2 Daa ŋanluob n pend,

g Yiesu tug Piɛr yen Saak yen San,

k b sud g fagd yen niib,

g duo jual nba kped po.

K b la g Yiesu ninnaɔnŋ lebd,

3 k u tiɛd cil g penn pai pai g nyili g tuud ninbina n ninŋ.

Nil g be tinŋ po ne,

g bu fid g ŋuul tiɛɔg,

lan gii pien nnyan.

4 K b la k *Eli yen *Moyis baal g pag yen Yiesu.

5 Lann i g Piɛr maad Yiesu :

" Canbaa,

l ŋan yen tin gii be ne.

T pua jond tintaa,

yenn ń gii tie a yal,

liel ń gii tie Moyis yal,

g liel mɔ ń gii tie Eli yal. "

6 Piɛr bo g ban wan bu maad yal nba g dugn jiwaani bo kua wano yen u lieb.

7 B sua g tawalgbaɔnŋ nne jiid nyan ŋunn nyan g libn b po,

g niɛlu nne nyiɛ l tawalgbaɔnŋ n ninŋ g maad :

" U ne tie n Bija i,

n bua’ɔg yen n pal kul,

i cenŋ man u maam "

8 L youg mɔno,

b yed k ban diid nne b ji g la baa sua.

B la g Yiesu kua n be yen’m.

9 Ban nyiɛ jual po g ji yaa youg,

g Yiesu kpaa’b k ban daa daa maad baa sua ban la yal,

saa yen daal nba g *Nifosaal Bija tan bu yied kpienm siign.

10 K b tug l maam g bil b pala n,

g yen ji bual b ŋmiɛl n g " yied kpienm siign " niimn tie bɛ i ?

11 Lann i k b bual Yiesu :

" Laabaal g Yendu Kadaaɔg *gbanbanda maad k Eli bu baal yo *Kristo ń fid g baal i ? "

12 K u ŋmiɛn’m :

" L tie mɔni i,

Eli n daa bu kpiɛ g baal g ŋmagd bona kul.

L yen tien nle i,

k l diɛn Yendu Kadaaɔg n ninŋ g Nifosaal Bija bu cagn bonciɛnn k ban yie’og u ?

13 Ama n maad’i,

Eli nuan baal’o,

b sun’o ban bua nand i,

nyan lan bo diɛn u po nand nyan. "

14 Yiesu yen u *ŋuantieb bantaa ŋann bo pund u ŋuantieb nba bo tenn nyan buol,

g la g niwulug gob g lind’b bonciɛnn,

g Yendu Kadaaɔg *gbanbanda sie g nai yen’m.

15 Niwulug n l la Yiesu yaa youg,

k l lid’b bonciɛnn,

k b san g baal g fuond’o.

16 G Yiesu bual’b :

" Yinm yen b ne sie g nai bɛ i ? "

17 Lann i g niwulug n ninŋ,

jua nne maad :

" Canbaa,

n baal yen n bija a buol i.

*Sanpola n ŋua’ɔg,

k u muu,

g kan fid g maad.

18 Naan buol kul l sanpola tu fuun g lu’ug tinŋ n ninŋ,

u jiina kul ń sed,

wan gii dua g ŋman nyina g mɔsankpinkpaaɔnŋ cuud.

K n miɛl a ŋuantieb k ban bel g yaan l sanpola,

k b g fid g bel’b. "

19 Lann i g Yiesu maad’b :

" Yinm nibiid buolu ne,

i g mɔg *dindann baa waam nne.

N biɛ baa be yen’i saa yen bɛ youg u ?

N biɛ bu di sugl i po saa yen bɛ daal i ?

Baal man yen l big nii. "

20 K b baal yen’o Yiesu buol.

Sanpola n la Yiesu,

ban fuun big g lu’ug tinŋ n,

k u dua g bindl g mɔsankpinkpaaɔnŋ cuud.

21 G Yiesu bual big baa :

" Bina ŋanŋaa n nyan k l tie’og nne i ?

" K u ŋmiɛn g hal u bim n ninŋ yo.

22 G yenn youg,

sanpola tu kpaan k ban kpi’ug u,

g tud’o wan baa muu n lann i kaa nyum n.

" Ama a gii bu fid,

ŋan jie’ti ninbaaɔg g tod’ti. "

23 G Yiesu maad’o :

" Laabaal k a yed k n gii bu fid i ?

A g ban g baa siɛl g paa yua mɔg dindann po ii ? "

24 G bibaa tand g maad :

" N mɔg dindann !

