¹ Nakʋyʋ wiye Nuuni pɩyalʋ Yoozuuwee kʋsɩ ɛyaa nabɛyɛ naalɛ Sitim ^a ɖikpeɣliye taa se powolo mɛsaɣ tɛɛ nɛ pɔcɔŋ Yeeriikoo tɛtʋ nɛ ɛjaɖɛ nɖɩ ɖɩ-taa tɩ-wɛɛ yɔ. Paba woba lɛ, pasʋʋ halʋ acɛyɛ tʋ weyi payaɣ se Rahaabɩ ^b yɔ, ɛ-tɛ nɛ pɛhɛnɩ peeye. ² Peeye nɔɔyʋ woba nɛ ɛtaɣzɩ Yeeriikoo wiyaʋ se Izirɛɛlɩ ñɩma nabɛyɛ wobi ɖoó ána a-taa tɛtʋ taa se pɔcɔŋ-tʋ. ³ Wiyaʋ nɩ ḿbʋ lɛ, etiyi se peheyi Rahaabɩ se, ɛyaa mba pasʋ ɛ́lɛ tɛ yɔ, powobi tɛtʋ taa se pɔcɔŋ nɛ patɩlɩ-tʋ siŋŋ. Se, ɛlɩzɩ-wɛ nɛ ɛ́cɛlɩ ḿba. ^4-5 Powobi peheyi Rahaabɩ ḿbʋ lɛ, ɛ́lɛ heyi-wɛ se, toovenim ɛyaa mba powobi ɛnʋ tɛ, ɛlɛ, ɛnʋ tana se pɛ-tɛ lɛ le. Se, ɖoó kɔm piyu nɛ pacaɣ se paɖɩɣ tɛtʋ nɔnɔɔ lɛ, palɩɩ nɛ ɛnʋ tana ɖenɖe pɛɖɛnaa yɔ. Se, ye patɩŋ pa-wayɩ kpɛdɛɛ yɔ, papɩzɩɣ pehiɣ-wɛ.

Ŋgʋ ɛɛkpaɣ pa-naalɛ nɛ ɛmɛsɩ.

⁶ Toovenim lɛ, ɛɛkpaɣ ɛyaa ḿba nɛ ɛkpanɩ-wɛ ɛ-ɖɩɣa ñʋʋ taa nɛ ɛmɛsɩ-wɛ ñɩyʋʋ nakʋyʋ ɖaŋ weyi ɛɛsɩ peeye yɔ ɛ-tɛɛ. ⁷ Eheyi mba wiyaʋ tiyaa yɔ́ɔ ḿbʋ lɛ, pakpaɣ nʋmɔʋ se paɖʋʋ pa-wayɩ. Patɩkʋyɩ tɛtʋ taa nɛ palɩɩ lɛ, paɖɩɣ tɩ-nɔnɔɔ. Peeye pakpaɣ nʋmɔʋ ŋgʋ kiwokini ɖenɖe pɛɖɛzɩɣ Yɔɔrɩdaŋ pɔɔ nɛ nɩŋgbanzɩ yɔ nɛ pañɩnɩɣ-wɛ. ⁸ Alɩwaatʋ ńdʋ lɛ, Rahaabɩ ñaakpa ɛ-ɖɩɣa ñʋʋ taa. Ɛkpawa lɛ, ɛyaa ḿba pa-naalɛ potoɖoda. ⁹ Peeye eheyi-wɛ se, ɛnʋ nawa se KƖPAƔLƲ ɖʋzɩ ɛjaɖɛ ńɖɩɩ pa nɛ pa-samaɣ pe-nesi taa. Se, sɔɔndʋ kpa mbaa ɛjaɖɛ taa ñɩma tɩŋa siŋŋ nɛ wɛ nɛ ḿba seliɣ. ¹⁰ Se, toovenim lɛ, ḿba nɩwa se alɩwaatʋ ndʋ palɩnɩ Ejipiti yɔ, KƖPAƔLƲ yeba nɛ Kañɩŋgbala teŋgu ^c lɩm sɔɔ ^d nɛ pɛɖɛzɩ nɩŋgbanzɩ waɣ waɣ. Se, ḿba nɩwa ɖɔɖɔ se, pakʋ Amoorii ñɩma awiya naalɛ, Sihɔɔnɩ nɛ Ɔɔgɩ ^e, Yɔɔrɩdaŋ pɔɔ wɩsɩ ɖɩlɩyɛ kiŋ nɛ pɛwɛɛkɩ a-ñɩm tɩŋa. ¹¹ Se, ḿba nɩ tɔm ńdʋ lɛ, pitii ḿba tome taa yɔɔɔ nɛ ḿba tatasɩ wɛnaʋ abalɩtʋ se pakaɖɩnɩ-wɛ. Toovenim lɛ, pa-KƖPAƔLƲ Ɛsɔ lɛ ɛsɔdaa nɛ tataa peeye Ɛsɔ. ¹² Se, póɖuuni KƖPAƔLƲ se palakɩ ɛnʋ hɔʋ taa ñɩma ɖeu ɖɔɖɔ ɛzɩ ɛnʋ labʋ-wɛ yɔ. Se, pawɩlɩ ɛnʋʋ mbʋ pɩwɩlɩɣ se, ¹³ peyeki ɛnʋ caa nɛ e-ɖoo nɛ ɛ-ɖalaa nɛ ɛ-kɔɔnaa nɛ pɔ-hɔŋ taa ñɩma tɩŋa payɩ nɛ pɛwɛɛ wezuu yɔ. Se, paayeki nɛ pakʋ ḿba. ¹⁴ Ɖɩnɛɛ ɛyaa ḿba pocosi-i se, ḿba ɖuwaa se, ye eteheyi nɔɔyʋ mbʋ pʋyɔɔ ḿba woba yɔ́ɔ yɔ, paa sɩm yɔ, ḿba sɩkɩ ɛ-yɔɔ. Se, alɩwaatʋ ndʋ KƖPAƔLƲ ɖʋzʋʋ tɛtʋ ndʋʋ ḿba nesi taa yɔ, ḿba lakɩ-ɩ ɖeu nɛ ḿba ɖɔ mbʋ ḿba ɖʋwa yɔ pʋ-yɔɔ.

