¹ Ezaawʋ weyi payaɣ ɖɔɖɔ se, Edom yɔ, ɛ-sɛyɩnaa hɩla yɔ. ² Ezaawʋ kpaɣ Kanaanɩ ɛjaɖɛ taa halaa. Mbaa yɔ: Hɛɛtɩ liɖe taa tʋ Elooni pɛlɛ Adaa, nɛ Hiwii tʋ Ana pɛlɛ Oholibamaa. Ɛ́lɛ kɛ Sibeyɔɔ sɛyɩ. ³ Ɛkpaɣ ɖɔɖɔ Isimaayɛɛlɩ pɛlɛ, Nebayɔɔtɩ neu weyi payaɣ se, Basɩmaatɩ yɔ. ⁴ Adaa lɛ Eliifaazɩ ɖoo, nɛ Basɩmaatɩ lɛ Rewuwɛɛlɩ ñɩnʋ, ⁵ nɛ Oholibamaa lɛ Yewuusi nɛ Yalam nɛ Kooraa, pa-ñɩnʋ. Mbaa lɛ Ezaawʋ pɩyalaa mba palʋlɩ-wɛ Kanaanɩ ɛjaɖɛ taa yɔ.

⁶ Ezaawʋ ñaakpaɣ ɛ-halaa nɛ ɛ-pɩyalaa ḿba nɛ ɛ-pɛlaa nɛ ɛ-tʋmlaɖaa tɩŋa payɩ nɛ ɛ-kpɩna kalakɩŋ tɩŋa. Ɛkpɛndɩnɩ ñɩm mbʋ ehiɣ Kanaanɩ ɛjaɖɛ taa yɔ pɩ-tɩŋa payɩ nɛ ɛkpaɣ nʋmɔʋ ewolo ɛcaɣ egeetiye naɖɩyɛ taa. Ɖiposini ɖenɖe e-ɖomɖa Yaakɔɔbʋ wɛɛ yɔ. ⁷ Toovenim lɛ, po-wondu kakɩlɩ ɖɔʋ, nɛ patapɩzɩɣ se, pacaɣ ɖama cɔlɔ. Ŋgʋ, egeetiye nɖɩ ɖɩ-taa paawɛɛ yɔ, ɖɩtaatalɩɣ-wɛ se papɩzɩ nɛ pácalɩ po-wondu. ⁸ Mbʋʋ Ezaawʋ weyi payaɣ ɖɔɖɔ se Edom yɔ, ewoba nɛ ɛcaɣ Seyiiri pʋŋ taa.

⁹ Ezaawʋ weyi ɛkɛ Edom ñɩma cɔzɔ yɔ, ɛ-sɛyɩnaa mba paawɛ Seyiiri pʋʋ taa yɔ, pa-hɩla yɔ. ¹⁰ Ezaawʋ pɩyalaa hɩla yɔ: ɛ-halʋ Adaa lʋlɩ Eliifaazɩ nɛ lɛlʋ ñalʋlɩ Rewuwɛɛlɩ, payaɣ ɛ́lɛ se Basɩmaatɩ.

¹¹ Eliifaazɩ ñalʋlɩ Temaanɩ nɛ Omaarɩ nɛ Cefoo nɛ Gayetam nɛ Kenaazɩ. ¹² Eliifaazɩ kɛwɛnɩ halʋ lɛlʋ, payaɣ-ɩ se Timinaa. Ɛ́lɛ lʋlɩ-ɩ abalɩbɩɣa, payaɣ-kɛ se Amalɛɛkɩ. Ezaawʋ nɛ ɛ-halʋ Adaa pɛ-sɛyɩnaa lɛ.

¹³ Rewuwɛɛlɩ pɩyalaa yɔ: Naahaatɩ nɛ Zeeraa nɛ Sama nɛ Miizaa. Ezaawʋ nɛ ɛ-halʋ Basɩmaatɩ pɛ-sɛyɩnaa lɛ. ¹⁴ Piyele Sibeyɔɔ sɛyɩ, Ana pɛlɛ Oholibamaa yɔ, ɛ́lɛ nɛ Ezaawʋ palʋlɩ Yewuusi nɛ Yalam nɛ Kooraa.

^15-16 Ezaawʋ sɛyɩnaa mba pɛkɛ ñʋŋ tɩnaa yɔ, mbaa yɔ: Temaanɩ nɛ Omaarɩ nɛ Cefoo nɛ Kenaazɩ nɛ Kooraa nɛ Gayetam nɛ Amalɛɛkɩ. Mbaa lɛ, Ezaawʋ nɛ ɛ-halʋ Adaa, pa-pɩyalʋ kacalaɣ tʋ Eliifaazɩ pɩyalaa. Paawɛ Edom ɛjaɖɛ taa.

¹⁷ Ñʋŋ tɩnaa Naahaatɩ nɛ Zeeraa nɛ Sama nɛ Miizaa lɛ, Rewuwɛɛlɩ pɩyalaa. Pɛkɛ Ezaawʋ nɛ ɛ-halʋ Basɩmaatɩ pɛ-sɛyɩnaa. Paawɛ Edom ɛjaɖɛ taa ɖɔɖɔ.

