4 𖼽𖽡 𖼺𖽴𖾑 𖼖𖽡𖽦𖾑 𖼖𖽙𖾐 𖼀𖽙𖾐 𖼳𖽡𖽚𖾐 𖼊𖽴 𖼞𖽳𖾐 𖼐𖽑𖽡𖾐 𖼦𖽑𖽦 𖼠𖽚 𖼦𖽑𖽻𖾐 𖼺𖽺𖾑，𖼽𖽱𖾐 𖼺𖽴𖾑 𖼇𖽕 𖼖𖽻 𖼈𖽴 𖼷𖽑𖽻𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼮𖽡 𖼽𖽡𖾑 𖼣𖽙𖾐 𖼊𖽑𖽺 𖼞𖽜 𖼊𖽑𖽡𖾑 𖼣𖽻𖾐，𖼣𖽙𖾐 𖼖𖽙𖾐 𖼀𖽙𖾐 𖼇𖽕 𖼖𖽻 𖼊𖽑𖽺 𖼀𖽦𖾐 𖼊𖽑𖽧 𖼞𖽜： 5 ‘ 𖼣𖽻𖾐 𖼀𖽙 𖼣𖽙𖾐 𖼞𖽜 𖼽𖽻 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼠𖽚，𖼽𖽻 𖼀𖽦𖾐：‘ 𖼐𖽦𖾐 𖼄𖽺！ 𖼣𖽙𖾐 𖼳𖽶𖾐 𖼖𖽻𖾐 𖼮𖽻𖾐，𖼐𖽑𖽡𖾐 𖼣𖽙𖾐 𖼊𖽑𖽺 𖼀𖽑𖽨 𖼺𖽺𖾑，𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼣𖽙𖾐 𖼽𖽻 𖼄𖽳𖾑 𖼖𖽙𖾐 𖼀𖽙𖾐 𖼂𖽺𖾐 𖼳𖽡𖽻𖾐 𖼺𖽪𖾐 𖼖𖽧 𖼀𖽳𖾐 𖼞𖽑𖽶𖾐 𖼍𖽡𖾑 𖼖𖽡𖾐．’ 𖽃𖽔𖾑 𖼄𖽳𖾑 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼞𖽜 𖼊𖽦𖾐 𖼽𖽡𖾐 𖼣𖽻𖾐 𖼀𖽙 𖼊𖽑𖽺 𖼍𖽡𖾑 𖼽𖽡𖾐，𖼠𖽙𖾑 𖼍𖽻𖾐 𖼣𖽙𖾐 𖼀𖽑𖽚𖾐 𖼞𖽚 𖼖𖽻𖾐 𖼊𖽻𖾐．”

6 𖼇𖽕 𖼖𖽻 𖼀𖽦𖾐：“𖼐𖽑𖽡𖾐 𖼊𖽦𖾐 𖼽𖽡𖾐 𖼺𖽺𖾑，𖼐𖽑𖽡𖽻𖾐 𖼀𖽙 𖼐𖽑𖽡𖾐 𖼞𖽜 𖼞𖽑𖽙𖾐 𖼄𖽳𖾐 𖼷𖽑𖽦𖾐 𖼺𖽪𖾐 𖼖𖽙𖾐 𖼮𖽑𖽻𖾐，𖼽𖽻 𖼊𖽑𖽺 𖼍𖽡𖾑 𖼽𖽡𖾐 𖼻𖽻𖾐．”

