¹ Pʋwayɩ lɛ, Izirɛɛlɩ ñɩma kʋyɩ Elim tɛtʋ taa nɛ pɛɖɛɛ nɛ powolo patalɩ Siini lakʋ taa. Fenaɣ naalɛ ñɩŋga tɛ kɩyakʋ hiu nɛ kagbaanzɩ^a ñɩŋgʋ wiye ɛzɩ palɩʋ Ejipiti ɛjaɖɛ taa yɔ, patalɩ peeye. Siini lakʋ wɛ Elim tɛtʋ ^b nɛ Sinayɩ pʋʋ pɛ-hɛkʋ taa. ² Lakʋ taa peeye, Izirɛɛlɩ ñɩma pazɩ midinuu Mooyiizi nɛ Aarɔɔnɩnɩnɩ. ³ Pɔyɔɔdaɣ se, piikili ɖeu se KƖPAƔLƲ ɛkʋ mbaa alɩwaatʋ ndʋ ḿba kekpeɣli nandʋ ɖeɣsi cɔlɔ Ejipiti ɛjaɖɛ taa nɛ ḿba kɛwɛnɩ sakɩyɛ se pɔtɔɔ. Se, ɛlɛ paba yɔ, powoni mbaa lakʋ taa se pakʋ mba ñɔɔsɩ!

⁴ Ɖɩnɛɛ, KƖPAƔLƲ heyi Mooyiizi se, ɛnʋ yeki nɛ kpɔnɔ lɩɩnɩ ɛsɔdaa nɛ kitii ɛzɩ tɛʋ yɔ. Se, paa efemiye nɖɩ lɛ, ɛyaa kalɩɣnɩ pa-ɖikpeɣliye taa nɛ powolo pakpaɣ paa weyi lɛ, e-femiye tɔɔnaɣ. Se, ɛnʋ takɩɣ-wɛ nɛ ɛna se, pɔɖɔŋ ɛnʋ paɣtʋ yɔɔ yaa paaɖɔŋ. ⁵ Se, kɩyakʋ loɖo ñɩŋgʋ wiye paa weyi ewoki tɔɔnaɣ kpaɣ lɛ, ɛkpaɣ mbʋ ɛtɩɩkpaɣkɩɣ yɔ pɩ-tɛ nabʋlɛ. Se, pʋbʋ Izirɛɛlɩ ñɩma ɛɛkaɣ tasʋʋ lɩʋ tɔɔnaɣ kpaɣʋ kɩyakʋ lʋbɛ ñɩŋgʋ ŋgʋ kɩkɛ-wɛ kɩyakʋ kɩhɛzʋʋ yɔ.

^6-8 Peeye, Mooyiizi nɛ Aarɔɔnɩnɩnɩ peheyi Izirɛɛlɩ ñɩma se, ɖanaɣ ŋga lɛ, KƖPAƔLƲ kaɣ-wɛ cɛlʋʋ nandʋ se pɔtɔɔ. Mbʋ pʋyɔɔ yɔ, ɛnɩ pemidini-i miduu mbʋ yɔ. Se, ɖɩnɛɛ pakaɣ ɖiizinuu se, ɛ́lɛ KƖPAƔLƲ eyebini nɛ palɩɩ Ejipiti ɛjaɖɛ taa. Se, kifeŋ tanaŋ lɛ, pakaɣ naʋ e-koboyaɣ, alɩwaatʋ ndʋ ɛcɛlɩɣ-wɛ tɔɔnaɣ sakɩyɛ yɔ. Se, piyele mba yɔ, mba tamʋna se pakaɖɩnɩ mba. Se, ye palabɩ mbʋ yɔ, toovenim lɛ, KƖPAƔLƲ pemidinaa.

