¹ Nakʋyʋ wiye KƖPAƔLƲ tɔm Mooyiizi se, ² ɛpaɣ Izirɛɛlɩ ñɩma se powolo pekpeɣli ɖenɖe payaɣ se Pihaahiirooti yɔ, pɩ-cɔlɔ, Migidooli tɛtʋ nɛ kañɩŋgbayɩsɩ teŋgu pɛ-hɛkʋ taa. Se, pekpeɣli Baalɩ Cefooni ɛsɩndaa, lone nɖɩ ɖɩ-taa ɖeiɖei, teŋgu cɔlɔ. ³ Ɖɩnɛ, Farawɔɔ kaɣ tɔm se, Izirɛɛlɩ ñɩma leba, se sɩwɛɛ siyotuu lakʋ taa yem. Se, papɩsɩ yomaa lakʋ. ⁴ Se, ɛnʋ yeki nɛ Farawɔɔ la ñʋʋ taa ɖoŋ nɛ ɛɖʋ Izirɛɛlɩ ñɩma wayɩ. Se ɖɩnɛ lɛ, ɛnʋ wɩlɩɣ ɛnʋ ɖoŋ nɛ ɛtɔyɩtɩ ɛ nɛ e-you laɖaa tɩŋa. Se, pʋbʋ, Ejipiti ñɩma naɣ se, ɛ́nʋ́ʋ́ lɛ KƖPAƔLƲ. Pɩlabɩ mbʋ lɛ, Izirɛɛlɩ ñɩma la ɛzɩ papaɣ-wɛ yɔ.

⁵ Pɔkɔm peheyi Farawɔɔ nɛ ɛ-cɔlɔ ñɩma se, Izirɛɛlɩ ñɩma kʋyɩ ɛjaɖɛ taa lɛ, pala lɩmaɣzaa nɛ pɔtɔ se, ɛbɛ mba labɩ mbʋ yɔ? Se, ɛbɛ yɔɔ mba yebi Izirɛɛlɩ ñɩma nɛ pɛɖɛɛ? Se, lɛɛlɛɛyɔ lɛ, paapɩzɩɣ patasɩ kɛʋ mbá yomaa. ⁶ Peeye, Farawɔɔ yebi pɔñɔɔzɩ e-you lɔɔɖɩyɛ nɛ ɛ nɛ e-you laɖaa pɛɖɛɛ. ⁷ Ɛɛkpaɣ e-you lɔɔɖa kɩpana taŋga nɛ mɩnʋʋ nɛ ɛkpɛndɩnɩ Ejipiti you lɔɔɖa lɛɛna tɩŋa. Ɛyaa naadozo kɛwɛ paa you lɔɔɖɩyɛ nɖɩ lɛ, ɖɩ-taa. ⁸ Izirɛɛlɩ ñɩma kʋyɩ Ejipiti ɛjaɖɛ taa nɛ palɩɣ lɛ, pakpazɩ pe-nesi se pɩwɩlɩ se pɛwɛ pa-tɩ yɔɔ ^a. Pʋ-yɔɔ, KƖPAƔLƲ yeba nɛ Ejipiti wiyaʋ Farawɔɔ la ñʋʋ taa ɖoŋ nɛ ɛkʋyɩ nɛ ɛɖʋ pa-wayɩ. ⁹ Ejipiti you laɖaa nɛ pa-kpaŋnaŋ nɛ po-you lɔɔɖa nɛ pɛ-ɛyaa paɖʋ Izirɛɛlɩ ñɩma wayɩ mbʋ́ lɛ, powolo pehiɣ-wɛ Pihaahiirooti. Paakpeɣli peeye Baalɩ Cefooni tɛtʋ ɛsɩndaa teŋgu cɔlɔ.