7 𖽃𖽔𖾐 𖼺𖽺𖾑，𖼽𖽱𖾐 𖼺𖽴𖾑 𖼊𖽦𖾐 𖼽𖽡𖾐 𖼽𖽻 𖼀𖽙 𖼊𖽑𖽺 𖼍𖽡𖾑．𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼊𖽦𖾐 𖼽𖽡𖾐 𖼺𖽺𖾑，𖼽𖽻 𖼀𖽙 𖼊𖽑𖽺 𖼍𖽡𖾑 𖼺𖽪𖾐， 𖼞𖽶𖾑𖽑 𖼇𖽕 𖼖𖽻 𖼞𖽳𖾐 𖼮𖽜𖾐 𖼀𖽑𖽙，𖼇𖽕 𖼖𖽻 𖼈𖽴 𖼞𖽳𖾐 𖼮𖽳 𖼄𖽻，𖼹𖽦𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼮𖽳 𖼄𖽻， 8 𖼽𖽱𖾐 𖼺𖽴𖾑 𖼊𖽑𖽡 𖼈𖽴 𖼷𖽑𖽻𖾐，𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼐𖽺𖾐 𖼽𖽻 𖼀𖽙 𖼈𖽴 𖽃𖽔𖾑 𖼞𖽑𖽶𖾐 𖼷𖽑𖽻𖾐 𖼣𖽻𖾐．𖼽𖽻 𖼈𖽳𖾐 𖼞𖽳𖾐 𖽃𖽔𖾐 𖼞𖽶𖾑、 𖼐𖽑𖽡 𖼐𖽺𖾐 𖽃𖽔𖾑 𖼮𖽑𖽸 𖼽𖽻𖾐 𖼷𖽪𖾐 𖼀𖽑𖽨 𖼠𖽜𖾐 𖼳𖽔𖾐 𖼄𖽡𖾐 𖼊𖽺𖾐 𖼍𖽙𖾑 𖼍𖽧𖾑 𖼦𖽑𖽙𖾐． 9 𖼦𖽑𖽔𖾐 𖼖𖽺𖾑 𖼮𖽑𖽜𖾐 𖼐𖽺𖾐 𖼄𖽪 𖼷𖽳 𖼺𖽪𖾐 𖼄𖽦 𖼀𖽑𖽙，𖼽𖽻 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖼊𖽦𖾐 𖼽𖽡𖾐．𖼽𖽡𖾐 𖼺𖽪𖾐 𖼷𖽑𖽻𖾐 𖼦𖽑𖽔𖾐 𖼮𖽶𖾐 𖼄𖽨．

10 𖼽𖽻 𖼈𖽳𖾐 𖼖𖽻𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼊𖽚𖾐 𖼄𖽡𖾐 𖼀𖽳，𖼽𖽕𖾑 𖼍𖽕 𖼞𖽳𖾐 𖼊𖽝 𖼞𖽳𖾐 𖼊𖽑𖽺 𖼮𖽑𖽡𖾐 𖼺𖽺𖾑，𖼞𖽑𖽶𖾑 𖼠𖽻𖾐 𖼮𖽻𖾐 𖼮𖽑𖽡𖽪 𖼈𖽳 𖼄𖽙𖾐 𖼣𖽶𖾐，𖼽𖽱𖾐 𖼺𖽴𖾑 𖼹𖽦𖾑 𖼽𖽻 𖼀𖽙 𖼖𖽙𖾐 𖼀𖽙𖾐 𖼳𖽶 𖼐𖽑𖽡𖾐 𖼳𖽡𖽚𖾐 𖼊𖽴 𖼦𖽑𖽙𖾐． 11 𖼽𖽻 𖼈𖽳𖾐 𖼽𖽕𖾑 𖼍𖽕 𖼞𖽳𖾐 𖼊𖽝 𖼞𖽳𖾐 𖼊𖽑𖽺 𖼮𖽑𖽧𖾐 𖼞𖽪 𖼣𖽶𖾐，𖼞𖽑𖽶𖾑 𖼠𖽻𖾐 𖼞𖽳𖾐 𖼰𖽡𖽔𖾐 𖼐𖽕 𖼺𖽪𖾐 𖼷𖽑𖽻𖾐 𖼐𖽦𖾐 𖼄𖽡𖽻𖾐 𖼺𖽺𖾑，𖼀𖽦𖾐：“𖼦𖽑𖽺𖾑 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼦𖽑𖽔𖾐 𖼮𖽶𖾐 𖼮𖽑𖽧𖾐 𖼞𖽪 𖼞𖽳𖾐 𖼣𖽶𖾐 𖼮𖽑𖽡𖽪 𖼣𖽻𖾐．” 𖽃𖽔𖾐 𖼺𖽺𖾑，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼞𖽳𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼊𖽑𖽺 𖼽𖽕𖾑 𖼂𖽚 𖼄𖽦𖾑 𖼳𖽡𖾐 𖼄𖽡𖾐．