⁹ Pʋwayɩ lɛ, Mooyiizi heyi Aarɔɔnɩnɩnɩ se eheyi Izirɛɛlɩ ñɩma samaɣ se kowolo KƖPAƔLƲ ɛsɩndaa. Mbʋ pʋyɔɔ yɔ, ɛ́lɛ nɩ pemidini-i miduu mbʋ yɔ. ¹⁰ Aarɔɔnɩnɩnɩ ɖɔŋnɩ Izirɛɛlɩ ñɩma samaɣ yɔɔdɩnʋʋ lɛ, paba kɛzɩ pa-tɩ nɛ pɔcɔŋnɩ lakʋ hɔɔlʋʋ taa, nɛ kpaagbaa mbʋ lɛ, KƖPAƔLƲ koboyaɣ wɩlɩ ka-tɩ mɩndʋ ^c yɔɔ. ¹¹ Pʋwayɩ lɛ, KƖPAƔLƲ heyi Mooyiizi se, ¹² ɛnʋ nɩ Izirɛɛlɩ ñɩma miduu. Se, eheyi-wɛ se, ɖanaɣ ŋga kɔ-yɔɔ lɛ pakaɣ nándʋ tɔɔʋ, nɛ kifeŋ tanaŋ lɛ, pakaɣ tɔɔnaɣ sakɩyɛ mʋʋ. Ɖɩnɛɛ lɛ, pakaɣ ɖiizinuu se, ɛnʋʋ KƖPAƔLƲ ɛkɛ pɛ-Ɛsɔ.

¹³ Toovenim, ɖanaɣ ɖanaa lɛ, pɩ́tɛɣ́sɩ ^d wolo sɩcaɣ pa-ɖikpeɣliye taa, nɛ kifem tanaŋ lɛ, ɖoluu kpa nɛ kɩcɔɔ pa-ɖikpeɣliye kpɛɛɛ. ¹⁴ Ɖoluu kɔm kʋkʋyɩ lɛ, piyele panaɣ nabʋyʋ kʋlʋmɩm yɩpɩ yɩpɩ, tataa. ¹⁵ Izirɛɛlɩ ñɩma na mbʋ lɛ, pɔpɔzʋʋ ɖama se, ɛbɛ lɛ? Mbʋ pʋyɔɔ yɔ, pataasɩ mbʋ pɩkɛwa yɔ. Peeye, Mooyiizi heyi-wɛ se, Tɔɔnaɣ ^e ŋga KƖPAƔLƲ haɣ-wɛ se pɔtɔɔ yɔ, ŋgá lɛ. ¹⁶ Se, KƖPAƔLƲ ɖʋwa se, paa weyi ekuu mbʋ ɛpɩzɩɣ ɛtɔɔ efemiye taa yɔ. Se, pɔcɔnɩ ɛyaa ɛzɩma wɛ kizinziku kʋɖʋmʋʋ tɛɛ yɔ nɛ pokuu ɛzɩ litrinaa naanza yɔ, ɛyʋ ñʋʋ taa.

¹⁷ Pʋwayɩ lɛ, Izirɛɛlɩ ñɩma labʋ mbʋ ɖeyi ɖeyi ɛzɩ peheyu-wɛ yɔ. Pa-taa lɛlaa kpaɣ sakɩyɛ nɛ piyele lɛlaa kpaɣ ŋñɩɩɩ. ¹⁸ Ɛlɛ, ye pamaɣzɩɣ yɔ, mba poku tɔɔnaɣ sakɩyɛ yɔ, pataawɛna nɛ pɩkɩlɩ mbʋ pʋpɔzʋʋ-wɛ yɔ, nɛ mba paba ñoku ŋñɩɩɩ yɔ, pataatɛɖɩ pʋyʋ ^f. Paa weyi, ɛɛwɛnɩ mbʋ pʋpɔzʋʋ se ɛwɛnɩ yɔ.

