Yiesu baal u ŋuantieb buol Tiberiad mɔgl kunŋ
21
1 L bo tien nyan dana ŋanŋaa nne i,
g Yiesu biɛ legd g ŋɔn u kua u *ŋuantieb Tiberiad mɔgl kunŋ.
Wan bo ŋɔn u kua nand n ne :
2 Simɔn Piɛr yen Toma,
yua k b bo yi’ug Didiim nyan,
yen Natanayɛl,
yua nba bo nyiɛ Kaana,
Galile doug n ninŋ,
yen Sebede bid yen Yiesu ŋuantieb banle nne n bo taan g be.
3 G Simɔn Piɛr tan maad :
" N bu gad jansuolu.
" K u lieb maad’o :
" T mɔ bu gad,
tinm yen fin n bu yeg.
" K b nyiɛ g kua ŋadunŋ n ninŋ.
Ama l nyiɛɔg b g suol baa siɛl.
4 Lan tan fani yaa youg,
g Yiesu baal g sie bɔngbann,
ama k u ŋuantieb yen g bann k wano i.
5 G Yiesu bual’b :
" Ŋaajab,
i g la jani yaa aa ?
" K b ŋmiɛn’o g yed :
" Ɛɛn,
t g la siɛl. "
6 K u guan g maad’b :
" Lu man i janbaaɔnŋ ŋadunŋ jendu po,
i bu la jani.
" K b lu janbaaɔnŋ g baan jani g ji gbaa k ban dad g nyan nyum n ninŋ g gbal,
g dugn b bo suol jani bonciɛnn.
7 G Yiesu n bo bua u ŋuantua nba nyan maad Piɛr :
" Yonmdaan i.
" L sua g Piɛr bo land u liɛdl g bil.
Wan gbad g Yonmdaan yaa youg,
k u tug u liɛdl g liɛ,
g yug g baa mɔgl n ninŋ.
8 G Yiesu ŋuantelieb ŋann guan yen ŋadunŋ bɔngbann g diɛl janbaaɔnŋ k l gbie yen jani.
L bo sua k ban be naan buol yen bɔngbann g fag.
L bo tie nyan taabana kobg nne i.
9 Ban duo bɔngbann yaa youg,
k b la g kuana so g jani maa l po,
g kpanu mɔ be.
10 G Yiesu maad’b :
" Bɔgd man jani nba k i daa l suol mɔlane nii. "
11 G Simɔn Piɛr guan g kua ŋadunŋ n ninŋ g dad janbaaɔnŋ g don yen jangbenŋa kobg yen piinmu yen jani ntaa.
L jani n bo l yab nand kul,
g nyaan janbaaɔnŋ bo g pad.
12 G Yiesu maad :
" Baal man g ŋman.
" U ŋuantieb n ninŋ sua g tuo g bual’o wan tie yua nba.
G dugn b bo ban g Yonmdaan i.
13 G Yiesu baal g tug kpanu g tie’b,
g biɛ tie’b jani mɔ.
14 Yiesu n yied kpienm siign ninŋ,
u ji bo ŋɔn u kua u ŋuantieb g guan taal muntaa po n nyan.
Yiesu pag yen Piɛr
15 Ban dii g gbenn,
g Yiesu bual Simɔn Piɛr :
" San bija Simɔn,
a bua’n g cie yab nba ne ii ?
" G Simɔn ŋmiɛn’o :
" Ɛɛn,
Yonmdaan,
fin mɔno ban k n bua’a bonciɛnn.
" G Yiesu maad’o :
" Ŋanm gii kub n pebid. "
16 G Yiesu biɛ guan g bual’o munle po :
" San bija Simɔn,
a bua’n ii ?
" G Simɔn ŋmiɛn’o :
" Ɛɛn,
Yonmdaan,
fin mɔno ban k n bua’a bonciɛnn.
" G Yiesu maad’o :
" I kpaa n pei. "
17 K u biɛ guan g bual’o taal muntaa po :
" San bija Simɔn,
a bua’n bonciɛnn ii ?
" G Piɛr yam ŋmad g dugn Yiesu n bual’o taal muntaa po g yed :
" A bua’n bonciɛnn ii ?
" Lann i g Piɛr ŋmiɛn’o :
" Yonmdaan,
fin n ban bonn kul,
a yen ban k n bua’a bonciɛnn.
" G Yiesu maad’o :
" Ŋanm gii kub n pei.
18 Yen mɔni n maad’a,
ŋan bo tie naasen,
fin mɔno n bo tu bob g gbenn,
g lol a gbann gii saa ŋan bua naan buol kul.
Ama a tan gii ciɛnd,
a bu tand nui i,
nifan ń bobn’a g lol a gbann g gad yen’a naan buol nba k a bo g bua k a gad. "
19 Yiesu bo maad nnyan g ŋɔnŋ Piɛr n tan bu kpe yaa kubuolu nba g don Yendu sann i.
L puol po g Yiesu maad’o :
" I ŋua’n. "
Yiesu yen ŋuantua nba k u bo bua’ɔg
20 Piɛr bo gbeg g la Yiesu n bo bua u *ŋuantua nba nyan,
k u ŋua’b.
L ŋuantua n bo kal g kpiɛ Yiesu yaa youg nba k b bo di nyan.
Wano n bo nagn g bual’o g " Yonmdaan,
ŋmaa n bu kuad’a nii ? "
21 Piɛr n la’ɔg nnyan,
k u bual Yiesu :
" Yonmdaan,
k u ne i,
bɛ n bu baal’o i ? "
22 G Yiesu ŋmiɛn’o :
" L gii tie n buam n ninŋ k wan gii be saa yen n guanu i,
l la’a lɛ i ?
Fin ń gii ŋua’n. "
23 L laabaal n bo yad Yiesu ŋuantieb siign ninŋ k b ji tua k l yaa ŋuantua kan kpe.
Yiesu yen bo g maad Piɛr k l ŋuantua kan kpe kaa.
U bo maad’o g yed g :
" L gii tie n buam n ninŋ k wan gii be saa yen n guanu i,
l la’a lɛ i ? "
24 L ŋuantua n kun mɔni bona ne kul po,
wano n biɛ diɛn l kul.
T ban k wan maad yal nba kul tie mamɔni.
25 Bona bonciɛnn biɛ be g Yiesu bo tien.
B bo gii bu diɛn l kul yenn yenn,
n mali k b bo kan la yiɛl ŋanduna n ninŋ g bil kadaad nba k b bo bu diɛn kul.