Yiesu maad jaanddeciɛɔnŋ mudu yen fala cilyoug
13
1 Yiesu bo nya *jaanddeciɛɔnŋ n k u *ŋuantieb n ninŋ yend maad’o :
" Canbaa,
a la ban tug tana nba g maa jaanddeciɛɔnŋ uu ?
A la ban maa’ɔg k u ja nand ii ? "
2 G Yiesu ŋmiɛn’o :
" A la ban maa’ɔg k u ja nand a,
l kul tan bu bed g duan tinŋ n sa-la-la-la,
g baa tanyenn kan tenn gii tua liel po. "
3 G Yiesu tan kal Oliif tiidi jual po g tuol jaanddeciɛɔnŋ,
g Piɛr yen Saak yen San yen Andre bual’o b kua n ninŋ :
4 " Maad’ti,
youg nba k l bona kul ne tan bu tien yen yal tan bu ŋɔn,
k l youg pund. "
5 G Yiesu ji cil g maad’b :
" Suol man i kua,
g daa ŋaa baa sua ń bɔnd’i.
6 Niib bonciɛnn tan bu baal gii kub n sann g tua k banm n tie *Kristo.
B bu bɔnd niib bonciɛnn ban tud sɔnu.
7 I tan gii gbad g niib maad tɔb maam lann i kaa g tɔb bu baal,
i yam ń daa ŋmad kaa,
l bual k l kul ne n tien yo,
ama l daa kan gii tie ŋanduna juodu kaa.
8 Buolu tu tan bu fiil g kɔn yen buollua,
doug ń fiil g kɔn yen dolieog.
Tinŋ tu tan bu jeg dingbana bonciɛnn n ninŋ,
g kom mɔ ń biɛ baa.
L bona kul ne daa tie madyiɛlu cilg i.
9 Suol man i kua.
Niib tan bu kuad’i g suol’i g gad yen’i g te buuddanm.
Niib tan bu pua’i gbana *tintaann died n.
B bu gad yen’i dougdanm yen batieb buol g dugn n po,
yin kun mɔni n po.
10 L tie k ban cind g muand n *Laabamann ŋanduna buoli kul yo.
11 B gii suol g saa yen’i buuddanm buol,
yin daa mali yin daan bu maad yal kaa.
Youg gii pund yin maad yal nba kua i pal n l youg mɔno,
g dugn yinm mɔno kaa bu maad,
*Foŋanm n bu maad i po.
12 Nil tan bu kuad u ninja ban kpi’ug.
Bibaa mɔ ń kuad u big ban kpi’ug.
Bid tan bu fiil g kɔn yen b danm g te ban kpi’b.
13 Niib kul tan kan gii bua i nublu g dugn n po.
Ama yua nba juun saa yen juog,
Yendu tan bu fiel wano i. "
Cicagciɛnm youg
14 " I tan gii la bonbiiug nba ŋmad niib yam baal g be naan buol nba k l bo g dagd k wan gii be,
(yua nba lii kadaaɔg ne wan gbad l niimn),
l youg,
yab nba be Suude doug n ban san g kua jɔa n ninŋ.
15 Yua n be deliɛkaɔg po,
wan daa yed k u bu jiid g kua dieog n g tug u tiɛd.
16 Yua n be kpaab n mɔ ń ji daa yed k u bu lebd g kun g tug u liɛdl.
17 L dani n ninŋ,
fala bu gbad puotinpunma yen sanpandi naa-nba.
18 I jaand man k lan daa tuu yen sabɔunŋ youg.
19 G dugn l dani n ninŋ niib bu cagn cicagm nba k b g ban g la hal Yendu n tag ŋanduna o.
Nil biɛ ji kan ban g cagn l cicagbuolu liem.
20 L bo gii tie g Yonmdaan g wad l cicagm dana,
baa nil bo kan ciɛl.
Ama u nigannkab po n te k u wad l dana.
21 Lann nil tan gii maad’i g *Kristo be ne,
lann i kaa k u be ne po,
yin daa tuo k l tie mɔni.
22 G dugn faaɔgdanm tan bu fiil g yed k banm n tie Kristo,
lieb ń yed k b tie Yendu *sogni-nba,
b tan bu tien palug yen yaalidug bona bonciɛnn,
l gii tie k b bo bu fid,
ban bɔnd Yendu nigannkab mɔno.
23 Suol man i kua yen bona nba bu baal.
N tuod g maad’i l kul ne n nyan. "
Nifosaal Bija baalu
24 " L dana n ninŋ,
l cicagciɛnm po gii pend,
yendu bu bɔnn i,
ŋmaalg mɔ biɛ ji kan gii pien.
25 Ŋmaabid bu ciel polu po g baa baa,
bona nba be polu po g mɔg paalu kul ń sag g ŋmad yen liel.
26 L youg u,
k b bu la g *Nifosaal Bija be tawalgband n,
g baad yen u paaciɛnu yen u yudand.
27 U tan bu sun *malɛg-nba,
ban taan u nigannkab nba be yaanŋ yen yanbaɔnŋ,
puol yen nintual,
ŋanduna n cil naan,
g daan juod naan nba. "
Kinkanŋ tundl
28 " Gaal man tundl ne kinkanŋ buol.
Youg nba k u tɔ bendmaana k u faad cil bundu,
i ban g kpanyil nag.
29 Nnyan,
i mɔ tan gii la k l bona tie,
yin bann g *Nifosaal Bija nag o,
k u ji be i dimɔi n i.a
30 Yen mɔni n maad’i,
l kul ne bu tien g sua g mɔlane niib nba be ne,
g siɛb daa g kpe.
31 Polu yen tinŋ kul bu pend,
ama n maam nuan kan ban g pend.
32 Baa sua g ban daal,
g bual youg nba k l bona kul ne bu tien.
*Malɛg-nba nba be polu g ban,
Yendu Bija mɔno g ban.
N Baa Yendu kua i kaa.
33 I ceg man i kua po g daa guand man,
g dugn i g ban youg nba k l bona kul bu tien.
34 L tan baa tie nyan nil n tu bua n gad sɔnu,
g tug u ŋaag g guun u tuonsunna nyan i,
g ŋɔn yua kul tuonn nba k u bu sun,
g maad yua guu ŋaag nyan mɔ,
k wan ŋanm gii guu dimɔb g daa guand.
35 Lann daa guand man,
g dugn i g ban ŋaagdaan n bu kpen yaa youg.
U bu kpen daajuoug uu,
yɔugsiiug uu,
kuutonmɔni ii,
siŋaafaani ii,
sua g ban.
36 K wan tan daa kpen g sua k i guand.
37 Min maad yal ne l nyuan sua kul i.
Lann,
i nyuan man g daa guand. "