¹ Mooyiizi kɛkɛ KƖPAƔLƲ tʋmlaɖʋ. Ɛ-tɛɛ tʋ payaɣaɣ se Yoozuuwee, abalʋ weyi payaɣ-ɩ se Nuuni yɔ, ɛ-pɩyalʋ lɛ. Mooyiizi kɔm ɛsɩ lɛ, KƖPAƔLƲ heyi Yoozuuwee se, ² ɛnawa se ɛnʋ tʋmlaɖʋ Mooyiizi sɩba. Se, lɛɛlɛɛyɔ, ɛkʋyɩ nɛ ɛkpaɣ Izirɛɛlɩ ñɩma nɛ ɛ nɛ wɛ pɛɖɛzɩ Yɔɔrɩdaŋ pɔɔ nɛ powolo ɛjaɖɛ nɖɩ ɛnʋ haɣ-wɛ yɔ ɖɩ-taa. ³ Se, lona wena a-taa pɛfɛyɩɣ nɩŋgbaŋaɣ yɔ, ɛnʋ haɣ-wɛ-yɛ ɛzɩ ɛnʋ keheyuu Mooyiizi yɔ. ⁴ Se, pɛ-tɛtʋ kpaɣkɩɣnɩ hadɛ kiŋ lakʋ, nɛ piwolo pɩsɩnɩ hayo kiŋ ɛjaɖɛ nɖɩ payaɣ se Liibaɣ yɔ. Se, wɩsɩ ɖɩlɩyɛ hɔɔlʋʋ taa lɛ, kpaɣ pɔɔ sɔsɔɔ ŋga payaɣ se Efiraatɩ yɔ, nɛ pɩkpɛndɩnɩ Hɛɛtɩ liɖe taa ñɩma tɛtʋ tɩŋa nɛ piwolo pɩsɩɩnɩ teŋgu sɔsɔʋ ŋgʋ payaɣ se Mediteraanee yɔ, wɩsɩ ɖɩɖʋyɛ hɔɔlʋʋ taa. ⁵ Se, ɛnʋʋ Yoozuuwee lɛ, nɔɔyʋ ɛɛpɩzɩɣ sɩŋ ɛ-sɩndaa, e-wezuu caɣʋ tɩŋa. Se, ɛnʋ wɛɣ ɛ-cɔlɔ ɛzɩ ɛnʋ kɛwɛʋ Mooyiizi cɔlɔ yɔ. Se, ɛnʋ ɛɛkaɣ-ɩ lɔʋ kaʋ, ɛɛhaɣ-ɩ siɣye kaʋ. ⁶ Se, ɛ́kpa ɖoŋ nɛ ɛ́wɛɛ abalɩtʋ! Mbʋ pʋyɔɔ yɔ, ɛnʋ kaɣnɩ Izirɛɛlɩ ñɩma tayʋʋ, tɛtʋ ndʋ ɛnʋʋ Ɛsɔ eɖuwaa se ɛhaɣ pɔ-cɔzɔnaa yɔ ^a. ⁷ Se, ɛñɩtɩ ɛ́kpa ɖoŋ nɛ ɛ́wɛɛ abalɩtʋ nɛ ɛɖɔ paɣtʋ ndʋ ɛnʋ tʋmlaɖʋ Mooyiizi heyi-i yɔ, tɩ-tɩŋa payɩ tɩ-yɔɔ. Se, ɛtaayele tɩ-yɔɔ ɖɔm kaʋ. Pʋbʋ piɖeɣni-i mbʋ pɩtɩŋa payɩ ɛlakɩ yɔ, pɩ-taa. ⁸ Se, ɛ́kalɩɣ paɣtʋ takayaɣ ŋ́ga ka-taa tɔm ɖoŋ tam. Se, ɛɖɔkɩ-tʋ nɛ ɛmaɣzɩɣ tɩ-yɔɔ wɩsɩ nɛ ɖoó nɛ piyele ɛɖɔ tɔm pe wena pama ka-taa yɔ a-tɩŋa payɩ a-yɔɔ. Se, pʋbʋ, ɛlakɩ mbʋ ɛɖʋwa yɔ́ɔ ɖeu nɛ piɖeɣni-i pɩ-taa. ⁹ Se, ɛtaasɔɔ se ɛnʋ heyi-i se, paa le ewoki yɔ, ɛnʋʋ ɛ-KƖPAƔLƲ Ɛsɔ ɛwɛɣ ɛ-cɔlɔ. Pʋ-yɔɔ lɛ, ɛ́kpa ɖoŋ nɛ ɛ́wɛɛ abalɩtʋ! Se, ɛ́taaseli, ɛtaayele pitii e-tome taa.

