3
यॊहन नूड़रत'उस
(मर 1:1–8; लूक 3:1–18; यॊ 1:19–28)
1 अबड़ा उल्‍ला नू यॊहन नूड़रत'उस यूदेया जिला ही टोड़ंग नू बरचस अरा असन एन्ने तेंगा कुद्दा हेलरस: 2 “जियन किर्त'आ एन्‍देरगेका धर्मेस आलर ही उज्‍जना नू राजी नन्ना ही बेड़ा हेद्दे अंड़सकी र'ई।” 3 यॊहनस आसिम हिकदस नॆख'आ पत्त नू धर्मेसी कत्‍था तिंगू यसायास बाचका रहचस का,
 
“ओर्तोस टोड़ंग नू चिच्चियारदस,
‘उर्बस गे डहरेन सपड़'आ,
आस गे डहरेन चत्र'आ।’”
 
4 यॊहनस ऊंट ही चुट्टी ती कमचका ओन्‍टा कड़कड़हा किचरिन चो'आलियस। अरा तंग्‍है कड़मा नू चपटा ही कमरपटी हें'आलियस। अरा आसी ओन्ना-मॊख़ना बोक्‍खो गुट्ठी अरा टोड़ंग तीनी रहचा। 5 येरुसलॆम नगरे ती अरा गोट्टा यूदेया जिला ही नन्ना नन्ना अड्डा ती अरा यरदन ख़ाड़ ही अड्डे-बेड्डे ती बग्‍गे आलर आसी गुसन कालालियर। 6 असन आर आसी कत्‍थन मेनरकी तम्‍है पाप गुट्ठिन पत्त'आलियर। ख़ने यॊहनस आरिन यरदन ख़ाड़ नू नॊड़रत'आलियस।
7 यॊहनस बग्‍गे फरिसीरa अरा सदुकीरिनb नॊड़र'आ गे तंग्‍हा हेद्दे बरनन ईरीयस ती आरिन बाचस, “अना बिक्‍ख नेर्रे बेसे आलारो, पाप नन्नन बिगर अम्‍बका ‍ती धर्मेसी बरना दंडे ती बोंगा गे निमन निक‍ईम चेता बाचर का? 8 जियन किर्त'अना ही जॊगे नलख नना। 9 नीम तम्‍है तम्‍है जिया नू एन्ने अमा सोच'आ हेलरा का ऎम अब्राहमसी बनसc ता हिकदम। ऎन निमन ब'अदन का धर्मेस इबड़ा पखना गुट्ठी ती अब्राहमस गे ख़द्द कम'आ ओंग्दस। 10 अक्‍कु सुरता नना का धर्मेसी रायबड़ी लेक्‍खा टोंग'ए मन्न ही पादा नू अबड़न खंडा गे उईर ख़च्चरकी र'ई। एका मन्न दौ ख़ंजपा मल ख़ंज‍ई अबड़न खंडरकी चिच्‍ची नू सजतार'ओ।
11 ऎन गा जियन किर्त'आ गे अम्म ती नॊड़रत'अदन, लिकिन एकास एंग्‍है ख़ॊख़ा बर‍'ऊ र'अदस, आस एंग्‍है ती कोड़हे सवंगिय र'अदस। ऎन गा आसी खरपन चॊदना जॊगे मलकन का एकदन बिट्ठी ननू जॊंख़स लेका नन्‍दस। आस निमन नेम्‍हा बॊलतस अरा चिच्‍च ती नॊड़त'ओस। 12 आस तंग्‍है के‍तेर ती गहूँ अरा चींख़न बेग'ओस, अरा आस तंग्‍है खलिन बॆस लगे एर्रोस। अरा आस गोट गहूँन कुट्ठी नू उइय्योस, अरा चींख़न चिच्‍ची नू बस्‍सोस एकदा इकला हूँ मल तेभर'ओ।”
यॊहनस ती येसुसी नॊड़रना
(मर 1:9–11; लूक 321,22)
13 आ बारी नू येसुस गलिलेया ‍जिला ती यरदन ख़ाड़ पिंडी नू यॊहनस गुसन आस ती नॊड़रत'आ गे बरचस। 14 लिकिन यॊहनस एन्ने बाचस ती छेंकचस, “एंगा गा निंग्‍है ती नॊड़रना ही चाड़ र'ई अरा नीन एंग्‍है गुसन बरचकादय।” 15 ख़ने येसुस आसिन आनाकिर्ताचस, “अक्‍कु एन्नेम मना चि'आ, नमा गे एन्नेम धर्मेसी मने लेक्‍खा उर्मी नन्ना चाड़ र'ई।” ख़ने यॊहनस येसुसिन नॊड़रत'आ गे मने मंजस।
16 नॊड़रस ती येसुस अम्‍मु ती उरखस ख़नेम, मेर्ख़ा तिसग्रा अरा धर्मेसी बॊलता पेरवाँ लेक्‍खा एत्तना दरा तंग्‍है मइय्याँ बरना ईरयस। 17 अरा मेर्ख़ा ती धर्मे बबस बाचस, “ईस एंग्‍है चोन्‍हा ख़द्दस हिकदस, ऎन ईस ती बग्‍गे खुसमारदन।”