¹ Abalʋ nɔɔyʋ kɛwɛɛ ḿbʋ nɛ ɛkpaɣ halʋ. Ɛ nɛ ɛ-halʋ pɛkɛ Leevii liɖe taa ñɩma. ² Pɩkɔma lɛ, halʋ ɛnʋ ɛhaɣ hoɣa nɛ ɛlʋlɩ abalɩbɩɣa nakɛyɛ. Ɛlʋlɩ-kɛ lɛ, ɛna se keɖewa. Peeye, ɛmɛsɩ pɩɣa ŋga fenasɩ naadozo. ³ Ɛlɛ, ɛtapɩzɩɣ se, ɛwɛ-kɛ mɛsʋʋ ḿbʋ́ lɛ, ɛkpaɣ ɖɔkʋ nakʋyʋ nɛ ɛtaa-kʋ aŋwɔ nɛ tɩʋ nakʋyʋ cɩyɩm se, lɩm ɛtaasʋʋ. Ɛtɛma lɛ, ɛkpaɣ pɩɣa nɛ ɛhɩzɩ-kɛ kɩ-taa nɛ ewoni ɖɔkʋ ŋ́gʋ́ nɛ ɛsɩɩ-kʋ pɔɔ nɔɔ yɔɔ, kañɩŋgbayaɣ hɛkʋʋ taa. ⁴ Pɩlabɩ ḿbʋ́ lɛ, pɩɣa ŋga kɔ-kɔɔ sɩŋ poliŋ taa se ɛna mbʋ kɛtɛŋna yɔ. ⁵ Pɩkɛda lɛ, Ejipiti wiyaʋ pɛlɛ kʋyɩ etii Niili pɔɔ taa se ɛsɔ lɩm. Etikaɣ lɛ, ɛ-taabalaa halaa ñɩma sɩɩ-ɩ nɛ pɛwɛɛ petiki nɛ pakpaɣ kiteŋ yɔɔ. Pɩkɛdaa lɛ, wiyaʋ pɛlɛ losi ɖɔkʋ kañɩŋgbayaɣ hɛkʋʋ taa nɛ etiyi ɛ-tʋmlaɖʋ halɩñɩnʋ se, ewolo ɛkpaɣ-kʋ nɛ ewoni-i. ⁶ Ekulaa lɛ, ɛmaɣna abalɩbɩɣa nakɛyɛ kɛwɛɛ kewiliɣ. Peeye, ɛna ka-pʋdɔdɩyɛ nɛ ɛtɔ se, paa pɩɩla ɛzɩma pɩkɛ Ebire tʋ nɔɔyʋ pɩɣa! ⁷ Ɖɩnɛɛ, pɩɣa kɔɔ pɔzɩ wiyaʋ pɛlɛ se, ɛnʋ ewolo Ebire ñɩma tɛ nɛ ɛñɩnɩ-ɩ halʋ nɔɔyʋ nɛ ɛ́lɛ́ cɔnɩ-ɩ kɔ-yɔɔ yaa we? ⁸ Peeye, wiyaʋ pɛlɛ cosi-i se, ɛɛɛ!

Pʋ-yɔɔ kɔɔ woba ɛkɔna pɩɣa ŋga ko-ɖoo kʋlʋlʋ. ⁹ Ɛ́lɛ́ kɔma lɛ, wiyaʋ pɛlɛ heyi-i se, ɛkpaɣ pɩɣa ŋga nɛ ɛcɔnɩ ɛ́nʋ́ʋ́-ɩ́ kɔ-yɔɔ. Se, ɛnʋ kaɣ-ɩ hɛyʋʋ pʋ-yɔɔ. Peeye, ɖoyo kpaɣ pɩɣa nɛ ɛcɔnɩ kɔ-yɔɔ.

¹⁰ Pɩɣa kɔm kapaɣlɩ lɛ, ko-ɖoo kpaɣ-kɛ nɛ ewoni-kɛ ɛcɛlɩ Ejipiti wiyaʋ pɛlɛ nɛ kacaɣ ɛ́lɛ́ cɔlɔ ɛzɩ ɛ-tɩtɩŋa ɛ-pɩɣa yɔ. Ḿbʋ́ pʋyɔɔ yɔ, ɛtɔŋaɣ se, lɩm taa ɛnʋ lɩzɩ-ɩ. Pʋ-yɔɔ ɛha-ɩ hɩɖɛ se, Mooyiizi^a.

