Yiesu yiin Sɔl
9
1 L youg Sɔl pal daa bo l ŋub Yonmdaan *ŋuantieb po,
k u ŋua’b yen ninmɔnn k wan biɛn’m.
U bo gad g la *salg-yidkab kul ciɛn
2 g te k u tie’og kadaad nba bu cab’o yikod k wan fid g kua Damas *tintaann died n ninŋ,
l gii tie k u la yab tuag Yonmdaan sɔnu,
jab lann i kaa puob,
wan suol g lol’b g guan yen’m Serusalɛm.
3 Wan bo paa sɔnu po g tan nag Damas,
u sua g yinyiem nne nyiɛ polu po g baal g fand g lind’o.
4 K u baa tinŋ n,
g gbad g niɛlu nne maad’o :
" Sɔl,
Sɔl,
laabaal k a cagn’n i ? "
5 G Sɔl bual’o :
" Yonmdaan,
a tie ŋmaa i ?
" K l niɛlu guan g ŋmiɛn’o :
" Min n tie Yiesu,
min i k a cagn’n.
6 Fiil g kua doug n,
b daan bu maad’a ŋan bu tien yal. "
7 Lann i g jiwaani kua u yegni,
k b sie g kan fid g maad baa siɛl.
B bo gbiɛ g niɛlu n maad,
ama b bo g nyuan baa sua.
8 G Sɔl fiil g nuul ninbina g yen ji g nyuan baa siɛl.
K b suol u nuu g dadb’o g kua yen’o Damas.
9 L buol i k u tien daa ŋantaa g g nyuan,
g g dii g biɛ g nyuu.
10 L bo sua g Yiesu *ŋuantua nne be Damas k b yi’ug Ananias.
K l tien’o nyan danŋd nyan g Yonmdaan yiin’o :
" Ananias !
" K u tuo :
" Min n nyan,
Yonmdaan. "
11 G Yonmdaan maad’o :
" Fiil g gad sɔnu nba po k b yi Sɔnsunsonn nyan,
g kua Suuda ŋaag,
g bual jua nne po k b yi’ug Sɔl k u nyiɛ Tars.
U be l buol g jaand.
12 Wan jaand yaa youg,
k l tien’o nyan danŋd nyan k u la jua nne k b yi’ug Ananias,
k u kua g maan nui u po k wan nyuand. "
13 K Ananias ŋmiɛn :
" Yonmdaan,
niib bonciɛnn maad’n l jua n sun yab nba dug a po tuonbiid nba kul Serusalɛm doug n.
14 U baal ne yen *salg-yidkab ciɛnm yikod i,
k wan suol yab nba kul jaand g taan a sann. "
15 Ama g Yonmdaan maad’o :
" Gad,
g dugn min n tug’o g tien’o n tuonsunn,
k wan ŋɔn *buolfanu yab yen b batieb yen Israyɛl yab min tie yua.
16 Min mɔno n bu ŋɔn’o cicagm nba kul k u bu cagn n po. "
17 Lann i k Ananias gad g kua l ŋaag n,
g maan nui u po g maad :
" N ninja Sɔl,
Yonmdaan Yiesu nba te k a la’ɔg youg nba k a bo paa sɔnu po g baad nyan,
wano n sun’n k ŋan fid g guan g nyuand g biɛ gbie yen *Foŋanm. "
18 L youg g bona nne nyiɛ u ninbina n g baa g naan waga.
K u ji nyuand.
K b wul’o nyuma.
19 K u la jied g dii g paalu tien.
Sɔl muand Laabamann Damas doug n
Sɔl bo g luol daa ŋanŋaa g be yen Yiesu *ŋuantieb Damas doug n.
20 U bo cil l youg mɔno g muand *tintaann died n g Yiesu tie Yendu Bija.
21 Yab bo cenŋ l tundl kul k l ji yaa g lid’b,
k b maad :
" Wano tien kaa daan tu cagn yab taan Yiesu sann Serusalɛm ii ?
L po kaa te k u baal ne k wan suol’b g lol’b,
g gad yen’m g daan te *salg-yidkab ciɛnm ii ? "
22 Sɔl paalu bo pugd daal kul Yendu mamuandu n ninŋ.
K u muand g ŋɔnŋ niib g Yiesu kon l tie *Kristo i.
