2 𖼽𖽔 𖼠𖽴𖾑 𖼞𖽳𖾐 𖼻𖽙 𖽃𖽔𖾐！ 𖼐𖽑𖽡𖾐 𖼈𖽳𖾐 𖼹𖽳𖾐 𖼄𖽙𖾐 𖼊𖽻 𖼐𖽙𖾐 𖼖𖽡𖾐，𖼐𖽑𖽡𖾐 𖼈𖽳𖾐 𖽃𖽔 𖼀𖽙 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼖𖽡𖾐．

3 𖼖𖽡𖽚 𖼂𖽡𖽦𖾑 𖽃𖽔𖾐！ 𖼐𖽑𖽡𖾐 𖼣𖽙𖾐 𖼞𖽳𖾐 𖼻𖽙 𖼈𖽳 𖼣𖽻𖾐，𖼣𖽙𖾐 𖼞𖽳𖾐 𖽂𖽙 𖼐𖽑𖽡𖾐 𖼣𖽻𖾐，𖼣𖽙𖾐 𖼞𖽳𖾐 𖼮𖽑𖽡 𖼈𖽪𖾑 𖼻𖽙 𖼣𖽻𖾐，𖼐𖽑𖽡𖾐 𖼀𖽑𖽶 𖼊𖽴 𖼄𖽶 𖼳𖽳𖾐 𖼮𖽻𖾐，𖼷𖽶 𖼊𖽺𖾐 𖼷𖽑𖽻𖾐 𖼊𖽑𖽺 𖼠𖽳𖾐．

4 𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼐𖽑𖽧𖾐 𖼄𖽙𖾐 𖼦𖽑𖽻𖾑 𖼍𖽪𖾐 𖼖𖽻𖾐，𖽃𖽔𖾐 𖼮𖽡𖽦𖾐 𖼹𖽪𖾐 𖼖𖽙𖾐 𖼺𖽶𖾑，𖼐𖽑𖽡𖾐 𖼐𖽑𖽡𖽻𖾐 𖼀𖽙 𖼽𖽦 𖼞𖽪𖾐 𖼊𖽦𖾐 𖼽𖽡𖾐，𖼣𖽙𖾐 𖼞𖽳𖾐 𖼞𖽑𖽻 𖼮𖽑𖽙𖾐 𖼊𖽑𖽺 𖼖𖽪𖾐 𖼐𖽝𖾐．𖽃𖽔𖾐 𖼺𖽺𖾑，𖼐𖽑𖽡𖾐 𖼞𖽜 𖼈𖽪𖾑 𖼷𖽪𖾐 𖼄𖽔 𖼂𖽺𖾐 𖼊𖽻𖾐．

5 𖼳𖽡𖾐 𖼄𖽡𖽺 𖼐𖽺𖾐 𖼖𖽡𖾑 𖼈𖽪𖽺𖾑，𖼊𖽑𖽡 𖼮𖽑𖽡𖽪 𖼊𖽑𖽡 𖼐𖽑𖽧𖾐 𖼄𖽙𖾐，𖼽𖽻 𖼈𖽳𖾐 𖽃𖽔𖾑 𖼊𖽑𖽙 𖼻𖽜，𖼮𖽑𖽡𖾐 𖼻𖽸 𖼳𖽶 𖼄𖽡𖽻 𖼂𖽺𖾐．

