Yiesu n muand laabaal nba jual po
Yab bu la Yendu diem pamann
5
1 Yiesu n la l niwulug,
k u duo jual po g kal,
k u *ŋuantieb nagn u buol.
2 K u gaal maam g ji cil g tund’b g maad :
3 " Yab jiind b kua,
g biɛ dug Yendu po,
pamann tie b yal i,
g dugn banm n tie Yendu *diem yab.
4 Yab kal yen ninsiid pamann tie b yal i,
g dugn Yendu tan bu fiɛl b ninsiid.
5 Yab mɔg panyiil,
pamann tie b yal i,
g dugn Yendu tan bu cab banm i tinŋ.
6 Yab pala kɔn k ban gii tuag mamɔni sɔnu,
pamann tie b yal i,
g dugn Yendu tan bu cab’b sɔnu.
7 Yab jie niib ninbaaɔg,
pamann tie b yal i,
g dugn Yendu tan bu jie b mɔ ninbaaɔg.
8 Yab tie papiendanm,
pamann tie b yal i,
g dugn b tan bu la Yendu.
9 Yab kpaan laafiɛ yen dɔnnu niib po,
pamann tie b yal i,
g dugn Yendu tan baa yi banm i u bid.
10 Yab tuag mamɔni sɔnu k b yen ŋɔnŋ’b fala l po,
pamann tie b yal i,
g dugn banm n tie Yendu diem yab.
11 B gii sugd’i,
g ŋɔnŋ’i fala,
g fa faaɔg g maad mabiid nba kul i po g dugn n po,
pamann tie i yal i.
12 I be man pamann n,
gii kpanm,
g dugn i nyuad tan baa yab Yendu *ŋaag.
Yab bo liid’i,
g tie Yendu *sogni-nba,
b bo cagn’m nnyan i.
Ŋanduna yaalm yen ŋanduna yinyiem
13 I tie nyan yaalm nyan i,
ŋanduna niib kul po.
Yaalm manu gii gbenn i,
b bu tug bɛ i g guan g manŋ’o i ?
L ji g mɔg siɛl yaa buam.
L tie k ban lu’ug cincann i niib ń gii ŋmaad l po.
14 Yinm n tie ŋanduna yinyiem.
Siɛl kan fid g legn doug nba be jual po.
15 Sua mɔ kan son fidl g cibn bobl n.
B tu son fidl g tuan’o naan k l baa so g fand ŋaag yab kul i.
16 I mɔ yaa yinyiem ń gii fand niib,
k ban fid g la i tuonŋana,
gii dond i Baa nba be polu po.
Yiesu n maad yal Yendu Mɔmaam po
17 Daa mali man k n baal k n piin *Moyis kadaaɔg yen Yendu *sogni-nba kadaaɔg kaa.
N g baal k n piin kaa,
n baal k min ŋanm g ŋɔn lan bual nand i.
18 Yen mɔni,
n maad’i.
Polu yen tinŋ gii bua lan wai nand Moyis kadaaɔg n nuan,
baa diɛnbig kan piin,
k ban bo diɛn bona nba kul g tien.
19 Yua g cɔln Yendu *Mɔmaam ne ninŋ bonyenn,
baa bonbig,
g ŋɔnŋ lieb k ban mɔ ń daa cɔln,
wano n bu juod Yendu *diem n.
Ama yua cɔln Yendu Mɔmaam kul,
g ŋɔnŋ lieb k ban gii tie nnyan,
wano n baa tie nigbenŋl Yendu diem n.
20 N maad’i,
i bontitied gii g ŋan g cie Yendu Kadaaɔg *gbanbanda yen *Farisiɛn-nba,
i kan kua Yendu diem n.
21 I gbad k b bo maad t yaajanm :
“A kan kpi nil.
G nil gii kpii u lua,
b bu gad yen’o buuddanm buol. ”
22 Min nuan maad’i :
yua gii ben pal u ninja po,
l danŋ k ban gad yen’o buuddanm buol.
Nil gii sugd u ninja k u tie fam b bu gad yen’o *Suif-nba buuddanm buol.
Nil gii maad u ninja k u tie yukpienn,
b bu lu’ug muu nba so g kan junn n ninŋ.
23 A gii baal *salg binbindl buol g bu yid Yendu salg,
g tiɛd k a ninja mɔg maam yen’a,
24 ŋan ŋaa a salg l binbindl buol,
g gad fin yen a ninja ń daan manŋ o,
ŋan fid g guan g yid Yendu salg.
