¹ Nakʋyʋ wiye KƖPAƔLƲ tiyiyu lɩnɩ Giligaalɩ tɛtʋ ^a taa nɛ ewolo Bokiim ñɩndʋ. Ewobi peeye lɛ, eheyi Izirɛɛlɩ ñɩma nɛ KƖPAƔLƲ nɔɔ se, ɛnʋ yeba nɛ palɩɩ Ejipiti ɛjaɖɛ taa, nɛ ɛnʋ la nɛ pasʋʋ ɛjaɖɛ nɖɩ ɛnʋ koɖuwaa se ɛhaɣ pɔ-cɔzɔnaa yɔ ɖɩ-taa. Se, ɛnʋ kɔtɔm se, ɛnʋ ɛɛkaɣ yebu ɛ-Nɔɔ Haʋ ḿbʋ pʋwɛ ɛ nɛ wɛ pɛ-hɛkʋ taa yɔ kaʋ. ² Se, ɛlɛ, ɛnʋ paɣ-wɛ se pa nɛ ɛjaɖɛ ńɖɩ ɖɩ-taa ñɩma pataaɖʋ taabalɩyɛ naɖɩyɛ. Se, ɛnʋ heyi-wɛ se pɔyɔkɩ paba kɩlaŋ ɖɩlayɛ ^b. Ɛlɛ, patanɩɩ ɛnʋ tɔm. Se, ɛbɛ palabɩ mbʋ yɔ? ³ Se, pʋ-yɔɔ lɛ, ɛnʋ heyiɣ-wɛ se, ɛnʋ ɛɛɖɔɔnʋʋ ɛjaɖɛ ńɖɩ ɖɩ-taa ñɩma pɛ-ɛsɩndaa. Se, paba kaɣ-wɛ ñɩbʋ kpaca nakʋyʋ, nɛ kɩkpa-wɛ nɛ pa-agɔlɩma tɛɛ luŋuu. ⁴ KƖPAƔLƲ tiyiyu tɛm Izirɛɛlɩ ñɩma heyuu tɔm ńdʋ lɛ, pa-tɩŋa payɩ pasʋʋ kubusi mabʋ yɔɔ nɛ pewiliɣ. ⁵ Pʋ-yɔɔ paya lone ńɖɩ se, Bokiim nɛ palaa KƖPAƔLƲ kɩlaŋ ɖɩ-taa. Bokiim tɔbʋʋ se, wiliyaa.

⁶ Yoozuuwee keyebi samaɣ se kɛɖɛɛ ^c lɛ, paa weyi ɛpɩsɩ ɛ-tɛtʋ taa. Mbʋʋ pɩlaba nɛ ɛjaɖɛ ńɖɩ ɖɩkɛ pa-ñɩnɖɛ. ⁷ Izirɛɛlɩ ñɩma kalabɩ KƖPAƔLƲ tʋmɩyɛ, Yoozuuwee wezuu caɣʋ tɩŋa payɩ. Ɛ́lɛ sɩm wayɩ lɛ, palabɩ-ɖɩ ɖɔɖɔ sɔsaa mba pɩɩkazaa yɔ pe-wezuu caɣʋ tɩŋa. Paba kananɩ tʋma sɔsɔna wena KƖPAƔLƲ labɩ Izirɛɛlɩ ñɩma yɔ. ⁸ KƖPAƔLƲ tʋmlaɖʋ, Nuuni pɩyalʋ Yoozuuwee, kɛwɛnɩ pɩnsɩ mɩnʋʋ nɛ hiu (110) nɛ pɩcɔ ɛsɩ. ⁹ Ɛsɩba lɛ, pepim-i tɛtʋ ndʋ paaha-ɩ nɛ tɩkɛ ɛ-ñɩndʋ yɔ, tɩ-taa, Timinaatɩhɛrɛɛsɩ ^d tɛtʋ taa. Tɩwɛ Efirayim pʋŋ egeetiye taa, Gaasɩ pʋʋ nɛ hayo kiŋ. ¹⁰ Ɛ-ɖaɣyɛ taa ñɩma kɔɔ pasɩ pa-tɩŋa. Pa-wayɩ lɛ, ɛyaa mba pɔkɔma yɔ, paba ɖaɣyɛ taa ñɩma tasɩ KƖPAƔLƲ nɛ tʋma wena ɛ́lɛ ñaalabɩ Izirɛɛlɩ samaɣ yɔ.