6 𖼣𖽙𖾐 𖼞𖽳𖾐 𖼈𖽦𖾐 𖼳𖽨𖾐 𖽃𖽔𖾐！ 𖼽𖽻 𖼈𖽳𖾐 𖼣𖽝 𖼊𖽪𖾐 𖼖𖽙𖾐 𖼊𖽑𖽔 𖼊𖽴．

𖼣𖽙𖾐 𖼞𖽳𖾐 𖼐𖽑𖽧𖾐 𖼄𖽙𖾐 𖽃𖽔𖾐！𖼽𖽻 𖼈𖽳𖾐 𖼻𖽶𖾑 𖼖𖽻𖾐 𖼖𖽙𖾐 𖼊𖽑𖽔 𖼮𖽑𖽻𖾐．

𖼞𖽪𖾐 𖼮𖽡𖽺𖾐， 𖼽𖽻 𖼈𖽳𖾐 𖼀𖽶 𖼻𖽶 𖼮𖽑𖽡𖾐 𖼠𖽻𖾐 𖼞𖽑𖽶𖾐，𖼷𖽙𖾐 𖼖𖽙𖾐 𖼮𖽑𖽻𖾐 𖼽𖽡𖾐 𖼷𖽑𖽻𖾐 𖼊𖽑𖽺 𖼺𖽦，

𖼽𖽻 𖼈𖽳𖾐 𖼖𖽺𖾑 𖼞𖽜𖾐 𖼺𖽜𖾐 𖼞𖽑𖽶𖾑 𖼮𖽶𖾐，𖼐𖽑𖽡 𖼀𖽪𖾐 𖼍𖽻𖾐 𖼮𖽡𖽪 𖼊𖽑𖽺 𖼊𖽝𖾐 𖼷𖽑𖽦𖾐．

7 𖼽𖽻 𖼈𖽳𖾐 𖼊𖽶𖾐 𖼮𖽑𖽪 𖼞𖽳𖾐 𖼀𖽶 𖼻𖽶 𖼮𖽑𖽡𖾐 𖼊𖽑𖽺 𖼮𖽙 𖼰𖽪𖾑 𖼷𖽻，

𖼽𖽻 𖼈𖽳𖾐 𖼮𖽑𖽡𖾐 𖼻𖽸 𖼀𖽡𖾐 𖼖𖽚𖾐 𖼞𖽳𖾐 𖼐𖽑𖽧𖾐 𖼄𖽙𖾐 𖼊𖽑𖽺 𖼮𖽙 𖼄𖽳𖾐 𖼖𖽡𖾐．

𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖼀𖽜𖾐 𖼀𖽺 𖼺𖽺𖾑，𖼽𖽔 𖼠𖽴𖾑 𖼈𖽴 𖼷𖽑𖽻𖾐 𖼠𖽻𖾐 𖼊𖽑𖽺 𖼮𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼮𖽻𖾐 𖼊𖽻𖾐．

8 𖼽𖽚 𖼍𖽕𖾑 𖽃𖽔𖾐！𖼐𖽑𖽡𖾐 𖼈𖽧 𖼐𖽑𖽳𖾐 𖼄𖽳𖾑 𖼄𖽳 𖼐𖽑𖽡𖾐 𖼊𖽑𖽺 𖼞𖽑𖽪𖾐 𖼮𖽑𖽳，𖼐𖽑𖽡𖾐 𖼖𖽦 𖼀𖽑𖽦𖾐 𖼮𖽡𖾐 𖼂𖽦𖾐 𖼖𖽺𖾐 𖼀𖽺 𖼊𖽑𖽺 𖼷𖽑𖽸𖾐 𖼍𖽡，𖼐𖽑𖽡𖽻𖾐 𖼀𖽙 𖼞𖽳𖾐 𖼻𖽙 𖼞𖽑𖽙𖾐 𖼣𖽻𖾐 𖼐𖽑𖽡𖾐 𖼊𖽑𖽺 𖼊𖽑𖽴 𖼊𖽻𖾐．

9 𖼽𖽚 𖼍𖽕𖾑 𖽂𖽙 𖼐𖽑𖽡𖾐 𖼺𖽪𖾐 𖼍𖽻𖾐 𖼻𖽙 𖼊𖽑𖽡 𖼊𖽝𖾐 𖼣𖽻𖾐．𖼣𖽙𖾐 𖼻𖽙 𖽃𖽔𖾐！ 𖼐𖽑𖽡𖾐 𖼷𖽙 𖼊𖽪𖾐 𖼵𖽪𖾐 𖽂𖽙𖾐 𖼺𖽺𖾑，𖼖𖽚𖾐 𖼳𖽡𖽪𖾐 𖼞𖽳𖾐 𖼊𖽦𖾐 𖼽𖽡𖾐．𖼽𖽻 𖼂𖽴𖾐 𖼹𖽺𖾐，𖼍𖽻𖾐 𖼂𖽙𖾑 𖼖𖽙𖾐 𖼺𖽶𖾑，𖼽𖽻 𖼊𖽡𖾐 𖼹𖽺𖾐，𖼍𖽻𖾐 𖼄𖽙𖾐 𖼖𖽙𖾐 𖼺𖽶𖾑，𖽃𖽔 𖼺𖽺 𖼽𖽻 𖼊𖽑𖽺 𖼍𖽪 𖼂𖽡𖾑 𖼐𖽺𖾑？

