Kadaaɔg ne n tie Yiesu *Laabamann nba g Luk bo diɛn. Wano Luk n biɛ diɛn Yiesu Sundi Tuona kadaaɔg mɔ. U bo tie dogda i. U bo ŋuan Pɔl k b gad g daan muand Laabamann yab g tie *Suif-nba. Wano mɔno bo g tie Suif kaa, ama g yen bo te Kristo-yua. Yen wan diɛn kadaaɔg ne, u ŋanm g bual bual yab nba bo be yen Yiesu g biɛ gbad u maam i, g fid g diɛn. Matieog yen Mark yen Luk n diɛn Laabamann kadaad nba, bona bonciɛnn taa taa i. Luk nuan yen diɛn bonyena g Matieog yen Mark g diɛn. U lugd g diɛn wan bo bua g niib ń gbad laabaal nba i.

Luk bo bua wan muand Laabamann, mandg yab nba g tie Suif-nba i. L po n te k u ŋanm g ŋɔnŋ lanbonpaala niimn yen Suif-nba danm bogda nba k b g ban. Nnyan, yab nba g tie Suif-nba g be ŋanduna n ninŋ kul bu fid g bann g Yiesu n tie b *Fietua.

Luk n yaan ŋɔnŋ g Yiesu tie yua nba n ne : U yed g Yiesu n tie ŋanduna kul Fietua. G Suif-nba bo guu bad nba bu baal g fiel’b, lan tie *Kristo nba g Yendu bo puon’m. Yendu bo ban k u gii g sun Kristo ŋanduna kul bu biɛl. L po n te k u sun’o g yua nba kul tuo g gaal’o, wan fiel’o.

Luk biɛ ŋɔn kadaaɔg ne ninŋ g Yiesu n tie Yonmdaan. G niib nba k b nund’b, Yiesu nuan ŋanm g bua banm i. K l po n te g Yiesu bo maad k u g baal *nimɔnm po kaa ama k u baal k wan yiin biiddanm i k ban lebd b binbem.