13
Tɛtʋ ndʋ pɩkazaa se Yoozuuwee ɛtɛzɩ mʋʋ yɔ
1 Yoozuuwee kɔm ɛkpadɩyɩ kongonoo lɛ, KƖPAƔLƲ heyi-i se, lɛɛlɛɛyɔ ɛkpadɩyɩ konkonoo, ɛlɛ, tɛtʋ ndʋ tɩkazɩ ɛjaɖɛ taa se ɛmʋ-tʋ yɔ, tɩɖɔ siŋŋ. 2 Ndʋʋ lɛ: Filisitii ñɩma nɛ Gesuuri ñɩma a pɛ-tɛtʋ. 3 Egeetiye nɖɩ pakpaɣ-ɖɩ se ɖɩkɛ Kanaanɩ ñɩma ñɩnɖɛ. Ɖɩwɛ kpaɣ Sihoori pɔɔ Ejipiti tɛtʋ kámaɣ yɔɔ nɛ piwolo pɩsɩnɩ Ekirooni egeetiye, hayo kiŋ. Peeye Filisitii awiya b kagbaanzɩ wɛɛ. Ana cɔŋnɩnɩ Gaazaa nɛ Asidoodi nɛ Asikalooni nɛ Gaatɩ nɛ Ekirooni pɛ-tɛtʋ nɛ Awa ñɩma c egeetiye pɔ-yɔɔ, 4 hadɛ kiŋ. Se, pʋwɛ ɖɔɖɔ se, ɛmʋ Kanaanɩ ñɩma ɛjaɖɛ, kpaɣ Sidɔɔ ñɩma tɛtʋ ndʋ payaɣ se, Meyaara d yɔ, piwolo Afeekaa ñɩndʋ, nɛ piwolo pɩsɩnɩ Amoorii ñɩma tɛtʋ kámaɣ. 5 Se, pɩkazɩ ɖɔɖɔ Gebaalɩ egeetiye nɛ Liibaɣ pʋŋ wɩsɩ ɖɩlɩyɛ hɔɔlʋʋ taa, kpaɣ Baalɩgaadɩ, Hɛɛrɩmɔɔnɩ pʋʋ liu tɛɛ nɛ piwolo pɩsɩnɩ Leboohamaatɩ tɛtʋ. 6 Se, pɩkazɩ ɖɔɖɔ pʋŋ egeetiye, kpaɣ Liibaɣ nɛ piwolo pɩsɩnɩ Misirefootimayim. Egeetiye nɖɩ ɖɩ-taa ñɩma tɩŋa kɛ Sidɔɔ liɖe taa ñɩma. Se, alɩwaatʋ ndʋ Izirɛɛlɩ ñɩma talɩɣ ageeta ana a-taa lɛ, ɛnʋ dɔɔnʋʋ a-taa ñɩma. Se, ɛnʋʋ Yoozuuwee lɛ, ɛɖʋ miika nɛ pɩsɩnɩ-ɩ nɛ ɛtayɩ Izirɛɛlɩ ñɩma, ɛjaɖɛ ńɖɩ ɛzɩ ɛnʋ keheyiɣ-i yɔ. 7 Se, ye ḿbʋ, ɛtayɩ ɛjaɖɛ nɖɩɩ Izirɛɛlɩ cejewe nakʋ (9) nɛ Manaasee ñɩnɖɛ hɔɔlʋʋ lɛɛkʋ e taa ñɩma.