10 𖼽𖽚 𖼍𖽕𖾑 𖼻𖽳𖾐 𖼻𖽳𖾐 𖼄𖽡𖽻 𖼠𖽕 𖼞𖽳𖾐 𖼷𖽶 𖼊𖽺𖾐 𖼮𖽻𖾐，𖼽𖽻 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼈𖽪𖾐 𖼍𖽦 𖼊𖽚𖾐 𖼺𖽺𖾑，𖼻𖽳𖾐 𖼹𖽦𖾐 𖼈𖽪𖾐 𖼍𖽦 𖼂𖽺𖾐 𖼊𖽻𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼮𖽑𖽡𖾐 𖼖𖽻𖾐 𖼰𖽶𖾐 𖼮𖽑𖽡𖾐，𖼞𖽑𖽙𖾐 𖼣𖽻𖾐 𖼳𖽶 𖼀𖽑𖽙 𖼖𖽻𖾐 𖼞𖽑𖽶𖾑 𖼽𖽚𖾐 𖼊𖽑𖽺 𖼊𖽑𖽴 𖼊𖽻𖾐．

11 𖼽𖽚 𖼍𖽕𖾑 𖼀𖽻𖾐 𖼀𖽡𖾐 𖼷𖽑𖽚 𖼺𖽺𖾑，𖼊𖽑𖽳 𖼖𖽳𖾐 𖼄𖽪 𖼻𖽙 𖼀𖽑𖽳𖾐 𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼺𖽳 𖼖𖽳 𖼊𖽻𖾐 𖼷𖽡𖾐 𖼊𖽑𖽺 𖼍𖽡，𖼀𖽑𖽡𖽻𖾐 𖼮𖽻 𖼈𖽺𖾐 𖼺𖽳 𖼖𖽳 𖼊𖽻𖾐 𖼈𖽡𖾐 𖼠𖽻𖾐 𖼞𖽑𖽶𖾐 𖼷𖽑𖽡．

12 𖼽𖽻 𖼦𖽙 𖼺𖽶𖾑 𖼮𖽶𖾐 𖼀𖽳 𖼦𖽶𖾑 𖼄𖽔 𖼷𖽑𖽶𖾐 𖼐𖽑𖽡𖾐，

𖼽𖽻 𖼺𖽜 𖼀𖽕𖾑 𖼮𖽸𖾐 𖼈𖽡𖾐 𖼦𖽶𖾑 𖼄𖽔 𖼷𖽑𖽶𖾐 𖼀𖽑𖽨𖾐．

13 𖼳𖽡𖾐 𖼂𖽪𖾑 𖼖𖽪𖽦 𖼦𖽜𖾐 𖼄𖽙𖾐 𖼦𖽜 𖼞𖽳𖾐 𖼮𖽻𖾐，𖼽𖽻 𖼮𖽻𖾐 𖼞𖽳𖾐 𖼖𖽡𖾑 𖼞𖽑𖽪 𖼐𖽙 𖼊𖽪 𖼀𖽑𖽢 𖼊𖽻𖾐，𖼽𖽻 𖼄𖽡𖾐 𖼊𖽺𖾐 𖼞𖽳𖾐 𖼄𖽡𖾐 𖼹𖽸𖾑 𖼰𖽻𖾐 𖼺𖽺𖾑，𖼳𖽡𖾐 𖼍𖽪𖽺𖾑 𖼄𖽡𖾐 𖼊𖽺𖾐 𖼮𖽑𖽡𖾐 𖼊𖽻𖾐．