¹⁰ Pʋwayɩ lɛ, Yoozuuwee heyi samaɣ ñʋndɩnaa se, ¹¹ pɔcɔɔ Izirɛɛlɩ ñɩma ɖipkeɣliye taa Yɔɔrɩdaŋ pɔɔ cɔlɔ peeye nɛ peheyi ɖɩ-taa ñɩma se pacaa tɔɔnaɣ, mbʋ pʋyɔɔ yɔ, pɩkazɩ kɩyakɩŋ naadozo se, pɛɖɛzɩ-kɛ, nɛ pamʋ ɛjaɖɛ nɖɩ pa-KƖPAƔLƲ Ɛsɔ haɣ-wɛ se ɖɩkɛ pa-ñɩnɖɛ yɔ. ¹² Pʋwayɩ lɛ, Yoozuuwee heyi Ruubɛɛnɩ nɛ Gaadɩ pe-cejewe nɛ Manaasee ñɩnɖɛ hɔɔlʋʋ lɛɛkʋ pa-taa ñɩma se, ¹³ pataasɔɔ tɔm ndʋ KƖPAƔLƲ tʋmlaɖʋ Mooyiizi heyi-wɛ yɔ, tɩ-yɔɔ. Ńdʋʋ lɛ se, pa-KƖPAƔLƲ Ɛsɔ yeki nɛ pɛwɛɛ laŋhɛzɩyɛ taa ɛjaɖɛ nɖɩ ɛha-wɛ Yɔɔrɩdaŋ pɔɔ nɛ wɩsɩ ɖɩlɩyɛ kiŋ peeye yɔ, ɖɩ-taa. ¹⁴ Se, pa-halaa nɛ pe-piya nɛ po-wondu pacaɣ Yɔɔrɩdaŋ pɔɔ hɔɔlʋʋ ŋgʋ kɩ-taa Mooyiizi woni-wɛ yɔ, kɩ-taa peeye. Se, piyele mbaa sɔdɩŋ lɛ, pakpaɣ po-you wondu nɛ pɛɖɛɛ cejewe lɛɛna taa ñɩma nɔɔ nɛ pɛɖɛzɩ pɔɔ ńga nɛ pɩcɔ. Se, pasɩnɩ paba ¹⁵ nɛ pɩkɔɔ pɩsɩnɩ alɩwaatʋ ndʋ pa-KƖPAƔLƲ Ɛsɔ yeba nɛ paba mʋ ɛjaɖɛ nɖɩ ɛha-wɛ se patɩɣyɩ-ɖɩ nɛ pɛwɛɛ laŋhɛzɩyɛ taa ɛzɩ ḿba ɖɔɖɔ yɔ. Pʋwayɩ lɛ, papɩsɩ ɖenɖe KƖPAƔLƲ tʋmlaɖʋ Mooyiizi kawɩlɩ-wɛ Yɔɔrɩdaŋ pɔɔ wayɩ wɩsɩ ɖɩlɩyɛ hɔɔlʋʋ taa peeye yɔ, nɛ patɩɣyɩ ^b.

¹⁶ Peeye paba cosi Yoozuuwee se, ḿba lakɩ ndʋ eheyi-wɛ yɔ tɩ-tɩŋa payɩ. Se, paa le etiyi-wɛ yɔ, powoki. ¹⁷ Se, pañaŋ-ɩ ɛzɩ paañam Mooyiizi yɔ. Se, paa pɩɩla ɛzɩma ɛ-KƖPAƔLƲ Ɛsɔ wɛɣ ɛ-cɔlɔ ɛzɩ ɛɛwɛʋ Mooyiizi cɔlɔ yɔ. ¹⁸ Se, ye nɔɔyʋ ɛkaɖɩnɩ-ɩ nɛ ekizi se ɛɛñaŋ-ɩ yɔ, pakʋ pʋdʋ. Se, piyele ɛnʋ lɛ, pɩwɛɛ se ɛ́kpa ɖoŋ nɛ ɛ́wɛɛ abalɩtʋ!