Tod’n k n dindann ń pugn. "

25 Yiesu n yaan la g niib bonciɛnn siɛn g baad g pugd nne,

wan tiɛn yen paalu sanpola po g maad :

" Yinm sanpola nba ŋua big,

k u g gbiɛ g biɛ g maad ne ;

ŋaa’ɔg man,

g biɛ daa ban g ŋuan’o. "

26 G sanpola yign lem lem lem,

g nyɔg big yen paalu,

g yaad g ŋaa’ɔg.

G big dua suoo nyan u kpe nyan.

G niib nba bo be l buol nyan,

g siɛb ji tua g big kpe o.

27 Lann i g Yiesu suol big nuu g fiin’o ;

g big fiil g sed.

28 Yiesu n kun ŋaag yaa youg,

k u ŋuantieb ŋuan g bual’o b kua n ninŋ :

" Canbaa,

l tien nle i k tinm yen g fid g bel g yaan l sanpola i ? "

29 G Yiesu ŋmiɛn’m g yaa sanpobuolu ne,

jaandi kua i kaa,

baa siɛl kan fid g bel g yaan’m.

30 Yiesu yen u *ŋuantieb bo nyiɛ l buol g tɔgn Galile doug n.

Yiesu bo g bua g niib bann k u be,

31 g dugn u bo tund u ŋuantieb g maad’b :

" B bu kuad *Nifosaal Bija,

niib ń suol’o g kpi’ug.

U gii kpe,

l daa ŋantaa daal u bu yied. "

32 Ama u ŋuantieb bo g gbiɛ l maam niimn,

g yen jie yen ban bual’o.

33 Yiesu yen u *ŋuantieb bo pund Kafarnawunm doug n.

Ban tan be ŋaag yaa youg nba,

k u bual’b :

" I bo nai yen lieb bɛ i sɔnu po i ? "

34 K u ŋuantieb ŋmin g g jiin siɛl,

g dugn ban bo paa sɔnu po,

b bo nai yen lieb g bua ban bann yua tie ciɛn i.

35 Lann i g Yiesu kal g yiin u ŋuantieb piig yen banle g maad’b :

" Yua bua wan te ciɛn,

wan gii tie nyan big nyan,

g biɛ gii suun lieb kul po. "

36 G yugl big u ŋuantieb sinsiign ninŋ,

g maad :

37 " Yua nba gaal big k u tie nyan u ne nyan,

k l tie n sann po,

u gaal min i.

Yua nba gaal n mɔ,

u g gaal min mɔno kaa,

u gaal yua nba sun’n i. "

38 San bo maad Yiesu :

" Canbaa,

t la jua nne k u biel *sanpola a sann po,

g yen g tie a *ŋuantua,

k t bel’o k wan daa tie nnyan,

g dugn u g be yen’ti. "

39 G Yiesu maad :

" Daa biel’o man,

g dugn nil g be,

g bu tien yaalidug bonn n sann po,

g biɛ guan g biil n sann l youg mɔno.

40 Lann,

nil nba g kɔn yen’ti,

u taa t po i.

41 Nil gii kabl nyum g tie’i k yin nyu g dugn i tie Kristo yab,

yen mɔni n maad’i l daan kan luol u nyuad. "

42 " Yua n te g bid nba dug n po ne ninŋ,

g baa yend tud Yendu sɔnu,

b bo gii tug naal nba kpai g lol g jɔn u tulu n,

g lu’ug mɔgl n ninŋ lann n bo baa su u po.

43 A nuu gii te k a tie biid,

ŋan jiɛl’o ;

a gii tie nuujenn g mɔg *miɛl nba kan ban g gbenn lann n su yen ŋan gii mɔg a nui nle k ban yen lu’a muubuoug n ninŋ,

naan g muu so g kan ban g junn, [

44 naan buol g nanguba nba kan kpe be,

g muu nba so g kan ban g junn mɔ be.]^a

45 A tital mɔ gii te k a tie biid,

ŋan cua g jend’o ;

a gii tie taajenn,

g mɔg miɛl nba kan ban g gbenn lann n su yen ŋan gii mɔg a titala ŋanle k ban yen lu’a muubuoug n, [

46 naan buol g nanguba nba kan kpe be,

g muu nba so g kan ban g junn mɔ be.]

47 A ninbinn mɔ n biɛ l gii te k a tie biid,

ŋan kpigd’o ;

a gii kua Yendu *ŋaag n g tie ninfiɛɔg,

lann n su yen ŋan gii mɔg a ninbina ŋanle k ban yen lu’a muubuoug n,

48 naan buol g nanguba nba kan kpe be g muu nba so g kan ban g junn mɔ be.

49 B tan bu pag nil kul yen muu i nyan yaalm nyan.

50 Yaalm tie bonmɔnn i ;

ama yaalm manu gii gbenn i,

b bu tug bɛ i g guan g manŋ’o i ?

Yaalm manu ń gii be i ninŋ,

yin biɛ gii man man yen i lieb. "