Piɛr gad Kɔrnai ŋaag
10
1 Jua nne bo be Sesaare doug n,
k b yi’ug Kɔrnai.
U bo tie *Rom sijenm ciɛn i,
g kub sijenm kobg u yul po,
k b be cagl nne ninŋ k b yi l cagl " Itali sijenm ".
2 U bo tie nil nba k u pal pien i,
k u biɛ jie Yendu,
wano yen u ŋaag yab kul.
U bo tod *Suif-nba buolu n ninŋ taladdanm,
g biɛ jaand youg kul.
3 G diyenn,
daajuoug kud muntaa po,
k l tien’o nyan danŋd nyan,
k u la Yonmdaan *malɛg ninprurr.
G malɛg kua u buol g yed g " Kɔrnai ! "
4 G Kɔrnai yaad g diid’o g jiwaani kua’ɔg k u bual malɛg :
" Yonmdaan,
laabaal tie bɛ i?
" G malɛg ŋmiɛn’o :
" A jaandi yen todl nba kul k a tod tali pund Yendu buol.
U tiɛn l po.
5 Ji sun niib mɔlane mɔno Jope doug n,
k ban daan yiin Simɔn,
yua k b yi’ug Piɛr nyan.
6 U be Simɔn gbanjabl ŋaag.
L ŋaag kpiɛ yen mɔgl i. "
7 Malɛg nba bo maad yen Kɔrnai n yaad g ŋaa’ɔg,
k u yiin u tuonsunna banle yen u sijenm nba guu’ug nyan ninŋ yend,
yua k u pal pien,
8 g dugn’m yal tien kul.
Lann i g sun’m Jope doug n.
9 Lan fann k b paa sɔnu po g tan nagd doug n,
l sua g Piɛr duo deliɛkaɔg po g bu jaand.
L bo tie yensikpikpalg n i.
10 G kom suol’o k u kpaan k wan di.
Ban tie jied yaa youg nba,
k l tien’o nyan danŋd nyan,
11 k u la g polu po luod g bonn nne juan g ji,
g naan cincenciɛɔnŋ k l mɔgbana ŋanna kul luol.
L bo jiid g daan sii tinŋ i.
12 L n ninŋ,
bonkobd nba mɔg titala ŋanna kul bo be,
g tinŋ n bonbalnkaa kul be,
g polu po bonyugda kul be.
13 K u gbad g niɛlu nne maad’o :
" Piɛr,
fiil g kpi g ŋman. "
14 G Piɛr ŋmiɛn :
" Kai Yonmdaan !
N g ban g dii jied nba k b kuan’ti,
lann i kaa jɔgnd jied. "
15 K l niɛlu guan g maad’o taal munle po :
" Yendu n ŋanm yal nba,
ŋan daa yed k l tie kual. "
16 K l tien’o nnyan g daan biin taal muntaa.
K l cincenciɛɔnŋ guan g duo polu po g bod.
17 K l yaa g lid Piɛr bonciɛnn,
k u ji bual u kua k wan la yal ne niimn tie bɛ i ?
L youg,
l sua g Kɔrnai n bo sun niib nba nyan,
bual bual g bann Simɔn ŋaag n be naan,
g baal g ji sie dimɔb n i.
18 Lann i k b yiin g bual :
" L tie mɔni i g Simɔn nba k b yi’ug Piɛr nyan be ŋaag ne ninŋ ii ? "
19 Piɛr daa bo mali wan la yal po i,
g *Foŋanm maad’o :
" Diid,
niib bantaa kpaan’a.
20 Fiil g jiid g ŋuan’m g daa mali munle-le,
g dugn min n sun’m. "
21 Lann i g Piɛr jiid b buol,
g maad’b :
" Min n tie yua nba k i kpaan’o.
I paa k l man ii ? "
22 K b ŋmiɛn’o :
" *Rom sijenm ciɛn Kɔrnai n sun’ti a buol.
U tie *nimɔn i,
g jie Yendu,
g *Suif-nba cɔlm’o.
Yendu *malɛg n cegl’o,
k wan te k ŋan baal u buol,
k wan cenŋ ŋan mɔg yal g bu maad’o. "
23 G Piɛr te k b kua l ŋaag n,
k b duan l nyiɛɔg.
K l fann,
k banm yen Piɛr yeg g lebd.
G Jope yab nba dug Yiesu po nyan ninŋ yenm ciɛn’m.
24 K l wonn po,
k b pund Sesaare.