25 Fin yen nil gii mɔg maam,
k i yeg g saa buuddaan buol,
ŋan tuod yin gbad i lieb maam g sua k i daa paa sɔnu po,
wan tan daa gad yen’a buuddaan buol,
k wan te sijenm ń luon’a.
26 Yen mɔni n maad’a,
a gii ŋaa k b luon’a l buol,
a kan nya saa yen youg nba k a bu pa l kul,
g kan tenn baa kuug.
27 I gbad k b bo maad :
“A kan dua yen nil ŋaapuo.”
28 Min nuan maad’i :
Yua gii nyuand puo k u yam kua l puo n ninŋ,
u dua yen’o u pal n ninŋ n nyan.
29 A nuujendu ninbinn n gii te k a tie biid,
ŋan kpigd’o g lu g dugn a gbannand bɔgyenn gii g be,
lann n su yen a gbanu kul ń gii be,
ban tan lu’a muu nba kan junn n ninŋ.
30 A nuujendu n gii te k a tie biid,
ŋan jiɛl l nuu g lu,
g dugn a gbannand bɔgyenn gii g be,
lann n su yen a gbanu kul ń gii be,
ban tan lu’a muu nba kan junn n ninŋ.
31 B biɛ bo maad :
“Jua nba nyan u ŋaapuo,
wan te’og kadaaɔg nba ŋɔn k u nyan’o.”
32 Min nuan maad’i :
Jua nba nyan u ŋaapuo k l g tie cunconm po,
l puo gii gad g dua yen jafan,
u kuan u ŋaapuo cunconm n ninŋ n nyan.
Jua nba kuan puo nba k u sal nyan’o,
u mɔ tien cunconm n nyan.
33 I biɛ gbad k b bo maad t yaajanm :
“A kan maad maam g pol Yendu g ban k a fa faaɔg.
K a gii pol Yendu k a bu tien yal ŋan tien.”
34 Min nuan maad’i :
Daa polg man palb.
Daa polg man polu yen tinŋ,
g dugn polu tie Yendu n kaal naan g bu buud i,
35 g tinŋ mɔ tie u taa-ŋmaa-buol.
Biɛ daa polg man Serusalɛm sann po mɔ,
g dugn Serusalɛm tie Yendu Badciɛn doug u.
36 Biɛ daa puon a yul g pol,
g dugn a kan fid g te baa a yuyeonŋ ń penn g bual lan bɔnn.
37 I maam n ninŋ,
i gii ban g yal tie mɔni,
yin yed k l tie mɔni,
i gii ban g yal tie faaɔg mɔ,
yin yed k l tie faaɔg,
yin ji maad yal g pugn kul nyiɛ *Bonbiildaan buol i.
38 I gbad k b bo maad g nil gii kpigd u lua ninbinn,
l dagd k ban kpigd u mɔ yaa ninbinn ;
g nil gii pua g fegd u lua nyinn,
l dagd k ban pua g fegd u mɔ yaa nyinn.
39 Min nuan maad’i :
Daa kɔn man yen tondanm.
Nil gii peb’a nuujendu kpiɛnu,
ŋan cab’o nuuganŋ kpiɛnu mɔ wan peb.
40 Nil gii bua bu yen’a g fiel a liɛdbig,
ŋan cab’o a liɛdgbenŋl mɔ.
41 Nil gii niin’a k a tug tugl g sonm g gad naan,
ŋan tug g sonm l fagnu munle.
42 Yua miɛl’a ŋan te’og,
yua bua k a kpend’o bonn ŋan daa bel’o.
43 I biɛ gbad k b bo maad :
“A baa bua a buolu n yab,
g daa bua a ninnanda nublu.”
44 Min nuan maad’i :
I bua man i ninnanda.
G biɛ gii miɛd Yendu bonŋana yab tie’i tonu po.
45 Nnyan i k i bu fid g ŋɔn k i tie i Baa nba be polu po bid,
wano nba te g yendu pud tondanm yen *nimɔnm po,
g te g taag baa mamɔnmaada po yen nibiid po.
46 I gii bua yab nba bua i kua,
i bu la bɛ nyuad i ?
Yab gaan *lonpo mɔ g tie nnyan kaa aa ?
47 I gii ŋanm g fuond i ninjanm kua,
n liɛ yin tie yal nba k l cie lieb i ?
*Buolfanu yab nba g ŋua Yendu,
b mɔ g tie nnyan kaa aa ?
48 Lann yinm ń daa mɔg siɛl yaa biid,
nyan i Baa nba be polu po n g mɔg siɛl yaa biid nyan.