¹ Ɛsɔ heyi Yaakɔɔbʋ nakʋyʋ wiye se, ɛ́kpaɣ nʋmɔʋ nɛ ewolo ɛcaɣ Beetɛɛlɩ. Se, ɛ́ma ɛnʋʋ kɩlaŋ ɖɩlayɛ peeye. Se, peeye ɛnʋ lɩzɩ ɛ-tɩ nɛ ɛwɩlɩ-ɩ alɩwaatʋ ndʋ eseɣaɣ e-ɖomɖa Ezaawʋ yɔ.

² Pʋ-yɔɔ Yaakɔɔbʋ heyi ɛ-hɔʋ taa ñɩma nɛ mba patɩŋa payɩ pɛwɛ ɛ-cɔlɔ yɔ se, pɔ́lɔ sɩɩnaa agɔma mba pɛwɛ pɔ-cɔlɔ yɔ. Se, pɛ́wɛɛ cɩɖɩ cɩɖɩ, pɛlɛɣzɩ wondu. ³ Se, pɔñɔɔzɩ pa-tɩ nɛ ɛ nɛ wɛ powolo Beetɛɛlɩ. Se, patalɩɣ peeye lɛ, ɛnʋ maɣ Ɛsɔ weyi ɛnʋ ya-ɩ kɩyakʋ ŋgʋ ɛnʋ kɛwɛ cɛyɩtʋ taa nɛ ɛ́lɛ cosi-i yɔ, kɩlaŋ ɖɩ-layɛ. Se, ɛ́lɛ sɩnɩnɩ-ɩ paa le ɛnʋ nʋmɔʋ ɖɔm taa. ⁴ Peeye palɩzɩ lɛlaa tɛ sɩɩnaa agɔma sɩʋ kpelisi nzɩ sɩɩwɛ pɔ-cɔlɔ yɔ, nɛ kokowe wena pɛlɛɣaɣ pa-nɩŋgbaaŋ yɔɔ yɔ, nɛ pɛcɛlɩ Yaakɔɔbʋ. Pɛcɛlɩ-ɩ lɛ, ewoni pɩtɩŋa nɛ epi tɩʋ sɔsɔʋ ŋgʋ kɩwɛ Siicem tɛtʋ cɔlɔ yɔ kɩ-tɛɛ. ⁵ Yaakɔɔbʋ nɛ e-piya pakʋyaa nɛ pɛɖɛɣ lɛ, Ɛsɔ yele nɛ sɔɔndʋ natʋyʋ kpa tɛtʋ ndʋ tɩñɔtɩnɩ-wɛ yɔ, tɩ-taa ñɩma siŋŋ, nɛ nɔɔyʋ takatɩ se, ɛɖʋ pa-wayɩ.

⁶ Yaakɔɔbʋ nɛ ḿba patɩŋa patɩŋaɣ-ɩ yɔ, patɩŋa pɔkɔɔ patalɩ Luuzi tɛtʋ taa Kanaanɩ ɛjaɖɛ taa. Payaɣ Luuzi tɛtʋ ndʋ lɛɛlɛɛyɔ se, Beetɛɛlɩ^a. ⁷ Patalɩ peeye lɛ, ɛ́ma kɩlaŋ ɖɩlayɛ nɛ ɛyaa lone nɖɩ se, Beetɛɛlɩ Ɛsɔ. Mbʋ pʋyɔɔ yɔ, peeye Ɛsɔ lɩzɩ ɛ-tɩ nɛ ɛwɩlɩ-ɩ alɩwaatʋ ndʋ eseɣaɣ e-ɖomɖa yɔ.

⁸ Halʋ nɔɔyʋ kɛwɛ pa-taa, payaɣ-ɩ se, Deboora. Ɛɛkɛ Reebeeka pʋnʋʋyʋ. Pɛwɛ Beetɛɛlɩ peeye lɛ, ɛsɩ nɛ pepim-i tɩʋ sɔsɔʋ nakʋyʋ tɛɛ. Pɩkpaɣnɩ kɩyakʋ ŋgʋ yɔ, payaɣ tɩʋ ŋgʋ se, Ɛzɩtɛɣlɩm Tɩʋ.

⁹ Yaakɔɔbʋ lɩnɩ Mezoopotamii nɛ ɛpɩsɩ Beetɛɛlɩ peeye lɛ, Ɛsɔ ɖaɣnɩ ɛ-tɩ lɩzʋʋ nɛ wɩlɩ-ɩ nɛ ɛwazɩ ɛ-yɔɔ. ¹⁰ Eheyi-i se, ɖooo lɛ, payaɣaɣ-ɩ se, Yaakɔɔbʋ. Se, paatasɩɣ-ɩ yaʋ ḿbʋ. Ɛlɛ, payaa-ɩ se, Izirɛɛlɩ. Mbʋʋ Ɛsɔ ya-ɩ se, Izirɛɛlɩ. ¹¹ Pʋwayɩ lɛ, eheyi-i se, ɛnʋʋ lɛ, Ɛsɔ Ɖoŋ Tɩŋa Tʋ. Se, ɛnʋ haɣ-ɩ piya sakɩyɛ se ɛ́kɛ ɛjaɖɛ naɖɩyɛ taa ñɩma cɔzɔ, nɛ halɩ ɛkɛ samaɣ ndɩ ndɩ cɔzɔ. Se, awiya kaɣ lɩʋ ɛ-sɛyɩnaa taa. ¹² Se, ɛnʋ haɣ-ɩ ɛjaɖɛ nɖɩ ɛnʋ kaha Abɩraham nɛ Iizaakɩ yɔ, nɛ ɛ-wayɩ lɛ, ɛnʋ ha-ɖɩ ɛ-sɛyɩnaa.

