¹ Yaakɔɔbʋ sɩbɩ ḿbʋ lɛ, Yoosɛɛfʋ luŋ nɛ ekpiikini-i nɛ ewili nɛ ɛzɩtɛɣlɩm kpe ɛ́lɛ ɛsɩndaa cɔɔɔ ⁿ. ² Pʋwayɩ lɛ, eheyi ɛ-ɖɔkɔtɔnaa sɔsaa se, pɔñɔɔzɩ ɛ-caa nɛ sɔzɩŋ nim ɛzɩ pɩwɛɣ pɔ-zɔnzɩ taa yɔ, nɛ ɛtaawɛɛkɩ. ³ Paba kpaɣ kɩyakɩŋ nɩɩnaza (40) pilim ɛzɩ pʋpɔzʋʋ yɔ, nɛ pɔñɔɔzɩ-ɩ nɛ sɔzɩŋ nim ndɩ ndɩ. Ejipiti ñɩma kpaɣ kɩyakɩŋ nɩɩnʋwa nɛ nɩɩlɛ (70) nɛ pacaɣnɩ Yaakɔɔbʋ leɣa.

⁴ Pɛtɛm Yaakɔɔbʋ leɣa caɣʋ ḿbʋ lɛ, Yoosɛɛfʋ heyi Faraawɔɔ ɖɩɣa taa ñɩma se, ye ɛnʋ tɔm ɛkɛdɩnɩ-wɛ yɔ, ɛnʋ tendi-wɛ se, powolo peheyi-i se, ⁵ pɩcɔ ɛnʋ caa sɩkɩ lɛ, eheyi ɛnʋ se, ɛnʋ eɖuuni Ɛsɔ se, ye ɛnʋʋ Yaakɔɔbʋ ɛsɩba yɔ, ɛnʋ wokini-i Kanaanɩ ɛjaɖɛ taa nɛ epi pɩlaʋ ŋgʋ ɛnʋʋ Yaakɔɔbʋ ehuyaa yɔ kɩ-taa, nɛ ɛnʋ ɖuuni-i ɖɔɖɔ. Se, pʋ-yɔɔ lɛ, ɛnʋʋ Yoosɛɛfʋ etendiɣ-i se, ɛ́ha ɛnʋʋ nʋmɔʋ nɛ ɛnʋ wolo epi ɛnʋ caa nɛ ɛpɩsɩ.

⁶ Powobi peheyi Faraawɔɔ ḿbʋ lɛ, ɛ́lɛ tisi se, éwolo epi ɛ-caa ɛzɩ eeɖuúu yɔ. ⁷ Peeye Yoosɛɛfʋ kpaɣ nʋmɔʋ se ewoki epi ɛ-caa. Ɛ nɛ Faraawɔɔ tʋmlaɖaa tɩŋa, nɛ kewiyaɣ taa sɔsaa tɩŋa nɛ Ejipiti ɛjaɖɛ taa sɔsaa, ⁸ nɛ ɛnʋʋ Yoosɛɛfʋ ɛ-ɖɩɣa taa ñɩma tɩŋa nɛ ɛ-ɖalaa nɛ e-neu nɛ ɛ-caa hɔʋ taa ñɩma powobina. Pɩtaakazɩ nɔɔyʋ Goosɛɛnɩ egeetiye taa, nɛ pɩtasɩnɩ piya nɛ kpɩna. ⁹ Halɩ ɛyaa kacaɣ you lɔɔɖɛ nɛ kpaŋnaŋ nɛ pasɩɩ-ɩ. Paakɛ ɛyaa canɖaŋ canɖaŋ.

¹⁰ Pɔkɔma patalɩ Sɔ́ɔ Hɔɔlʋʋ taa Tɔɔnaɣ Ɖɩmaɖɛ, Yɔɔrɩdaŋ pɔɔ wayɩ wɩsɩɖɩlɩyɛ hɔɔlʋʋ taa lɛ, pácaɣ peeye kɩyakɩŋ lʋbɛ (7) nɛ pácaɣ leɣa sɔsɔɔ nakɛyɛ siŋŋ. Peeye Yoosɛɛfʋ kpaɣ kɩyakɩŋ lʋbɛ (7) nɛ ɛcaɣ ɛ-caa kʋñɔŋ. ¹¹ Kanaanɩ ñɩma mba paawɛ hɔɔlʋʋ ŋ́gʋ kɩ-taa yɔ, pana leɣa ŋ́ga palaba peeye ḿbʋ yɔ lɛ, pɔyɔɔdɩ se, leɣa ŋ́ga, kɛkɛ Ejipiti ñɩma leɣa sɔsɔɔ nakɛyɛ. Pʋ-yɔɔ paya Yɔɔrɩdaŋ pɔɔ wayɩ wɩsɩɖɩlɩyɛ hɔɔlʋʋ taa lone ńɖɩ se Abɛɛlɩ Micirayim, pʋ-tɔbʋʋ se, Ejipiti ñɩma leɣa.

