<<    <     San     4     >    >> 
Yiesu cend Samari puo
4
1-2 *Farisiɛn-nba bo gbad g Yiesu n laad niib nba g *wuul’b nyum k b te u *ŋuantieb nyan, yab g cie San yab. Mɔni nuan, Yiesu mɔno kaa bo wuul’b, u ŋuantieb n bo wuul’b. To, wano Yiesu n bann g Farisiɛn-nba gbad nnyan,
3 k u nyiɛ Suude g guan g lebd Galile.
4 L bo tie mabl i,
k wan tɔgn g nya Samari.
5 U saa saa g daan pund Samari dobig nne ninŋ k b yi Sisaar.
L buol g fag yen *Sakɔb n bo tie u bija Sosɛf tinŋ nba nyan.
6 Wano Sakɔb caal mɔno bo be l buol i.
Yiesu n sonm sonm g cɔg nyan,
k u ji baal g kal l caal buol.
L sua k l tie nyan piig yen kud munle nne i.
7 G Samari doug n puo nne tan baal g bu luun nyum,
g Yiesu maad’o :
" Te’n nyum k n nyu. "
8 L bo sua k u ŋuantieb daa gad doug n ninŋ k ban daan daa jied o.
9 Lann i g puo nba bo nyiɛ Samari doug n nyan bual’o :
" Fin tie *Suif buolu g tan miɛd min Samari puo nyum ii ?
" U bo maad nnyan g dugn Suif-nba yen Samari yab bo g man yen lieb.
10 G Yiesu ŋmiɛn’o :
" A bo gii ban Yendu paab,
g ban yua nba maad’a k a te’og nyum k wan nyu ne,
fin mɔno n bo bu miɛl’o k wan te’a nyunŋanma. "
11 K l puo maad’o :
" Canbaa,
a g mɔg guoga,
caal mɔ biɛ nyua,
a bua la l nyunŋanm lɛ i ?
12 Bii fin n cie t yaaja Sakɔb nba bo tie’ti l caal ii ?
L caal nyum i k wano mɔno yen u bid yen u bonkobd bo nyuu. "
13 G Yiesu ŋmiɛn’o :
" Nil nba kul nyuu nyum ne,
nyunnyuglu biɛ bu suol’o.
14 Ama yua nba bu nyu nyum nba k n bu te’og,
nyunnyuglu ji kan ban g suol’o.
Min bu te’og nyum nba baa tie nyan nyunbunbunn nyan i u ninŋ,
g *miɛl nba g mɔg gbennu nyum buni l n ninŋ. "
15 Lann i g puo ŋann maad’o :
" Canbaa,
te’n l nyum,
g nyunnyuglu ń ji daa ban g suol’n,
k n biɛ ji daa ban g baal ne mɔ g luun nyum. "
16 G Yiesu maad’o k wan gad g daan yiin u sal nii.
17 K l puo maad k u g mɔg sal.
G Yiesu maad’o :
" A maad mɔni i k a g mɔg sal.
18 G dugn a kun jab banmu i,
ŋan biɛ be yen jua nba mɔlane mɔ g tie a sal kaa.
A kon maad mɔni i. "
19 G puo ŋann ŋmiɛn’o :
" Canbaa,
n bann o,
a tie Yendu *sogni i.
20 T yaa baa-nba bo pug Yendu jual ne po i,
k yinm Suif-nba yen ji yed g Serusalɛm n mɔg naan buol nba g sua kul baa pug’o waa ! "
21 G Yiesu guan g ŋmiɛn’o :
" Puo ne,
ŋanm g cenŋ n maam,
youg baad k i tan kan do jual ne po,
lann i kaa g gad Serusalɛm kaa yo,
g daan pug t Baa Yendu.
22 Yinm nuan pug yin g ban yua nba i,
k tinm pug tin ban yua nba,
g dugn *fielu nya Suif-nba buol i.
23 G nyaan youg baad,
l youg taan pund o,
yab nba pug t Baa Yendu yen mɔni,
b baa pug’o b pal n i yen mamɔni.
G dugn t Baa Yendu kpaan yab nba baa pug’o nnyan i.
24 Yendu g mɔg gbannand,
sua kan fid g la’ɔg,
lann yab nba pug’o kul,
b baa pug’o b pala n ninŋ i yen mamɔni. "
25 G puo ŋann guan g maad’o :
" N ban g Mɛsib bu baal (ban yi yua nba *Kristo nyan).
U tan gii baal u bu ŋɔn’ti bona kul niimn ninŋ. "
26 G Yiesu ŋmiɛn’o :
" Min i,
min nba maad yen’a ne. "
27 L youg mɔno k wano Yiesu *ŋuantieb guan.
K l yaa g lid’b yen ban la’ɔg k u pag yen puo.