14 𖼽𖽡 𖼺𖽕𖾑 𖼰𖽡𖽔𖾐 𖽂𖽙 𖼐𖽑𖽡𖾐 𖼺𖽪𖾐 𖼊𖽑𖽳 𖼖𖽳𖾐 𖼄𖽪 𖼊𖽑𖽡 𖼷𖽳 𖼣𖽻𖾐，𖼽𖽻 𖼦𖽑𖽺𖾐 𖼞𖽑𖽶𖾐 𖼽𖽦 𖼍𖽳𖾐 ^\fr．

15 𖼽𖽻 𖼐𖽦𖾐 𖼄𖽡𖽻𖾐，𖼞𖽑𖽶𖾑 𖼄𖽡𖾐 𖼊𖽺𖾐 𖼮𖽻𖾐 𖼷𖽡𖾑 𖼮𖽻𖾐 𖼺𖽙𖾐 𖼊𖽙𖾐，𖼄𖽡𖾐 𖼷𖽑𖽪𖾐 𖼄𖽡𖾐 𖼹𖽳𖾐 𖼣𖽻𖾐 𖼺𖽺𖾑，𖼈𖽪𖾑 𖼊𖽡𖾐 𖼞𖽸 𖼹𖽺𖾐 𖼈𖽺𖾐 𖼖𖽡 𖼀𖽶，𖼐𖽑𖽧𖾐 𖼺𖽳 𖼄𖽙𖾐 𖼮𖽜𖾐 𖼀𖽑𖽙 𖼂𖽺𖾐．

16 𖼍𖽗𖾑 𖼦𖽑𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼈𖽴 𖼞𖽳𖾐 𖼞𖽑𖽻𖾐 𖼂𖽻𖾑 𖼮𖽑𖽪𖾐 𖼳𖽶 𖼖𖽙𖾐 𖼺𖽶𖾑，𖼽𖽻 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼠𖽕 𖼊𖽻𖾐．

17 𖼍𖽗𖾑 𖼦𖽑𖽺𖾑 𖼮𖽨𖾐 𖼄𖽙𖾐 𖼊𖽑𖽺 𖼮𖽻𖾐 𖼺𖽪𖾐 𖼖𖽙𖾐 𖼳𖽳𖾐 𖼣𖽻𖾐，𖼮𖽨𖾐 𖼄𖽙𖾐 𖼦𖽜 𖼞𖽳𖾐 𖼖𖽙𖾐 𖼳𖽳𖾐 𖼊𖽚 𖼖𖽙𖾐 𖼺𖽶𖾑，𖼽𖽻 𖼄𖽪 𖼀𖽴 𖼊𖽑𖽺 𖼞𖽑𖽴 𖼳𖽻𖾐，𖼄𖽪 𖼷𖽳 𖼺𖽪𖾐 𖼞𖽜 𖼮𖽑𖽙 𖼹𖽺𖾐 𖼖𖽻𖾐 𖼊𖽻𖾐．

18 𖼽𖽺𖾐 𖼦𖽴 𖼦𖽫 𖽃𖽔𖾐！ 𖼣𖽙𖾐 𖼻𖽳𖾐 𖼻𖽳𖾐 𖼐𖽑𖽡𖾐 𖼞𖽳𖾐 𖼰𖽨𖾑 𖼮𖽡 𖼽𖽡𖾑 𖼊𖽑𖽺 𖼐𖽦𖾐 𖼳𖽡𖽻𖾐．

19 𖼰𖽡𖽔𖾐 𖼍𖽴 𖼊𖽑𖽺 𖼐𖽻𖾑 𖼮𖽴𖾐 𖼺𖽪𖾐 𖼮𖽑𖽢𖾑 𖼞𖽕 𖼊𖽻𖾐，𖼞𖽚 𖼀𖽑𖽚𖾐 𖼽𖽻 𖼽𖽡𖾐 𖼽𖽻 𖼈𖽳𖾐 𖼊𖽑𖽺 𖼞𖽕．

20 𖼽𖽕𖾑 𖼳𖽴𖾑 𖼞𖽳𖾐 𖼄𖽡𖾐 𖼮𖽑𖽙𖾐 𖼷𖽙𖾐 𖼺𖽳 𖼀𖽻𖾐 𖼀𖽡𖾐 𖼊𖽚𖾐，𖼽𖽻 𖼈𖽪𖾐 𖼍𖽦 𖼞𖽜 𖼷𖽙 𖼖𖽚𖾐 𖼂𖽚𖾐 𖼷𖽙𖾐 𖼹𖽳𖾐 𖼮𖽻𖾐．

21 𖼐𖽕 𖼇𖽮 𖼊𖽑𖽔𖾐 𖼖𖽡𖾑 𖼮𖽻𖾐 𖼷𖽡𖾑 𖼮𖽻𖾐 𖼺𖽙𖾐 𖼺𖽪𖾐 𖼷𖽑𖽦𖾐 𖼄𖽙𖾐 𖼊𖽑𖽡 𖼊𖽝𖾐 𖼣𖽻𖾐，𖼽𖽻 𖼐𖽑𖽧𖾐 𖼐𖽜𖾑 𖼺𖽪𖾐 𖼷𖽑𖽦𖾐 𖼻𖽙 𖼦𖽑𖽨𖾐．

