¹ Izimayɛɛlɩ liɖe taa ñɩma ḿba, powoni Yoosɛɛfʋ Ejipiti lɛ, pɛpɛdɩnɩ-ɩ Pootiifaarɩ. Abalʋ ɛnʋ, ɛkɛ wiyaʋ sɔsɔ Faraawɔɔ sɔɔjanaa taa sɔsɔ nɔɔyʋ. Ɛkɛ mba paɖaŋɩɣ ɛnʋ ɛ-ɖɩɣa yɔɔ yɔ, pa-ñʋʋdʋ. ² Ŋgʋ KƖPAƔLƲ kɛwɛ Yoosɛɛfʋ cɔlɔ nɛ piɖeɣni-i ɛ́lɛ pɩtɩŋa pɩ-taa. Halɩ nɛ Yoozɛɛfʋ wolo ɛcaɣ ɛ-caa Ejipiti tʋ ɛnʋ ɛ-tɛ. ³ Pootiifaarɩ nawa se KƖPAƔLƲ wɛ Yoosɛɛfʋ cɔlɔ nɛ eyeki nɛ piɖeɣni ɛ́lɛ mbʋ pɩtɩŋa payɩ ɛlakɩ yɔ, pɩ-taa. ⁴ Pʋ-yɔɔ Pootiifaarɩ taa hʋlɩmɩnɩ-ɩ, nɛ ɛkpaɣ ɛ-ɖɩɣa nɛ ɛ-ñɩm tɩŋa payɩ nɛ ɛɖʋzɩ e-nesi taa se, ɛcɔnɩ pʋ-yɔɔ. ⁵ Pootiifaarɩ labɩ ḿbʋ lɛ, KƖPAƔLƲ tɩŋnɩ Yoozɛɛfʋ yɔɔ nɛ ɛwazɩ ɛ-ɖɩɣa yɔɔ. Ɛwazɩ ɛ-ñɩm mbʋ pɩwɛ ɖɩɣa nɛ hayɩm taa yɔ, pɩ-tɩŋa payɩ pʋ-yɔɔ. ⁶ Peeye ɛkpaɣ ɛ-ñɩm tɩŋa payɩ nɛ ɛɖʋzɩ Yoosɛɛfʋ nesi taa se, ɛ́lɛ ɛcɔnɩ pʋ-yɔɔ. Ɛtatasɩɣ ɖɩɣa taa nabʋyʋ labʋ nɛ pɩtasɩnɩ ɛ-maɣmaɣ ɛ-tɔɔnaɣ tɔɔʋ.

Ye ŋcɔnɩ Yoosɛɛfʋ, eɖewa kamaɣ fɛyɩ. ⁷ Yoozɛɛfʋ caa cɛlɩ-ɩ tʋmɩyɛ wayɩ lɛ, ɛ́lɛ halʋ cɔnɩ-ɩ nɛ pɩkɛdɩnɩ-ɩ nɛ eheyi-i se, ɛ nɛ ɩ pasʋʋ. ⁸ Ɛlɛ, Yoosɛɛfʋ kizi nɛ eheyi-i se, ɛ́cɔnɩ ɛ́na, ɖooo ɛzɩ ɛnʋ wɛʋ peeye yɔ, ɛnʋ caa ɛɛtasɩɣ nabʋyʋ labʋ ɛ-ɖɩɣa taa, ɛlɛ, ɛta ɛnʋ liu nɛ eyebini-i ɛ-ñɩm tɩŋa payɩ se, ɛnʋ ɛcɔnɩ pʋ-yɔɔ. ⁹ Se, halɩ ɛnʋ caa fɛyɩnɩ ɖoŋ ɖɩɣa ŋ́ga ka-taa nɛ pɩkɩlɩ ɛnʋ. Ɖɔɖɔ lɛ, ɛtaɖaŋ ɛnʋʋ nabʋyʋ yɔɔ nɛ pɩtasɩnɩ ɛnʋʋ ɛ-halʋ. Pʋ-yɔɔ lɛ, ɛzɩmaa ɛnʋ pɩzɩɣ nɛ ɛla ɛzaɣtʋ sɔsɔtʋ ńdʋ nɛ ɛnʋ yʋsɩnɩ Ɛsɔ? ¹⁰ Kɩyakɩŋ tɩŋa, ɛwɛɛ ɛcɛyɩɣ Yoosɛɛfʋ ḿbʋ se, ɛ nɛ ɛ́lɛ pasʋʋ, ɛ́lɛ eekeŋni-i.

