मत्तायोसी लिखचका दौ कत्‍था
चिन्‍हा परछा
ई दौ कत्‍था येसुसी चेला मत्तायोस ती लिख्रकी र'ई। ई पुथी ईस्वी 70 ही ख़ॊख़ा लिख्रकी र'ओ दने। मत्तायोस ओन्‍टा यहूदी आलस रहचस। लिकिन आस रोमी राजी गे मालगुजारी ऊज'आ लगियस। आस चेला मना गे येसुस ती मॆख़रस ती येसुसी चेलस मंजस केरस। मत्तायोस यहूदी आलर गे आर पाब ईरू मसीस येसुस दिम एन्ने ऎद'आ गे ई पुथिन लिखचस। धर्मेस चिरान नू तंग्‍है कत्‍था तिंगुर ती बाचका कत्‍था येसुसी उज्‍जना ती पुरा मंजा एन्ने मत्तायोस ई पुथी नू ऎद्ददस।
मत्तायोस इय्या लिख्रका येसुसी बनस अब्राहमस अरा दाऊदस ती ऒड़ मनर'ई। ई पुथी येसु मसीसी कुन्‍द्रना ही कत्‍था ती ऒड़ मनी, अरा आसी नॊड़रना अरा बिढ़्रना ही पत्त नू र'ई, अरा गलिलेया जिला नू दौ कत्‍था तेंगना, अरा सिखाब'अना अरा कोड़े नन्‍ना ही नलख र'ई, इदही ख़ॊख़ा येसुसी गलिलेया ती येरुसलॆम गूटी डहरे ऎकना, अरा येसुसी उज्‍जना ही छेद्दे हप्‍ता ता मंजका कत्‍था र'ई, अरा येसुसिन क्रुस नू ठोकना अरा उज्‍जा चो'अना र'ई। ई पुथी नू धर्मेसी राजी ही पत्त नू कोड़हे लिख्रकी र'ई। औंगे “धर्मेसी राजी महले मेर्ख़ा राजी” एन्ने कत्‍था ई पुथी नू बग्‍गे हॆल बर'ई।
सरियाचका पं‍डी
बनस अरा येसु मसीसी कुन्‍द्रना 1:1-2:23
येसु मसीसी नलख ही ऒड़ 3:1-3:12
येसु मसीसी नॊड़रना अरा बिढ़्रना 3:13-4:11
गलिलेया नू येसुसी सुसर'अना 4:12-18:25
येसुसी गलिलेया ती येरुसलॆम काना 19:1-20:34
येरुसलॆम नू छेद्दे हप्‍ता 21:1-27:66
येसुसी उज्‍जा चो'अना अरा आलर गे ऎथ्रना 28:1-20