49
Yaakɔɔbʋ wazʋʋ ɛ-pɩyalaa hiu nɛ naalɛ (12) yɔɔ yɔ
1 Pʋwayɩ lɛ, Yaakɔɔbʋ yaa ɛ-pɩyalaa nɛ eheyi-wɛ se,
pékpeɣli ɖama nɛ ɛnʋ heyi-wɛ
mbʋ pɩkaɣ-wɛ talʋʋ yɔ.
2 Yaakɔɔbʋ pɩyalaa! Íkpeɣli ɖama nɛ íwelisi!
Íwelisini maa mɩ-caa Izirɛɛlɩ!
3 Ruubɛɛnɩ! Ñaa lɛ, man-kajalaɣ pɩɣa.
Ñaa mancalɩ lʋlʋʋ
me-evebitu taa.
Ŋkɩlɩ ñe-newaa tɩŋa
sɔsɔtʋ nɛ ɖoŋ.
4 Ŋwɛ helu helu ɛzɩ lɩm hola yɔ.
Ŋsʋnɩ ma-halʋ lɛlʋ a.
Ŋwɛɛkɩ ña-tɩ.
Ŋŋtasɩɣ kɛʋ sɔsɔ.
5 Siimeyɔɔ nɛ Leevii, pɛkɛ kʋɖʋm.
Panɩɣnɩ ɖama nɛ palakɩ helu helu lakasɩ.
6 Pa-pana kpawa siŋŋ nɛ pakʋ ɛyaa.
Pɛsɛtɩ abalɩnaŋ hola, se pɩkɛdɩnɩ-wɛ.
Ḿbʋ yebina nɛ maawɛɣ pɔ-nɔɔ tam.
Maawoki pe-kpeɣluu taa.
7 Mawɩlɩɣ-wɛ kpalʋʋ, pa-pana kadɩtayaɣ
nɛ pa-mʋzɩŋ kadatayaɣ pɔ-yɔɔ.
Mamɩzɩɣ pɛ-sɛyɩnaa nɛ Izirɛɛlɩ ɛjaɖɛ,
Mamɩzɩɣ-wɛ ɛjaɖɛ nɖɩ ɖɩ-tɩŋa.
8 Yuuda! Ña-ɖalaa nɛ ñe-neyaa pasaŋ-ŋ.
Ŋ́ɖʋʋ ño-koyidinaa ñʋŋ tataa,
Ña-maɣmaɣ ña-ɖalaa nɛ ñe-neyaa poluŋuu ñɛ-tɛɛ.
9 Man-pɩyalʋ Yuuda! Ŋwɛ ɖoŋ ɛzɩ tɔɔyʋʋ
ŋgʋ kɩtɔwaa kɩhaɣ nɛ kɩpɩsɩɣ kɩ-ɖɩcaɣyɛ yɔ.
Tɔɔyʋʋ pabɩɣ nɛ kɩhɛnɩ.
Akatɩɣ nɛ ɛkʋsɩ-kʋ?
10 Kewiyaɣb eeposuuni ña-ɖɩɣa.
Ñɛ-sɛyɩnaa tɔkɩnɩ-kɛ ḿbʋ
nɛ pɩsɩnɩ weyi ɛ-maɣmaɣ ɛtɩnɩ-kɛ yɔ, ɛ-kɔm.
Ɛ-tɛɛ ajɛɛ tɩŋa taa ñɩma luŋuu.
11 Tɩŋ weyi popuu i-pe sʋlʋm yɔ, ɩkɔŋ tɔyʋʋ kamaɣ fɛyɩ,
nɛ halɩ ewoni ɛ-kpaŋaɣ nɛ ɛɖɩnɩ weyi ɩkɩlɩ lʋlʋʋ yɔ.
Tɩŋ ɩnʋ ɩ-sʋlʋm kaɣ tɔyʋʋ
nɛ halɩ ɛcɔtɩ e-wondu pɩ-taa.
12 Ɛñɔʋ sʋlʋm nɛ ɛ-ɛza sɛɛ.
ɛ́ñɔɔ naalɩm nɛ halɩ e-kela hʋlɩmɩ.
13 Zabulɔɔnɩ ñɛwɛɣ teŋgu nɔɔ,
mɛlɛnaa ɖɩ-sɩŋɩyɛ.
Ɛ-ɛjaɖɛ walɩɣ nɛ pɩtalɩ Siidɔɔ tɛtʋ.
14 Isaakaarɩ ñɛwɛ ɛzɩ kpaŋaɣ ŋga kɛwɛ kpekpeka yɔ.
Ɛhɛnɩɣ kaɖaɣ ŋga pɔcɔzɩ kolonzi nzɩ sɩwɛ ɖoŋ yɔ, ka-taa.
15 Ɛnawa se, lone nɖɩ, ɖɩwɛ ɖeu,
nɛ ɛjaɖɛ wɛɛ kɔcɔka.
Etisaa se, pasʋʋ-ɩ sʋʋtʋ.
Ɛmʋnaa se, ɛla tʋmɩyɛ ɛzɩ yom yɔ.
16 Daanɩ ñakaɣ cɔnaʋ ɛ-ɛyaa yɔɔ,
ɛzɩ palakʋʋ Izirɛɛlɩ cejewe lɛɛna taa yɔ.
17 Daanɩ wɛɣ ɛzɩ ɖʋm nʋmɔʋ nɔɔ yɔ.
Ɛwɛɣ ɛzɩ cakpata nʋmɔʋ nɔɔ yɔ.
Ɛñasɩɣ koyindu kpaŋnɔ nɩnkpaŋgaɣ
nɛ ɛ́lɛ tɔlɩ tataa yaɣyaɣ.