¹⁰ Izirɛɛlɩ ñɩma kɔm pakʋsɩ pɛ-ɛza nɛ pana se Farawɔɔ nɛ Ejipiti ñɩma paɖʋ pa-wayɩ nɛ pɛwɛɛ pɔñɔtɩnɩ-wɛ lɛ, sɔɔndʋ kpa-wɛ pɩtɩɩfɛyɩ. Peeye, papazɩ kubusi mabʋ nɛ payaɣ KƖPAƔLƲ ¹¹ nɛ pɔpɔzʋʋ Mooyiizi se, ɛzɩ pɩlaŋ tɔɖɔɔna Ejipiti ɛjaɖɛ taa kɛtɛ ewoni ḿbaa lakʋ taa se ɛkʋ-wɛ yaa we? Se, ɛlɛ, ɛbɛ yɔɔ ɛlɩzɩ ḿbaa Ejipiti ɛjaɖɛ nɖɩ ɖɩ-taa? ¹² Se, ḿba kɛtɛm-ɩ-tʋ heyuu ḿba kɛwɛ Ejipiti lɛ se, eyele ḿba ɖiɣ ɖiɣ! Se, ḿba sɔɔlaa se pɛkɛ Ejipiti ñɩma tʋmlaɖaa! Se, pɩkɩlɩ weewee se ḿba ɛkɛ Pɛkɛ Ejipiti ñɩma tʋmlaɖaa, kɛtɛ ḿba ɛsɩ lakʋ taa. ¹³ Ɖɩnɛɛ, Mooyiizi heyi-wɛ se, pɔɖɔkɩ pa-tɩ kpam. Se, sɔɔndʋ ɛtaakpa-wɛ. Se, KƖPAƔLƲ kaɣ pa-ñʋʋ yabʋ. Se, toovenim lɛ, Ejipiti ñɩma ḿba pɛwɛɛ panaɣ-wɛ mbʋ yɔ, paakaɣ-wɛ tasʋʋ naʋ wiɖiye kaʋ. ¹⁴ Se, pacaɣ ɖiɣ ɖiɣ! Se, KƖPAƔLƲ kaɣnɩ you po-lone taa.

¹⁵ KƖPAƔLƲ pɔzɩ Mooyiizi se, ɛbɛ yɔɔ ɛmakɩ kubusɩ nɛ ɛyaɣ ɛnʋ se, ɛnʋ ɛkɔ nɛ ɛsɩnɩ-ɩ. Se, eheyi Izirɛɛlɩ ñɩma se pakʋyɩ nɛ pakpaɣ nʋmɔʋ. ¹⁶ Se, ɛkpaɣ ɛ-ɖaʋ e-nesi taa nɛ eposi-kʋ teŋgu yɔɔ nɛ pɩhɛɛ nʋmɔʋ teŋgu hɛkʋ taa nɛ piyele nɛ Izirɛɛlɩ ñɩma pɩzɩ nɛ pɛɖɛzɩ-kʋ nɩŋgbanzɩ waɣwaɣ. ¹⁷ Se, piyele nɛ ɛnʋ yɔ, ɛlakɩ nɛ Ejipiti ñɩma ñʋʋ kpa ɖoŋ nɛ paɖʋ pa-wayɩ teŋgu taa. Se, ɖɩnɛɛ ɛnʋ kaɣ e-ɖoŋ wɩlɩʋ nɛ ɛtɔyɩtɩ Farawɔɔ nɛ e-you laɖaa tɩŋa nɛ e-you lɔɔɖa nɛ ɛ-kpaŋnaŋ caɣyaa. ¹⁸ Se, alɩwaatʋ ndʋ ɛnʋ wɩlɩɣ e-ɖoŋ mbʋ́ lɛ, pʋbʋ Ejipiti ñɩma naɣ se, ɛ́nʋʋ lɛ KƖPAƔLƲ.

¹⁹ Pʋ-yɔɔ Ɛsɔtiyiyu weyi ɛkɛɖɛ Izirɛɛlɩ ñɩma nɔɔ nɛ ɛwɩlɩɣ-wɛ nʋmɔʋ yɔ, ɛlɛɣzɩ lone nɛ ɛpɩsɩnɩ pa-wayɩ. Ɖɔɖɔ lɛ, mɩndʋ ^b ndʋ tʋtʋ ñaawɛ pɛ-ɛsɩndaa n tɩpɩsɩnɩ pa-wayɩ, ²⁰ nɛ kɩsɩŋ nɛ kɩtayɩ Izirɛɛlɩ ñɩma nɛ Ejipiti ñɩma pɛ-hɛkʋ taa. Mɩndʋ ndʋ tɩɩkɛ cɩkpɛndʋʋ lɛlaa hɔɔlʋʋ taa, piyele nɛ tɩñandɩɣ lɛlaa paba hɔɔlʋʋ taa. Pɩ-yɔɔ, pɔɖɔm ɖoo mpilim patɩpɩzɩ nɛ pɔñɔtɩnɩ ɖama.