¹¹ Tɔɔ! Nakʋyʋ wiye Yoosɛɛfʋ wobi ɖɩɣa se, ɛlakɩ ɛ-tʋmɩyɛ. Tʋmlaɖaa lɛlaa taa nɔɔyʋ taawɛɛ pu-wiye nɖɩ. ¹² Pɩkɛdaa lɛ, halʋ sezi ɛkpa Yoosɛɛfʋ toko nɛ ɛɖɔkɩ cɩŋ nɛ eheyi-i se, ɛ nɛ ɛ́lɛ pasʋʋ. Peeye ɛ́lɛ yebini-i e-toko nɛ ese ɛlɩɩ. ¹³ Yoosɛɛfʋ yebini halʋ e-toko nɛ ese ḿbʋ lɛ, ¹⁴ ɛ́lɛ ma kubuka nɛ ɛ́yaa tʋmlaɖaa se, pówolo pána! Paba woba lɛ, eheyi-wɛ se, weyi ɛnʋ walʋ woni-wɛ yɔ, ɛcaɣ se ɛpɛŋɩ mbaa tɛtɛ. Ebiree tʋ lɛ ḿbʋ yɔ! Se, ewoba se ɛ nɛ ɛnʋ pasʋʋ nɛ ɛnʋ kizi nɛ ɛnʋ ma kubuka ɖoŋ. ¹⁵ Se, ɛnʋ tɩmabɩ kubuka ḿbʋ lɛ, eyebini ɛnʋʋ e-toko nɛ ese ɛlɩɩ.

¹⁶ Dɩnɛɛ halʋ ɛnʋ ɛsɩ Yoosɛɛfʋ toko se ɛ-walʋ ɛtala ɛmaɣna. ¹⁷ Ɛ́lɛ kɔma ɛtalɩ lɛ, ɛkɛdɩ ɛ́lɛ tɔm kʋɖʋmtʋ ndʋ. Ndʋʋ lɛ se, yom Ebiree tʋ weyi ewoni-wɛ yɔ, ewobi ɛnʋ cɔlɔ se, ɛnʋ nɛ ɩ pacaɣ nɛ ɛɖʋ ɛnʋʋ fɛyɛ. ¹⁸ Se, Alɩwaatʋ ndʋ ɛnʋ mabɩ kubuka ɖoŋ nɛ ɛ́yaa ɛyaa lɛ, ɛtɩkʋyɩ nɛ ese ɛlɩɩ nɛ eyele e-toko ɛnʋ cɔlɔ. ¹⁹ Yoosɛɛfʋ caa ɛnʋ ɛ-halʋ kɛdɩ-ɩ mbʋ Yoosɛɛfʋ laba yɔ lɛ, ɛ-pana kpa. ²⁰ Peeye eyeba nɛ pakpa Yoosɛɛfʋ nɛ paɖʋ-ɩ saɖɩka, wiyaʋ saɖɩkadɩnaa cɔlɔ.

Ye ḿbʋ, mbʋʋ paɖʋ Yoozɛɛfʋ saɖɩka. ²¹ Paa ḿbʋ yɔ, KƖPAƔLƲ wɛ ɛ-cɔlɔ peeye ɖɔɖɔ nɛ ɛwɩlɩ-ɩ ɛ-camɩyɛ lakasɩ. Toovenim lɛ, eyeba nɛ Yoosɛɛfʋ tɔm kɛdɩnɩ saɖɩka ñʋʋdʋ. ²² Peeye ɛ́lɛ kpaɣ saɖɩkadɩnaa lɛlaa tɩŋa nɛ ɛɖʋzɩ Yoosɛɛfʋ nesi taa. Ɛnʋʋ pɩwɛɛ se ɛcɔnɩ saɖɩkadɩnaa lɛlaa yɔɔ tʋma wena pɩpɔzaa se pala yɔ, a-tɩŋa payɩ a-taa. ²³ Saɖɩka ñʋʋdʋ taatasɩɣ cɔnaʋ tʋma wena ɛɖʋzɩ Yoosɛɛfʋ nesi taa yɔ, a-taa naɖɩyɛ yɔɔ. Mbʋ pʋyɔɔ yɔ, KƖPAƔLƲ kɛwɛ Yoosɛɛfʋ cɔlɔ nɛ eyeki nɛ piɖeɣni-i mbʋ pɩtɩŋa payɩ ɛlakɩ yɔ, pɩ-taa.