¹ Alɩwaatʋ ndʋ tɩ-yɔɔ lɛ, Mooyiizi ñaawɛɛ ɛcɔnɩ ɛ-yɩtɩ Maadiyaanɩ tʋ Yetiroo heŋ nɛ pʋŋ pɔ-yɔɔ. Ɛ́lɛ́ ñaakɛni Maadiyaanɩ ɛjaɖɛ taa cɔjɔ. Nakʋyʋ wiye Mooyiizi woni wondu lakʋ taa nɛ ɛkɔɔ ɛtalɩ Ɛsɔ pʋʋ ŋgʋ́ payaɣ se Hrɛɛbɩ pʋʋ yɔ kʋ-yɔɔ. ² Peeye KƖPAƔLƲ tiyiyu lɩzɩ ɛ-tɩ nɛ ɛwɩlɩ-ɩ cɔkɔyɛ nɖɩ ɖiɖiɣni miŋ mʋʋ yɔ ɖɩ-taa. Toovenim lɛ, Mooyiizi nawa se cɔkɔyɛ wɛɛ ɖɩmʋʋ miŋ ɛlɛ, ɖɩtɩñakɩ. ³ Ḿbʋ́ʋ́, ɛdʋ ɛ-taa se, ɛnʋ hɛyɩɣ nɛ ɛna kawɩlasɩ nzɩ nɛ ɛnʋ ɖiɣzini se, pɩlabɩ ɛzɩma nɛ cɔkɔyɛ mʋʋ miŋ nɛ ɖɩɩñakɩ. ⁴ KƖPAƔLƲ nawa se ɛheyaa se ɛna lɛ, ɛyaa-ɩ nɛ miŋ ɛnʋ ɛ-taa se, Mooyiizi, Mooyiizi! Ecosi-i se, ɛnʋ́ʋ́ yɔ! ⁵ Peeye ɛ́lɛ́ pɩsɩnaa se, ɛtaakpɩtɩnɩ cɔkɔyɛ nɖɩ. Se, ɛhɔzɩ ɛ-naataŋgbala, ḿbʋ́ pʋyɔɔ yɔ Ɛsɔ kɔdaɣ lone taa ɛsɩŋ ḿbʋ́ yɔ. ⁶ Se, ɛnʋ kɛnɩ ɛ-cɔzɔnaa Abɩraham nɛ Izaakɩ nɛ Yaakɔɔbʋ pɛ-Ɛsɔ.

Pɩlabɩ ḿbʋ́ lɛ, sɔɔndʋ kpa Mooyiizi nɛ ehuuzi ɛ-ɛza yɔɔ se ɛtaana Ɛsɔ. ⁷ KƖPAƔLƲ tasɩ-ɩ heyuu se, ɛnʋ na ɛzɩma mbʋ paɖʋʋ ɛnʋ samaɣ kʋñɔŋ Ejipiti ɛjaɖɛ taa yɔ. Se, ɛnʋ nɩ kubusi nzɩ Izirɛɛlɩ ñɩma wɛɛ pamakɩ alɩwaatʋ ńdʋ́ Ejipiti ñɩma taa tʋma yɔɔ cɔnɩyaa wɛɛ pawɩlɩɣ-wɛ ñaŋ yɔ. Se, ɛnʋ sɩm pa-kʋñɩmɩŋ. ⁸ Se, pʋ-yɔɔ ɛnʋ tiba se ɛlɩzɩ-wɛ Ejipiti ñɩma nesi taa nɛ ewoni-wɛ ɛjaɖɛ nɖɩ ɖɩ-taa naalɩm nɛ tɩŋnum pɔtɔyaa yɔ ^a, ɖɩ-taa. Ɛjaɖɛ ńɖɩ, ɖɩwɛ ɖeu nɛ ɖɩtɛ ɖɩwalɩ. Kanaanɩ ñɩma nɛ Hɛɛtɩ liɖe taa ñɩma nɛ Amoorii ñɩma nɛ Periizii ñɩma nɛ Hiwi liɖe taa ñɩma nɛ Yeebuusii tɛtʋ taa ñɩma, pɛwɛnɩ ɛjaɖɛ ńɖɩ ɖɩ-taa. ⁹ Se, toovenim lɛ, ɛnʋ na ɛzɩma Ejipiti ñɩma wɛɛ panazɩɣ Izirɛɛlɩ ñɩma yɔ nɛ ɛnʋ nɩ pe-witu. ¹⁰ Se, lɛɛlɛɛyɔ lɛ, ɛnʋ tiyiɣ-i Ejipiti wiyaʋ cɔlɔ. Se ewolo nɛ ɛlɩzɩ ɛnʋ samaɣ́, Izirɛɛlɩ ñɩma ɛjaɖɛ nɖɩ́ ɖɩ-taa.