12 𖼽𖽔 𖼠𖽴𖾑 𖼞𖽳𖾐 𖼻𖽙 𖼞𖽑𖽶𖾑 𖼹𖽻𖾐 𖼽𖽻 𖼀𖽙 𖼞𖽑𖽙𖾐 𖼀𖽦𖾐 𖼄𖽪𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼽𖽡𖾐， 13 𖼽𖽔 𖼠𖽴𖾑 𖼊𖽑𖽺 𖼦𖽑𖽙𖾐 𖼺𖽺𖾑 𖼰𖽡𖽔𖾐 𖼐𖽕 𖼄𖽡𖾐 𖼊𖽺𖾐 𖼮𖽑𖽡𖾐，𖼀𖽑𖽨 𖼄𖽦𖾑 𖼂𖽡 𖼖𖽔𖾐 𖼄𖽡𖾐 𖼠𖽻𖾐 𖼞𖽑𖽶𖾐 𖼄𖽡𖾐 𖼊𖽪 𖼳𖽡𖽪𖾐 𖼮𖽻 𖼖𖽙𖾐 𖼍𖽡𖾑．𖼄𖽡𖾐 𖼮𖽑𖽙𖾐 𖼞𖽑𖽶𖾑 𖼄𖽕𖾑 𖼖𖽡𖾑 𖼄𖽡𖾐 𖼊𖽺𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼞𖽳𖾐 𖼮𖽻𖾐，𖼞𖽑𖽶𖾑 𖼽𖽕𖾑 𖼂𖽚 𖼖𖽔𖾐 𖼦𖽗 𖼀𖽑𖽨𖾐 𖼀𖽑𖽡 𖼻𖽜 𖼺𖽺𖾑，𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼽𖽡 𖼇𖽮 𖼖𖽪𖽦 𖼞𖽳𖾐 𖼈𖽳𖾐 𖼂𖽻𖾐 𖼖𖽻𖾐 𖼖𖽧 𖼀𖽳𖾐 𖼄𖽡𖾐 𖼂𖽺𖾐 𖼺𖽪𖾐 𖼣𖽻𖾐．

14 𖼽𖽱𖾐 𖼺𖽴𖾑 𖼽𖽻 𖼀𖽙 𖼊𖽑𖽺 𖼍𖽡𖾑 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼐𖽺𖾐 𖼞𖽑𖽙𖾐 𖼊𖽦𖾐 𖼽𖽡𖾐 𖼽𖽻 𖼀𖽙 𖼊𖽑𖽺 𖼍𖽡𖾑 𖼺𖽪𖾐 𖼷𖽑𖽻𖾐，𖼄𖽳𖾑 𖼄𖽳 𖼷𖽙𖾐 𖼖𖽙𖾐 𖼮𖽑𖽻𖾐 𖼀𖽑𖽚𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽚 𖼽𖽡𖾐．