¹¹ Mooyiizi labɩ ɛyʋ sʋtʋyʋ lɛ, nakʋyʋ wiye ewolo se ɛna ɛ-tɛ ñɩma cɔlɔ. Ɛɛna kʋñɔŋ ŋgʋ paɖʋwaɣ-wɛ yɔ. Ɛtɩɩtala lɛ, ɛna Ejipitʋ nɔɔyʋ ɖɔɔnɩ mabʋ e-koobiya Ebire ñɩma taa nɔɔyʋ. ¹² Peeye, Mooyiizi cɔnɩ ɛ-cɔlɔ kpɛɛɛ. Ɛcɔnaa nɛ ɛtɩna nɔɔyʋ lɛ, ɛkpa Ejipiti tʋ nɛ ɛkʋyɩ-ɩ nɛ ɛkpaɣ ɛ́lɛ́ tomnaɣ nɛ ɛmɛsɩ-kɛ kañɩŋa taa. ¹³ Tɛʋ fema nɛ ɛpɩsɩ lɛ, ɛmaɣna Ebire ñɩma naalɛ pɛwɛɛ pamakɩ ɖama pa-taa peɖeke. Peeye eloli-wɛ nɛ ɛpɔzɩ weyi ɛca tɔm yɔ se, pɩlabɩ ɛzɩma nɛ ɛmakɩ ɛ-taabalʋ? ¹⁴ Ɛ́lɛ́ kitini-i se, asɩ-ɩ ḿbá wiyaʋ nɛ ḿbá tɔmhʋyʋ? Ɛpɔzɩ-ɩ se, ɛñɩnɩɣ ɛkʋ ɛnʋ ɛzɩ ɛkʋ Ejipiti tʋ yɔ yaa we? Mooyiizi nawa see ɛyaa sɩma tɔm ndʋ lɛ, sɔɔndʋ kpa-ɩ. ¹⁵ Pɩlabɩ ḿbʋ lɛ, Farawɔɔ maɣmaɣ kɔɔ ɛnɩ tɔm ńdʋ nɛ ɛñɩnɩɣ se ɛkʋ-ɩ. Peeye, Mooyiizi sewa nɛ ewolo ɛmɛlɩ Maadɩyaanɩ^b ɛjaɖɛ taa. Ɛtalɩ peeye lɛ, ewolo ɛcaɣ lɔkɔ nakʋyʋ cɔlɔ ^c.

¹⁶ Cɔjɔ nɔɔyʋ kɛwɛ Maadɩyaanɩ ɛjaɖɛ nɖɩ ɖɩ-taa, payaɣ-ɩ se Yetiroo. Ɛkɛwɛnɩ pɛlaa lʋbɛ. Ḿbʋ́ʋ́ pɛlaa ḿba powoba se polu lɩm nɛ papɩyɩ pulona taa se, pa-caa wondu ɛñɔɔ. ¹⁷ Pɩkɛdaa lɛ, wondu ketiyaa napɛyɛ wolo se pɔɖɔɔnɩ-wɛ. Mooyiizi na ḿbʋ́ lɛ, ɛlʋ pɛlaa ḿba pɔ-yɔɔ nɛ ɛha pɔ-wondu lɩm nɛ tɩñɔɔ. ¹⁸ Pɛlaa ḿba pɔkɔm papɩsɩ ɖɩɣa lɛ, pa-caa pɔzɩ-wɛ se, pɩlabɩ ɛzɩma nɛ papɩsɩ lɔŋ ḿbʋ́? ¹⁹ Ḿbʋ́ʋ́ pocosi-i se, Ejipiti tʋ nɔɔyʋ lɩ zɩnɩ-wɛ wondu ketiyaa nesi tɛɛ, halɩ elu lɩm nɛ ɛpɩyɩ ḿba wondu nɛ tɩñɔɔ. ²⁰ Pʋ-yɔɔ pa-caa pɔzɩ-wɛ se, abalʋ ɛnʋ ɛwɛ le yɔ? Se, patiwoni-i ɖɩɣa suwe? Se, powolo paya-ɩ nɛ ewolo ɛ nɛ wɛ pɔtɔɔ.

²¹ Ḿbʋ́ʋ́ Mooyiizi tisaa nɛ ɛcaɣ abalʋ ɛnʋ ɛ-tɛ. Pɩlablɩ ḿbʋ́ lɛ, Yetiroo kpaɣ ɛ-pɛlɛ Seforaa nɛ ɛha-ɩ se, ɛkɛ ɛ-halʋ. ²² Pacaɣ lɛ, Ciporaa haɣ hoɣa nɛ ɛlʋlɩ abalɩpɩɣa. Pɑlʋlɩ-kɛ lɛ, Mooyiizi tɔ se, ɛnʋ yaɣ-kɛ se, Gɛrɩsɔɔm. Toovenim lɛ, ɛtɔŋaɣ se, ɛnʋ kɛ caɣyʋ ɛjaɖɛ nɖɩ ɖɩ-taa ɛnʋ kɛ ɛgɔm yɔ.

²³ Pʋwayɩ pɩkɔm pileɖipɩŋŋ lɛ, Ejipiti ɛjaɖɛ wiyaʋ sɩ. Yomiye tʋmɩyɛ nɩwaɣ Izirɛɛlɩ ñɩma lɛ, papazɩ wiluu nɛ pamaki kubusi nɛ Ɛsɔ cɔlɔ kiŋ se, ɛ́lɛ́ ɛlɩzɩ-wɛ pɩ-taa. ²⁴ Pɩlabɩ ḿbʋ́ lɛ, Ɛsɔ nɩɩ pe-wiluu nɛ ɛtɔzɩ nɔɔ haʋ ḿbʋ pʋwɛ ɛ nɛ Abɩraham nɛ Izaakɩ nɛ Yaakɔɔbʋ pɛ-hɛkʋ taa yɔ pʋ-yɔɔ. ²⁵ Ḿbʋ́ʋ́, Ɛsɔ cɔnɩ Izirɛɛlɩ ñɩma pʋdɔdɩyɛ nɛ ɛya pa-ñʋʋ.