G *Suif-nba nba be Damas ji g ban ban bu maad’o yal.
23 L bo wai bonciɛnn yo,
g Suif-nba tan taan mɔb g bu kpi Sɔl.
24 G Sɔl bann ban taan mɔb g lol yal u po.
Yendu n yen nyiɛɔg,
b bo guu doug dimɔi mɔno g kpaan k ban kpi’ug.
25 Diyenn nyiɛɔg k u ŋuantieb duo yen’o guonn nba bo kaan g lind doug nyan po,
g kpien’o kpancubug n,
g jiin’o cincann po.
Sɔl be Serusalɛm
26 Sɔl bo gad Serusalɛm g kpaan k wan kua Yiesu *ŋuantieb n ninŋ,
ama k b kul yen jie’og.
G dugn b bo g tuo k u te Yiesu ŋuantua yen mɔni.
27 Lann i g Barnabas juab’o g gad yen’o Yiesu *sundi buol,
g dugn’m nand nba g Sɔl bo la Yonmdaan,
sɔnu po,
yen Yonmdaan n bo maad yen’o nand,
yen nand nba k u bo muand Yendu maam Damas doug n yen papaal Yiesu sann po.
28 Lan cil l youg,
Sɔl bo be yen Yiesu sundi i.
U bo yegd yen banm i,
g waa g muand Yendu maam yen papaal,
Yonmdaan sann po,
Serusalɛm doug n.
29 U bo pag yen *Suif-nba nba maad grɛk nyan mɔ bonciɛnn,
k l tan tien mɔniɛɔg,
k b ji kpaan k ban kpi’ug.
30 Sɔl lieb n gbad nnyan,
k b tug’o g gad yen’o Sesaare,
g te k u kun Tars.
31 L youg,
yab bo dug Yiesu po,
g be Suude yen Galile yen Samari bo be b yam n,
k b *dindann pugd,
k b cɔln Yonmdaan,
g *Foŋanm tod’b g niib pugd bonciɛnn b po.
Piɛr paag Ene
32 Piɛr bo waa doug n naan buol kul.
Diyenn,
k u tan gad g can yab bo dug Yiesu po g kua Lida,
33 g la jua nne k u be l buol k b yi’ug Ene.
U bo yiɛl i,
k u gbanu kpe k u dua dunduanu po.
Wan bo duan l yiɛlu bina nniin n nyan.
34 Lann i g Piɛr maad’o :
" Ene,
Yiesu Kristo paag’a no.
Fiil g ŋanm a dunduanu. "
Piɛr yied puo nne Jope doug n
36 Jope doug n bo mɔg puo nne k u dug Yiesu po k b yi’ug Tabita,
(g Grɛk-nba maam n k b yi’ug Dɔrkasb).
U bo tie ŋanm bonciɛnn g biɛ tod tali.
37 K l tuu k l dana n ninŋ,
g yiɛlu suol’o,
k u kpe.
K b wul’o g duo g duan’o detuadug po.
38 G Yiesu *ŋuantieb gbad g Piɛr be Lida.
Jope bo g fag yen Lida.
Lann i k b sun niib banle k b gad g maad’o k wan di sugl g baal tonm nii.
39 G Piɛr fiil l youg mɔno g ŋuan’m.
Ban pund yaa youg,
k b duo yen’o detuadug po.
G pekɔa kul baal u buol g buud,
g ŋɔnŋ’o liɛdbid yen liɛdgbenŋa nba k wano Dɔrkas daan tu luug youg nba k u daan be yen’m.
40 G Piɛr te k b nyan niib kul,
k u gbaan g jaand g tan tol u nunŋ kuum n dua naan po,
g maad :
" Tabita,
fiil.
" K u ligd ninbina.
Wan la Piɛr,
k u fiil g kal.
41 G Piɛr suol u nuu,
g fiin g sen’o.
Lann i,
g yiin yab dug Yiesu po yen pekɔa g ŋɔn’m k u fo.
42 G Jope yab kul gbad yal tien,
g niib bonciɛnn tuo g ŋuan Yonmdaan.
43 Piɛr bo g luol g tien dana ŋanŋaa Jope doug n,
gbanjabl nne ŋaag,
k b yi’ug Simɔn.