22 𖼽𖽱𖾐 𖼺𖽴𖾑 𖼺𖽳 𖼊𖽴 𖼄𖽨 𖼺𖽪𖾐 𖼺𖽧𖾐 𖼠𖽕𖾑 𖼣𖽻𖾐，𖼈𖽡𖾐 𖼊𖽚𖾐 𖼀𖽙 𖼮𖽑𖽶𖾐 𖼺𖽳 𖼊𖽴 𖼺𖽪𖾐 𖼠𖽕𖾑 𖼖𖽦𖾐 𖼣𖽻𖾐，𖼽𖽻 𖼞𖽳𖾐 𖼠𖽕𖾑 𖼖𖽦 𖼮𖽡𖽺𖾐 𖼺𖽺𖾑，𖼖𖽜𖾐 𖼀𖽜𖾐 𖼊𖽑𖽺 𖼠𖽳𖾐 𖼊𖽑𖽧 𖼽𖽡𖾐．

23 𖼮𖽑𖽡𖽦𖾐 𖼀𖽝𖾐 𖼮𖽑𖽡𖽦𖾐 𖼞𖽙𖾐 𖼺𖽪𖾐 𖼽𖽻 𖼊𖽑𖽺 𖼦𖽹𖾑 𖼀𖽑𖽧𖾐，𖼮𖽑𖽡𖽦𖾐 𖼻𖽜 𖼽𖽻 𖼊𖽑𖽺 𖼀𖽝𖾐，𖼽𖽻 𖼊𖽑𖽺 𖼮𖽡𖾐 𖼂𖽦𖾐 𖼊𖽑𖽪 𖼊𖽻𖾐．

24 𖼦𖽑𖽻𖾐 𖼊𖽑𖽻𖾐，𖼽𖽻 𖼞𖽳𖾐 𖼮𖽑𖽡𖽦𖾐 𖼞𖽶𖾑 𖼞𖽶 𖼠𖽴𖾑 𖼠𖽴𖾐，𖼽𖽻 𖼞𖽳𖾐 𖼖𖽦 𖼂𖽪𖾑 𖼦𖽑𖽔𖾐 𖼮𖽶𖾐 𖽂𖽙 𖼐𖽑𖽡𖾐．𖼞𖽪𖾐 𖼮𖽡𖽺𖾐，𖼽𖽔 𖼠𖽴𖾑 𖼞𖽳𖾐 𖽂𖽙 𖼐𖽑𖽡𖾐 𖼈𖽳 𖼺𖽡 𖼀𖽑𖽙、 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼖𖽚𖾑 𖼀𖽑𖽙、 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼖𖽚𖾐 𖼳𖽕𖾐 𖼊𖽑𖽺𖾐 𖼞𖽑𖽶𖾑 𖼽𖽚𖾐 𖼽𖽻 𖼖𖽙𖾐 𖼂𖽻𖾐 𖼮𖽨𖾐．

25 𖼐𖽑𖽡𖽻𖾐 𖼀𖽙 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼐𖽑𖽡𖾐 𖼊𖽑𖽺 𖼂𖽻𖾐．𖼞𖽑𖽙𖾐 𖼣𖽻𖾐 𖼳𖽶 𖼂𖽺𖾐 𖼠𖽸𖾑 𖼺𖽪𖾐 𖽂𖽙 𖼺𖽙𖾐 𖼂𖽙𖾐，𖼽𖽻 𖼄𖽶 𖼠𖽻𖾐 𖼊𖽑𖽺 𖼮𖽑𖽻𖾐 𖼖𖽻𖾐 𖼺𖽪𖾐 𖼄𖽢 𖼀𖽜𖾐，𖼄𖽡𖾑 𖼐𖽦𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼺𖽪𖾐 𖼄𖽢 𖼀𖽜𖾐，𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑 𖼞𖽳𖾐 𖼄𖽢 𖼀𖽜𖾐，𖼄𖽳𖾑 𖼄𖽳 𖼖𖽪 𖼐𖽑𖽡𖾐 𖼊𖽑𖽺 𖼄𖽻𖾑．

