Pɔl ŋɔnŋ Korɛnt Kristo-yab n bu tod Serusalɛm Kristo-yab nand
16
1 Mɔlane po,
n ji bu maad yal nba nyuan paab nba k i mɔg g bu tug g tod Kristo-yab nba be Serusalɛm nyan po i.
Mɔ ń gii tie man nyan min daan ŋɔn Galasi Kristo-yab *tintaanu n niib k ban gii tie nand nyan.
2 Laad n ninŋ dacincinn daal,
sua kul ń tu bil u ŋaapo wan mɔg paab nba g bu te,
u paalu n dagd’o nand,
g daa guu k n tan baal o,
yin ji cil gii tien i paab.
3 N gii pund,
n bu sun yin lugd yab nba,
g te’b kadaad k ban gad yen l paab Serusalɛm.
4 L gii dagd yen k n gad mɔ,
min yen banm n bu yeg g gad.
Pɔl n mali k wan gad dingbana nba
5 N bu nya Maseduann i g baal i buol,
g dugn n mali k n waa g gɔnn gɔnn Maseduann dingbana.
6 L g kua n bu yann i buol waam,
l gii tuu mɔno min gii be yen’i saa yen fawaaɔg gbennu,
k yin tod’n k n gad n sɔnu.
7 Mɔlane nuan,
n ji g bua k n baal g la’i g pend kaa,
n daan g Yonmdaan gii cab,
min kal i buol g yann waam.
8 Ama n daa baa be Efɛs i,
saa yen *Pantekuot jaanm youg.
9 G dugn Yendu luod sɔnu n po k n bu sun tuongbenŋl l doug n,
g nyaan ninnanda mɔ yabd.
10 Timote gii baal yin ŋanm g gaal’o k wan gii be yen’i g daa mɔg siɛl yaa yanbani,
g dugn u mɔ suun t Yonmdaan po i,
nyan min nyan.
11 Sua ń daa nund’o.
Tod’o man k wan guan n buol ne yen laafiɛ g dugn n guu wano yen t naataani guanu.
12 T naataanu Apolɔs nuan,
n paan u pal taal munŋaa kul k wano yen t naataani ń gad i buol,
g nyaan l g be u yam n ninŋ palb k wan gad mɔlane.
U tan gii la sɔnu yaa youg,
u bu gad.
Jijuog cegli yen cabdi
13 I guu man i kua,
gii sie *dindann n k l paa,
g ŋɔn k i tie jab,
k i paa.
14 Yin suun yal nba kul,
yin sun yen buam.
15 N naataani,
n biɛ bu miɛl’i bonliel g pugn.
I ban g Stefanas yen u ŋaag yab n bo cind g tuo Kristo Akaayi doug n ninŋ,
g suun Kristo-yab po yen b pal kul,
16 i cɔln man l nibuolu yen yab nba l be l tuonn n ninŋ kul,
g suun g g jie fala.
17 N pal man bonciɛnn Stefanas yen Fɔrtunatus yen Akaayikus baalu ne po.
B tien yin daan g be g bu tien yal nba n po,
18 g dugn b te k min yen yinm kul yam duan.
L dagd k yin ŋɔn l nibuolu i k i cɔln’m.
19 Asi dingbann n ninŋ Kristo-yab *tintaanu niib fuond’i.
Akilas yen Prisiil yen Kristo-yab nba taand lieb b ŋaag n ninŋ mɔ fuond’i bonŋann Yonmdaan sann po.
20 T naataani kul fuond’i.
Mɔ ń ŋanm g fuond fuond i lieb man,
g lɔn lɔn lieb yen naataann.