15 𖼽𖽔 𖼠𖽴𖾑 𖼳𖽶𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽱𖾐 𖼺𖽴𖾑 𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼀𖽦𖾐：“𖼽𖽱𖾐 𖼺𖽴𖾑 𖽃𖽔 𖼐𖽺𖾑 𖼊𖽑𖽺 𖼐𖽑𖽧𖾐 𖼷𖽚𖾐 𖼍𖽳𖾐 𖼺𖽺 𖼊𖽑𖽡𖾑 𖼣𖽻𖾐，𖽃𖽙𖾑 𖼄𖽺 𖼊𖽑𖽙 𖽃𖽔 𖼐𖽺𖾑 𖼽𖽻 𖼊𖽑𖽺 𖼞𖽑𖽙𖾐 𖼂𖽺𖾐 𖼺𖽪𖾐 𖼊𖽶𖾐 𖼄𖽡𖽻 𖼖𖽙𖾐 𖼮𖽑𖽻𖾐 𖼺𖽺𖾑，𖼽𖽻 𖽃𖽔 𖼐𖽺𖾑 𖼊𖽑𖽺 𖼖𖽦 𖼂𖽚𖾐 𖼊𖽻𖾐．”

16 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑，𖼽𖽻 𖼈𖽳𖾐 𖼷𖽑𖽻𖾐 𖼹𖽡𖾐 𖼽𖽱𖾐 𖼺𖽴𖾑 𖼖𖽙𖾐 𖼀𖽦𖾐：“𖼐𖽑𖽡𖽻𖾐 𖼀𖽙 𖼄𖽔 𖼳𖽶𖾐 𖼺𖽺 𖽃𖽙𖾑 𖼄𖽺 𖼦𖽑𖽺𖾑 𖼻𖽻𖾐 𖼀𖽦𖾐 𖼄𖽪𖾑： 17 ‘ 𖼐𖽑𖽡𖾐 𖼈𖽳𖾐 𖼽𖽱𖾐 𖼺𖽴𖾑 𖼖𖽙𖾐 𖼮𖽑𖽻𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼖𖽡𖾐，𖽃𖽙𖾑 𖼄𖽺 𖼊𖽑𖽙 𖼐𖽑𖽡𖾐 𖽃𖽔 𖼽𖽪𖾐 𖼞𖽑𖽶𖾑 𖼹𖽻𖾐 𖼐𖽑𖽡𖾐 𖼊𖽑𖽺 𖼮𖽑𖽡𖾐 𖼻𖽸，𖼐𖽑𖽡𖾐 𖼽𖽻 𖼈𖽳𖾐 𖼞𖽳𖾐 𖼦𖽑𖽙 𖼊𖽪 𖼐𖽺𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖼄𖽡𖽺 𖼦𖽑𖽙𖾐 𖼞𖽜 𖼖𖽡𖾐．’ 𖼣𖽙𖾐 𖼈𖽳𖾐 𖼐𖽑𖽡𖽻𖾐 𖼀𖽙 𖼞𖽑𖽙𖾐 𖼊𖽻 𖼮𖽶𖾐 𖼺𖽪𖾐 𖽂𖽙 𖼺𖽙𖾐 𖼂𖽙𖾐 𖼞𖽳𖾐 𖼮𖽜𖾐 𖼀𖽑𖽙 𖼣𖽻𖾐，𖽃𖽔𖾑 𖼄𖽳𖾐 𖼐𖽑𖽡𖾐 𖼣𖽙𖾐 𖼈𖽳𖾐 𖼞𖽳𖾐 𖼽𖽺𖾐 𖼮𖽑𖽡𖽪𖾑 𖼊𖽑𖽺 𖼄𖽡𖽺 𖼦𖽑𖽙𖾐 𖼞𖽜．” 𖼽𖽱𖾐 𖼺𖽴𖾑 𖼊𖽻 𖼂𖽪𖾑 𖼦𖽑𖽺𖾑 𖼊𖽻 𖼮𖽨 𖼺𖽺𖾑 𖼣𖽶𖾐 𖼍𖽪𖾐 𖼖𖽻𖾐．