¹⁹ Pʋwayɩ lɛ, Mooyiizi tasɩ-wɛ heyuu se, pɩfɛyɩ se nɔɔyʋ ɛpasɩ ɛsɩɩ kɩcaʋ se kifem tanaŋ lɛ, ɛɛtɔɔ. ²⁰ Ɛlɛ, pa-taa nabɛyɛ takpaɣ ndʋ Mooyiizi yɔɔdaa yɔ nɛ palabɩnɩ tʋmɩyɛ, nɛ pakazɩ tɔɔnaɣ nɛ tɛʋ fem-kɛ.Pɩlabɩ mbʋ lɛ, sonzoo sʋʋ tɔɔnaɣ ŋga ka-taa nɛ kɛwɛɛkɩ. Peeye, Mooyiizi pana kpanɩ-wɛ. ²¹ Pɩkpaɣʋnɩ aliwaatʋ ndʋ yɔ, paa tanaŋ ŋgʋ lɛ, paa weyi ekuu e-efemiye tɔɔnaɣ. Mbʋ pʋyɔɔ yɔ, tɔɔnaɣ ŋga kakazaa yɔ, koyulaɣ alɩwaatʋ ndʋ wɩsɩ kpaɣaɣ ɖoŋ yɔ.

²² Pɩtalɩ kɩyakʋ loɖo ñɩŋgʋ wiye lɛ, pokuu afema naalɛ tɔɔnaɣ, ɛzɩ litrinaa lutozo yɔ ɛyʋ ñʋʋ taa. Pɩlabɩ mbʋ lɛ, Izirɛɛlɩ samaɣ ñʋndɩnaa wolo peheyi-tʋ Mooyiizi ²³ nɛ ɛ́lɛ cosi-wɛ se, ḿbʋ KƖPAƔLƲ ɖʋwa. Se, kifen lɛ, pɩkɛ kɩyakʋ kɩhɛzʋʋ ^g ŋgʋ kɩkɛ KƖPAƔLƲ ñɩŋgʋ yɔ. Se, pʋ-yɔɔ lɛ, pawɩsɩ mbʋ pʋwɛɛ se pawɩsɩɣ yɔ nɛ patɩzɩ mbʋ pʋwɛɛ se patɩzɩɣ yɔ. Se, mbʋ pɩlaɣyaa yɔ, pasɩɩ-pʋ nɛ tɛʋ fe. ²⁴ Pɛkɛzɩ tɔɔnaɣ ŋgá kɩjaʋ yɔ, mbʋʋ pazɩ-kɛ nɛ tɛʋ fe ɛzɩ Mooyiizi kɔpɔzʋ-wɛ yɔ, kɔtɔsɔŋ ŋgʋ kataɖʋ sonzoo. ²⁵ Peeye, Mooyiizi heyi-wɛ se, pɔtɔɔ tɔɔnaɣ ŋ́ga puwiye. Se, mbʋ pʋyɔɔ yɔ, puwiye kɛ KƖPAƔLƲ kɩyakʋ kɩhɛzʋʋ. Se, paa palɩ awayɩ, paakaɣ nabʋyʋ naʋ. ²⁶ Se, toovenim lɛ, papɩzɩɣ pokuu tɔɔnaɣ ŋga kɩyakɩŋ loɖo. Se ɛlɛ, kɩyakʋ lʋbɛ ñɩŋgʋ wiye lɛ, nabʋyʋ fɛyɩ, mbʋ pʋyɔɔ yɔ, ŋgʋʋ lɛ kɩyakʋ kɩhɛzʋʋ.

²⁷ Pɩtɛlɛ, Izirɛɛlɩ ñɩma taa nabɛyɛ kʋyɩ ɖi-kpeɣliye taa nɛ palɩɩ se pokuu tɔɔnaɣ kɩyakʋ lʋbɛ ñɩŋgʋ wiye nɛ petehiɣ pʋyʋ. ²⁸ Pɩlabɩ mbʋ lɛ, KƖPAƔLƲ pɔzɩ Mooyiizi se, pɛtɛŋ pa-taa se pɛwɛɛ mbʋ nɛ paaɖɔŋ ɛnʋ paɣtʋ nɛ ndʋ ɛnʋ ɖʋwa yɔ, tʋ-yɔɔ yaa we? ²⁹ Se, panɩɩ camɩyɛ se ɛnʋ ha-wɛ kɩyakʋ kɩhɛzʋʋ se pɛhɛzɩ, nɛ pʋ-yɔɔ kɩyakʋ loɖo ñɩŋgʋ wiye lɛ, ɛnʋ haɣ-wɛ afema naalɛ tɔɔnaɣ. Se, kɩyakʋ lʋbɛ ñɩŋgʋ wiye lɛ, paa weyi ɛcaɣ ɛ-tɛ, nɔɔyʋ ɛtaatasɩ lɩʋ awayɩ. ³⁰ Pʋ-yɔɔ Izirɛɛlɩ ñɩma hɛzɩɣ kɩyakʋ lʋbɛ ñɩŋgʋ wiye.