¹³ Pʋwayɩ lɛ, Ɛsɔ posi ɛ-tɩ nɛ lone nɖɩ ɖɩ-taa ɛɛyɔɔdɩnɩ Yaakɔɔbʋ yɔ. ¹⁴ Yaakɔɔbʋ kpaɣ pɩyɛ nɛ esiɣ-ɖɩ peeye nɛ ɛpɩyɩ ɖɩ-ñʋʋ taa num nɛ sʋlʋm nɛ ɖɩkɛnɩ-ɩ kɔdaɣ taa pɩyɛ. ¹⁵ Piyele ɛ́yaa lone nɖɩ ɖɩ-taa Ɛsɔ kalɩzɩ ɛ-tɩ nɛ ɛwɩlɩ-ɩ yɔ, se Beetɛɛlɩ. Pʋ-tɔbʋ se, Ɛsɔ Ɖɩɣa.

¹⁶ Pʋwayɩ lɛ, Yaakɔɔbʋ nɛ ɛ-hɔʋ taa ñɩma pakʋyɩ Beetɛɛlɩ se pɛɖɛɣ. Pɩkɔma pɩkazɩ pazɩ se, patalɩ Efiraataa tɛtʋ taa lɛ, Raasɛɛlɩ lʋlɩ pɩɣa. Pɩɣa ŋ́ga ka-lʋlʋʋ kalabɩ kaɖɛ. ¹⁷ Raasɛɛlɩ wɩɣaɣnɩ lʋlʋʋ ḿbʋ lɛ, halʋlɩsɩyʋ heyi-i se, sɔɔndʋ ɛtaakpa-ɩ. Se, abalɩbɩɣa ɛtasɩɣ lʋlʋʋ. ¹⁸ Raasɛɛlɩ kefiɣnaa. Ɛtɛzaɣ kɛdɛzaɣ fezuu tisuu lɛ, ɛ́yaa pɩɣa ŋ́ga se, Bɛɛnɩ Onii. Pʋ-tɔbʋʋ se, kʋñɔŋ pɩɣa. Ɛlɛ, ka-caa ñayaa-kɛ se, Bineyaamiini. Pʋ-tɔbʋʋ se, nesikɩbanzɩ yɔɔ pɩɣa. ¹⁹ Raasɛɛlɩ sɩba lɛ, pepimi-i Efiraataa tɛtʋ habɩyɛ nɔɔ. Lɛɛlɛɛyɔ payaɣ-tʋ se, Bɛtɩlɛhɛm. ²⁰ Pepimi-i lɛ, Yaakɔɔbʋ kpaɣ pɩyɛ naɖɩyɛ nɛ esiɣ ɛ-pɩlaʋ yɔɔ. Halɩ nɛ sɔnɔ, pɔdɔŋnɩ-ɖɩ yaʋ se, Raasɛɛlɩ pɩlaʋ Pɩyɛ.

²¹ Yaakɔɔbʋ kʋyɩ peeye lɛ, ewolo esiɣ ɛ-kɩɖanɖʋʋ Migidaalɩ Edɛɛrɩ tɛtʋ wayɩ. ²² Yaakɔɔbʋ wɛ hɔɔlʋʋ ŋgʋ kɩ-taa ḿbʋ lɛ, ɛ-pɩyalʋ Ruubɛɛnɩ wolo ɛcaa ɛ-halʋ cikpelu Bilihaa. Pɩlabɩ ḿbʋ lɛ, Yaakɔɔbʋ ñanɩɩ ^b.

Yaakɔɔbʋ wɛnɩ abalɩbiya hiu nɛ naalɛ (12). ²³ Leyaa lʋlɩnɩ-ɩ ɛ-pɩyalʋ sɔsɔ Ruubɛɛnɩ. Pʋwayɩ lɛ, ɛlʋlɩ Siimeyɔɔ nɛ Leevii nɛ Yuuda nɛ Isaakaarɩ nɛ Zabulɔɔnɩ. ²⁴ Raasɛɛlɩ ñalʋlɩ-ɩ Yoosɛɛfʋ nɛ Bineyaamiini. ²⁵ Raasɛɛlɩ tʋmlaɖʋ halɩñɩnʋ Bilihaa ñalʋlɩ-ɩ Daanɩ nɛ Nɛfɩtaalii. ²⁶ Leyaa tʋmlaɖʋ halɩñɩnʋ Zilipaa ñalʋlɩ-ɩ Gaadɩ nɛ Asɛɛrɩ. Tɔɔ! Mbaa lɛ, Yaakɔɔbʋ pɩyalaa mba palʋlɩ-wɛ Mezoopotamii yɔ.

²⁷ Yaakɔɔbʋ kɔma ɛkʋyɩ Migidaalɩ Edɛɛrɩ tɛtʋ wayɩ lɛ, ewolo ɛ-caa Iizaakɩ tɛ, Mamiree. Pɩñɔtɩnɩ Kiriyaatɩ Arɩbaa tɛtʋ. Payaɣ-tʋ lɛɛlɛɛyɔ se, Hɛbɩrɔɔnɩ. Abɩraham nɛ Iizaakɩ paacaɣ peeye. ²⁸ Iizaakɩ kɛwɛnɩ pɩnzɩ mɩnʋʋ nɛ nɩɩnʋwa nɛ niidozo (180) ²⁹ nɛ pʋcɔ ɛsɩ. Ye ḿbʋ, ɛɛkpadɩyɩ kuŋgu nɛ pɩcɔ ɛsɩ nɛ ewolo sɔsaa cɔlɔ. Ɛsɩba lɛ, ɛ-pɩyalaa Ezaawʋ nɛ Yaakɔɔbʋ pepim-i.