26 𖼣𖽙𖾐 𖼞𖽑𖽙𖾐 𖼦𖽙𖾐 𖼐𖽑𖽡𖾐 𖼞𖽜 𖼺𖽪𖾐 𖼄𖽢 𖼀𖽜𖾐，𖼣𖽻𖾐 𖼂𖽸𖾑 𖼣𖽻𖾑 𖼄𖽻 𖼞𖽳𖾐 𖼄𖽢 𖼀𖽜𖾐 𖼦𖽶𖾑 𖼄𖽔 𖼷𖽑𖽶𖾐 𖼈𖽳，𖼦𖽑𖽔𖾐 𖼖𖽺𖾑 𖽂𖽙 𖼰𖽡𖽺𖾐 𖼊𖽑𖽺 𖼞𖽑𖽙𖾐 𖼮𖽻𖾐 𖼺𖽪𖾐 𖼹𖽳𖾐 𖼳𖽶 𖼊𖽑𖽺 𖼠𖽳𖾐．𖼄𖽢 𖼀𖽜𖾐 𖼦𖽑𖽺𖾑 𖼹𖽻𖾐，𖼄𖽳𖾑 𖼄𖽳 𖼖𖽪 𖼽𖽱𖾐 𖼺𖽴𖾑 𖼐𖽑𖽡𖾐 𖼊𖽑𖽺 𖼞𖽜，𖼖𖽪 𖼺𖽺𖾑 𖼈𖽧 𖼐𖽑𖽳𖾐 𖼠𖽻𖾐 𖼞𖽑𖽶𖾐 𖼈𖽪𖾑 𖼷𖽪𖾐 𖼂𖽺𖾐 𖼺𖽪𖾐 𖼐𖽑𖽡𖾐 𖼊𖽑𖽺 𖼄𖽻𖾑．

27 𖼂𖽡𖽦𖾑 𖼽𖽔 𖼄𖽡𖽺 𖼐𖽑𖽧𖾐 𖼐𖽦𖾑 𖼺𖽪𖾐 𖼍𖽳𖾐 𖼖𖽳𖾐 𖼊𖽑𖽡 𖼊𖽝𖾐 𖼣𖽻𖾐，𖼷𖽑𖽶𖾐 𖼐𖽦 𖼽𖽻 𖼞𖽕 𖽂𖽙𖾐 𖼺𖽪𖾐 𖼐𖽑𖽡𖾑 𖼦𖽙 𖼊𖽑𖽺 𖼷𖽙，𖼄𖽶 𖼮𖽑𖽧 𖼽𖽻 𖼐𖽻𖾑 𖽂𖽙𖾐 𖼺𖽪𖾐 𖼄𖽡𖽻 𖼐𖽑𖽡 𖼊𖽑𖽺 𖼀𖽜𖾐．”

28 𖼦𖽑𖽺𖾑 𖼹𖽻𖾐 𖼦𖽑𖽺𖾑 𖼽𖽻 𖼈𖽳𖾐 𖽃𖽔 𖼀𖽙 𖼽𖽻 𖼈𖽳𖾐 𖼖𖽙𖾐 𖼮𖽑𖽻𖾐 𖼞𖽑𖽙𖾐 𖼊𖽑𖽜𖾐 𖼺𖽪𖾐 𖼊𖽻 𖼂𖽪𖾑 𖼣𖽻𖾐，𖼦𖽑𖽺𖾑 𖼽𖽻 𖼄𖽳𖾑 𖼄𖽢 𖼀𖽜𖾐 𖼖𖽙𖾐 𖼮𖽑𖽻𖾐 𖼺𖽺𖾑，𖼄𖽢 𖼦𖽙𖾐 𖼽𖽻 𖼈𖽳𖾐 𖼊𖽑𖽺 𖼞𖽜 𖼺𖽪𖾐 𖼣𖽻𖾐．𖼽𖽻 𖼈𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼷𖽑𖽡𖾐 𖼐𖽑𖽡 𖼮𖽑𖽪𖾐 𖼳𖽶 𖼣𖽻𖾐．

