¹ Alɩwaatʋ ndʋ tɩ-taa, Yuuda kʋyɩ ɛ-ɖalaa nɛ e-newaa pɔ-cɔlɔ nɛ ewolo Aduulam tɛtʋ taa, abalʋ weyi payaɣ se Hiiraa yɔ, ɛ-tɛ. ² Ewobi peeye lɛ, ɛna Kanaanɩ tʋ weyi payaɣ se, Suwaa yɔ, ɛ-pɛlɛ, ɛkpaɣ-ɩ nɛ ɛ́lɛ kɛ ɛ-halʋ. Ɛ nɛ ɛ́lɛ pacaɣaɣ lɛ, ³ ɛ́lɛ haɣ hoa nɛ ɛlʋlɩ abalɩbɩɣa nɛ Yuuda yaa-kɛ se, Ɛɛrɩ. ⁴ Pʋwayɩ lɛ, Halʋ ɛnʋ, ɛtasɩ haɣʋ nɛ ɛlʋlɩ abalɩbɩɣa lɛɛka nɛ ɛyaa-kɛ se, Oonaanɩ. ⁵ Pʋbʋ wayɩ lɛ, ɛtasɩ ɖɔɖɔ lʋlʋʋ abalɩbɩɣa nɛ ɛyaa kaka se, Seelaa. Alɩwaatʋ ńdʋ lɛ, Yuuda ñaawɛ Keziivi tɛtʋ taa.

⁶ Pʋwayɩ lɛ, Yuuda caa pɛlɛ weyi payaɣ se, Tamaarɩ ^a yɔ nɛ ɛcɛlɛ ɛ-pɩyalʋ kajalaɣ ñɩnʋ Ɛɛrɩ, nɛ ɛ́lɛ kpaɣ-ɩ. ⁷ Ɛlɛ, Yuuda pɩyalʋ Ɛɛrɩ ɛnʋ ɛ-tɔm taakɛdɩnɩ KƖPAƔLƲ nɛ ɛ́lɛ yele nɛ ɛsɩ. ⁸ Peeye Yuuda heyi Oonaanɩ se, ɛnʋ kɩlɩnɩ ñɔtɩnaʋ ɛ-ɖalʋ weyi ɛsɩba yɔ, ɛsɩm mbʋ pɩwɛɛ se ɛla yɔ. Pɩwɛɛ se, éyele pɩtɩŋnɩ ɛ-yɔɔ nɛ ɛ-ɖalʋ hiɣ piya nɛ ɛ́lɛ lʋlʋʋ ɛtaaɖɩ. Pʋ-yɔɔ lɛ, ɛ́hɔ ɛ́lɛ lelu. ⁹ Oonaanɩ na keɣlee se, pɩɣa ŋ́ga kaakaɣ kɛʋ ɛ-ñɩŋga. Pʋ-yɔɔ alɩwaatʋ ndʋ ewoki se ɛ nɛ ɛ-ɖalʋ halʋ pasʋʋ lɛ, ɛwɛɛkɩɣ ɛ-abalɩtʋ nɛ ɛlɔʋ tata yem se, ɛtaalʋlɩ ɛ-ɖalʋʋ, pɩɣa. ¹⁰ Ɛ-lakasɩ ńzɩ sɩtɛkɛdɩnɩ KƖPAƔLƲ nɛ ɛ́lɛ yele nɛ ɛsɩ ɖɔɖɔ. ¹¹ Ɖɩnɛɛ Yuuda heyi e-wolu Tamaarɩ se, ɛzɩma mbʋ ɛkɛ lelu yɔ, ɛpɩsɩ ɛ-caa tɛ nɛ pɩkɔɔ pɩsɩnɩ alɩwaatʋ ndʋ ɛnʋ pɩyalʋ Seelaa paɣlaa yɔ. Pʋ-yɔɔ Tamaarɩ kpema ɛcaɣ ɛ-caa tɛ. Toovenim lɛ, Yuuda maɣzaɣ se, pɩfɛyɩ se Seelaa ɛsɩ ɖɔɖɔ ɛzɩ ɛ-ɖalaa yɔ.