Ama sua yen g tuo g bual’o wan bua yal nba l puo buol,
lann i kaa wan maad yen’o yal nba po.
28 Lann i g puo ŋann ŋaa u nyunsual l buol,
g san g lebd doug n ninŋ g daan maad niib :
29 " Baal man g diid jua nba maad’n min sun yal nba kul n binbem n ninŋ.
Wano kaa baa tie Kristo ii ? "
30 G niib nyiɛ doug n ninŋ g saa Yiesu buol.
31 L youg nyan,
l sua k u ŋuantieb balm’o g tua :
" Canbaa,
mɔnd g di. "
32 G Yiesu ŋmiɛn’m :
" Min mɔg jied nba g bu di,
i g ban. "
33 K u ŋuantieb ji maad b ŋmiɛl n ninŋ :
" Sua baa tie’og jied k u dii daa aa ? "
34 G Yiesu maad’b :
" N jied tie k min tien yua nba sun’n nyan n bua yal nba i,
g sun u tuonn g juod.
35 I tu tua g diyendu tenn ŋmaali yinna i.
Min maad’i,
yaad man g diid kpaand,
l ji pien i fuaa,
diyendu youg pund n nyan.
36 Yua nba yend diic nuan gaal u paaɔg n nyan !
U ji taand dii i,
g ŋuund *miɛl nba kan ban g gbenn bunbual n ninŋ.
Yua nba yend dii yen yua nba daan bul kul ji taan g be pamann n i.
37 Makpanjam nba k b tu yed g “ Yua buul be u kua,
g yua yend be u kua ” nyan,
kon tie mɔni i.
38 Min sun’i k yin yend yal nba,
yinm kaa daan kuo.
Siɛb n daan kuo g la fala o,
k yinm ji duo b fala nyuad. "
39 L doug n ninŋ Samari niib bonciɛnn bo tuo Yiesu,
g dug u po,
k l maa puo ŋann bo maad’b :
" U maad’n min ban g sun yal nba kul n binbem n ninŋ. "
40 Lann i g Samari yab ŋann pund wano Yiesu buol,
g balm’o k wan baal gii be yen’m.
G Yiesu tien daa ŋanle l doug n ninŋ.
41 G niib bonciɛnn biɛ pugn g dug u po,
g dugn u maam po.
42 B bo maad puo ŋann mɔno :
" L ji g tie ŋan maad yal nba kua kaa te k t dug u po,
tinm mɔno gbad,
g bann k wano n tie ŋanduna *Fietua yen mɔni. "
Yiesu paag tuonsungbenŋl nne bija
43 L daa ŋanle n pend,
g Yiesu nyiɛ l doug n g gad Galile,
44 g dugn wano mɔno n bo maad g Yendu *sogni kan la cɔlunŋ u doug n yab buol.
45 Wan pund Galile,
k l doug n yab ŋanm g gaal’o g dugn b mɔ bo gad Serusalɛm g bu di jaanm,
g la wan tien yal nba kul l jaanm dana n ninŋ.
46 Lann i k u guan g lebd Kaana,
Galile diem n,
naan buol nba k u bo te g nyum kpand dimɔunŋ nyan.
L sua g gobna tuonsungbenŋl nne be l buol,
k u big be Kafarnawunm g yiɛl.
47 Wan gbad g Yiesu nyiɛ Suude g baal Galile nyan,
k u baal g la’ɔg g miɛl’o sugl k wan mɔnd g jiid Kafarnawunm g paag u bija.
L bo sua k l big nag kuum o.
48 Lann i g Yiesu maad’o :
" I gii g la palug yen yaalidug bona,
i kan ban gii dug n po. "
49 G tuonsungbenŋl ŋann guan g ŋmiɛn’o :
" Canbaa,
baal k t gad g sua k n big daa g kpe. "
50 G Yiesu maad’o :
" I kun,
a bija dii miɛl o. "
51 G jua ŋann tuo g gaal Yiesu maam,
g paan g kun.
U daa bo paa sɔnu po i k u tuonsunna tuog’o g maad’o k u bija paag o.
52 K u bual’b g bɛ youg u k l cil g su u po i ?
K b maad’o lann i,
g wonn kudyeonŋ po i,
k u gbanu won sɔnŋ.
53 G bibaa tiɛd k l youg u g Yiesu won maad’o k u big dii miɛl o.
L cil l daal i k wano yen u ŋaag yab kul tug b *dindann g tien Yiesu n ninŋ.
54 Yiesu n nyiɛ Suude g guan Galile g tien yaalidug bonn nba n nyan,
g guan taal munle po.