Pɔl n bo cind g diɛn kadaaɔg nba g tie Korɛnt yab nyan, l puol po wano mɔno bo gad Korɛnt yab buol ama u yen bo g wai. U bo baal g sua g bonciɛnn pala g man u po. G siɛb yie mɔno k u g tie Yiesu *sundu. Pɔl yen l buol Kristo-yab n ninŋ siɛb pala bo biil l po.

Pɔl bo nyiɛ l buol g lebd Efɛs yo, g diɛn kadalieog g tie Korɛnt yab. L kadaaɔg n ninŋ, u yed k u bo da yen ninsiid i (2 Korɛnt Kristo-yab 2.4, 7.8). U bo diɛn g kɔn yen Korɛnt yab nba bo g tuo u po. Tiit n bo gad yenn g tie Korɛnt Kristo-yab. L kadaaɔg nuan bod o, sua g ban lan tien nand k l bod.

Tiit n bo gad yen l kadaaɔg nyan, Pɔl yam bo g dua baa waam. U bo tan guan g cend wano Tiit Maseduann i k u maad’o g Korɛnt yab tuo u maam g lebd b binbem, g Pɔl pal manŋ k u ji diɛn kadaaɔg nba ne g tie’b.

L kadaaɔg n ninŋ, Pɔl daa cind g kɔn u kua po i, g maad’b k u tuonn tie k wan muand nil kul t Baa Yendu yen Yiesu Kristo n tie yab nba i. G Yiesu n tug l tuonn g kubn’o, k u la fala hal bonciɛnn yen yubɔnbuolu kul l tuonn sunu n ninŋ, g nyaan k u pal yen g wad, g dugn Yendu be yen’o g paand u pal youg kul. U tien Yendu balg bonciɛnn l po.

L puol po, Pɔl ŋɔn Yendu n guan g manŋ yen niib nand, g maad wan gaal laabaal nba Tiit buol Korɛnt yab po, g paan b pala k ban mɔnd g paab nba k b bobn g bu te Serusalɛm Kristo-yab tali nyan, k ban pi l paab yen bulcind.

Pɔl pugn g tie’b cegli k ban suol b kua yen mɔmamuanda nba diɛ maband g pua mɔb g donŋ b kua nyan. U kɔn yen l faaɔgdanm bonciɛnn yo, g yuand g juod u kadaaɔg yen cabdi g paan Korɛnt Kristo-yab pala.