Pɛtayʋʋ tɛtʋ Yɔɔrɩdaŋ pɔɔ nɛ wɩsɩ ɖɩlɩyɛ hɔɔlʋʋ taa yɔ
8 Paatɛm Manaasee cejewiye hɔɔlʋʋ lɛɛkʋ nɛ Ruubɛɛnɩ ñɩnɖɛ nɛ Gaadɩ ñɩnɖɛ pa-taa ñɩma tɛyɩnaʋ tɛtʋ Yɔɔrɩdaŋ pɔɔ nɛ wɩsɩ ɖɩlɩyɛ hɔɔlʋʋ taa. KƖPAƔLƲ tʋmlaɖʋ Mooyiizi kɛtɛyɩnɩ-wɛ-tʋ. 9 Hadɛ kiŋ hɔɔlʋʋ taa lɛ, pɛ-tɛtʋ kasɩnɩ Arohɛɛrɩ tɛtʋ nɛ ndʋ tɩwɛ Arinooni kajalaŋa taa yɔ. Arohɛɛrɩ wɛ Arinooni pɔɔ nɔɔ. Tɩɖɛ mbʋ nɛ tiwolo tɩkpa Madabaa ɖoŋiye tɩŋa yɔɔ nɛ tiwolo tɩsɩnɩ Diivooni tɛtʋ. 10 Pɩɩkpɛndɩnɩ tɛtʋ ndʋ Amoorii wiyaʋ Sihooni kɔtɔɔ kewiyaɣ tɩ-yɔɔ yɔ, tɩ-tɩŋa. Ɛ́lɛ kɩtɔɔ kewiyaɣ kpaɣ Hɛsɩbɔɔnɩ tɛtʋ nɛ piwolo pɩsɩnɩ Amoonii ñɩma tɛtʋ kámaɣ yɔɔ. 11 Gaalaadɩ ɛjaɖɛ nɛ Gesuuri egeetiye nɛ Maakaa ñɩma ñɩndɛ f nɛ Hɛrɩmɔɔnɩ pʋʋ tɩŋa nɛ Basaanɩ hɔɔlʋʋ piwolo pɩsɩnɩ Salɩkaa, paawɛ ɖɔɖɔ hɔɔlʋʋ ŋgʋ kɩ-taa. 12 Ɔɔgɩ kɛkɛ wiyaʋ Basaanɩ hɔɔlʋʋ ŋ́gʋ kɩ-taa, ɛtɔɔ kewiyaɣ Asɩtaarɔɔtɩ nɛ Ɛdɩrɛyɩ pɛ-tɛtʋ yɔɔ. Ɔɔgɩ ɛnʋ ɛkɛ Refayi ñɩma kɛtɛzaɣ ñɩma taa nɔɔyʋ g. Mooyiizi kawabɩnɩ hɔɔlʋʋ ŋgʋ kɩ-taa ñɩma nɛ ɛmʋ pɛ-tɛtʋ. 13 Paa mbʋʋ yɔ, Izirɛɛlɩ ñɩma tɔɖɔɔnɩ Gesuuri ñɩma yaa Maakaatɩ ñɩma. Mbʋʋ pɩlaba nɛ paba wɛɛ Izirɛɛlɩ ɛjaɖɛ taa halɩ nɛ sɔnɔ.
14 Leevii cejewiye taa ñɩma ɖeke pataatɛyɩnɩ tɛtʋ. Mbʋ pʋyɔɔ yɔ, mbʋ paha KƖPAƔLƲ Izirɛɛlɩ Ɛsɔ yɔ, pʋ-yɔɔ palɩzɩɣ mbʋ pahaɣ ɖɩ-taa ñɩma yɔ ɛzɩ KƖPAƔLƲ maɣmaɣ keheyuu-wɛ yɔ h.
15 Tɛtʋ ndʋ Mooyiizi kaha paa cejewiye nɖɩ ɖɩ-taa ñɩma Ruubɛɛnɩ liɖe taa yɔ, ndʋʋ yɔ: 16 Hadɛ kiŋ lɛ, Arinooni pɔɔ nɔɔ tɛtʋ ndʋ payaɣ se Arohɛɛrɩ yɔ nɛ ndʋ tɩwɛ kajalaŋa taa yɔ pɛwɛnɩ tɩ-kámaɣ yɔɔ. Tɛtʋ ńdʋ, ndʋʋ lɛ, kpaɣ Madabaa ɖoŋiye cɔlɔ kpɛɛɛ 17 nɛ piwolo Hɛsɩbɔɔnɩ tɛtʋ nɛ kɛdɛɛŋa taa tɛtʋ tɩŋa. Ndʋʋ lɛ, Diivooni nɛ Bamɔɔtɩ Baalɩ nɛ Beyiti Baalɩ Meyɔɔnɩ 18 nɛ Yaahɩcaa nɛ Kedemɔɔtɩ nɛ Mefaatɩ 19 nɛ Kiriyaatayim nɛ Sivimaa nɛ Sɛrɛɛtɩsahaarɩ ñɩndʋ, piyaɣ sɔsɔɔ yɔɔ 20 nɛ Beyitipeyɔɔrɩ nɛ Pisigaa piyisi kadika nɛ Beyitiyesimooti. 21 Ruubɛɛnɩ liɖe taa ñɩma tɛtʋ tasɩnɩ Kɛdɛɛŋa taa tɛtʋ ńdʋ ti-ɖeke, ɛlɛ, pɩkpɛndɩnɩ tɛtʋ ndʋ Amoorii ñɩma wiyaʋ Sihooni cɔŋaɣnɩ tɩ-yɔɔ yɔ, tɩ-tɩŋa. Ɛ́lɛ kɛwɛ Hɛsɩbɔɔnɩ tɛtʋ taa. Mooyiizi kawabɩ ɛ nɛ Ewii wiyaʋ nɛ Rɛɛkɛm ñɩnʋ nɛ Cuuri ñɩnʋ nɛ Huuri ñɩnʋ nɛ Rɛvaa ñɩnʋ. Awiya ana, akɛ Madiyaanɩ awiya. Sihooni kɛwɛnɩ ɖoŋ a-yɔɔ, aawɛ ɛjaɖɛ taa peeye. 22 Beyɔɔrɩ pɩyalʋ Baalaam weyi ɛkɛ tɩʋ yɔ, ɛɛwɛ mba Izirɛɛlɩ ñɩma kakʋ alɩwaatʋ ndʋ yɔ, pa-taa. 23 Wɩsɩ ɖɩɖʋyɛ hɔɔlʋʋ taa lɛ, Ruubɛɛnɩ liɖe taa ñɩma tɛtʋ kámaɣ lɛ, Yɔɔrɩdaŋ pɔɔ. Tɛtʋ sɔsɔtʋ nɛ cikpetu ndʋ tɩcɔ-tʋ nɛ tɩta yɔ, ndʋʋ lɛ, hɔɔlʋʋ ŋgʋ patayɩnɩ Ruubɛɛnɩ liɖe taa ñɩma cejewiye cejewiye yɔ.