³¹ Pɩlabɩ mbʋ lɛ, Izirɛɛlɩ ñɩma ha tɔɔnaɣ ŋga hɩɖɛ se, maanɩ ^h. Tɔɔnaɣ ŋga kahʋlʋmaa nɛ kɛwɛɛ pee yɩpɩ yɩpɩ nɛ ke-leleŋ wɛɛ ɛzɩ kakandɛyʋʋ ŋgʋ pata kʋ-yɔɔ tɩŋ num yɔ.

³² Peeye, Mooyiizi tɔma se, KƖPAƔLƲ ɖʋwa se, pamaɣzɩ tɔɔnaɣ ŋga ñɩnaɣ nakɛyɛ taa nɛ pasɩɩ nɛ pawɩlɩ pɛ-sɛyɩnaa. Se pʋbʋ, paba kaɣ naʋ tɔɔnaɣ ŋga ɛnʋ kacalɩ-wɛ lakʋ taa, alɩwaatʋ ndʋ lɩzɩ-wɛ Ejipiti ɛjaɖɛ taa yɔ. ³³ Pʋ-yɔɔ, Mooyiizi heyi Aarɔɔnɩnɩnɩ se, ɛmaɣzɩ ɛyʋ kʋɖʋm efemiye tɔɔnaɣ nɛ ɛɖʋ koona wena a-taa pɔtɔsʋʋ tɔɔnaɣ yɔ a-taa naɖɩyɛ taa. Se pʋwayɩ lɛ, ɛsɩɩ kooye nɖɩ KƖPAƔLƲ ɛsɩndaa se pɩkɛnɩ tɔsʋʋ pɛ-sɛyɩnaa ⁱ cɔlɔ. ³⁴ Mbʋʋ, Aarɔɔnɩnɩnɩ laba nɛ ɛkpaɣ kooye ɛsɩɩ KƖPAƔLƲ nɔɔ haʋ aɖɩkaɣ ɛsɩndaa ɖɔɖɔ ɛzɩ KƖPAƔLƲ kaaɖʋ Mooyiizi paɣtʋ yɔ.

³⁵ Pɩlabɩ mbʋ lɛ, Izirɛɛlɩ ñɩma tɔɔ tɔɔnaɣ ŋga payaɣ se maanɩ yɔ pɩnzɩ nɩɩnaza piwolo pɩsɩɩnɩ patalʋ tɛtʋ ndʋ ɛyaa wɛ tɩ-taa yɔ, tɩ-taa. Pɔtɔɔ-kɛ mbʋ piwolo pɩsɩɩnɩ kámaɣ́ ŋga pɛɖɛzɩɣ nɛ pasʋʋ Kanaanɩ ^j ɛjaɖɛ taa yɔ. ³⁶ Maanɩ tɔɔnaɣ ŋga ɛyʋ kʋɖʋm tɔkɩ efemiye taa yɔɔ makɩnɩ ɛzɩ litrinaa naanza yɔ. Pamaɣzɩ ɛyʋ kʋɖʋm efemiye tɔɔnaɣ nɛ patayɩ-kɛ tɔm hiu yɔ, pɩlakɩ pɩ-tɛ hɔɔlʋʋ kʋɖʋmʋʋ hɔɔlɩŋ hiu taa.