¹ Pʋwayɩ lɛ, KƖPAƔLƲ tasɩ yɔɔdʋʋ se, paɣtʋ lɛɛtʋ ndʋ ɛnʋ pɔzʋʋ-ɩ se ɛɖʋ Izirɛɛlɩ ñɩma yɔ, ndʋ́ yɔ. ² Se, ye payabɩ yom nɛ ɛkɛ Ebɩre tʋ yɔ, pɩnzɩ loɖo ɛkɛɣ yom. Piyele pɩnaɣ lʋbɛ ñɩŋga lɛ, ɛpɩzɩɣ ɛɖɛɛ yem faaa, ɛɛhɛyɩɣ pʋyʋ nɔɔyʋ, ɛwɛɣ ɛ-tɩ yɔɔ. ³ Se, ye ɛɛwɛ e-ɖeke alɩwaatʋ ndʋ ɛkɛ yom yɔ, ɛdɛɣ ɖɔɖɔ e-ɖeke. Se, ye ɛɛkpaɣ halʋ yɔ, ɛ nɛ ɛ-halʋ pɛɖɛɣna. ⁴ Se, ye ɛ-caa weyi ɛyabɩ-ɩ ɛcanɩ-ɩ halʋ nɛ ɛ́lɛ́ lʋɩ-ɩ piya, abalɩbiya nɛ halɩbiya yɔ, ɖɩnɛ abalʋ ɖeke ɖɛɣna, piyele halʋ nɛ piya pɛkɛ ɛ-caa weyi ɛyabɩ-ɩ yɔ, ɛ-ñɩm. ⁵ Se, ɛlɛ, ye yom ɛtɔm se, ɛsɔɔlɩ ɛ-caa nɛ ɛ-maɣmaɣ ɛ-halʋ nɛ e-piya nɛ ɛɛcaɣ se ɛɖɛɛ eyele-wɛ nɛ ɛwɛɛ ɛ-tɩ yɔɔ yɔ, ⁶ ɛ-caa eyele nɛ Ɛsɔ kɛ pa-aseɣɖe tʋ ^a. Se, ɛ-caa ewoni-i ɛmalɩsɩnɩ nɔnɔɔ yaa ɛ-ɖɩɣa nɔnɔɔ ɖasɩ nɛ ɛtʋlɩ ɛ-nɩŋgbaaŋ nɛ pɩñɛyaɣ. Se, pɩkpaɣʋ nɛ alɩwaatʋ ndʋ lɛ, abalʋ ɛnʋ, ɛwɛɣ ɛ-caa tʋmɩyɛ taa, tam.

⁷ Se, ye nɔɔyʋ ɛpɛdɩ ɛ-pɛlɛ se ɛkɛ yom yɔ, pɛlɛ ɛnʋ e-yomiye taa lɩʋ ɛɛwɛɣ ɛzɩ abalʋ ɛɛkɛnɩ yom yɔ. ⁸ Se, ye ɛ-caa nɔɔyʋ ɛyabɩ-ɩ se ɛkɛ ɛ-halʋ nɛ pɩkɔɔ nɛ e-liu fɛyɩ-ɩ yɔ, pʋwɛɛ se ɛpɩsɩnɩ pɛlɛ ɛnʋ ɛ́lɛ́ ñɩnʋ weyi ɛ-cɔlɔ ɛɛyabɩ-ɩ yɔ nɛ cɛlɩ-ɩ e-liidiye. Se, ɛfɛyɩnɩ waɖɛ se ɛkpaɣ-ɩ nɛ ɛpɛdɩnɩ ɛyaa agɔmaa. Se, ɛkpaɣ ɛ́lɛ́ nɛ ɛpɛdɩnɩ ɛyaa agɔma yɔ, ɛlɩ ɛ́lɛ́ wayɩ. ⁹ Se, ye ɛyabɩ ɛ́lɛ́ se ɛkɛ ɛ-pɩyalʋ halʋ yɔ, ɛlakɩ-ɩ ɛzɩ pʋpɔzʋʋ se pala pɛlaa mba pawalɩɣ yɔ. ¹⁰ Se, ye ɛ-caa weyi ɛyabɩ-ɩ yɔ, ɛtasɩ halʋ lɛlʋ kpaɣʋ yɔ, pɩfɛyɩ se ɛnɩɩnɩ ɛ́lɛ́ nɛ pɩkɩlɩ kajalaɣ tʋ paa tɔɔnaɣ haʋ yaa wondu yabʋ yaa halʋ nɛ abalʋ pacaɣʋ hɔɔlʋʋ, pa-taa. ¹¹ Se, ye pɩcɩbɩ-ɩ nɛ ɛtɩnɩɩnɩ halʋ hɔɔlɩŋ naadozo ɛnʋ ɛ-taa yɔ, halʋ pɩzɩɣ ɛɖɛɛ yem faaa, ɛɛhɛyɩɣ pʋyʋ.