18 KƖPAƔLƲ! Mantaɣ liu se, ŋyakɩ ma-ñʋʋ!
19 Gaadɩ yɔ, mɩlaa woki ɛ-wayɩ
nɛ ɛnʋ ñakʋyɩ pɔ-yɔɔ nɛ ɛɖɔɔnɩ-wɛ.
20 Asɛɛrɩ yɔ, tɔɔnaɣ lakɩ ɛ-ɛjaɖɛ taa siŋŋ,
ɛ-tɛtʋ lʋlʋʋ awiya tɔɔnaɣ.
21 Pɩkazɩ Nɛfɩtaalii yɔ, ɛ́lɛ wɛ ɛ-tɩ yɔɔ ɛzɩ nam wɛɣʋ tɛyɛ yɔ.
Nam weyi ɛlʋlʋʋ piya kɩbanzɩ yɔ.
22 Yoosɛɛfʋ ñɛwɛ ɛzɩ tɩʋ ŋgʋ kɩlʋlʋʋ yɔ, ki-eholosiye yɔ.
Tɩʋ ŋ́gʋ, kɩñɔʋ hiɖe nɔɔ.
Ki-pilinzi kpaɣ sɩkaɣ koloŋa yɔɔ.
23 Tɔŋ tɔyaa tɔ-ɩ ñɩma.
Paca-ɩ tɔm, nɛ pa nɛ ɩ poyoo.
24 Ɛlɛ, ɛɖɔkɩ ɛ-tɔʋ kpam.
Etelesi e-kpekpeka kaʋ.
Ɛsɔ Caa Ɖoŋ Tʋ, weyi maa Yaakɔɔbʋ moluŋuu ɛ-tɛɛ yɔ, eyebina nɛ pɩla ḿbʋ.
Ɛnʋʋ lɛ ñe-ɖiyiyu.
Ɛnʋʋ lɛ Izirɛɛlɩ ɛwaɣ ŋga kohuuzuu ñɔ-yɔɔ yɔ.
25 Maa ña-caa Yaakɔɔbʋ, mɛ-Ɛsɔ ɛ́kɔɔ ɛ́sɩnɩ-ŋ,
Ɛsɔ Ɖoŋ Tɩŋa Tʋ ɛ́wazɩ ñɔ-yɔɔ.
Eyele nɛ tɛʋ lɩnɩ ɛsɔdaa kɩnɩɩ nɛ pɩwazɩ-ŋ.
Lɩm lɩnɩ tɛtɛɛ, nɛ pɩwazɩ-ŋ.
Halaa nɛ kpɩna palʋlɩ, nɛ pɩwazɩ-ŋ.
26 Maa ña-caa, ma-wazɩtʋ kɩlɩ ɖooo caanaʋ pʋŋ taa ñɩm.
Tɩkɩlɩ ɖɔɖɔ, ɖooo caanaʋ piyisi yɔɔ ñɩm.
Maa ña-caa ma-wazɩtʋ étii ñaa Yoosɛɛfʋ ñɔ-yɔɔ.
Títii weyi ña ŋkɛ ña-ɖalaa nɛ ñe-neu pa-ñʋʋdʋ yɔ, ñɔ-yɔɔ!
27 Bineyaamiini ñɛwɛ ɛzɩ kpemtɔɔyaɣ yɔ.
Tanaŋ tɛɛ, ɛkʋʋ nɛ ɛtɔkɩ.
Ɖanaɣ yɔɔ lɛ, ɛtayɩ mbʋ pɩkazaa yɔ.
28 Mbʋʋ Yaakɔɔbʋ yɔɔdɩnɩ ɛ-pɩyalaa alɩwaatʋ ndʋ ɛwazaɣ pɔ-yɔɔ yɔ. Ɛwazɩ paa pa-taa anɩ ɛ-yɔɔ ɛzɩ pɩpɔzʋʋ yɔ. Ɛ-pɩyalaa mbaa lɛ, Izirɛɛlɩ cejewe hiu nɛ naalɛ (12).
Yaakɔɔbʋ sɩm tɔm
29 Pʋwayɩ lɛ, Yaakɔɔbʋ heyi ɛ-pɩyalaa se, ɛnʋ ɛsɩba lɛ, pepimi-i ɛ-cɔzɔnaa pɔʋ taa. Se, pɔʋ ŋgʋ, kɩwɛ ɛwaɣ ŋga kɛwɛ Hɛɛtɩ liɖe taa tʋ Efirɔɔnɩ hayɩm taa yɔ, ka-taa. 30 Se, hayɩm ḿbʋ, pɩwɛ Maakpela hɔɔlʋʋ taa, Mamiree cɔlɔ, Kanaanɩ ɛjaɖɛ taa. Se, Abɩraham yabɩnɩ-pʋʋ Efirɔɔnɩ cɔlɔ, nɛ ɛwaɣ ŋ́ga, kɛkɛ ɛ-ñɩŋga nɛ e-ɖipinɖe. 31 Se, peeye pepim ɛ nɛ ɛ-halʋ Saaraa. Se, pʋwayɩ lɛ, Izaakɩ nɛ ɛ́lɛ halʋ Reebeeka. Se, peeye ɖɔɖɔ ɛnʋ pim Leyaa. 32 Se, hayɩm ḿbʋ nɛ pɩ-ɛwaɣ, Hɛɛtɩ pɩyalaa cɔlɔ, payabɩ-wɛ.
33 Yaakɔɔbʋ tɛm ɛ-pɩyalaa heyuu ɛ-kɛtɛzaɣ tɔm lɛ, ɛɖaɣnɩ hɛnʋʋ, etizi fezuu, nɛ ewoni sɔsaa mʋlʋm.