29 𖼽𖽔 𖼠𖽴𖾑 𖼦𖽑𖽔𖾐 𖼖𖽺𖾑 𖼽𖽻 𖼈𖽳𖾐 𖼊𖽑𖽺 𖼀𖽦𖾐 𖼄𖽪𖾑：“𖼣𖽙𖾐 𖼣𖽻𖾐 𖼂𖽸𖾑 𖼣𖽻𖾑 𖼄𖽻 𖼞𖽳𖾐 𖼞𖽚 𖼽𖽡𖾐 𖼖𖽻𖾐 𖼮𖽻𖾐，𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖼀𖽑𖽨 𖼺𖽺𖾑， 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽡 𖼇𖽮 𖼖𖽪𖽦 𖼄𖽡𖾐 𖼠𖽻𖾐 𖼞𖽳𖾐 𖼄𖽡𖾐 𖼊𖽪 𖼳𖽡𖽪𖾐 𖼞𖽑𖽶𖾐 𖼍𖽡𖾑 𖼖𖽡𖾐，𖼣𖽙𖾐 𖼞𖽜 𖼣𖽻𖾐 𖼂𖽸𖾑 𖼣𖽻𖾑 𖼄𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼞𖽕 𖼮𖽻𖾐 𖼖𖽡𖾐．

30 𖼄𖽡𖾐 𖼊𖽪 𖼳𖽡𖽪𖾐 𖼞𖽑𖽶𖾑 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼄𖽕𖾑 𖼖𖽡𖾑 𖼄𖽡𖾑 𖼐𖽦𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼄𖽦𖾑 𖼂𖽡 𖼖𖽔𖾐 𖼄𖽡𖾐 𖼠𖽻𖾐 𖼞𖽳𖾐 𖼮𖽻𖾐，𖼞𖽑𖽶𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽑𖽨𖾐 𖼀𖽑𖽡 𖼻𖽜 𖼺𖽺𖾑， 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽡 𖼇𖽮 𖼖𖽪𖽦 𖼞𖽳𖾐 𖼈𖽳𖾐 𖼂𖽻𖾐 𖼖𖽻𖾐 𖼖𖽧 𖼀𖽳𖾐 𖼄𖽡𖾐 𖼂𖽺𖾐． 31 𖼽𖽕𖾑 𖼂𖽚 𖼖𖽔𖾐 𖼦𖽗 𖼐𖽺𖾐 𖼽𖽻 𖼄𖽳 𖼻𖽙 𖼺𖽔 𖼖𖽔𖾐 𖼊𖽑𖽺 𖼀𖽑𖽨 𖼞𖽑𖽶𖾑 𖼠𖽻𖾐 𖼍𖽡𖾑，𖼽𖽡 𖼺𖽔 𖼐𖽺𖾐 𖼽𖽻 𖼄𖽳 𖼻𖽙 𖼖𖽡𖾑 𖼂𖽦 𖼰𖽡𖽔𖾐 𖼊𖽑𖽺 𖼖𖽺𖾑 𖼀𖽑𖽨 𖼞𖽑𖽶𖾑 𖼠𖽻𖾐 𖼍𖽡𖾑，𖼣𖽙𖾐 𖼄𖽳 𖼻𖽙 𖼖𖽡𖾑 𖼽𖽕𖾑 𖼊𖽑𖽺 𖼖𖽺𖾑 𖼣𖽙𖾐 𖼀𖽑𖽨 𖼞𖽑𖽶𖾑 𖼠𖽻𖾐 𖼍𖽡𖾑． 32 𖼄𖽡𖾐 𖼮𖽑𖽙𖾐 𖼐𖽺𖾐 𖼄𖽡𖾐 𖼊𖽪 𖼳𖽡𖽪 𖼞𖽑𖽶𖾑 𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽳𖾐 𖼂𖽻𖾐 𖼖𖽻𖾐 𖼺𖽪𖾐 𖼣𖽻𖾐．”

33 𖼽𖽔 𖼠𖽴𖾑 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼀𖽦𖾐 𖼄𖽪𖾑 𖼦𖽑𖽻𖾐 𖼺𖽺𖾑，𖼮𖽑𖽡𖾑 𖼀𖽑𖽦𖾐 𖼮𖽑𖽡𖽺𖾐 𖼀𖽑𖽚𖾐 𖼽𖽦 𖼞𖽪𖾐 𖼊𖽑𖽺 𖼊𖽦𖾐 𖼽𖽡𖾐，𖼺𖽦 𖼷𖽑𖽦𖾐 𖼳𖽶𖾐 𖼦𖽑𖽙𖾐，𖼽𖽻 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖼽𖽡𖾐 𖼦𖽑𖽙𖾐．