24 Tɛtʋ ndʋ Mooyiizi kaha Gaadɩ liɖe taa paa cejewe nɖɩ ɖɩ-taa ñɩma yɔ, ndʋʋ yɔ: 25 Yazeeri tɛtʋ nɛ Galaadɩ egeetiye taa tɛtʋ nɛ kpaɣ Amoorii ñɩma ɛjaɖɛ hɔɔlʋʋ nɛ piwolo pɩsɩnɩ Arohɛɛrɩ tɛtʋ, Raabaa cɔlɔ. 26 Tɛtʋ ndʋʋ lɛ ɖɔɖɔ, kpaɣ Hɛsɩbɔɔnɩ nɛ piwolo pɩsɩnɩ Ramaatɩmicipe nɛ Betoonim nɛ kpaɣ Mahanayim nɛ piwolo pɩsɩnɩ Lodevaarɩ egeetiye kámaɣ yɔɔ. 27 Yɔɔrɩdaŋ pɔɔ kajalaŋa taa lɛ, kpaɣ Beyitiharam tɛtʋ nɛ piwolo Beyitinimira nɛ Sukɔɔtɩ nɛ Cafooni pa-ñɩndʋ. Tɩkɛ tɛtʋ ndʋ pɩɩkazɩ Hɛsibɔɔnɩ wiyaʋ Sihooni kewiyaɣ taa yɔ. Tɛtʋ ndʋ tɩwɛ Yɔɔrɩdaŋ pɔɔ nɛ wɩsɩ ɖɩlɩyɛ hɔɔlʋʋ taa. Hoyo kiŋ lɛ, tɩkpaɣnɩ Yɔɔrɩdaŋ pɔɔ kpɛɛɛ nɛ piwolo pɩsɩnɩ Jenezaarɛɛtɩ teŋgu. 28 Tɛtʋ ńdʋ tɩ-tɩŋa nɛ tɩ-tɛtʋ cikpetu cikpetu ndʋ patayɩnɩ Gaadɩ liɖe taa ñɩma cejewiye cejewiye yɔ.
29 Tɛtʋ ndʋ Mooyiizi kaha Manaasee liɖe hɔɔlʋʋ lɛɛkʋ taa paa cejewe nɖɩ ɖɩ-taa ñɩma yɔ, ndʋʋ yɔ: 30 hadɛ kiŋ lɛ, kpaɣ Mahanayim nɛ piwolo Basaanɩ tɛtʋ tɩŋa nɛ Basaanɩ wiyaʋ Ɔɔgɩ ɛjaɖɛ tɩŋa nɛ Yayiiri tɛtʋ cikpetu nɩɩnɩwa nɛ hiu (60) ndʋ tɩwɛ egeetiye nɖɩ ɖɩ-taa yɔ. 31 Pɩɩkpɛndɩnɩ ɖɔɖɔ Galaadɩ ɛjaɖɛ hɔɔlʋʋ nɛ Asɩtaarɔɔtɩ nɛ Edireyi pɛ-tɛtʋ. Tɩkɛ wiyaʋ Ɔɔgɩ kewiyaɣ taa tɛtʋ, tɩwɛ Basaanɩ hɔɔlʋʋ taa. Hɔɔlʋʋ ŋgʋ kɩ-tɩŋa paha Manaasee pɩyalʋ Maakiiri liɖe taa cejewe hɔɔlʋʋ lɛɛkʋ taa ñɩma.