¹² Alɩwaatʋ sakɩyɛ wayɩ lɛ, Yuuda halʋ Suwaa pɛlɛ sɩ. Ɛtɛm ɛ-halʋ kʋñɔŋ caɣʋ lɛ, ɛ nɛ ɛ-taabalʋ Aduulam tʋ, weyi payaɣ se, Hiiraa yɔ, pakpa Timinaa tɛtʋ taa, mba pahʋŋ heŋ hʋndʋ yɔ, pɔ-cɔlɔ. ¹³ Tamaarɩ nɩwa se, ɛ-panja woki Timinaa se ɛhʋ e-heŋ hʋndʋ lɛ, ¹⁴ ɛhɔzɩ e-lelitu wondu nɛ ehuuzi ɛ-ñʋʋ yɔɔ kɛtɛɛka se, pataasɩm-ɩ. Ɛlabɩ ḿbʋ lɛ, ewolo ɛcaɣ Eyinayim tɛtʋ ndʋ tɩwɛ Timinaa nʋmɔʋ taa yɔ, tɩ-nɔɔ yɔɔ. Toovenim lɛ, ɛɛnawa se, Seelaa kapaɣlaa, ɛlɛ, peteyele se, ɛmalɩnɩ ɛ́lɛ. ¹⁵ Yuuda talaa lɛ, ɛmaɣnɩ Tamaarɩ eehuuzi ɛ-ɛza yɔɔ nɛ ɛkpaɣ-ɩ ɛzɩ halʋ acɛyɛ tʋ nɔɔyʋ yɔ. ¹⁶ Peeye ewobi ɛ-cɔlɔ nʋmɔʋ nɔɔ nɛ eheyi-i se, ɛnʋ sɔɔlaa se, ɛ́lɛ etisi ɛ nɛ ɩ pacaɣ. Ɛtaatɩlɩ se e-wolu. Tamaarɩ pɔzɩ-ɩ se, ɛbɛɛ ɛhaɣ ɛnʋʋ pʋ-yɔɔ? ¹⁷ Ɖɩnɛɛ Yuuda cosaa se, ɛnʋ tiyiɣni-i ɛ-pʋŋ taa, pimbiɣa nakɛyɛ. Ɛ́lɛ kitini-i se, pɩ́kɛ mbʋʋ toovenim, ɛlɛ, pɩwɛɛ se ɛ́cɛlɩ ɛnʋʋ nabʋyʋ nɛ pɩ́kɛnɩ yʋsaɣ nɛ pʋcɔ. ¹⁸ Peeye Yuuda pɔzɩ-ɩ se, ɛbɛɛ ɛsɔɔlaa? Tamaarɩ cosi se, mbʋ ɛñɩkɩɣnɩ nesi yɔ, nɛ pi-nimaɣ nɛ ɖaʋ ŋgʋ ɛɖɔkaa yɔ. Peeye ɛ́lɛ kpaɣ pɩtɩŋa payɩ nɛ ɛ́cɛlɩ-ɩ nɛ ɛ nɛ ɩ pacaɣ nɛ ɛhaɣ hoa. ¹⁹ Pɛtɛm caɣʋ ḿbʋ lɛ, ɛkʋyɩ nɛ ekpe. Ɛtalɩ ɛ-tɛ lɛ, ekuli ɛ-ñʋʋ yɔɔ kɛtɛɛka nɛ ɛɖaɣnɩ suu e-lelitu wondu.