¹⁵ Rahaabɩ ɖɩɣa kɛwɛ koloŋa sɔsɔɔ ńga kɔjɔ tɛtʋ nɛ kata yɔ, kɔ-yɔɔ. Ɛ nɛ wɛ pɛtɛm yɔɔdʋʋ lɛ, ɛkpaɣ nimiye naɖɩyɛ nɛ etisini-wɛ nɛ muntoɖe pɔʋ tataa. ¹⁶ Etisaɣ-wɛ ḿbʋ lɛ, eheyi-wɛ se, powolo pɛmɛlɩ pʋŋ taa nɛ ḿba pañɩnɩɣ-wɛ yɔ, pataana-wɛ. Se, pɛ́mɛlɩ peeye mbʋʋ kɩyakɩŋ naadozo nɛ pɩkɔɔ pɩsɩnɩ alɩwaatʋ ndʋ paba kitaa yɔ. Pʋbʋ papɩzɩɣ pakpaɣ pa-nʋmɔʋ nɛ pɛɖɛɛ. ¹⁷ Peeye ɛyaa ḿba peheyi-i se, ḿba lakɩ ɖuúu mbʋ eyeba nɛ ḿba ɖuu yɔ pʋ-yɔɔ. ¹⁸ Se, mbʋ pɩwɛɛ se ɛla yɔ lɛ se, ḿba nɛ pa-ñɩma pɔkɔm pasʋʋ ɛjaɖɛ taa lɛ, ɛkpaɣ nimaɣ kɩsɛmaɣ nɛ ɛta muntoɖe nɖɩ ɛlɩzɩnɩ ḿba yɔ ɖɩ-yɔɔ nɛ ɛ́yaa ɛ-caa nɛ e-ɖoo nɛ ɛ-ɖalaa nɛ e-newaa nɛ ɛ-hɔʋ taa ñɩma tɩŋa nɛ pekpeɣli ɛ-tɛ. ¹⁹ Se, ye nɔɔyʋ ɛlɩ ɛnʋʋ Rahaabɩ ɛ-tɛ nɛ pakʋ pʋdʋ yɔ, pʋdʋ ñɩndʋ lɛ, pɩtɛkɛ ḿba ñɩndʋ. Ɛlɛ, ye ḿba ɛkʋ nɔɔyʋ ɛ-ɖɩɣa taa yɔ, ḿba ñʋʋ taa pɩtɛŋ. ²⁰ Se, ɛlɛ, ye eheyi ɛyaa, ḿba lɩmaɣza yɔ, ɖɩnɛ ḿba lɩ ɖuúu ḿbʋ eheyi ḿba nɛ poɖuu yɔ pɩ-taa. ²¹ Pɔyɔɔdɩ ḿbʋ lɛ, Rahaabɩ tisi se ɛɛɛ! Peeye etisi ɛyaa ḿba pa-naalɛ se pɛɖɛɛ. Pɛɖɛwa lɛ, ɛkpaɣ nimaɣ kɩsɛmaɣ nɛ ɛta muntoɖe yɔɔ. ²² Cɔŋɩyaa ḿba pɛɖɛwa nɛ pɔkɔɔ patalɩ pʋŋ taa lɛ, pɛmɛlɩ peeye nɛ pɩkɔɔ pɩsɩnɩ alɩwaatʋ ńdʋ ḿba paɖʋwaɣ pa-wayɩ yɔ, papɩsɩ Yeeriikoo tɛtʋ taa yɔ. Paamɛlɩ peeye kɩyakɩŋ naadozo nɛ paba ñɩnɩ-wɛ hɔɔlɩŋ tɩŋa nɛ patana-wɛ. ²³ Ɖɩnɛɛ cɔŋɩyaa ḿba pa-naalɛ palɩnɩ pa-ɖɩmɛlɩyɛ taa nɛ petii pʋŋ nɛ pɛɖɛzɩ Yɔɔrɩdaŋ pɔɔ nɛ powolo Yoozuuwee cɔlɔ. Patalaa lɛ, pɛkɛdɩ ɛ́lɛ mbʋ pɩtɩŋa payɩ pɩɩtalɩ-wɛ yɔ. ²⁴ Peheyi-i se, paa pɩɩla ɛzɩma, KƖPAƔLƲ kpaɣ ɛjaɖɛ nɖɩ ɖɩ-tɩŋa nɛ ɛɖʋzɩ pa-tɩŋa pe-nesi taa. Se, halɩ sɔɔndʋ kakpa ɛjaɖɛ ńɖɩ ɖɩ-taa ñɩma nɛ nɔɔyʋ taawɛnɩ abalɩtʋ se ɛkaɖɩnɩ ḿba.