¹² Pʋwayɩ lɛ, Yaakɔɔbʋ pɩyalaa la ɛzɩ pa-caa keheyuu-wɛ yɔ. ¹³ Pakpaɣ pa-caa nɛ powoni-i Kanaanɩ nɛ pepim-i Maakpela, ɛwaɣ pɔʋ taa, hayɩm taa. Maakpela kɛwɛ Mamiree cɔlɔ kpam. Hayɩm ḿbʋ, Abɩraham kayabɩ-pʋ Hɛɛtɩ liɖe taa tʋ Efirɔɔnɩ cɔlɔ se, ɛwaɣ ŋ́ga kɛkɛ ɛ-ñɩŋga nɛ e-ɖipinɖe. ¹⁴ Pɛtɛm Yaakɔɔbʋ pim lɛ, Yoosɛɛfʋ nɛ ɛ-ɖalaa nɛ e-neu nɛ mba pasɩ-ɩ yɔ, patɩŋa papɩsɩ Ejipiti tɛtʋ taa.

¹⁵ Pepim Yaakɔɔbʋ wayɩ lɛ, Yoosɛɛfʋ ɖalaa maɣzɩ pa-taa se, lɛɛlɛɛyɔ, ḿba caa sɩba. Se, Yoosɛɛfʋ pɩzaɣ se, ɛkpaɣ ḿba ɛzɩ koyindinaa nɛ ɛtɔ se, ɛkpaɣ-wɛ kɩmɩyɛ ɛzaɣtʋ ndʋ ḿba kalabɩ-ɩ yɔ tɩ-yɔɔ. ¹⁶ Peeye petiyaa se, peheyi Yoosɛɛfʋ se, pʋcɔ nɛ ɛ-caa sɩkɩ lɛ, ɛ́lɛ tɔm se, ¹⁷ péheyi ɛnʋʋ Yoosɛɛfʋ se, hayɩ! Se, ɛ́na ɛ-ɖalaa pɩtɔdɩyɛ nɛ ekpeɣ-wɛ pa-kɩwɛkɩm sɔsɔm nɛ pɛ-ɛzaɣtʋ. Se, ye ḿbʋ, ɛ́tɔɔ ɛ-hɔyɛ nɛ ékpeɣ mbaa mba pa nɛ ɛ-caa pɛsɛɣ Ɛsɔ kʋɖʋm yɔ, ɛzaɣtʋ ńdʋ. Peheyi Yoosɛɛfʋ tɔm ńdʋ lɛ, ɛpazɩ wiluu. ¹⁸ Pʋwayɩ lɛ, ɛ-ɖalaa maɣmaɣ wolo pɔtɔlɩ ɛ-tɛɛ nɛ peheyi-i se, ḿba kɛ e-yomaa. ¹⁹ Ɛlɛ, Yoosɛɛfʋ cosi-wɛ se, sɔɔndʋ ɛtaakpa-wɛ. Se, ɛnʋ tɛkɛ Ɛsɔ nɛ ɛkpaɣ-wɛ kɩmɩyɛ. ²⁰ Se, paasɔɔlaa se, pala ɛnʋʋ ɛzaɣtʋ, ɛlɛ, Ɛsɔ ñapɩsɩ-pʋ, kɩbandʋ se, ɛyabɩnɩ ɛyaa sakɩyɛ ñʋʋ ɛzɩ panaɣʋ sɔnɔ yɔ. ²¹ Se, lɛɛlɛɛyɔ, sɔɔndʋ ɛtaakpa-wɛ, ɛnʋ cɔŋnɩ pa nɛ pɔ-hɔŋ taa ñɩma pɔ-yɔɔ.

Ɛyɔɔdɩnɩ-wɛ tɔm kɩpandʋ ḿbʋ lɛ, pɩlabɩ-wɛ hʋnʋm nɛ pɩkʋyɩ pɔ-yɔɔ.

²² Mbʋʋ Yoosɛɛfʋ nɛ ɛ-caa hɔʋ taa ñɩma pacaɣ Ejipiti ɛjaɖɛ taa. Yoosɛɛfʋ caɣ wezuu pɩnzɩ mɩnʋʋ nɛ hiu (110). ²³ Ɛna ɛ-pɩyalʋ Efiraayim piya nɛ paba piya. Ɛɖɔkɩ ɛ-sɛyɩ Maakiiri piya. Ɛ-pɩyalʋ Manaasee lʋlʋnɩ ɛ́lɛ. ²⁴ Nakʋyʋ wiye Yoosɛɛfʋ heyi ɛ-ɖalaa nɛ e-neu se, ɛnʋ wɩzɩ sɩbʋ. Ɛlɛ, paa pɩɩla ɛzɩma Ɛsɔ sɩŋnɩ-wɛ nɛ pakʋyɩ Ejipiti nɛ powolo ɛjaɖɛ ńɖɩ eɖuwaa se, ɛhaɣ Abɩraham nɛ Izaakɩ nɛ Yaakɔɔbʋ yɔ, ɖɩ-taa. ²⁵ Se, póɖuuni Ɛsɔ se, alɩwaatʋ ndʋ ɛ́lɛ sɩŋnɩ-wɛ ḿbʋ yɔ, pɛkpɛndɩɣnɩ ɛnʋ mɔɔ peeye. ²⁶ Yoosɛɛfʋ wɛnɩ pɩnzɩ mɩnʋʋ nɛ hiu (110) lɛ, ɛsɩ Ejipiti ɛjaɖɛ taa. Pɔñɔɔzɩ-ɩ nɛ sɔzɩŋ nim ɛzɩ pʋwɛʋ pɔ-sɔnzɩ taa yɔ, se ɛ́taawɛɛkɩ. Pʋwayɩ lɛ, pakpaɣ-ɩ nɛ paɖʋ Aɖakaɣ ŋga palabɩnɩ pɩyɛ yɔ, ka-taa.