14
1 G Yiesu maad :
" Daa ŋmad man i yam kaa.
I dug man Yendu po,
g biɛ gii dug n po mɔ.
2 N Baa ŋaag n died be bonciɛnn.
L bo gii g tie mɔni,
n bo kan maad’i k n bu gad g daan cegn yiɛl i po.
3 N gii gad g cegn yiɛl i po,
n bu guan g tug’i k yin mɔ ń daan gii be min baa be naan buol.
4 I yen ban sɔnu nba saa min saa naan buol. "
5 G Toma maad :
" Yonmdaan,
t g ban ŋan saa naan buol mɔno,
t ji bu tien nle i gii ban l sɔnu i ? "
6 G Yiesu ŋmiɛn’o :
" Min n tie sɔnu,
min n tie mamɔni,
min n tie miɛl.
Sua kan fid g gad n Baa buol g g maan nuu n po.
7 I bo gii ban’n,
i ban n Baa mɔ n nyan.
Lan cil dinne gii saa,
i ban’o g biɛ la’ɔg. "
8 G Filiip maad’o :
" Yonmdaan,
ŋɔn’ti a Baa.
Lann kukua bu dagd’ti. "
9 G Yiesu ŋmiɛn’o :
" Filiip,
min be yen’i k l wai nand ne,
k a tan g ban’n ii ?
Yua nba la’n,
u la n Baa n nyan.
Laabaal k a biɛ tua k n ŋɔn’i n Baa i ?
10 A g tuo g gaal yen mɔni k n be n Baa n ninŋ,
k n Baa mɔ be n ninŋ ii ?
Lanbona nba k n maad’i ne g tie n yul po maam kaa.
N Baa nba be n ninŋ n suun u tuona.
11 Tuo man g gaal yen mɔni k n be n Baa n ninŋ k n Baa mɔ be n ninŋ.
L gii g tie nnyan mɔno yin yen tuo g dugn l tuona po.
12 Yen mɔni n maad’i,
yua nba dug n po,
u bu fid g sun tuona nba k n suun ne kul.
U bu fid g sun yal cie nnyan mɔno,
g dugn n saa n Baa buol i.
13 Yal nba k i bu miɛl n sann po kul,
n bu tien,
g niib ń fid g la Yendu Bija n ninŋ,
Yendu yudand.
14 I gii miɛl’n yal nba kul n sann po,
n bu tien.
Yiesu puon u ŋuantieb Foŋanm
15 I gii bua’n,
i baa kub n *mɔmaam.
16 N bu miɛl n Baa wan te’i todkɔlua nba baa be yen’i youg kul.
17 Wano n tie *Foŋanm,
yua nba ŋɔnŋ mamɔni.
*Ŋanduna niib kan fid g gaal’o,
g dugn b kan fid g la’ɔg,
b biɛ kan fid g bann’o.
Yinm nuan yen bu bann’o,
g dugn u baa be yen’i,
g biɛ be i ninŋ.
18 N kan ŋaa’i yin gii be i kukua nyan kpiebi nyan,
n bu guan i buol.
19 L gii pugn waam,
ŋanduna ne niib ji kan la’n.
Ama yinm nuan bu la’n,
g dugn min baa fo nyan,
i mɔ baa fo.
20 L daal,
i bu bann k n be n Baa n ninŋ,
k i be n ninŋ,
k n mɔ be i ninŋ.
21 Yua nba tuo g gaal n mɔmaam g cɔln,
wano n bua’n.
N Baa baa bua yua nba bua’n,
k n mɔ bua l daan.
N bu legd g ŋɔn’o min tie yua nba. "
22 Lann i g Suuda bual’o (l g tie Suuda Iskariyɔt kaa) :
" Bɛ po i k a bu legd g ŋɔn a kua,
tinm ń la’a,
k a yen ji kan ŋɔn a kua ŋanduna yab i ? "
23 G Yiesu guan g ŋmiɛn’o :
" Yua nba bua’n,
u baa kub n maam.
N Baa baa bua’ɔg.
Min yen n Baa bu baal u buol gii be yen’o.
24 Yua nba g bua’n,
u kan kub n maam.
Min maad’i yal nba ne g tie n yul po maam kaa.
N Baa nba sun’n yal i.
25 N maad’i l kul ne g daa be yen’i.
26 *Foŋanm nba tie i Todkua,
k n Baa bu sun’o n sann po nyan n tan bu ŋɔn’i bonn kul niimn ninŋ,
g tiɛd’i min daan maad’i yal nba kul.
27 N bu cab’i yin gii be laafiɛ.
N laafiɛ i k n tien’i.
Min yen g tien’i nyan ŋanduna yab n tien nand nyan kaa.
Daa ŋmad man i yam,
daa jie man siɛl.
28 N tua i gbad k n maad’i mii n saa n nyan g yen bu guan i buol aa ?
L bo gii tie k i bua’n,
min maad k n saa n Baa buol nyan,
i bo baa kpanm i,
g dugn n Baa yab g cie’n.
29 N tuod g maad’i mɔlane k l bona daa g tien,
k l tan gii tien yin tuo g gaal yen mɔni i.
30 N ji kan maad yen’i bonciɛnn,
g dugn *Sitaan baad,
wano nba tie ŋanduna ne bad.
N ban k u g mɔg paalu n po,
31 ama l bual g ŋanduna kul ń bann k n bua n Baa,
k n suun n Baa n yed k n sun yal nba i.
Fiil man k t yaad ne buol. "