18 𖼽𖽻 𖼽𖽪𖾐 𖼞𖽑𖽶𖾑 𖼹𖽻𖾐 𖼄𖽳𖾑 𖼄𖽳 𖼖𖽻𖾐 𖼽𖽻 𖽃𖽙𖾑 𖼄𖽺 𖼮𖽑𖽡𖽺 𖼂𖽴𖾐 𖼹𖽺𖾐，𖼀𖽦𖾐：“𖼣𖽙𖾐 𖼈𖽳𖾐 𖼐𖽑𖽡𖾐 𖼞𖽳𖾐 𖼮𖽜𖾐 𖼀𖽑𖽙 𖼣𖽻𖾐．”

19 𖼽𖽱𖾐 𖼺𖽴𖾑 𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖼮𖽡𖽮𖾐 𖼄𖽔 𖼻𖽻𖾐！ 𖼣𖽙𖾐 𖽂𖽙 𖼺𖽙𖾐 𖼂𖽙𖾐 𖼄𖽔 𖼣𖽻𖾐，𖽃𖽔 𖼊𖽺𖾑 𖼳𖽶 𖼷𖽶 𖼊𖽺𖾐 𖼮𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼊𖽑𖽺 𖼳𖽶 𖼊𖽻 𖼐𖽙𖾐 𖼐𖽺𖾑？ 20 𖽃𖽙𖾑 𖼄𖽺 𖼊𖽑𖽙 𖼐𖽑𖽡𖾐 𖼈𖽳𖾐 𖼣𖽙𖾐 𖼊𖽑𖽺 𖼦𖽹𖾑 𖼀𖽑𖽧𖾐 𖼊𖽡 𖼮𖽑𖽻．𖼦𖽑𖽻𖾐 𖼊𖽑𖽻𖾐，𖽂𖽙 𖼺𖽙𖾐 𖼂𖽙𖾐 𖼣𖽝 𖼺𖽪𖾐 𖼹𖽳𖾐 𖼳𖽶 𖼣𖽻𖾐，𖼽𖽻 𖽃𖽙𖾑 𖼐𖽑𖽡𖾐 𖼣𖽙𖾐 𖼞𖽜 𖼷𖽶 𖼄𖽻 𖼈𖽳 𖼂𖽺𖾐 𖼺𖽺𖾑，𖼷𖽑𖽻𖾐 𖼞𖽑𖽙 𖼄𖽙𖾐 𖼊𖽑𖽺 𖼖𖽺𖾑 𖽂𖽙𖾐 𖼍𖽻𖾐 𖼠𖽙𖾑． 21 𖽃𖽔𖾑 𖼄𖽳𖾑 𖼐𖽑𖽡𖾐 𖼈𖽳𖾐 𖼮𖽡𖽮𖾐 𖼄𖽔 𖼻𖽻𖾐，𖼣𖽙𖾐 𖼐𖽑𖽡𖾐 𖼈𖽳𖾐 𖼐𖽺𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖽃𖽔𖾐 𖼞𖽶𖾑 𖼊𖽑𖽺 𖼍𖽻𖾐 𖼊𖽻𖾐．” 𖽃𖽔𖾐 𖼺𖽺𖾑，𖼽𖽱𖾐 𖼺𖽴𖾑 𖼐𖽑𖽧𖾐 𖼐𖽪 𖼊𖽻 𖼊𖽑𖽜𖾐，𖼽𖽻 𖼈𖽳𖾐 𖼊𖽑𖽺 𖼐𖽑𖽧𖾐 𖼍𖽡𖾐．

22 𖼽𖽱𖾐 𖼺𖽴𖾑 𖼐𖽺𖾐 𖼽𖽻 𖼀𖽙 𖼈𖽴 𖼷𖽑𖽻𖾐，𖼄𖽳𖾑 𖼄𖽳 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽻𖾐．𖼽𖽱𖾐 𖼺𖽴𖾑 𖼊𖽑𖽡 𖼦𖽑𖽙𖾐 𖼷𖽑𖽡𖾐 𖼞𖽑𖽚 𖽂𖽙𖾐 𖼮𖽻𖾐．