L sua g Kɔrnai yiin u naataani yen u dɔnn-nba g guu’b.
25 Piɛr n kua ŋaag n yaa youg,
g Kɔrnai tuog’o,
g gbaan u nintual n,
g pug’o.
26 Ama g Piɛr gbaa g suol u nuu g fiin’o g maad :
" Fiil,
g dugn n mɔ tie nil nyan fin nyan i. "
27 K wano yen Piɛr ji yeg g pag g kua dieog n.
Ban kua dieog n,
g Piɛr la g niib tigl g g mɔg dindin,
28 k u maad’b :
" I ban k tinm Suif-nba *yiko g cab g Suif ń gii be yen buolfanu nil,
lann i kaa wan kua u ŋaag n ninŋ.
Ama g Yendu yen maad’n k min daa nyuan sua k u jɔgn,
lann i kaa k u g dagd yen min gii nagd’o.
29 L po n te ŋan yiin’n yaa youg nba,
k n g yie yen min baal.
N ji bua min bann yal po te k a yiin’n i. "
30 G Kɔrnai maad’o :
" Daa ŋanna n nyan,
l youg n ne,
k n daan jaand n ŋaag ne,
daajuoug kud muntaa jaandi,
g tan la jua nne k u liɛ tiɛpiend k l nyili g tuud,
k u kua g sed n buol,
31 g maad :
“ Kɔrnai,
Yendu gaal a jaandi,
u g sunn todl nba k a tod tali nyan po.
32 Lann,
sun niib Jope doug n,
g te g Simɔn,
yua k b yi’ug Piɛr nyan ń baal.
U be Simɔn gbanjabl ŋaag.
L ŋaag kpiɛ yen mɔgl i. ”
33 L youg mɔno k n sun k b yiin’a,
k a tuo g baal.
Mɔlane t kul ji taan g be Yendu nintual n i,
g bu cenŋ Yonmdaan n yed k a maad’ti yal. "
Piɛr n maad yal Kɔrnai ŋaag
34 Lann i g Piɛr gaal maam g maad :
" Mɔlane,
n ji bann yen mɔni g Yendu g mɔg lugdm.
35 Nil kul,
u gii tie baa buolu nba,
g cɔln Yendu,
g suun tuona nba tuag mamɔni sɔnu,
Yendu pal man u po.
36 Yendu bo tie Israyɛl buolu u laabaal.
L *Laabamann tie,
g Yiesu Kristo po n te g manu kal Yendu yen niib siign,
wano Yiesu n tie niib kul Yonmdaan.
37 I kul ban yal nba tien Suude doug n ninŋ kul.
San bo muand niib u *nyunwulu yo,
g bona kul fid g cil Galile g ji yad Suude doug n.
38 I biɛ ban Yendu n yad u *Foŋanm paalu nand nba Nasarɛt Yiesu po.
Yendu bo be yen’o k u waa doug n naan kul,
g tie ŋanm g biɛ paagd niib nba kul bo be *Sitaan nuu n,
g dugn Yendu bo be yen’o.
39 Tinm la wan tien yal nba kul Serusalɛm yen *Suif-nba n l kua naan kul.
B kpaa’ɔg *dapunpɔnn po i k u kpe.
40 Ama daa ŋantaa daal,
g Yendu yied’o kpienm siign,
g te k u legd g ŋɔn u kua.
41 Niib kul kaa bo la’ɔg,
ama tinm nba g Yendu bo tuod g lugd’ti,
k t tie u sieda-nba n la’ɔg.
Wan yied,
tinm n taan g dii g biɛ nyuu yen’o.
42 K u maad’ti k tin gii muand niib Yendu maam g biɛ gii ŋɔnŋ’b yen mɔni k wano Yiesu n tie yua nba g Yendu lugd’o,
k u bu bu fuodb yen kpienm buud.
43 Yendu *sogni-nba kul bo maad wano i g tua g yaa daan nba kul dug u po,
u bu la u biid sugl. "
Foŋanm jiid yab g tie Suif-nba po
44 Piɛr daa bo g maad g gbenn mɔno g *Foŋanm jiid yab nba kul bo cenŋ u maam nyan po.
45 K l yaa g lid *Suif-nba nba dug Yiesu po g bo ciɛn Piɛr nyan,
yen ban la g Yendu te k u Foŋanm jiid hal yen yab nba g tie Suif-nba mɔ yaa po.
46 B ji bo gbiɛ k b maad mabuoli nba k b g ban g gbad i,
g biɛ dond Yendu.