¹² Weyi ɛma ɛyʋ nɔɔyʋ nɛ ɛkʋ-ɩ yɔ, pakʋ pʋdʋ ^b. ¹³ Se, pakpaɣ se, ɛyʋ ɛnʋ e-liu taawɛɛ se ɛkʋ-ɩ, ɛlɛ, ɛnʋʋ KƖPAƔLƲ ɛhanɩ ɛ́lɛ waɖɛ nɛ asɛyʋʋ tɩŋɩnɩ ɛ-yɔɔ nɛ kʋsʋʋ. Se, pʋbʋ, ɛnʋ wɩlɩɣ-ɩ lone naɖɩyɛ ^c nɛ weyi ɛ-yɔɔ asɛyʋʋ ŋgʋ kɩtɩŋɩnaa nɛ kʋsʋʋ yɔ, eewolo ɖɩ-taa nɛ ɛɖʋ kʋyʋʋ. ¹⁴ Se, ɛlɛ, ye nɔɔyʋ taa ɛwɛna lɛlʋ nɛ ɛkʋ-ɩ nɛ ajiitu yɔ, paa pʋdʋ ɛnʋ eewoba nɛ ɛmɛlɩ ɛnʋ kɩlaŋ ɖɩlayɛ^d cɔlɔ yɔ, palɩzɩ-ɩ nɛ pakʋ.

¹⁵ Se, weyi ɛmaabɩ ɛ-caa yaa e-ɖoo yɔ, pʋwɛɛ se pakʋ-ɩ.

¹⁶ Se, weyi ɛmɩlɩ ɛyʋ nɔɔyʋ yɔ, paa pakpa-ɩ nɛ ɛyʋ ɛnʋ yaa ɛtɛm-ɩ pɛdʋʋ yɔ, pʋwɛɛ se pakʋ-ɩ^e.

¹⁷ Se, weyi ɛwɩlɩ ɛ-caa yaa e-ɖoo kpalʋʋ yɔ, pʋwɛɛ se pakʋ-ɩ ^f.

¹⁸ Pakpaɣ ɛzɩ you taa, ɛyʋ nɔɔyʋ mabɩ lɛlʋ ŋgulumiye yaa piyɛ, nɛ weyi pamabɩ-ɩ yɔ ɛtasɩ, ɛlɛ, ɛwɛɛ ñalʋʋ yɔɔ, ¹⁹ se, ye weyi pamabɩ-ɩ yɔ ɛpɩzɩɣ kʋyʋʋ nɛ ɛɖɔkʋʋ ɖaʋ nɛ ɛlɩɣ yɔ, ɖɩnɛ lɛ, weyi ɛmabɩ-ɩ yɔ paahɔŋ ɛ-nɩŋgbaaŋ. Pɩtɛlɛ, pʋwɛnɩ-ɩ se ɛhɛyɩ kʋdɔndʋ ekuudi ɛ́lɛ tataa kuuduu mbʋ yɔ pʋ-yɔɔ nɛ ɛcɔnɩ ɛ́lɛ yɔɔ piwolo pɩtalɩ ɛ́lɛ yɔɔ cɛba.