¹⁸ Ñʋŋ tɩnaa Yewuusi nɛ Yalam nɛ Kooraa lɛ, Ezaawʋ nɛ ɛ-halʋ Oholibamaa pa-pɩyalaa. Oholibamaa ɖoo lɛ, Ana.

¹⁹ Ḿbaa lɛ Ezaawʋ sɛyɩnaa, Edom liɖe taa ñɩma ñʋŋ tɩnaa.

^20-21 Mba pacalɩ caɣʋ Edom ɛjaɖɛ taa yɔ, mbaa lɛ, Hoorii liɖe taa tʋ Seyiiri sɛyɩnaa. Hoorii liɖe taa ñɩma ñʋŋ tɩnaa lɛ, Seyiiri pɩyalaa Lootaanɩ nɛ Sobaalɩ nɛ Sibeyɔɔ nɛ Ana nɛ Diisooni nɛ Ecɛɛrɩ nɛ Diisaanɩ. ²² Lootaanɩ pɩyalaa lɛ, Hoorii nɛ Heemam. Lootaanɩ kɛwɛnɩ neu halɩñɩnʋ payaɣ-ɩ se Timinaa. ²³ Sobaalɩ pɩyalaa lɛ, Alɩvaanɩ nɛ Manahaatɩ nɛ Ebaalɩ nɛ Sefo nɛ Oonam. ²⁴ Sibeyɔɔ pɩyalaa lɛ, Aya nɛ Ana. Ana kananɩ hiɖe naɖɩyɛ lakʋ taa, alɩwaatʋ ndʋ ɛtɩŋaɣ ɛ-caa Cibeyɔɔ kpaŋasɩ yɔ. ²⁵ Ana piya lɛ, ɛ-pɩyalʋ Diisooni nɛ ɛ-pɛlɛ Oholibamaa. ²⁶ Diisaanɩ pɩyalaa lɛ, Hɛmɩdaanɩ nɛ Esebaanɩ nɛ Yitiraanɩ nɛ Keraanɩ. ²⁷ Ecɛɛrɩ pɩyalaa lɛ, Bilihaanɩ nɛ Zaavaanɩ nɛ Akaanɩ. ²⁸ Diisaanɩ pɩyalaa lɛ, Uuci nɛ Araanɩ.

^29-30 Horii liɖe taa ñɩma mba pɛwɛ Seyiiri ɛjaɖɛ taa yɔ, pa-ñʋndɩnaa lɛ, Lootaanɩ nɛ Sobaalɩ nɛ Sibeyɔɔ nɛ Ana nɛ Diisooni nɛ Ecɛɛrɩ nɛ Diisaanɩ.

³¹ Pɩcɔ nɛ wiyaʋ sɔsɔ nɔɔyʋ tɔɔ kewiyaɣ Izirɛɛlɩ ɛjaɖɛ taa lɛ, awiya sɔsɔnaa wena atɔɔ kewiyaɣ Edom ñɩnɖɛ taa yɔ, anaa yɔ: ³² Beyɔɔrɩ pɩyalʋ Bɛlaa, ɛ-tɛ nɛ Dinehavaa tɛtʋ taa. ³³ Ɛsɩba lɛ, Zeeraa pɩyalʋ Yobaabɩ lɛɣzɩ e-lone taa. Ɛ́lɛ tɛ nɛ Bacɩraa tɛtʋ taa. ^34-39 Pʋwayɩ lɛ, mba pɔtɔɔ kewiyaɣ yɔ, mbaa yɔ: Husam, ɛ-tɛ nɛ Temaanɩ egeetiye taa. Ɛ-wayɩ lɛ, Bedaadɩ pɩyalʋ Hadaadɩ, ɛ́lɛ tɛ nɛ Aviiti tɛtʋ taa. Ɛnʋ wabɩnɩ Maadiyaanɩ liɖe taa ñɩma Mowaabɩ ɛjaɖɛ taa. Ɛ́lɛ wayɩ lɛ, Masireekaa tʋ Samɩla. Ɛ́lɛ wayɩ lɛ, Pɔɔ yɔɔ Reehobooti tɛtʋ taa tʋ Sawuuli. Ɛ́lɛ wayɩ lɛ, Akɩbɔɔrɩ pɩyalʋ Baalɩ Hanaanɩ. Ɛ́lɛ wayɩ lɛ, Pawuu tɛtʋ taa tʋ Hadaarɩ. Ɛ́lɛ kakpaɣ Matɩrɛɛdɩ pɛlɛ Mehetaabɛɛlɩ. Ɛ́lɛ ñɛkɛ Mezaahaabɩ sɛyɩ.

^40-43 Edom liɖe taa ñɩma ñʋndɩnaaa hɩla yɔ: Timinaa nɛ Alɩwaa nɛ Yeetɛɛtɩ nɛ Oholibamaa nɛ Elaa nɛ Pinooni nɛ Kenaazɩ nɛ Temaanɩ nɛ Mibisaarɩ nɛ Magidiyɛɛlɩ nɛ Iiram. Mbaa lɛ Edom liɖe taa ñɩma ñʋndɩnaa. Pɛkɛ pɛ-ɛjaɖɛ taa ageeta ndɩ ndɩ ñʋndɩnaa.

Edom ñɩma cɔzɔ lɛ, Ezaawʋ.