nɛ peyele Reebeeka nɛ ɛ-pʋnʋʋyʋ, nɛ pa nɛ Abɩraham tʋmlaɖʋ nɛ ɛ́lɛ wayɩ ñɩma se pɛɖɛɛ. ⁶⁰ Paawazɩ Reebeeka yɔɔ. Peheyi-i se,

⁶² Alɩwaatʋ ńdʋ lɛ, Izaakɩ kakʋyɩ Lahayɩ Rooyi lɔkɔ cɔlɔ, nɛ ewolo ɛwɛɛ Neegɛɛvɩ egeetiye taa. ⁶³ Nakʋyʋ wiye pɩkɔma ɛzɩ ɖanaɣ yɔ lɛ, ɛlɩɩ nɛ ɛcɔʋ ɛ-hayɩm taa. Pɩkɛdaa lɛ, ɛnaɣ kʋyʋndʋʋ kpaŋnaŋ woki. ⁶⁴ Reebeeka kɔma elosi Izaakɩ lɛ, ɛkʋyɩnɩ kʋyʋndʋʋ kpaŋnɔ yɔɔ nɛ ɛmaa tataa, ⁶⁵ nɛ ɛpɔzʋʋ Abɩraham tʋmlaɖʋ se, anɩ lɛ abalʋ weyi ɛɖɔŋ hayɩm taa nɛ ɛkatɩɣ-wɛ mbʋ yɔ? Ɛ́lɛ cosi-i se, ɛ-caa Izaakɩ lɛ. Kpaagbaa ḿbʋ lɛ, ehuuzi ɛ-ɛza yɔɔ kɛdɛɛka. ⁶⁶ Ɛ́lɛ kɔma nɛ ɛkatɩ-wɛ lɛ, tʋmlaɖʋ ɛnʋ, ɛkɛdɩ-ɩ mbʋ ɛlaba yɔ pɩtɩŋa. ⁶⁷ Patalɩ ɖɩɣa lɛ, Izaakɩ woni Reebeeka e-ɖoo Saaraa kɩɖanɖʋʋ tɛɛ, nɛ ɛkpaɣ-ɩ nɛ ɛkɛ ɛ-halʋ nɛ ɛsɔɔlɩ-ɩ. Ḿbʋ hɛzɩnɩ Izaakɩ laŋɩyɛ, e-ɖoo sɩm wayɩ.