²⁰ Se, ye nɔɔyʋ ɛmaba e-yom abalʋ ñɩnʋ yaa halʋ ñɩnʋ ɖaʋ nɛ ɛ́lɛ fiɣni ɛzɩ ɛsɩ yɔɔ yɔ, pʋwɛɛ se pakʋ-ɩ. ²¹ Se, ɛlɛ, ye weyi pamabɩ-ɩ yɔ ɛtasɩ labʋ kɩyakʋ kʋɖʋmʋʋ yaa kɩyakɩŋ naalɛ nɛ pɩcɔ ɛsɩ yɔ, ɖɩnɛ lɛ paatasɩɣ weyi ɛmabɩ-ɩ yɔ ɛ-nɩŋgbaaŋ hɔm. Se, mbʋ pʋyɔɔ yɔ, ɛɛkɛ ɛ́lɛ pʋyʋ.

²² Se, ye abalaa nabɛyɛ ɛwɛɛ poyou nɛ pɔyɔkɩ halʋ hoɣa tʋ nɔɔyʋ nɛ e-hoɣa lɩɩ nɛ pɩtala halʋ nabʋyʋ yɔ, weyi ɛyɔka-ɩ yɔ ɛhɛyɩɣ ḿbʋ halʋ walʋ ɖʋwa se pɛhɛyɩ yɔ. ²³ Se, ɛlɛ, ye nabʋyʋ ɛlabɩ halʋ yɔ, pɔhɔŋ weyi ɛtɩɣyɩ tɔm yɔ ɛ-nɩŋgbaaŋ, mbʋ pɩlabɩ halʋ yɔ pʋ-nɔɔ taa. ²⁴ Ye halʋ ɛzɩyɛ ɛyɔkɩna yɔ, pɔyɔkʋʋ ɛ-ɛzɩyɛ; ye halʋ keɖe eholina yɔ, poholuu e-keɖe; ye halʋ nesi ɛpɛlɩna yɔ, pɛpɛlɩɣ e-nesi nɛ ye halʋ nɩŋgbáŋaɣ ɛpɛlɩna yɔ, pɛpɛlɩɣ ɛ-nɩŋgbáŋaɣ. ²⁵ Se, ye miŋ ɛñaɣnɩ halʋ yɔ, pañaɣzɩɣ-ɩ miŋ nɛ kɩcɩkpʋʋ paɖʋ halʋ yɔ, paɖʋ-ɩ kɩcɩkpʋʋ nɛ ye ŋgulumiye ɛmabɩ halʋ yɔ, pamakɩ-ɩ ŋgulumiye ^g.

²⁶ Se, ye nɔɔyʋ ɛmabɩ e-yom, abalʋ ñɩnʋ yaa halʋ ñɩnʋ nɛ ɛyɔkɩ ɛ-ɛsɩyɛ yɔ, ɛsɩyɛ nɖɩ ɛyɔkɩ-ɖɩ yɔ ɖɩ-yɔɔ lɛ, eyeki-i nɛ ɛwɛɛ ɛ-tɩ yɔɔ. ²⁷ Se, ye ɛkpɛzɩ e-keɖe yɔ, e-keɖe nɖɩ ɛkpɛzɩ-ɖɩ yɔ ɖɩ-yɔɔ lɛ, eyeki-i nɛ ɛwɛɛ ɛ-tɩ yɔɔ.