¹¹ Mbʋʋ Izirɛɛlɩ ñɩma labɩ mbʋ pɩtɛkɛdɩnɩ KƖPAƔLƲ yɔ, nɛ papazɩ luŋuu agɔlɩma wena payaɣ se, Baalɩwaa yɔ, a-tɛɛ. ¹² Pɩlabɩ ḿbʋ lɛ, paha KƖPAƔLƲ, pɔ-cɔzɔnaa Ɛsɔ weyi ɛlɩzɩ-wɛ Ejipiti yɔɔ siɣye nɛ poluŋuu samaɣ ŋga kɛwɛ pɔ-cɔlɔ kpɛɛɛ yɔ, ka-agɔlɩma tɛɛ. Poluŋ agɔlɩma tɛɛ ḿbʋ lɛ, pakpazɩ KƖPAƔLƲ pana. ¹³ Mbʋʋ paha KƖPAƔLƲ siɣye nɛ poluŋuu agɔlɩma Baalɩwaa nɛ Asɩtaarɩtɩwaa ^e pɛ-tɛɛ. ¹⁴ Pʋ-yɔɔ KƖPAƔLƲ pana kpaɣaɣnɩ-wɛ nɛ eyeki-wɛ yeɣyeɣ mɩlaa nesi taa, nɛ paba mɩlɩɣ pa-ñɩm tɩŋa. Ɛkpakaɣ-wɛ ɖɔɖɔ nɛ ɛɖʋzʋʋ po-koyindinaa mba pɔcɔ-wɛ nɛ pata yɔ, pe-nesi taa. Pʋ-yɔɔ patapɩzɩɣ se pakaɖɩnɩ paba. ¹⁵ KƖPAƔLƲ yekaɣ nɛ pawakɩ-wɛ paa you ŋgʋ kɩ-taa, ɛzɩ eeɖuúu nɛ eheyi-wɛ yɔ. Pɩlakaɣ ḿbʋ lɛ, pasʋʋ kʋñɔŋ nakʋyʋ taa siŋŋ. ¹⁶ Peeye, KƖPAƔLƲ lɩzaɣ nɔɔɖɛyaa nabɛyɛ pɛ-hɛkʋ taa, nɛ paba lɩzɩɣ-wɛ mba pamɩlaɣ-wɛ ḿbʋ yɔ, pe-nesi taa. ¹⁷ Ɛlɛ, Izirɛɛlɩ ñɩma taña nɔɔɖɛyaa ḿba. Panɩɣaɣnɩ agɔlɩma agɔma nɛ poluŋuu a-tɛɛ. Mbʋʋ, pelekaɣ pɔ-cɔzɔnaa nʋmɔʋ kɛlɛʋ kɛlɛʋ. Ŋgʋ, paba ñaŋaɣ Ɛsɔ paɣtʋ. Ɛlɛ, pataalakɩ ɛzɩ paba yɔ. ¹⁸ Ye KƖPAƔLƲ ɛlɩzɩ nɔɔyʋ se ɛkɛ pɔ-nɔɔɖɛyʋ yɔ, ɛ-maɣmaɣ ɛwɛɣ ɛ́lɛ cɔlɔ. Ɛlɩzɩɣ Izirɛɛlɩ ñɩma po-koyindinaa nesi taa, nɔɔɖɛyʋ ɛnʋ e-wezuu caɣʋ tɩŋa taa. Mbʋ pʋyɔɔ yɔ, alɩwaatʋ ndʋ po-koyindinaa nazaɣ-wɛ nɛ pɔmɔlʋʋ paba nesi taa lɛ, KƖPAƔLƲ nawaɣ pa-pʋdɔdɩyɛ. ¹⁹ Ɛlɛ, nɔɔɖɛyʋ ɛnʋ ɛsɩkɩ lɛ, paɖaɣnɩ pazʋʋ ɛzaɣtʋ labʋ nɛ pɩkɩlɩ pɔ-cɔzɔnaa. Paluŋaɣ agɔlɩma agɔma tɛɛ. Paayeki pɛ-ɛzaɣtʋ lakasɩ yaa pa-ñʋʋ taa ɖoŋ.

²⁰ Pɩlabɩ ḿbʋ lɛ, KƖPAƔLƲ pana kpanɩ Izirɛɛlɩ ñɩma nɛ ɛtɔ se, pa-samaɣ manɩ Nɔɔ Haʋ mbʋ, ɛnʋ kaɖʋ ɛnʋ nɛ pɔ-cɔzɔnaa pɛ-hɛkʋ taa yɔ, pʋ-yɔɔ. Se, pataña ɛnʋ. ²¹ Se, ye mbʋ, ajɛɛ wena Yoozuuwe taaɖɔɔnɩ a-taa ñɩma nɛ pʋcɔ ɛsɩ yɔ, ɛnʋ ɛɛtasɩɣ a-taa-tʋ nɔɔyʋ ɖɔɔnʋʋ pɛ-ɛsɩndaa. ²² Se, ɛnʋ tɩŋɩɣnɩ a-yɔɔ nɛ ɛtakɩ Izirɛɛlɩ ñɩma nɛ ɛna se, palakɩ ɛzɩ ɛnʋ liu wɛʋ yɔ nɛ paña ɛnʋ ɛzɩ pɔ-cɔzɔnaa yɔ, yaa paalakɩ mbʋ? ²³ Pʋ-yɔɔ KƖPAƔLƲ yeba nɛ ajɛɛ wena ɛtaaɖʋzɩ-yɛ Yoozuuwe nesi taa yɔ, awɛɛ ɛjaɖɛ taa. Etekpedesi se ɛɖɔɔnɩ-yɛ.