¹ Ɩna tɛtʋ ndʋ ndʋ patayɩ Izirɛɛlɩ ñɩma, Kanaanɩ ^a ɛjaɖɛ taa yɔ. Cɔjɔ Eliyaazaarɩ ^b nɛ Nuuni pɩyalʋ Yoozuuwee nɛ cejewe ndɩ ndɩ taa ɖɩsɩ ñʋndɩnaa pɛtɛyɩnɩ-wɛ tɛtʋ. ² Miika paɖʋwa nɛ patayɩ cejewe nakʋ nɛ hɔɔlʋʋ (9,5) pa-taa ñɩma mba pataatɩɩwɛnɩdɩ tɛtʋ yɔ́ɔ tɛtʋ ɛzɩ KƖPAƔLƲ keheyuu Mooyiizi yɔ. ³ Mooyiizi kɛtɛm cejewe naalɛ nɛ hɔɔlʋʋ (2,5), tɛtʋ tayɩnaʋ Yɔɔrɩdaŋ pɔɔ wayɩ. Ɛlɛ, ɛtatayɩnɩ Leevii liɖe taa ñɩma natʋyʋ. ⁴ Toovenim lɛ, Yoosɛɛfʋ pɩyalaa kɛkɛ cejewe naalɛ: Manaasee ñɩnɖɛ nɛ Efiraayim ñɩnɖɛ. Pataaha Leevii liɖe taa ñɩma tɛtʋ natʋyʋ, ɛjaɖɛ taa peeye nɛ pɩtasɩnɩ ndʋ tɩ-taa pa nɛ po-wondu nɛ pa-ñɩm pɛwɛɣ yɔ. ⁵ Mbʋʋ Izirɛɛlɩ ñɩma tayɩ ɛjaɖɛ ɛzɩ KƖPAƔLƲ keheyuu Mooyiizi yɔ.

⁶ Nakʋyʋ wiye Yuuda cejewiye taa ñɩma wobi Yozuuwee cɔlɔ Giligaalɩ tɛtʋ taa. Patalaa lɛ, Keniizii liɖe taa tʋ Yefunee pɩyalʋ Kaalɛɛbɩ pɔzɩ-ɩ se, ɛtɔzʋʋ ndʋ KƖPAƔLƲ keheyi ɛ-ñɩnʋ Mooyiizi , ɛ nɛ ɩ pɔ-yɔɔ Kadɛɛsɩbaarɩneyaa tɛtʋ taa yɔ tɩ-yɔɔ yaa we? ⁷ Se, ɛnʋ kɛwɛnɩ pɩnzɩ nɩɩnaza (40) alɩwaatʋ ndʋ KƖPAƔLƲ tʋmlaɖʋ Mooyiizi tiyi ɛnʋ nɛ Kadɛɛsɩbaarɩneyaa se ɛnʋ ewolo ɛcɔŋ ɛjaɖɛ nɖɩ nɛ ɛna yɔ. Se, ɛnʋ kitaa lɛ, ɛnʋ kɛdɩ-ɩ mbʋ ɛnʋ nawa yɔ ɖeyiɖeyi. ⁸ Se, ɛnʋ nɛ mba paawoba yɔ, peyekaɣ nɛ pitiki samaɣ tome taa. Ɛlɛ, ɛnʋ lakaɣ mbʋ KƖPAƔLƲ Ɛsɔ ɖʋwa yɔ ^c. ⁹ Se, puwiye nɖɩɩ Mooyiizi ɖuwaa se, pɔkɔŋ se patayɩɣ ɛjaɖɛ lɛ, paha ɛnʋʋ ɖenɖe ɛnʋ cɔwa yɔ nɛ ɛnʋ nɛ e-liɖe taa ñɩma patɩɣyɩ peeye tám yɔ́ɔ. Mbʋ pʋyɔɔ yɔ, ɛnʋ labɩ mbʋ ɛ-KƖPAƔLƲ Ɛsɔ ɖʋwa yɔ. ¹⁰ Se, lɛɛlɛɛyɔ KƖPAƔLƲ yeba nɛ ɛnʋ wɛɛ wezuu ɛzɩ ɛɛyɔɔdʋʋ yɔ. Se, pɩlabɩ pɩnzɩ nɩɩnaza nɛ kagbaanzɩ (45) yɔ ɛzɩ KƖPAƔLƲ heyuu-tʋ Mooyiizi yɔ. Alɩwaatʋ ndʋ Izirɛɛlɩ ñɩma ɖɔŋaɣ lakʋ taa yɔ eheyi-i-tʋ. Se, lɛɛlɛɛyɔ ɛnʋ wɛnɩ pɩnzɩ nɩɩnʋwa nɛ niidozo nɛ kagbaanzɩ (85). ¹¹ Se, paa mbʋʋ yɔ, ɛnʋ kpɛndɩ ɛwɛ ɖoŋ ɛzɩ alɩwaatʋ ndʋ Mooyiizi ketiyi ɛnʋ se ewolo ɛcɔŋ nɛ ɛna yɔ. Se, ɛnʋ wɛnɩ ɖoŋ weyi ɛnʋ kɛwɛnɩ alɩwaatʋ ndʋ yɔ se, ɛlabɩnɩ you yaa paa tʋmɩyɛ nɖɩ. ¹² Se, ye mbʋ, ɛcɛlɩ ɛnʋʋ pʋŋ hɔɔlʋʋ ŋgʋ KƖPAƔLƲ kɔyɔɔdɩ kʋ-tɔm alɩwaatʋ ndʋ tɩ-taa yɔ. Se, ɛnʋ kɛtɛm-ɩ heyuu se, Anaakɩ ^d liɖe taa ñɩma wɛ peeye tɛtʋ sɔsɔtʋ sɔsɔtʋ ndʋ pɔcɔzɩ-tʋ kolonzi yɔ tɩ-taa. Se, ye KƖPAƔLƲ ɛwɛ ɛnʋ cɔlɔ yɔ, ɛnʋ ɖɔɔnʋʋ-wɛ ɛzɩ ɛ-maɣmaɣ ɛ́ɛyɔɔdʋʋ yɔ.

¹³ Peeye Yoozuuwee wazɩ Yefunee pɩyalʋ Kaalɛɛbɩ yɔɔ nɛ ɛcɛlɩ-ɩ Hɛbɩrɔɔnɩ tɛtʋ. ¹⁴ Halɩ nɛ sɔnɔ, tɛtʋ ndʋ tɩkpɛndɩ tɩkɛ Keniizi liɖe taa tʋ Yefunee pɩyalʋ Kaalɛɛbɩ liɖe taa ñɩma ñɩndʋ. Mbʋ pʋyɔɔ yɔ, Kaalɛɛbɩ kalabɩ mbʋ KƖPAƔLƲ Izirɛɛlɩ Ɛsɔ ɖʋwa yɔ. ¹⁵ Ɖooo lɛ, payaɣaɣ Hɛbɩrɔɔnɩ tɛtʋ se, Kiriyaatarɩbaa yaa Arɩbaa tɛtʋ. Anaakɩ liɖe taa sɔdɩŋ taa sɔdʋʋ payaɣ mbʋ.

Mbʋʋ pɩlaba nɛ samaɣ hɛzɩnɩ you.