²¹ Pʋwayɩ lɛ, Mooyiizi posi e-nesi teŋgu yɔɔ. Ɛlabi mbʋ́ lɛ, KƖPAƔLƲ yele nɛ heelim sɔsɔm nabʋyʋ lɩɩnɩ wɩsɩ ɖɩlɩyɛ hɔɔlʋʋ taa nɛ pɩma teŋgu yɔɔ ɖoo tɩŋa nɛ pɩfaɣ teŋgu hɔɔlɩŋ nɩɩlɛ nɛ piyele nʋmɔʋ waɣ waɣ, hɛkʋ taa. ²² Pɩlabɩ mbʋ́ lɛ, Izirɛɛlɩ ñɩma pɩzɩ pɛɖɛzɩ teŋgu nɩŋgbanzɩ waɣ waɣ ^c. Lɩm kakʋyaa pɩsɩŋ ɛzɩ koloŋa yɔ́ɔ pa-nɩwaŋ yɔɔ nɛ pa nɩmɩyɛ yɔɔ. ²³ Peeye Ejipiti ñɩma ɖʋ Izirɛɛlɩ ñɩma wayɩ. Farawɔɔ nɛ e-you laɖaa tɩŋa nɛ ɛ-kpaŋnaŋ tɩŋa nɛ e-youlɔɔɖa nɛ ɛ-kpaŋnaŋ caɣyaa pa-tɩŋa patɩŋ Izirɛɛlɩ ñɩma wayɩ, halɩ teŋgu hɛkʋ taa. ²⁴ KƖPAƔLƲ kɛwɛ ɛsɔmɩndʋ nɛ ñalɩmɩyɛ pa-taa nɛ ɛcɔŋna. Pɩkɔm ɛzɩ pɩcaɣ ñandʋʋ lɛ, élíɣtí Ejipiti ñɩma you laɖaa. ²⁵ Ɛlaba nɛ po-you lɔɔɖa pɔbɔla ɛɛtasɩɣ cɔʋ ^d, nɛ pɩɩwɛ-yɛ kaɖɛ se atasɩ pɩzʋʋ nɛ aɖɛnɩ ɛsɩndaa. Peeye, Ejipiti ñɩma mabɩ kubusi se, pʋwɛɛ se mba ese nɛ poposini Izirɛɛlɩ ñɩma sɩŋŋ. Se, mbʋ́ pʋyɔɔ yɔ, KƖPAƔLƲ kʋyɩ ɖɔ-yɔɔ nɛ pɔ-nɔɔ.

²⁶ Ɖɩnɛɛ, KƖPAƔLƲ heyi Mooyiizi se, eposi e-nesi teŋgu nɛ piyele nɛ lɩm pɩsɩ nɛ pɩwadɩ Ejipiti ñɩma you lɔɔɖa nɛ pa-kpaŋnaŋ caɣyaa pɔ-yɔɔ. ²⁷ Ɛyɔɔdɩ mbʋ́ lɛ, Mooyiizi la mbʋ ɖɔɖɔ nɛ teŋgu lɩm pɩsɩ ɛzɩ pɩɩwɛʋ yɔɔ. Ejipiti ñɩma mbá pesewaɣ potudi lɩm nɛ KƖPAƔLƲ tuzi-wɛ pɩ-taa. ²⁸ Lɩm pɩsaɣ ɛzɩ pɩɩwɛʋ yɔ lɛ, pɩwalɩ Ejipiti you laɖaa tɩŋa nɛ po-you lɔɔɖa nɛ pa-kpaŋnaŋ caɣyaa pɔ-yɔɔ. Ejipiti ñɩma tɩŋa mbá paaɖɔɔnɩ Izirɛɛlɩ ñɩma nɛ patɩŋ pa-wayɩ teŋgu taa yɔ, lɩm kpaɣ pa-tɩŋa, pɩtakazɩ nɔɔyʋ. ²⁹ Piyele nɛ Izirɛɛlɩ ñɩma yɔ, paba ñaaɖɛzɩ teŋgu nɩŋgbanzɩ waɣ waɣ. Lɩm kakʋyaa pɩsɩŋ ɛzɩ koloŋa yɔɔ pa-nɩwaŋ yɔɔ nɛ pa nɩmɩyɛ yɔɔ.

³⁰ Puwiye nɖɩ KƖPAƔLƲ yaba Izirɛɛlɩ ñɩma ñʋʋ nɛ ɛlɩzɩ-wɛ Ejipiti ñɩma nesi taa. Teŋgu lɩm walɩ Ejipiti ñɩma yɔɔ mbʋ́ lɛ, pasɩ nɛ Izirɛɛlɩ ñɩma na po-tomnasɩ teŋgu nɔɔ. ³¹ Peeye, Izirɛɛlɩ ñɩma na hama lakasɩ nzɩ KƖPAƔLƲ laba nɛ ɛkʋyɩ Ejipiti ñɩma yɔɔ yɔ. Pʋ-yɔɔ, pañam KƖPAƔLƲ nɛ paɖʋ pe-lidaʋ ɛ nɛ ɛ-tʋmlaɖʋ Mooyiizi, pɔ-yɔɔ.