Yiesu te k t guan g manŋ yen Yendu
5
1 Lann,
tin yaan dug Yendu po i,
k u te k t tie *nimɔnm u nunŋ n,
g guan g manŋ yen’o g dugn t Yonmdaan Yiesu Kristo po.
2 Tin yaan dug wano Yiesu po nyan,
k u te k t fid g la Yendu *ŋalbalg g diɛ k l paa.
T kpanm g dugn t mɔg *dindann g Yendu yudand tan baa tie t kul yal i.
3 L g tie lann kukua kaa,
t gii be fala n ninŋ mɔno t tu kpanm i,
g dugn t ban g fala baad yen juunn i nil po,
4 g juunn mɔ baad yen mindl bigna youg,
g mindl baad yen dindann.
5 Dindann mɔ yen kan kuan’ti fai n ninŋ,
g dugn Yendu tie’ti *Foŋanm k u ŋɔn’ti g Yendu bua’ti hal bonciɛnn.
6 Yen mɔni,
yaa youg nba k t daa bo kan fid g tien siɛl i,
g *Kristo kpe tinm biiddanm po,
Yendu n bo sen k u bu kpe yaa youg.
7 Yen mɔni,
yua nba tie bona kul lan bual nand mɔno,
l paa yen nil ń tuo g gaal u po g kpe.
Yua nba tie nimɔn nuan,
l g kua sua tan bu fid g pua pal g gaal u po g kpe.
8 Ama Yendu nuan yen ŋɔn’ti wan bua’ti nand,
g dugn yaa youg nba k t daa bo tie biiddanm i,
g Kristo gaal t po g kpe.
9 U tuo g yid u miɛl *salg k t mɔ ji te nimɔnm Yendu nunŋ n o,
bɛ po i k u ji kan fiel’ti k tin daa baa Yendu mutuol n ninŋ i ?
10 G dugn,
yaa youg nba k t daa bo tie Yendu ninnanda,
g Yendu yen guan g manŋ yen’ti g dugn u Bija bo kpe t po,
g mɔlane tin ji man yen’o ne,
u kan fiel’ti g dugn u Bija n fo nyan po ii ?
11 L g tie lann kukua kaa mɔno,
t pal man Yendu po bonciɛnn,
g dugn t Yonmdaan Yiesu Kristo po,
wano nba te k t guan g manŋ yen Yendu.
Adam biid n baal yen kuum, g Kristo nyan’ti kuum n
12 Niyend po i g biid kua ŋanduna n ninŋ,
g baal yen kuum,
g niib kul ji kpenn,
g dugn niib kul tien biid.
13 Biid nuan bo tuod g be ŋanduna n ninŋ g sua g Yendu daa g tie *Moyis u *Mɔmaam.
Yendu n daa bo g tie Moyis u Mɔmaam nyan,
u bo g dugd nil biid.
14 Ama lan cil *Adam youg saa yen Moyis youg,
kuum nuan bo l be i,
g dii yen niib nba k b biid bo g tie nyan Adam n bo sun tuonkpiɛdl nba nyan mɔno.
Adam n bo tie nil nba bo tan bu baal nyan yaa ninnaɔnŋ.
15 G nyaan Adam tuonbiid,
yen Yendu n piin paab nba fam yen g taa,
l biɛ g ja.
G dugn,
l tie mɔni i k wano niyend ne po i,
g niib bonciɛnn kpe,
ama niyend mɔ yaa po i,
g Yendu ŋɔnŋ niib bonciɛnn u *ŋalbalg nba yab,
g piin’m u paab nba g mɔg lan ja yen yal nba.
L nil n tie Yiesu Kristo.
16 Niyend tuonbiid n baad yen yal nba kan nand yen Yendu paab,
g dugn niyend n bo sun tuonbiiug k b jiɛl u buud k l baal yen tubdadu,
ama Yendu paab nuan tie g niib sun tuonbiid bonciɛnn g Yendu yen cab’b,
g g dad b tubl.
17 L gii tie g niyend kukua yaa tuonbiid po g kuum ji mɔg nuu yua kul po,
g yab nba ji la Yendu ŋalbalg nba g mɔg po,
k u cab’b k b g mɔg biid,
g dugn Yiesu Kristo kukua po,
l danm ji kan gii mɔg nuu bonn kul po b binbem n ninŋ g dugn u po ii ?
18 Lann,
nyan niyend biid n bo baal yen tubdadu niib kul po nyan,
nnyan i g niyend mɔ yaa tuonŋann po te g Yendu nyanŋ niib kul buud n ninŋ,
g tien’m miɛl.
19 Nyan niyend ninkuam n bo te g niib bonciɛnn te biiddanm nyan,
nnyan mɔ i g niyend cɔlunŋ po bu te g niib bonciɛnn ń te *nimɔnm Yendu nunŋ n ninŋ.
20 Yendu bo tan yuand i g tie Moyis u Mɔmaam g niib biid ń ŋanm g pugn,
ama naan buol g biid pugn nyan,
l buol i g Yendu ŋɔn k u ŋalbalg g mɔg lan ja yen yal nba.
21 Lann,
nyan biid po n bo te g niib kpenn nyan,
nnyan i g Yendu ŋalbalg po mɔ te g niib te nimɔnm Yendu nunŋ n,
g la *miɛl nba kan ban g gbenn g dugn t Yonmdaan Yiesu Kristo po.