23 𖼽𖽱𖾐 𖼺𖽴𖾑 𖼽𖽡 𖼇𖽕 𖼖𖽡𖽦 𖼞𖽳𖾐 𖼖𖽡𖾑 𖼂𖽙𖾑 𖼊𖽑𖽺 𖽂𖽙𖾐 𖼄𖽡𖽻𖾐．𖼄𖽔 𖼐𖽕 𖼳𖽡𖾐 𖼻𖽙 𖼄𖽔 𖼰𖽧 𖼣𖽻𖾐，𖼄𖽔 𖼰𖽧 𖼞𖽳𖾐 𖼻𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼽𖽱𖾐 𖼺𖽴𖾑 𖼀𖽑𖽨 𖼽𖽻 𖼻𖽙 𖼰𖽕𖾐．

24 𖼽𖽱𖾐 𖼺𖽴𖾑 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼖𖽙𖾐 𖼀𖽦𖾐：“𖼣𖽙𖾐 𖼳𖽶𖾐 𖼖𖽻𖾐 𖼮𖽻𖾐！ 𖼦𖽑𖽻𖾐 𖼊𖽑𖽻𖾐，𖽂𖽙 𖼺𖽙𖾐 𖼂𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽦𖾐 𖼳𖽪𖾐，𖼐𖽑𖽡𖾐 𖼈𖽳𖾐 𖼊𖽑𖽺 𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼺𖽺𖾑，𖼽𖽻 𖼽𖽕𖾑 𖼂𖽚 𖼖𖽔𖾐 𖼦𖽗、 𖼽𖽡 𖼺𖽔 𖼐𖽺𖾐 𖼽𖽔 𖼠𖽴𖾑 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼽𖽻 𖼈𖽳𖾐 𖼊𖽑𖽺 𖼞𖽜 𖼮𖽙𖾐 𖼞𖽳𖾐 𖼄𖽡𖾐 𖼊𖽺𖾐 𖼊𖽦𖾐 𖼽𖽡𖾐 𖼊𖽻𖾐．”

25 𖼽𖽱𖾐 𖼺𖽴𖾑 𖼦𖽑𖽔𖾐 𖼖𖽺𖾑 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐 𖼞𖽜 𖼄𖽳𖾐 𖼷𖽑𖽦𖾐，𖼀𖽦𖾐：“𖽂𖽙 𖼺𖽙𖾐 𖼂𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽦𖾐 𖼳𖽪𖾐 𖼊𖽻𖾐．𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼈𖽳𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼣𖽙𖾐 𖼞𖽳𖾐 𖼈𖽶 𖼠𖽴𖾐 𖼮𖽑𖽶𖾑 𖼺𖽺𖾑，𖼞𖽜 𖼮𖽙𖾐 𖼄𖽡𖾐 𖼊𖽺𖾐 𖼊𖽦𖾐 𖼽𖽡𖾐 𖼖𖽡𖾐．” 26 𖼽𖽱𖾐 𖼺𖽴𖾑 𖼊𖽑𖽡 𖼦𖽑𖽙𖾐 𖼷𖽑𖽡𖾐 𖼞𖽑𖽚 𖼖𖽚，𖼳𖽶𖾐 𖼦𖽑𖽙𖾐．𖼷𖽑𖽻𖾐 𖼐𖽕𖾐 𖼷𖽑𖽡 𖼈𖽺𖾐 𖼽𖽻 𖼞𖽶𖾐 𖼮𖽑𖽶 𖼊𖽑𖽺 𖼄𖽺𖾑，𖼀𖽑𖽨 𖼄𖽻 𖼦𖽑𖽺𖾐 𖼠𖽻𖾐 𖼞𖽑𖽶𖾐 𖼰𖽡𖽺𖾐，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼍𖽙𖾑．