²⁸ Se, ye nɔ abalɩñɩnʋ nɔɔyʋ ɛyɔkɩ abalʋ nɔɔyʋ yaa halʋ nɔɔyʋ nɛ ɛ́lɛ sɩ yɔ, payaɣ-ɩ pɛ nɛ ɛsɩ. Se, pataatɔɔ ɛ-nandʋ. Piyele nɛ nɔ tʋ yɔ, pataakpaɣ se ɛnʋʋ tɔm tɔɔwaa. ²⁹ Se, ɛlɛ, ye nɔ ɛnʋ ɛtɩɩyɔkʋʋ ɛyaa nɛ peheyi ɛ-tʋ nɛ ɛ́lɛ teke tɩ-yɔɔ yɔ yɔ, nɛ ye nɔ ɛnʋ ɛkʋ nɔɔyʋ nɛ ɛ-hɩŋ yɔ, pʋwɛɛ se pakʋ nɔ ɛnʋ ɛ-tʋ nɛ payaɣ nɔ ɛnʋʋ pɛ nɛ ɛsɩ. ³⁰ Se, ɛlɛ, ye pɛpɛlɩ nɔ-tʋ liidiye se ɛhɛyɩ nɛ ɛcaɣ wezuu yɔ, pʋwɛɛ se ɛhɛyɩ mbʋ pɛpɛlɩ-ɩ yɔ, pɩ-tɩŋa. ³¹ Se, ye nɔ abalɩñɩnʋ ɛyɔkɩ pɩɣa nakɛyɛ, abalɩ ñɩŋga yaa halɩ ñɩŋga, nɛ kasɩ yɔ, kʋɖʋm tʋ ndʋ́ʋ palakɩ. ³² Se, ye nɔ abalɩñɩnʋ ɛyɔkɩ yom abalɩñɩnʋ yaa halɩñɩnʋ nɔɔyʋ nɛ ɛ́lɛ sɩ yɔ, ɛ-tʋ hɛyɩɣ liidiye ñɩɣtʋ niidozo (30) weyi pɩyɔkɩ-ɩ mbʋ nɛ ɛsɩ yɔ ɛ-caa. Piyele nɔ ɛnʋ yɔ, payaɣ-ɩ pɛ nɛ ɛsɩ.

³³ Ye nɔɔyʋ ehuyi lɔkɔ nɛ etehuuzi kʋ-yɔɔ, nɛ nɔ nɔɔyʋ yaa kpaŋaɣ nakɛyɛ tɔlɩ kɩ-taa yɔ, ³⁴ kʋ-tʋ hɛyɛɣ kpɩnɛ tʋ liidiye, piyele nɛ ɛkpaɣ kpɩnɛ kɩsɩbɩyɛ nɖɩ nɛ ɖɩkɛ ɛ-ñɩnɖɛ. ³⁵ Se, ye nɔɔyʋ nɔ ɛyɔkɩ lɛlʋ nɔ nɛ nɔ ɛnʋ ɛsɩ yɔ, naŋ ɛnʋ ɛ-ñɩma tayɩɣ nɔ weyi ɛsɩba yɔ ɛ-nandʋ, nɛ pɛpɛdɩɣ nɔ weyi ɛwɛnɩ ɛ-ɛza yɔ nɛ patayɩ ɖɔɖɔ ɛ́lɛ liidiye. ³⁶ Ɛlɛ, ye pɩlaba se, nɔ ɛnʋ ɛyɔkaɣ ɛyaa nɛ ɛ-tʋ teke nɔ ɛnʋ e-ɖeɖe yɔ, ɛ-tʋ ɛnʋ ɛcaɣ nɔ nɛ ɛhɛyɩ, piyele nɛ ɛkpaɣ nɔ weyi ɛsɩba yɔ.

³⁷ Se, ye ɛyʋ nɔɔyʋ ɛmɩlɩ nɔ yaa heu yaa pʋnʋ, nɛ pʋwalɩ lɛ, ɛkʋ kpɩnɛ nɖɩ ɛmɩlaa yɔ yaa ɛpɛdɩ-ɖɩ yɔ, pʋwɛɛ se, ɛhɛyɩ ɖɩ-tʋ naŋ kagbaanzɩ yaa heŋ naanza yaa pɩŋ naanza, pu-lone taa.