¹¹ Pɩlabɩ ḿbʋ lɛ, Mooyiizi pɔzɩ Ɛsɔ se, ɛnʋʋ anɩ nɛ ewoki Ejipiti wiyaʋ cɔlɔ se ɛlɩzɩ Izirɛɛlɩ ñɩma ɛ-ɛjaɖɛ taa? ¹² Peeye Ɛsɔ heyi-i se, ɛnʋ wɛɣ ɛ-cɔlɔ. Se, ɛ́na yʋsaɣ ŋga kawɩlɩɣ se ɛnʋ tiyiɣni-i yɔ. Se, ye ɛkɔma ɛlɩzɩ Izirɛɛlɩ ñɩma Ejipiti ɛjaɖɛ taa lɛ, ɛ nɛ wɛ powolo pʋʋ ŋgʋ yɔ kʋ-yɔɔ nɛ palaa-ɩ kɩlaʋ. ¹³ Mooyiizi heyi Ɛsɔ se pʋwɛ ɖeu. Se, ye ḿbʋ, ɛnʋ woki Izirɛɛlɩ ñɩma cɔlɔ nɛ eheyi-wɛ se pɔ-cɔzɔnaa Ɛsɔ tiyi ɛnʋʋ pɔ-cɔlɔ. Se, ye pɔpɔzɩ ɛnʋ se payaɣ ɛ́lɛ se we lɛ, ɛnʋ cosi-wɛ se we? ¹⁴ Peeye, Ɛsɔ kaɖɩ Mooyiizi kpayɩ se, ɛnʋ hɩɖɛ lɛ Mɛwɛtam. Se, ewoba lɛ eheyi Izirɛɛlɩ ñɩma se, weyi Ɛwɛtam yɔ etiyi ɛnʋ́ʋ́ pɔ-cɔlɔ. ¹⁵ Ɛsɔ tasɩ Mooyiizi heyuu se, eheyi-wɛ ɖɔɖɔ se weyi etiyi ɛnʋʋ pɔ-cɔlɔ yɔ, ɛnʋʋ lɛ KƖPAƔLƲ, pɔ-cɔzɔnaa Ɛsɔ, Abɩraham Ɛsɔ, Izaakɩ Ɛsɔ nɛ Yaakɔɔbʋ Ɛsɔ. Se, ɛnʋ hɩɖɛ lɛ, tam yɔɔ. Se, hɩɖɛ nɖɩ́ kpaɖɩŋ tɩŋa taa ɛyaa kaɣ-ɩ yaʋ paa alɩwaatʋ ndʋ. ¹⁶ Se, ewolo nɛ ekpeɣli Izirɛɛlɩ sɔsaa nɛ eheyi-wɛ se, KƖPAƔLƲ pɔ-cɔzɔnaa Ɛsɔ, Abɩraham nɛ Izaakɩ nɛ Yaakɔɔbʋ pɛ-Ɛsɔ lɩzɩ ɛ-tɩ nɛ ɛwɩlɩ ɛnʋ. Se, ɛnʋ luzi ɛ-tɩ nɛ pɔ-cɔlɔ kiŋ nɛ ɛnʋ na ɛzɩma pɛwɛɛ pɑwɩlɩɣ-wɛ kʋñɔŋ Ejipiti ɛjaɖɛ taa yɔ. ¹⁷ Se, pʋ-yʋʋ ɛnʋ ɖʋ ɛ-taa se ɛnʋ yeki nɛ palɩzɩ-wɛ Ejipiti ñɩma nesi tɛɛ, nɛ ɛnɛ la nɛ powoni-wɛ Kanaanɩ ñɩma nɛ Hɛɛtɩ liɖe taa ñɩma nɛ Amoorii ñɩma nɛ Periizii ñɩma nɛ Hiwii liɖe taa ñɩma nɛ Yeebuusii tɛtʋ taa ñɩma ɛjaɖɛ taa, ɛjaɖɛ nɖɩ́ ɖɩ-taa naalɩm nɛ tɩŋnum pɔtɔyaa yɔ. ¹⁸ Izirɛɛlɩ ñɩma kaɣ-ɩ welesinuu. Ɖɩnɛɛ lɛ, ɛ nɛ pa-sɔsaa pakaɣ wobu Ejipiti wiyaʋ cɔlɔ nɛ peheyi-i se, KƖPAƔLƲ Ebire ñɩma Ɛsɔ, ḿbá Ɛsɔ lɩzɩ ɛ-tɩ nɛ ɛwɩlɩ ḿbá. Se, pʋ-yɔɔ lɛ, ɛha ḿbáá nʋmɔʋ nɛ ḿbá ɖɔ kɩyakɩŋ naadozo nɛ powolo lakʋ taa nɛ pala-ɩ kɩlaŋ. ¹⁹ Ɛnʋ́ sɩma ḿbʋ se pɩtɩha Ejipiti wiyaʋ ɛɛkaɣ-wɛ yebu se pɛɖɛɛ, ye patɩkpa-ɩ kɩkpaʋ nɛ ɖoŋ yɔ. ²⁰ Pʋ-yɔɔ ɛ́nʋ́ kaɣ Ijipiti ñɩma nɩŋgbaaŋ hɔm nɛ kʋñɔmɩŋ ndɩ ndɩ weyi patanadɩ-ɩ yɔ ɛwɩlʋʋ, halɩ nɛ wiyaʋ ɖɔɔnʋʋ-wɛ kʋɖɔɔnʋ se pɛɖɛɛ. ²¹ Halɩ ɛ́nʋ́ yeki nɛ Ejipiti ñɩma la ɛ́nʋ́ samaɣ kɩpandʋ nɛ kaaɖɛɣ lɛ, kataɖɛɛ ndaakpasɩ. ²² Paa Izirɛɛlɩ halʋ weyi lɛ, ɛkaɣ sʋlʋmʋʋ Ejipiti halaa ḿbá paakɛ ɛ-ɖɩɣa taa ñɩma yaa ɛ-cɔlɔ ñɩma yɔ ñɩɣlɩm nɛ sika wondu nɛ wondu kususutu, nɛ paasʋ-tʋ pa-pɩyalaa nɛ pɛ-pɛlaa. Ḿbʋ́ʋ́ ɛkaɣ sʋsɩnaʋ EJIPITI ñɩma kʋñɔŋ.