Yendu yen Israyɛl yab
9
1 N maad mɔni i,
n tie Kristo-yua i,
n g fa faaɔg kaa.
*Foŋanm ŋmagd’n,
k min mɔno yaa pal n ninŋ k n ban k l g tie faaɔg kaa
2 k n be pabɔnn n,
k l yiɛl’n n pal n ninŋ youg kul.
3 Min bo sun mɔno g Yendu ń yie’n,
g fagn’n yen *Kristo,
k lan tod n ninjanm.
N maad min yen yab nba taa buolu i,
4 Israyɛl yab.
Banm i g Yendu tug’b k b tie u bid,
k u ŋɔn’m u yudand,
g suol *dɔnnu yen’m taal munŋaa kul,
g tie’b u *Mɔmaam,
g ŋɔn’m jaandi,
g puon’m u puoni.
5 Israyɛl buolu bo cil yen b yaajanm nba k b sana duo i.
Kristo bo te nifosaal k b mal’o b buolu n i,
wano nba mɔg nuu bonn kul po,
g tie Yendu,
wan gaal dondl youg kul.
*Amɛnn.
6 L g bua n maad g Yendu g fid g tien wan bo puon b yaajanm yal nba kaaa.
Yen mɔni Israyɛl yab kul kaa tie Israyɛl buolu.
7 L tie nnyan i yen *Abraham yaabuona mɔ,
b kul kaa tie u yaabuona yen mɔni.
G dugn Yendu bo maad Abraham :
" *Isaak yaabuona kukua n tan bu don a sann ".
8 L bua n maad k l g tie nifosaal sɔm bid kaa tie Yendu bid,
Yendu n puon bid nba n tie u bid yen mɔni.
9 Yendu n bo puon g maad yal nba n ne :
" N tan bu guan nne youg,
l bu sua g *Sara ji diɛ bijabg i. "b
10 Lann kukua kaa.
T yaaja *Isaak yen Rebeka bo taan lieb g mal sanpola banle.
11-12 Ama ban daa bo g mal l bid mɔno, k b daa g tien siɛl k l tie bonbiiug lann i kaa bonŋann, g Yendu yen tuod g maad b naa Rebeka g ciɛn po tan baa tie nyan u waag yonm nyan i, g suun u tuona. Yendu bo maad nnyan k wan ŋɔn k u tu g nyuand nil tuona kaa g yiin’o, k u yanbuam n i k u tu yiin’o, k l yanbuam g mɔg lebdu. 13 L tie nyan Yendu n maad nand u kadaaɔg n nyan i :
" N buad *Sakɔb g yie Esaayu. "c
14 To,
t ji bu yed g bɛ ?
G Yendu n suun yal nba g ŋan ii ?
Palb,
lann g be.
15 Yendu bo maad *Moyis :
" Yua nba k n pal bu siɛ u po,
l bu l siɛ u po i,
yua nba k n bu jie’og ninbaaɔg mɔ,
n bu l jie’og ninbaaɔg u. "
16 Lann,
l g nya nil yanbuam po,
lann i kaa wan tie mɔndl nba po kaa,
l nya Yendu pasiɛdug po i.
17 Yendu Kadaaɔg n ninŋ u maad Faraaɔn :
" Min n kaan’a badkog po,
g niib ń la a buol n paalu,
k n sann ń yad ŋanduna n ninŋ kul. "
18 Lann,
l tie nnyan i,
Yendu n bua yua nba i k u tu jie’og ninbaaɔg,
g kuan kangbadm mɔ wan bua yua nba.d
Yendu mutuol yen u ninbajienu
19 Sua bu bual’n k l gii tie nnyan,
g bɛ po i g Yendu yen kɔn yen’ti nii ?
G ŋmaa n bu fid g yie Yendu yanbuam i ?
20 Fin nifosaal,
a mɔ tie ŋmaa i g baa nai yen Yendu i ?
Tiɛɔg bu fid g bual tiɛmaal k l tien nle i k u maa’ɔg nne ii ?
21 Tiɛmaal g mɔg yiko yen wan tuon yɔug,
g bɔgd yɔugkonyenn g maa bulcintiɛɔg,
g tug yɔugkonliel g maa tiɛɔg nba g tie bulcintiɛɔg uu ?
22 Yendu bo bua k wan ŋɔn u mutuol,
g te g niib ń la u paalu i,
ama yen l kul,
k u yen dii mindl bonciɛnn g ŋaa yab nba bo dagd yen k u mutuol ń baa b po k ban biɛl fam nyan.
23 U biɛ bo bua wan ŋɔn yab nba k u jie’b ninbaaɔg,
g bo tuod g bobn’m g bu te’b yudand nyan,
k u yudand yab hal bonciɛnn.
24 Tinm n tie yab nba k u yiin ;
l g tie *Suif-nba buolu n ninŋ kukua kaa,
buolfanu n ninŋ yab mɔ be.
25 Yendu bo maad lann n nyan u *sogni Ose kadaaɔg n ninŋ :
" Yab nba bo g tie n buolu,
n ji bu yiin banm i n buolu,
yua nba k n bo g bua’ɔg,
wano n ji baa tie n buakua.
26 G naan buol nba k b bo maad’b k :
“ Yinm g tie n buolu ” nyan,
l buol i k b ji baa yi’b Yendu miɛldaan bid. "
27 Esaayi mɔ bo maad Israyɛl yab po k nne :
" Baa Israyɛl yab gii mal mal g yabd nyan mɔgl tanbiini nyan,
yab nba bu tenn g la *fielu baa tie waam nne i.
28 G dugn Yonmdaan bu gbaa g tien g gbenn tinŋ po ne,
wan bo maad k u bu tien yal nba. "
29 Wano Esaayi biɛ bo tuod g maad g :
" Yonmdaan paaciɛnudaan bo gii g tie t buolu tennm baa waam,
man ne t bo bu te nyan *Sɔdɔm nyan i,
tinm yen *Gomɔr kul bo baa tie bonyenn i. "
30 Tin maad yal nba ne niimn ii ?
L niimn tie g *buolfanu yab nba bo g kpaan k ban te *nimɔnm Yendu nunŋ n,
banm n biɛ ji tan te nimɔnm.
Yendu yiin’m nimɔnm g dugn b *dindann po i.
31 Ama k Israyɛl yab nuan yen bo kpaan *yiko nba bu te k ban gii tie nimɔnm Yendu nunŋ n ninŋ i,
g yen tan luol.
32 Bɛ n te k b luol i ?
B luol g dugn ban bo kpaan nyan,
b bo g dug b dindann po kaa,
b bo dug b tuona po i,
g tan tuud tantuudkale.
33 Nyan Yendu n maad nand u kadaaɔg n nyan :
" I la i,
n bil tantuudkal n nyan Siyɔnf doug n,
l tie tangbaɔnŋ u,
g niib tuud g baal.
Ama yua nba dug u po,
u kan di fai. "