²⁰ Pʋwayɩ lɛ, Yuuda cɛlɩ ɛ-taabalʋ Aduulam tʋ pimbiɣa se, ewona nɛ ɛcɛlɩ halʋ ɛnʋ nɛ ɛmʋ ɛ́lɛ cɔlɔ mbʋ ɛɛcɛlɩ-ɩ yɔ. Ɛ́lɛ ñowoba lɛ, ɛtana halʋ ɛnʋ. ²¹ Peeye ɛpɔzɩ Enaayim ñɩma se, lee halʋ acɛyɛ tʋ weyi ɛɛwɛ nʋmɔʋ nɔɔ peeye yɔ, ɛwɛɛ? Paba cosi se, pɩtɛ halʋ nɔɔyʋ taatɩɩwɛʋ ḿba-tɛ peeye kaʋ. ²² Ɛ́lɛ pɩsɩ nɛ eheyi Yuuda se ɛtana-ɩ, se, halɩ peeye ñɩma heyi ɛnʋ se, pɩtɛ halʋ nɔɔyʋ taatɩɩwɛʋ pɛ-tɛ peeye kaʋ. ²³ Mbʋʋ Yuuda kitinaa se, halʋ ɛnʋ ɛ́kpaɣ wondu ndʋ! Se, ḿba ɛtaaɖʋ pa-tɩ fɛyɛ. Toovenim lɛ, ɛnʋ tiyini pimbiɣa nɛ ɛnʋʋ ɛ-taabalʋ ewolo nɛ ɛtana halʋ ɛnʋ.

²⁴ Fenasɩ naadozo wayɩ lɛ, nɔɔyʋ wolo eheyi Yuuda se, e-wolu Tamaarɩ labɩ acɛyɛ. Halɩ ɛ nɛ hoa! Peeye Yuuda ha nɔɔ se, palɩnɩ-ɩ nɛ pɔsɔbɩ-ɩ miŋ nɛ ɛ-ɛza.

²⁵ Palɩɣaɣnɩ Tamaarɩ lɛ, ɛcɛlɩ wondu ndʋ ɛ-panja kɛcɛlɩ-ɩ yɔ: mbʋ pañɩkɩɣnɩ nesi yɔ, nɛ pi-nimaɣ nɛ ɖaʋ se, powona pawɩlɩ ɛ-panja ɛnʋ nɛ peheyi-i se, ɛcɔnɩ wondu ndʋ nɛ ɛna se, atɩnɩ-tʋ. Se, abalʋ weyi ɛtɩnɩ wondu ndʋ yɔ, ɛnʋ tɩna ɛnʋ hoa. ²⁶ Ɛ́lɛ cɔnɩ-tʋ lɛ, ɛtɔ se Tamaarɩ wɛnɩ toovenim nɛ pɩkɩlɩ ɛnʋ, se, ɛkɩlɩ ɛnʋʋ weewee. Mbʋ pʋyɔɔ yɔ, pɩɩwɛɛ se ɛnʋ eyele ɛmalɩnɩ ɛnʋ pɩyalʋ Seelaa. Ɛlɛ, ɛnʋ tala mbʋ.

Pɩkpaɣʋnɩ pu-wiye yɔ, Yuuda tatasɩ ɛ-yɔɔ sʋʋ kaʋ.

²⁷ Tamaarɩ kɔma se ɛlʋlʋʋ lɛ, pana se ɖomaa wɛnɩ ɛ-taa. ²⁸ Ɛlʋlaɣ lɛ, pa-taa lɛlʋ lɩzɩ e-nesi nɛ halʋlɩsɩyʋ kpa-sɩ nɛ ɛta sɩ-taa pɩsaɖʋʋ kɩsɛmʋʋ nɛ ɛtɔ se, ɛnɛ ɛcalɩnɩ lɩʋ. ²⁹ Ɛyɔɔdɩ ḿbʋ lɛ, ɛ́lɛ pɩsɩnɩ e-nesi nɛ piyele e-ɖomɖa lɩɩ. Ɖɩnɛɛ halʋlɩsɩyʋ kitinaa se, nɔnɔɔ ŋgaa ɛtʋlɩ ḿbʋ yɔ? Pʋ-yɔɔ Yuuda ya-ɩ se Pɛɛrɛɛcɩ, pʋ-tɔbʋʋ se, nɔnɔɔ tʋlʋʋ. ³⁰ Pʋwayɩ lɛ, e-ɖomɖa weyi paatam e-nesi taa pɩsaɖʋʋ kɩsɛmʋʋ yɔ, ɛ́lɛ ñalɩɩ nɛ payaa-ɩ se, Zeeraa ^b.